پورشے پانامیرا 2016 آئندہ سال جنیوا موٹر شو میں دکھائی جائے گی

2016-Porsche-Panamera-spied

اب سے کوئی چھ سال قبل شنگھائی آٹو شو 2009 میں پورشے نے پہلی بار پانامیرا سے پردہ اٹھایا تھا۔ بعد ازاں اسے 2013 میں ایک نئے انداز سے بھی پیش کیا گیا۔ پھر پورشے خاموش ہوگیا تاہم شائقین کی جانب سے اس چار دروازوں والی دلکش گاڑیوں کے نئے ماڈل کا مطالبہ بڑھتا گیا۔ پورشے کے شائقین کا طویل انتظار اب ختم ہوا چاہتا ہے کیوں کہ ادارے نے پانامیرا کی دوسری جنریشن آئندہ سال جنیوا موٹر شو 2016 میں پیش کرنے کا اعلان کیا ہے۔

یہ بھی پڑھیں: آنجہانی پال والکر کی صاحبزادی نے پورشے پر مقدمہ کردیا

پورشے کے سابق سربراہ و صدر متھایس مولر نے تبصرہ کرتے ہوئے کہا ہے کہ پانامیرا کی نئی جنریشن اور پچھلی جنریشن میں زیادہ فرق نہیں اس لیے اسے باآسانی پہچان لیا جائے گا۔ گو کہ کار ساز ادارے نے نئی جنریشن کو انتہائی جامع و مختصر رکھنے اور جدید دور کے تقاضوں سے ہم آہنگ کرنے کی کوشش کی ہے تاہم انداز وہی پرانا ہے۔ البتہ مشینی اعتبار سے یہ گاڑی بالکل نئی ہے۔ پورشے اس گاڑی میں اپنے ہی منتظم ادارے ووکس ویگن کا تیار کردہ ایم ایس بی (Modularer Standardantrieb-Baukasten) انجن اور پہیے استعمال کرے گا۔ پانامیرا کو ہائبرڈ طرز کے ساتھ روایتی V6 اور V8 پیٹرول و ڈیزل انجن کے ساتھ بھی پیش کیا جائے گا۔ پانامیرا کی دوسری جنریشن میں شامل گاڑیوں کا وزن پہلی جنریشن کے مقابلے میں 91 کلو گرام کم ہوگا۔

2016-Porsche-Panamera-rear-spied

جرمنی سے شائع ہونے والے میگزین آٹو بِلڈ نے نئی پانامیرا کی چند جھلکیاں پیش کی تھیں تاہم بعد میں علم ہوا کہ وہ محض پانامیرا کا ایک نمونہ تھا جسے چند ہفتوں قبل آئرلینڈ میں دیکھا گیا تھا۔ اس نمونے کا انداز اور نقش و نگار آٹو بِلڈ کی دکھائی گئی پانامیرا سے قدرے مختلف تھے لیکن پھر بھی انہیں دیکھ کر مستقبل کی پانامیرا کا ایک خاکہ تو بنایا جاسکتا ہے۔ نئی پورشے پانامیرا سال 2016 کے وسط میں فروخت کے لیے پیش کی جائے گی۔

I am a visual communications artist, I use arts and visual content to tell automotive stories to people.

Top