ہانگ کانگ میں ٹیسلا ماڈل S سب سے زیادہ فروخت ہونے والی برقی گاڑی بن گئی

Tesla in Hong Kong

ہانگ کانگ کے شعبہ تحفظ ماحولیات کی طرف سے جاری ہونے والے اعداد و شمار سے پتہ چلا ہے کہ ہانگ کانگ میں برقی گاڑیوں کی تعداد 5 ہزار سے تجاوز کرچکی ہے۔ اب سے چھ سال قبل ہانگ کانگ میں بجلی سے چلنے والی گاڑیوں کی تعداد چند سو گاڑیوں تک محدود تھی۔ اس وقت ٹیسلا ماڈل S کی مقبولیت میں زبردست اضافہ ہورہا ہے جس کا اندازہ اس بات سے لگایا جاسکتا ہے کہ ہانگ کانگ میں استعمال کی جانے والی 70 فیصد برقی گاڑیاں ٹیسلا کی تیار کردہ ہیں۔ اس حوالے سے ٹیسلا نے کہا کہ سال 2014 اور 2015 کے دوران نئی برقی گاڑیوں کی فروخت میں 270 فیصد اضافہ ہوا ہے۔

یہ بھی پڑھیں: پاکستان میں برقی گاڑیوں کا مستقبل؛ ٹیسلا ماڈل 3 وِزل اور پرایوس کو مات دے سکتی ہے!

ٹیسلا کے سربراہ ایلون مُسک نے اس قابل ذکر کارکردگی پر خوشی کا اظہار کرتے ہوئے کہا کہ ہانگ کانگ برقی گاڑیوں کے لیے روشنی کی ایک کرن ہے جس نے دنیا کے دیگر شہروں کے لیے ایک مثال قائم کردی ہے۔ انہوں نے ہانگ کانگ کی حکومت کی تعریف کرتے ہوئے شہر میں برقی گاڑیوں کے فروغ کے لیے ان کی حکمت عملی کو سراہا۔ یاد رہے کہ ہانگ کانگ حکومت نے پہلی بار برقی گاڑی خریدنے والوں کو ٹیکس سے مستثنی قرار دیا ہے۔ اس کے علاوہ جو ادارے برقی گاڑیاں خریدیں گے انہیں بھی پہلے سال ٹیکس میں رعایت دی جائے گی۔ تاہم ماڈل S کے خریداروں کو گاڑی کی بیٹری چارج کرنے کے حوالے سے مشکلات کا سامنا ہے۔ شہر میں بہت کم ایسے مقامات موجود ہیں جہاں سے گاڑی چارج کی جاسکے اس لیے اکثر مالکان کو اپنے گھر ہی پر اس کا بندوبست کرنا پڑتا ہے۔

Source: The Guardian

Source: The Guardian

ہانگ کانگ میں ٹیسلا موٹرز کی کامیابی کے بالکل برعکس چین میں انہیں سخت مشکلات کا سامنا کرنا پڑ رہا ہے۔ ایلون مُسک نے اس حوالے سے کہا کہ ہمیں چین کے برعکس ہانگ کانگ حکومت کی جانب سے بھرپور تعاون حاصل رہا ہے۔ چین میں ٹیسلا کو درپیش مشکلات کے قابل اسباب میں گاڑیوں کی درآمد پر عائد بھاری ٹیکس اور حکومت کی جانب سے برقی گاڑیوں پر مراعات نہ دیئے جانا شامل ہیں۔ ہانگ کانگ میں زبردست کامیابی کے باوجود ٹیسلا گاڑیوں کی سب سے زیادہ فروخت شمالی امریکا اور یورپ میں دیکھی جارہی ہے۔ اس کے باوجود ایلون مُسک ایشیائی مارکیٹ پر نظر رکھے ہوئے ہیں اور اسے ہی ادارے کی کامیابی کی کنجی قرار دیا ہے۔

Adan Ali

Adan is a Tribe Leader at Drive Tribe, who writes to share his passion for cars, culture and gadgetry through words. So far his writings and contributions have been able to make their way to media outlets like PakWheels and Dawn. Reach out to him by tweeting @adanali12

Top