گاڑیوں کے مقبول ترین رنگ

car-colors

ہزاروں کی بھیڑ میں خود کو ممتاز رکھنے کے لیے لوگ منفرد رنگ کا استعمال کرتے ہیں۔ یہی وجہ ہے کہ اکثر و بیشتر گاڑی پسند آجانے کے باوجود لوگ رنگوں کے انتخاب میں الجھ جاتے ہیں۔ ایک طرف دل کرتا ہے کہ گاڑی سفید رنگ میں لی جائے تاکہ لوگ اس کی چمک دمک دیکھ کر واہ واہ کریں تو دوسری طرف دماغ کہتا ہے کہ سیاہ یا کسی اور گہرے رنگ میں گاڑی لینی چاہیے تاکہ اس پر میل کچیل کے نشانات کم واضح ہوں اور بعد از استعمال فروخت کی صورت میں اچھے پیسے مل جائیں۔ بہرحال ہمارے یہاں تو سیڈان گاڑیوں میں زیادہ رنگوں کا انتخاب موجود نہیں لیکن ان لوگوں کے لیے یہ معاملہ کسی سنگین مسئلے سے کم نہیں کہ جو بڑی اور پرتعیش گاڑیاں جیسا کہ رولز روئس خریدنا چاہتے ہیں۔ یاد رہے کہ رولز روئس صارفین کو 44 ہزار مختلف رنگوں میں گاڑی لینے کا موقع فراہم کرتی ہے۔

گاڑیوں کے مقبول ترین رنگ
سفید 23 فیصد
سیاہ (کالا) 18 فیصد
نقرئی (سلور) 16 فیصد
بھورا 13 فیصد
سرخ 10 فیصد
نیلا 9 فیصد
خاکی 5 فیصد
پیلا 3 فیصد
سبز 2 فیصد
دیگر 1 فیصد

درج بالا اعداد و شمار سے ظاہر ہوتا ہے کہ گاڑی خریدنے والا ہر چوتھا شخص سفید رنگ ہی میں گاڑی لینا پسند کرتا ہے۔ اب سوال پیدا ہوتا ہے کہ سب سے جلد خراب ہوجانے،میلا کچیلا نظر آنے اورماند پڑجانے جیسے منفی تاثرات رکھے کے باوجود سفید رنگ کیوں کہ مقبولیت میں سرفہرست ہے تو اس کا مختصر جواب ہوسکتا ہے “ایپل”۔

یہ بھی پڑھیں: گاڑیوں کے مشہور رنگ؛ ماضی کی خوبصورتی آج ماند پڑ چکی ہے!

یہاں ہم کھانے والے ایپل یعنی سیب سے متعلق بات نہیں کر رہے بلکہ امریکی ادارے ایپل کا ذکر کر رہے ہیں جسے دنیا کی امیر ترین کمپنی ہونے کا اعزاز حاصل ہے۔ جدید دور میں صارفین کے لیے متعدد برقی آلات بنانے والے اس ادارے کی اکثر مصنوعات سفید رنگ میں ہی پیش کی جاتی ہیں۔ مثال کے طور پر آپ ایپل آئی فون، ایپل آئی پیڈ یا میک بُک ملاحظہ فرماسکتے ہیں۔ ایپل کے رجحان نے جلد ہی گاڑیوں کے شعبےمیں بھی اپنا رنگ دکھانا شروع کردیا اور اب کئی سالوں سے لوگ سفید رنگ کو ترجیح دینے لگے ہیں۔

سفید کے بعد سیاہ یعنی کالے رنگ کو سب سے زیادہ مقبولیت حاصل ہے۔ اس کی بنیادی وجہ یہ ہے کہ سیاہ رنگ کو اکثر چیزوں کے لیے موزوں خیال کیا جاتا ہے چاہے وہ گاڑی ہو یا کچھ اور۔ اس کے بعد نقرئی (سلور)، بھورا (گرے) اور پھر سرخ رنگ کا نمبر آتا ہے۔

اگر آپ کو اپنی گاڑی کے لیے کوئی بھی رنگ منتخب کرنے کا موقع دیا جائے تو آپ کس رنگ میں گاڑی لینا پسند کریں گے؟

یہ بھی دیکھیں: سیاہ یا سفید – گاڑیوں کے رنگ سے متعلق دلچسپ ویڈیو

Top