سوزوکی سیاز – ایک بہترین فیملی سیڈان کہلائے جانے کی حقدار!

Suzuki Ciaz

سوزوکی سیاز کو اب سے تقریباً دو سال قبل 2014 میں متعارف کروایا گیا تھا۔ یہ ایک چھوٹے سائز کی سیڈان ہے جسے سوزوکی آلیویو کے نام سے بھی پکارا جاتا ہے۔ اس سیڈان نے لاطینی امریکا اور ایشیائی مارکیٹوں میں دستیاب سوزوکی SX4 کی جگہ حاصل کی۔ بھارت میں اس گاڑی کو ماروتی سیاز کے ساتھ پیش کیا گیا اور اس نے وہاں ہونڈا سِٹی، نسان سنی، ہیونڈائی ویرنا، ووکس ویگن وینتون اور رینالٹ اسکانا کے مقابلے میں قابل ذکر مقبولیت حاصل کی۔ سیاز نے اپنی منفرد خصوصیات، اضافی گنجائش، آرامدے کیبن، طاقتور انجن اور ایندھن بچانے کی بہترین قابلیت کے بلبوتے پر اپنا لوہا منوایا۔

ظاہری انداز (Exterior)

سوزوکی سیاز کا ظاہری انداز پہلی ہی نظر میں اپنا گرویدہ بنا لیتا ہے۔ اس کی جدید ہیڈلائٹس، دلکش نقش کا حامل لمبا بونٹ، چمکتی ہوئی کروم گِرل غرض یہ کہ اس کا مجموعی انداز ہی کافی شاندار ہے۔ دائیں یا بائیں جانب سے گاڑی پر نگاہ ڈالیں تو یہ روایتی چھوٹی سیڈان سے خاصی بڑی معلوم ہوتی ہے۔ اس کا بمپر کافی بڑا جبکہ پچھلا حصہ بھی کافی دلکش ہے۔ سوزوکی سیاز کی لمبائی 4490 ملی میٹر، چوڑائی 1730 ملی میٹر اور اونچائی 1485 ملی میٹر ہے جبکہ اس کا ویل بیس 2650 ملی میٹر اور گراؤنڈ کلیئر 170 ملی میٹر ہے۔ بھارت میں یہ گاڑی متعدد خوبصورت رنگوں میں پیش کی جاتی ہے جن میں سرخ، سفید، سیاہ، نقرئی، بھورا، خاکی سب سے زیادہ پسندکیے جاتے ہیں۔

یہ بھی پڑھیں: سوزوکی مہران سے بھی سستی سیڈان – اور کیا چاہیے!

Ciaz-5

اندرونی حصہ (Interior)

سوزوکی سیاز کی کئی خاص باتوں میں سے ایک اضافی گنجائش اور مسافروں کے لیے کشادہ لیگ روم بھی ہے۔ پچھلی نشستوں پر تین افراد بہت آسانی سے سما سکتے ہیں۔ سادے اور صاف ستھرے ڈیش بورڈ کی وجہ سے یہ حصہ سادگی کا قرینہ معلوم ہوتا ہے۔ درمیان میں 7 انچ کی LCD اس کی دلکشی میں مزید اضافہ کرتی ہے۔ علاوہ ازیں ایئرکنڈیشننگ، بنا چابی گاڑی اسٹارٹ کرنے کی سہولت، تفریحی و موسیقی نظام اور نیوی گیشن سسٹم اس کی قابل ذکر خصوصیات میں سے چند ہیں۔

interior12

Maruti-Suzuki-Ciaz-Interior-rear-seats-68789

انجن (Engine)

بھارت میں سوزوکی سیاز کو دو مختلف انجن 1300cc ڈیزل اور 1400cc پیٹرول کے ساتھ پیش کیا جاتا ہے۔ اس کے علاوہ سوزوکی سیاز چین میں 1600cc پیٹرول انجن کے ساتھ بھی دستیاب ہے۔ ماروتی سیاز میں شامل شامل ملٹی جیٹ 1300cc ڈیزل انجن 4000 آر پی ایم پر 89 ہارس پاور فراہم کرنے کی اہلیت رکھتا ہے۔جبکہ K-سیریز 1400cc پیٹرول انجن 6000 آرپی ایم پر 91 ہارس پاور اور 4000 آر پی ایم پر 130 نیوٹن میٹر ٹارک فراہم کرسکتا ہے۔ عام طور پر 1400cc انجن کو اس طرز کی گاڑی کے لیے ناکافی سمجھا جاتا ہے تاہم سیاز کے کم وزن کو مدنظر رکھتے ہوئے اسے مناسب قرار دیا جاسکتا ہے۔

یہ بھی پڑھیں: سوزوکی سیاز، ہونڈا سِٹی اور ٹویوٹا کرولا (XLi/Gli) کی بہترین متبادل

Maruti-Suzuki-Ciaz-Engine-Bay-engine-68785

سوزوکی سیاز میں دو گیئر باکس پیش کیے جاتے ہیں جن میں 5-اسیڈ مینوئل اور 4-اسپیڈ آٹومیٹک (صرف پیٹرول انجن کے ساتھ) شامل ہیں۔ بھارت میں پیش کی جانے والی ماروتی سیاز ڈیزل انجن کے ساتھ ایک لیٹر میں 26 کلومیٹر جبکہ پیٹرول انجن کے ساتھ ایک لیٹر میں 25 کلومیٹر تک سفر کرسکتی ہے۔

مجموعی طور پر سوزوکی سیاز ایک بہترین فیملی سیڈان قرار دی جاسکتی ہے جو بھارت کی طرح پاکستان میں بھی جلد مقبولیت حاصل کرنے کی اہلیت رکھتی ہے۔ پڑوسی ممالک میں سیاز کی مشہوری دیکھتے ہوئے پاک سوزوکی اسے مستقبل قریب میں پاکستان میں پیش کیے جانے سے متعلق فیصلہ کرسکتی ہے۔ امید ہے وہ وقت جلد آئے گا۔

A car enthusiast, with a Computer Science background, loves to read and write about cars.

Top