کیا پاک سوزوکی ویگن آر کی بُکنگ شروع کرنے لگی ہے؟


فروری 2018ء کے اوائل میں پاک سوزوکی نے ویگن آر کی بُکنگ اچانک بند کر دی تھی۔ ادارے کی جانب سے تمام ڈیلرشپس کو ویگن آر کی مزید بُکنگ سے یہ کہہ کر روک دیا تھا کہ سوزوکی ویگن آر کی فروخت فی الوقت ملتوی کی جا رہی ہے البتہ پہلے سے بُک شدہ گاڑیاں طے شدہ وقت کے مطابق ہی خریداروں کو فراہم کی جائیں گی۔ لیکن اب پاک ویلز سوشل میڈیا پلیٹ فارمز پر یہ خبر گردش کر رہی ہے کہ پاک سوزوکی نے ویگن آر VXR کی بُکنگ دوبارہ شروع کر دی ہے جبکہ یکم مارچ سے ویگن آر VXL کی بُکنگ کا سلسلہ بھی شروع کیا جا رہا ہے۔

یاد رہے کہ فی الوقت ایسی خبریں مختلف غیر مصدقہ ذرائع سے سامنے آ رہی ہیں اس لیے ان پر یقین کرنا قدرے مشکل ہے۔ ان خبروں کی تصدیق کے لیے ہم نے پاک سوزوکی سے رابطہ کیا ہے اور جیسے ہی ہمیں ان کا جواب موصول ہوگا، ہم اپنے قارئین تک ضرور پہنچائیں گے۔

اس سے قبل پاک سوزوکی نے ویگن آر کی بُکنگ بند کیے جانے کی کوئی بھی وجہ بتانے سے گریز کیا تھا۔ اس حوالے سے مختلف ذرائع کا کہنا تھا کہ غیر معمولی اضافی تعداد میں بُکنگ کی درخواستیں موصول ہونے پر یہ قدم اٹھایا گیا ہے۔ یاد رہے کہ مقامی مارکیٹ میں سوزوکی ویگن آر کی مانگ میں اضافہ دیکھا جا رہا ہے اور جنوری 2018ء میں ادارے نے 2703 ویگن آر فروخت کی تھیں۔

علاوہ ازیں سوزوکی ویگن آر کی قیمت میں اضافہ کی خبریں بھی زیر بحث ہیں۔ ہمارے باخبر ذرائع نے اس بات کا عندیہ دیا ہے کہ قیمت میں اضافے کے ساتھ سوزوکی ویگن آر میں کئی ظاہری تبدیلیاں بھی متعارف کروائی جائیں گی۔ لیکن بہرحال، فی الوقت یہ صرف اڑتی اڑتی خبریں ہیں اور پاک سوزوکی نے ان کی تصدیق یا تردید نہیں کی۔

مزید خبروں کے لیے پاک ویلز کے ساتھ رہیے!


My name is M. Ali Laghari and I love to read and write about Cars.

Top