پاک ویلز پشاور آٹو شو 2015: تصویری جھلکیاں اور مختصر ویڈیو

PakWheels Peshawar Auto Show 2015 Teaser Video

8 نومبر 2015 کے سورج نے پاکستان کے قدیم و تاریخی شہر پشاور میں سینکڑوں گاڑیوں کا میلہ دیکھا جس کا انعقاد پاک ویلز کی طرف سے کیا گیا تھا۔ اسلامیہ کالج پشاور کے کرکٹ گراؤنڈ میں ہونے والے اس میلے کا خواب پاک ویلز کی انتظامیہ نے دیکھا جسے شرمندہ تعبیر کرنے میں ڈپٹی کمشنر پشاور اور ضلعی انتظامیہ نے بھرپور کردار ادا کیا۔ ایک اندازے کے مطابق ‘پاک ویلز پشاور آٹو شو 2015’ میں ملک بھر سے 300 گاڑیوں اور ہزاروں افراد نے شرکت کی۔

پاک ویلز طویل عرصے سے ملک کے مختلف شہروں میں ایسے پروگرامات منعقد کرتی رہی ہے جس میں لاہور، اسلام آباد، ملتان اور کراچی بھی شامل ہیں۔ پشاور کے شہریوں کی گاڑیوں میں زبردست دلچسپی دیکھتے ہوئے پاک ویلز نے اس بار پشاور میں میلہ سجانے کا ارادہ کیا۔ ماضی میں سیاسی و سماجی حالات کی خرابی سے پشاور کے شہری گھروں میں مقید اور تفریحی سرگرمیوں سے دور ہوچکے تھے۔ لیکن موجودہ صورتحال میں بہتری کے بعد آٹو شو کے ذریعے پشاور کے شہریوں کو زبردست تفریحی موقع میسر آیا۔ علاوہ ازیں نئی اور پرانی گاڑیوں کے شوقین افراد کے لیے بھی بہترین موقع تھا کہ وہ اپنی منفرد گاڑیاں پیش کر کے لوگوں سے داد و تحسین حاصل کریں۔

پاک ویلز پشاور آٹو شو 2015 کو محض گاڑیوں کی روایتی نمائش تک محدود رکھنے کے بجائے دیگر شعبہ ہائے زندگی سے وابستہ افراد کی دلچسپی کو بھی مدنظر رکھا گیا تھا۔ یہ ایک مکمل فیملی ایونٹ تھا کہ جہاں بچوں کی تفریح اور خواتین کی دلچسپی سے متعلق بھی اشیاء دستیاب تھیں۔ پشاور کے کمشنر جناب فخرِ عالم اور شہری پولیس کے سربراہ مبارک زیب نے بھی پروگرام میں شرکت کی اور پاک ویلز و ضلعی انتظامیہ کی کوششوں کو سراہا۔

ہم بہت جلد اس پروگرام کی تفصیلی ویڈیو اپنے قارئین و ناظرین تک پہنچائیں گے لیکن فی الحال آپ اس کامیاب پروگرام کی چند تصویری جھلکیوں اور مختصر ویڈیو سے لطف اندوز ہوں۔

  • Shahmir Khan

    A good start keep arranging it in Peshawar

Top