سندھ میں CNG اسٹیشنز کی ہڑتال ختم

CNG Stations

آئل اینڈ گیس ریگولیٹر اتھارٹی (اوگرا) کی جانب سے سرد رویہ اختیار رکھے جانے کے خلاف آل پاکستان CNG ایسوسی ایشن کی سندھ شاخ نے گزشتہ ہفتے صوبے بھر میں ہڑتال کا اعلان کیا تھا۔ تاہم اوگرا کے اعلی عہدیداران کی جانب سے مطالبات سنے جانے کی یقین دہانی کے بعد CNG اسٹیشنز کی نمائندہ انجمن نے ہڑتال ختم کرنے کا اعلان کردیا ہے۔

یہ بھی پڑھیں: اوگرا کے ساتھ تنازعہ؛ CNG اسٹیشنز کا غیر معینہ مدت تک ہڑتال کا اعلان

اوگرا اور CNG ایسوسی ایشن کے مابین تنازعے کو حل کرنے کے لیے دونوں فریقین کے وفود 16 اگست کو ملاقات کریں گے۔ ایسوسی ایشن کے سابق سربراہ غیاث پراچہ نے کہا کہ CNG اسٹیشن مالکان آئندہ ملاقات میں ہونے والے فیصلوں کو تسلیم کریں گے چاہے وہ ان کے موقف کے برخلاف ہی کیوں نہ ہوں۔ انہوں نے یقین دہانی کروائی ہے کہ CNG ایسوسی ایشن کا وفد نہ صرف اپنے مطالبات اوگرا کے سامنے رکھے گا بلکہ اس پر وفاقی ادارے کا موقف بھی سنے گا۔

پاکستان بھر میں CNG اسٹیشنز کی نمائندہ تنظیم کا مطالبہ ہے کہ سندھ میں CNG کی قیمت متعین کرنے کا اختیار انہیں دیا جائے۔ علاوہ ازیں سندھ میں CNG اسٹیشنز مالکان کلو کے بجائے لیٹر کے حساب سے CNG فروخت کرنا چاہتے ہیں۔ یاد رہے کہ پنجاب میں لیٹر کے اعتبار سے CNG فروخت کی جاتی ہے۔ فی الوقت پنجاب میں CNG کی قیمت 48 روپے فی لیٹر مقرر ہے۔ اس کے برخلاف سندھ میں CNG اسٹیشنز کو پابند کیا گیا ہے وہ کہ کلو کے حساب سے گیس فروخت کریں۔

یہاں یہ بات بھی قابل ذکر معلوم ہوتی ہے کہ پنجاب کے بیشتر علاقوں میں CNG کی فراہمی 24/7 جاری رہتی ہے جبکہ اس کے برعکس سندھ کو ہفتے میں صرف چار روز ہی گیس فراہم کی جاتی ہے۔ سوئی سدرن گیس کمپنی کی جانب سے سندھ کو CNG کی فراہمی کا نیا شیڈول جاری کردیا گیا ہے۔ نئے شیڈول کے مطابق سندھ بھر میں سوموار، بدھ اور جمعے کے روز CNG اسٹیشنز کو گیس کی فراہمی صبح 8 بجے سے 24 گھنٹوں کے لیے بند رہے گی۔

Top