سوزوکی سوِفٹ 2017 – نئے پلیٹ فارم اور ٹربو انجن کی حامل جاذب نظر ہیچ بیک!

suzuki-swift-2017

سوزوکی سوِفٹ کا شمار دنیا کی مشہور ترین چھوٹی گاڑیوں (ہیچ بیک) میں کیا جاتا ہے۔ اس کی شہرت صرف ترقی یافتہ ممالک تک ہی محدود نہیں بلکہ یہ پاکستان میں بھی بے حد مقبول ہے۔ عام تاثر یہی ہے کہ پاک سوزوکی اپنے صارفین کو جدید خصوصیات سے عاری ہیچ بیک پیش کر رہا ہے تاہم سوزوکی سوِفٹ کو دیکھ کر اس تاثر کی نفی ہوسکتی ہے۔ جاپانی کار ساز ادارہ سوزوکی موٹرز ایک عرصے سے سوِفٹ کی نئی جنریشن پیش کرنے کی تیاریوں میں مصروف رہا ہے۔ بیرون ممالک میں پیش کی جانے والی موجودہ سوِفٹ کو سال 2010 میں پیش کیا گیا تھا اور اب ابھرتے سورج کی سرزمین جاپان میں سوفٹ کی چوتھی جنریشن سے پردہ اٹھا دیا گیا۔ سوزوکی سوفٹ کو کار ساز ادارے کی بہترین برانڈ کے طور پر جانا جاتا ہے۔ اعداد و شمار کے مطابق سال 2004 سے اب تک دنیا بھر میں 53 لاکھ سے زائد سوزوکی سوفٹ فروخت کی جاچکی ہیں۔

نئی سوِفٹ 2017 کو دیکھ کر محسوس ہوتا ہے کہ سوزوکی نے اس مرتبہ انقلابی تبدیلیوں کے بجائے اس گاڑی کو ارتقائی عمل سے گزارنے کی کوشش ہے۔ یہی وجہ ہے کہ گاڑی کا ظاہری انداز پچھلی جنریشن سے بہت زیادہ مختلف معلوم نہیں ہوتا۔ لیکن قابل ذکر بات یہ ہے کہ اسے سوزوکی کے نئے پلیٹ فارم ‘ہارٹیکٹ’ (Heartect) پر تیار کیا گیا ہے۔ یہ وہی پلیٹ فارم ہے کہ جس پر نئی سوزوکی بلینو ہیچ بیک تیار کی گئی ہے۔ نئے پلیٹ فارم کے باعث سوِفٹ 2017 پہلے سے کم وزنی، زیادہ مضبوط اور بہتر انداز کی حامل بن چکی ہے۔

سوزوکی کا کہنا ہے کہ گاڑی کے اکثر حصوں پر انتہائی لچک والی اسٹیل پلیٹس کے استعمال سے گاڑی پہلے سے زیادہ مضبوط ہوئی ہے اور اس کا مجموعی وزن کم ہوا ہے۔ ان دونوں خصوصیات کی موجودگی سے اس گاڑی میں کم ایندھن میں زیادہ سفر کرنے کی اضافی قابلیت بھی شامل ہوگئی ہے۔

im0000004155

ظاہری انداز پر نظر ڈالیں تو نئی سوِفٹ میں (آوڈی / ہیونڈائی الینٹرا جیسی) نئی گِرل اور دلکش ہیڈلائٹس موجود ہیں جو اس کے مجموعی انداز کو بہت جذباتی اور اسپورٹی طرز فراہم کر رہی ہیں۔ یہ بھی ممکن ہے آپ کو نئی سوزوکی سوِفٹ پہلی نظر میں جاگوار F-ٹائپ کی جھلک بھی نظر آئے۔ پچھلی جانب بہت زیادہ تبدیلیاں نہیں کی گئیں البتہ سوزوکی کا کہنا ہے کہ اسپائلر، اسٹاپ لائٹس اور پچھلے دروازے کے ڈیزائن میں تبدیلی کی گئی ہے۔ ہوسکتا ہے کہ کچھ لوگوں کو یہ بات معیوب لگے لیکن پچھلے دروازے کا ہینڈل اب روایتی گاڑیوں کی رح درمیان میں نہیں جارہا بلکہ بالکل نیچے موجود ہے۔ دور حاضر کی بہت سی کراس اُووَرز میں ڈگی کھولنے کے لیے یہی طریقہ اختیار کیا جارہا ہے اس لیے کہا جاسکتا ہے کہ مستقبل کی گاڑیاں بھی اسی طرز کی حامل ہوسکتی ہیں۔

جاپان میں نئی سوزوکی سوِفٹ کے پانچ ماڈل پیش کیے گئے ہیں۔ ان میں 2 انجن اور 3 گیئر باکس کا انتخاب دیا گیا ہے۔ انجن کے بارے میں پہلے بات کریں تو سوِفٹ میں 3-سلینڈر 1000ccٹربو انجن (K10C) اور 1200cc ڈیول جیٹ نیچرلی ایسپریٹڈ انجن (K12C) شامل ہے۔ ٹربو انجن 1700 آر پی ایم پر 100.9 ہارس پاور اور 150 نیوٹن میٹر ٹارک فراہم کرسکتا ہے۔ جبکہ ڈیول جیٹ انجن 89 ہارس پاور اور 120 نیوٹن میٹر ٹارک فراہم کرسکتا ہے۔ جاپان میں دستیاب سوِفٹ کا بہترین ماڈل RSt ہے جس میں 3-سلینڈر ٹربو انجن دیا گیا ہے اور اس کی قیمت بھی دیگر تمام ماڈل سے زیادہ ہے۔ 1200cc انجن کے ساتھ 5-اسپیڈ مینوئل اور CVT گیئر باکس منسلک کرنے کا اختیار موجود ہے۔ البتہ سوزوکی نے صرف ٹربو ماڈل میں 6-اسپیڈ آٹومیٹک گیئر باکس اور پیڈل شفٹرز بھی شامل کیے ہیں۔ دوسرے لفظوں میں 1000cc انجن کے ساتھ مینوئل گیئر باکس فراہم نہیں کیا جائے گا۔ علاوہ ازیں سوزوکی سوفٹ کے تمام ہی ماڈل اگلے پہیوں کی قوت (FWD) سے چلنے کی صلاحیت رکھتے ہیں البتہ اگر خریدار چاہیں تو 1200cc انجن والے ماڈل میں چاروں پہیوں کی قوت (4WD) سے چلنے کی صلاحیت بھی شامل کرواسکتے ہیں۔

سوِفٹ کے 1200cc ماڈل میں سوزوکی کے نیم-ہائبرڈ نظام (SHVS) بھی پیش کیا جائے گا۔ اس سے نہ صرف گاڑی میں ایندھن بچانے کی قابلیت میں اضافہ ہوگا بلکہ اس کی کارکردگی میں بھی بہتری آئے گی۔ مذکورہ نظام دراصل ریجنریٹیو بریکنگ اینرجی کی ایک قسم ہے جس میں ایک جنریٹر گاڑی کو بریک لگانے پر توانائی پیدا کرتا ہے جو خاص بیٹری میں محفوظ ہوجاتی ہے۔ یہ توانائی سفر کے دوران استعمال ہوتی ہے اور اضافی ٹارک درکار ہونے کی صورت میں ایک اسٹارٹر موٹر کے ذریعے انجن تک منتقل ہوجاتی ہے۔ سوزوکی کے مطابق نیم-ہائبرڈ نظام والے ماڈل میں ایک لیٹر ایندھن پر 27.4 کلومیٹر تک سفر کیا جاسکتا ہے۔ یاد رہے کہ یہ اعداد و شمار ایندھن کی جاپانی درجہ بندی JC08 کے استعمال پر بتائی گئی ہے۔ اس ماڈل میں آئیڈل اسٹارٹ/ اسٹاپ کی خصوصیت بھی شامل ہے۔

نئی سوزوکی سوفٹ کے چاروں پہیوں پر ڈسک بریکس دیئے گئے ہیں جبکہ اگلے پہیوں پر میک فرسن اسٹروٹ جبکہ پچھلے پہیوں کے ساتھ ٹورسیون بیم سسپنشن موجود ہیں۔ سوِفٹ میں ریک اینڈ پنیون اسٹیئرنگ بھی شامل ہے جس کا کم سے کم ٹرننگ ریڈیئس 4.8 میٹر ہے۔ یوں سوِفٹ کو تنگ سڑکوں اور چھوٹی گلیوں میں سفر کرنے میں آسانی میسر آئے گی۔ علاوہ ازیں اس میں 185/55 کے 16 انچ الائے ویلز لگائے گئے ہیں البتہ سب سے کم قیمت اور سادہ ماڈل میں 15 انچ کے اسٹیل ویلز پیش کیے جارہے ہیں۔ تمام ہی ماڈل میں ABS اور EBD کی سہولت شامل ہے۔

نئی سوزوکی سوفٹ کے بارے میں پاک ویلز فورم پر جاری گفتگو میں حصہ لینے کے لیے یہاں کلک کریں۔

Image result

سوزوکی سوِفٹ کے اندر جھانکیں تو آپ کو ایک بالکل نیا انٹریئر نظر آئے گا جس میں نئے ڈیزائن کا حامل ڈیش بورڈ بھی شامل ہے۔ یہ ڈیش بورڈ کچھ حد تک سوزوکی ویتارا کے ڈیش بورڈ سے ملتا جلتا لگتا ہے۔ اس میں شامل نیا کلسٹر LCD پر مشتمل ہے جس پر گاڑی کی تمام اہم معلومات ظاہر ہوتی ہیں۔ یہاں موجود نئے ایرکنڈیشننگ وینٹس اور نیا سینٹرل کنسول بھی قابل ذکر ہے جس میں کلائمنٹ کنٹرول اور تفریحی نظام دیا گیا ہے۔ 7 انچ کی اسکرین ایپل کار پلے یا اینڈرائیڈ آٹو کی حامل ہے۔ اس کے علاوہ گیئر لیور کی جگہ بھی تبدیل کی گئی ہے۔ چابی کے بغیر گاڑی کھولنے کے علاوہ انجن اسٹارٹ اور بند کرنے کے لیے بھی بٹن دیا گیا ہے۔

حفاظتی سہولیات کی بات کریں تو سوِفٹ کی پچھلی جنریشن بھی اس حوالے سے بہترین قرار پائی تھی اور اس نے یورو-NCAP میں بہترین درجہ بندی بھی حاصل کی تھی۔ نئی سوفٹ میں 7 ایئربیگز کے علاوہ اضافی حفاظتی سہولیات کا پیکیج بھی فراہم کیا جارہا ہے جسے اضافی قیمت کی ادائیگی پر شامل کروایا جاسکتا ہے۔ البتہ بہترین ماڈل یعنی سوِفٹ ٹربو میں یہ پیکیج پہلے ہی سے شامل کیا گیا ہے۔ اس پیکیج میں کیمرے اور لیزر سینسرز کی مدد سے تصادم کے خطرے سے منتبہ کرنے کا نظام، لین کی خلاف ورزی پر انتباہ اور ہائی بیم کو بہتر طور پر استعمال کرنے کی سہولت بھی شامل ہے۔

نئی سوفٹ میں پہلی مرتبہ کروز کنٹرول بھی شامل کیا گیا ہے جس نے اسے پہلے سے زیادہ محفوظ بنادیا ہے۔ پچھلی جنریشن کے برعکس نئی سوزوکی سوفٹ لمبائی میں 10 ملی میٹر چھوٹی ہے تاہم اس کا لیگ روم 20 ملی میٹر زیادہ ہے۔ علاوہ ازیں پچھلی جنریشن کے مقابلے میں ڈگی کی گنجائش 55 لیٹر اضافے سے 265 لیٹر تک پہنچ چکی ہے۔

سوزوکی نے نئی سوفٹ کے حوالے سے مکمل تفصیلات فراہم نہیں کیں تاہم جاپان میں اس کی فروخت 4 جنوری 2017 سے شروع کیے جانے کی توقع ہے۔ اس کے بعد نئی سوزوکی سوفٹ کو سال 2017 ہی میں بھارت اور دیگر یورپی مارکیٹوں میں بھی پیش کیا جائے گا۔ سوزوکی سوفٹ کی قیمت سے متعلق کوئی تفصیلات سامنے نہیں آئیں۔ پاکستان میں ہم صرف امید ہی رکھ سکتے ہیں کہ پاک سوزوکی سال 2017 کے آخر یا پھر اس کے فوری بعد سوفٹ کی نئی جنریشن متعارف کروائے۔

یہ بھی پڑھیں: سوزوکی سلیریو – 2017 میں متوقع گاڑیوں میں سے ایک!


Fazal Wahab

I am Civil Engineer by Profession and have love for High Rise Towers, Underground construction and Carbon Fiber Composites, automobiles is my first love. Its my passion to know and share about anything new in automobile industry.

Top