سوزوکی ویگن آر 2017: نئے انداز اور نئے انجن کے ساتھ پیش کی جائے گی

2017-suzuki-wagon-r-maruti-wagon-r-rendered

سوزوکی ویگن آر اور سوزوکی ویگن آر اسٹنگرے کی اگلی جنریشن سے متعلق بروشر انٹرنیٹ پر گردش کر رہا ہے جس میں اس خوبصورت گاڑی کا نیا انداز اور شامل خصوصیات کے بارے میں بہت کچھ شامل ہیں۔ حاصل شدہ معلومات کے مطابق سوزوکی ویگن آر 2017 کو پیٹرول انجن کے علاوہ ہائبرڈ ٹیکنالوجی کے ساتھ پیش کیا جائے گا۔ اس کی باضابطہ رونمائی اب سے دو روز بعد یکم فروری 2017ء کو کی جائے گی۔

1

سوزوکی ویگن کی نئی جنریشن کو نئے انداز سے بھی روشناس کروایا گیا ہے۔ اس کی مجموعی لمبائی 3395 ملی میٹر، چوڑائی 1475 ملی میٹر اور اونچائی 1650 ملی میٹر ہے۔ نئی ویگن آر کا مجموعی وزن 750 سے 840 کلو گرام (بمطابق ماڈل) ہے جبکہ اس کا ویل پیس 2460 ملی میٹر ہے۔ اس گاڑی یں 27 لیٹر پر مشتمل فیول ٹینک بھی شامل ہے۔

جاپان میں نئی سوزوکی ویگن آر کو تین مختلف گریڈز FA، ہائبرڈ FX اور ہائبرڈ FZ کے نام سے فروخت کیا جائے گا۔ ہائبرڈ FZ کے مقابلے میں ہائبرڈ FX اور FA کا ظاہری انداز قدرے مختلف ہے تاہم تینوں ہی ماڈلز یکساں خصوصیات کے ساتھ پیش کیے جائیں گے۔

2

سوزوکی ویگن آر کے انداز میں بہت زیادہ تبدیلیاں نہیں کی گئیں۔ ان میں سب سے زیادہ قابل ذکر تبدیلی گاڑی کے اگلے حصے میں کروم بریسز اور ہیڈلائٹ کا بہتر انداز ہے جبکہ دائیں اور بائیں جانب دونوں دروازوں کے درمیان والے ستون (B-Pillar) کو بھی دلکش انداز دیا گیا ہے۔ علاوہ ازیں گاڑی کے اندر جھانکیں تو سوزوکی نے ویگن آر میں سوزوکی اگِنس سے ملتی جلتی چیزیں استعمال کی ہیں۔ اسٹیئرنگ ویل سوزوکی اگِنس سے بہت مشابہ ہے، ڈیش بورڈ کے وسط میں انسٹرومنٹ کلسٹر شامل ہیں اور اسی میں CVT اور تفریحی نظام کے لیے ٹچ اسکرین دی گئی ہے۔ بتایا جارہا ہے کہ نئی جنریشن ویگن آر میں 3-سلینڈر 660cc (R06A) انجن لگایا گیا ہے جو 51.28 بریک ہارس پاور اور 60 نیوٹن میٹر ٹارک فراہم کرسکتا ہے۔ اس کے علاوہ ہائبرڈ ماڈل میں WAO5A برقی موٹر لگائی گئی ہے جو 3 بریک ہارس پاور اور 50 نیوٹن میٹر ٹارک فراہم کرنے کی اہلیت رکھتی ہے۔ تمام ہی ماڈلز میں AWD سسٹم کو بطور انتخاب رکھا گیا ہے۔


Top