کیا سوزوکی مہران میں مینوئل کی جگہ آٹومیٹک گیئر لگانا ممکن ہے؟

mehran

اگر یہ پوچھا جائے کہ مینوئل گیئر باکس کی حامل گاڑی کو آٹومیٹک ٹرانسمیشن پر منتقل کیا جاسکتا ہے؟ تو اس کا مختصر جواب ہوگا: جی ہاں۔ البتہ یہ بات گاڑی کی تیاری اور ماڈل پر منحصر ہے کہ اس کام میں آپ کو کتنا وقت اور سرمایہ درکار ہوسکتا ہے۔ پچھلے چند سالوں میں تیار کی جانے والی گاڑیوں میں یہ کام انجام دینے کے لیے مختلف کمپیوٹر اور ڈیش بورڈ درکار ہوسکتا ہے اور اسی لیے یہ کام قدرے مشکل نظر آتا ہے۔ لیکن پرانی گاڑیوں میں چونکہ زیادہ ٹیکنالوجی وغیرہ شامل نہیں ہوتی اس لیے انہیں مینوئل سے آٹومیٹک پر منتقل کرنے کا تجربہ آسان ثابت ہوسکتا ہے۔ یہی وجہ ہے کہ ہم اس کام کو انجام دینے کے لیے سوزوکی مہران کو استعمال کر رہے ہیں۔ یاد رہے کہ مہران کو 1989 میں متعارف کروایا گیا ہے تھا اور آج تک اس میں ہونے والی واحد قابل ذکر تبدیلی 2012 میں بہتر انجن کا استعمال رہی ہے۔

تو سوال یہ ہے کہ آیا مینوئل مہران کو آٹومیٹک میں منتقل کیا جاسکتا ہے؟
آگے بڑھتے ہوئے میں یہاں ہر اس طریقہ کار سے متعلق بات کروں گا کہ جس پر عمل کرنا ممکن ہے۔ امید ہے کہ اس سے مینوئل گیئر باکس کو تبدیل کرنے میں مدد ملے گی۔

یہ بھی پڑھیں: جدید خصوصیات سے آراستہ سوزوکی مہران VTi اوریئل پروسمیٹک

1: ازسر نو ترتیب (Reconfiguration)
نوآموز افراد کو یہ کام شروع کرنے سے پہلے سمجھ لینا چاہیے کہ انہیں انجن اور گیئر باکس کی موجودہ ترتیب کو بالکل تبدیل کرنا ہوگا۔ اس کی وجہ یہی ہے کہ آٹومیٹک گیئر باکس کے فنکشن مینوئل ٹرانسمیشن سے بالکل مختلف ہوتے ہیں۔ آپ کو پورا گیئر باکس تبدیل کرنا ہوگا جس کے لیے مناسب پرزوں کی دستیابی اور اس کام کے لیے انتہائی ماہر مکینک کی خدمات حاصل کرنا جیسی درد سری بھی چاہیے ہوگی۔ یہ بات بھی جاننا ہر گز مت بھولیے کہ جو گیئر باکس آپ مہران میں شامل کرنا چاہ رہے ہیں آیا وہ اس گاڑی کے انجن سے مطابقت بھی رکھتا ہے یا نہیں۔ اس ضمن میں درج ذیل باتوں کاخیال رکھنا ضروری ہے:

• مینوئل گیئر والی گاڑیوں میں انجن کنٹرول موڈیول (ECM) استعمال کیا جاتا ہے جبکہ آٹومیٹک ٹرانسمیشن والی گاڑی میں پاور-ٹرین کنٹرول موڈیول (PCM) استعمال کیا جاتا ہے۔ آپ کو ان دونوں میں سے کوئی ایک درکار ہوگا۔

• کیا باڈی (body) اور انجن سے منسلک تار اس قابل ہیں کہ وہ نئے ECM/PCM کے ساتھ کام کرسکیں یا پھر آپ کو ان دونوں ہی چیزوں میں بھی رد و بدل کرنا ہوگا؟

• اگر گیئر باکس گاڑی کے فرش سے جڑا ہوا ہے تو آپ کو اس حصے کو بھی ہٹانا ہوگا تاکہ تبدیلی ممکن بنائی جاسکے۔ اس کے لیے لوہے کو کاٹنے اور پھر جوڑنے (ویلڈنگ) کی مشین بھی درکار ہوگی تاکہ آٹومیٹک گیئر شفٹر لگایا جاسکے۔

• چونکہ مہران اگلے پہیوں کی قوت (FWD) سے چلنے والی گاڑی ہےاور جس گاڑی سے آٹومیٹک گیئر باکس لیا جارہا ہے اس کی لمبائی وغیرہ میں فرق ہوسکتا ہےلہٰذا اس اہم معاملہ کو بھی مدنظر رکھنا چاہیے۔

• اگلے پہیوں کی قوت (FWD) سے چلنے والی گاڑیوں میں آٹومیٹک اور مینوئل گیئر باکس کے اعتبار سے مختلف شاکس استعمال کیے جاتے ہیں کیوں کہ آٹومیٹک ٹرانسمیشن کا وزن زیادہ ہوتا ہے اس لیے ممکن ہے کہ آپ کو مینوئل گاڑی میں آٹومیٹک گیئر لگانے کے لیے تھوڑی نچلی جگہ بنانی پڑے۔

• اس کے علاوہ یاد رکھنے والی ایک چیز یہ بھی ہے کہ مینوئل گیئر کو آٹومیٹک سے تبدیل کرنے کا کام آپ کی جیب پر بھاری پڑ سکتا ہے۔ چونکہ اس دوران آپ کو گاڑی کے چیسز بھی تبدیلی کرنا ہوتی ہے اس لیے بہت زیادہ احتیاط بھی درکار ہوتی ہے بصورت دیگر لینے کے دینے پڑ سکتے ہیں۔

2: آٹومیٹک کلچ (Automatic Clutch)
ہوسکتا ہے کہ کچھ لوگ یہ خیال کریں کہ گاڑی میں مینوئل کی جگہ آٹومیٹک گیئر باکس لگانے کے لیے ازسرنو ترتیب دینے کے بجائے آٹومیٹک کلچ لگادینا زیادہ آسان ثابت ہوسکتا ہے۔ کتابی حوالے سے بات کی جائے تو آٹومیٹک کلچ دراصل گیئر شفٹ میں شامل کیا جانے والا ایک بٹن ہے کو ہر مرتبہ گیئر تبدیل کرتے ہوئے پاؤں سے کلچ دبانے کی جھجٹ سے خلاصی فراہم کرتا ہے۔ اس طرح آپ کو مینوئل ٹرانسمیشن کو کھولنے کھالنے کی محنت نہیں کرنا پڑتی اور محض ایک بٹن کے ذریعے آپ وہی کام کرسکتے ہیں کہ جس کے لیے ہر مرتبہ پیر کو تکلیف دینا پڑتی ہے۔بظاہر یہ ایک بہترین اور آسان طریقہ نظر آتا ہے تاہم اس پر عمل کرنے کے لیے بھی انتہائی ماہر ٹیکنشین اور مکینک کی خدمات درکار ہوتی ہیں۔ البتہ اس میں بھی مختلف پرزوں بشمول کلچ، ECU، تار وغیرہ کی مقامی سے خریداری اور انہیں اچھے ‘استاد’ سے نصب کروانے پر اچھا خاصہ وقت اور پیسہ خرچ ہوسکتا ہے۔

یہ بھ پڑھیں: سوزوکی مہران نے کرولا، سِوک کو بھی پیچھے چھوڑ دیا

حتمی رائے
میں نے کوشش کی ہے کہ اس مضمون میں ان تمام اہم باتوں کا احاطہ کیا جائے جو اس کام میں آپ کی مدد کرسکتے ہیں اور مجھے امید ہے کہ گاڑیوں کا شوق رکھنے والے احباب ان نکات کو ضرور کارآمد پائیں گے۔اس کے علاوہ میں سمجھتا ہوں کسی بھی گاڑی کو مینوئل سے آٹومیٹک بنانا ممکن تو ہے مگر اسے آسان نہیں کہا جاسکتا۔ اس لیے بہتریہی ہے کہ اگر آٹومیٹک گیئر باکس والی ہیچ بیک لینا چاہتے ہیں تو سوزوکی مہران کا خیال دل سے نکال کر آٹومیٹک جاپانی گاڑی کو منتخب کریں۔


Abdul Hanan

Hanan is an avid auto enthusiast with a flair for writing and playing games. He loves traveling, deciphering political maneuvering and exploring the realms of coding & graphic designing.

Top