گاڑی فروخت کرنے سے پہلے 5 اہم چیزوں کا خیال رکھیں

Car Sales

اس حوالے سے تو سبھی بات کرتے ہیں کہ گاڑی خریدنے سے پہلے کن چیزوں کو کیسے دیکھنا چاہیے لیکن آج ہم بات کریں گے ان اہم عوامل کی جن کا گاڑی فروخت کرنے سے قبل ضرور خیال رکھنا چاہیے۔ اگر آپ گاڑی کو جوں کی توں فروخت کرنا چاہتے ہیں اور اس کے اشتہار میں بھی یہی لکھا ہے تو پھر آپ کو ان میں سے کوئی کام کرنے کی ضرورت نہیں۔ لیکن اگر آپ اچھی قیمت پر گاڑی فروخت کرنا چاہتے ہیں اور خریدار کی نظر میں اپنی گاڑی کی وقعت بڑھانا چاہتے ہیں تو پھر ان پانچ اہم و ضروری کاموں کو انجام دینے میں ہر گز کوتاہی نہ برتیے۔ خریدار ہمیشہ ایسی گاڑی پسند کرتا ہے جو صاف ستھری اور اچھی حالت میں ہو۔

یہ بھی پڑھیں: استعمال شدہ گاڑی خریدنے سے پہلے انجن کی 5 چیزیں ضرور دیکھیں

اس کے علاوہ استعمال شدہ گاڑیوں کی مارکیٹ میں بھی آج کل مندی کا رجحان ہے اس لیے صرف وہی گاڑی جلد فروخت ہوتی ہے جس کا نہ صرف باہری بلکہ اندرونی حصہ اور مشینری بھی صاف ستھری اور قابل تعریف حالت میں ہو۔ ہمارے ساتھی بلاگر عثمان انصاری بھی اس حوالے سے لکھ چکے ہیں کہ بعد از استعمال اچھی قدر رکھنے والی سوزوکی گاڑی فروخت کرنا بھی اب مشکل ہوچکا ہے۔ تو اگر آپ نئی گاڑی خریدنے کا ارادہ رکھتے ہیں اور اس سے پہلے اپنی ہونڈا سِوک 2004 فروخت کرنے جا رہے ہیں تو بہتر ہوگا کہ ذیل میں بتائے گئے چند اہم کام بھی کرتے چلیں۔ اگر آپ چاہتے ہیں کہ خریدار آپ کی گاڑی قدر و قیمت کا اندازہ انصاف سے لگائے تو آپ کو بھی چاہیے کہ اس کے ساتھ ایمانداری والا معاملہ رکھیں۔

صفائی ستھرائی کا اہتمام کریں

جتنی صاف ستھری اور چمکدار گاڑی ہوگی، اتنا ہی زیادہ امکان ہے کہ خریدار اس کی طرف جلد متوجہ ہوجائیں۔ اس لیے گاڑی کو اندر اور باہر سے صاف ستھرا رکھیں بالخصوص گاڑی فروخت کے اشتہار سے پہلے اس چیز کا اہتمام ضرور کریں۔ کوئی بھی خریدار اپنے لیے گرد آلود، میلی کچیلی یا گندی گاڑی خریدنے میں دلچسپی نہیں لے گا۔

interior cleaning

کولنگ سسٹم کو صاف کریں

خود میرے تجربے میں ایک ایسی گاڑی آچکی ہے کہ جس کا کولنگ سسٹم خراب تھا اس لیے مجھ سے زیادہ شاید ہی کوئی کولنگ سسٹم کی افادیت جانتا ہو۔ جو گاڑی میں نے خریدی اس میں درجہ حرارت کو متوازن رکھنے کا نظام نہیں تھا۔ یوں جب بھی موسم ٹھنڈا ہوتا اور درجہ حرارت منفی کی طرف مائل ہوتا تو گاڑی کے سسٹم میں موجود پانی جم کر برف بن جاتا۔ مختصر یہ کہ میرے پاس سرد موسم میں گاڑی کھڑی کر کے پرانے مالک کو لعن تعن کرنے کے علاوہ کچھ نہ بچا۔ آپ کا اخلاقی فرض ہے کہ گاڑی کے تمام حصوں کے ساتھ کولنگ سسٹم کو بھی جانچیں کہ آیا اس میں پانی رسنے کا یا ٹپکنے کا کوئی مسئلہ تو نہیں۔ اگر مسئلہ ہو تو گاڑی فروخت کرنے سے قب لکولنٹ (coolant) لگوائیں۔ اگر آپ پیسے خرچ نہیں کرنا چاہتے تو پھر خریدار سے یہ گاڑی کا یہ عیب ہر گز نہ چھپائیں اور اسے سادے الفاظ میں مسائل سے آگاہ کریں۔

coolant leak

بریکس کی فعالیت دیکھیں

حفاظتی اعتبار سے ایک گاڑی میں جتنی اہمیت بریکس کو حاصل ہے، شاید کسی اور حصے یا سہولت کو نہ ہو۔ اس لیے ضروری ہے کہ انہیں بالکل ٹھیک حالت میں رکھا جائے۔ اگر ان میں ذرا بھی مسئلہ تو خریدار اور فروخت کار دونوں کے لیے بہتر ہے کہ وہ اس مسئلہ کی جلد از جلد نشاندہی اور حل کی کوشش کریں۔ گاڑی فروخت کرتے ہوئے بریکس کے مسئلہ سے جان نہ چھڑائیں بلکہ اسے فوری ٹھیک کروائیں۔ بصورت دیگر کسی بھی قسم کا حادثہ گاڑی اور اس کے مسافروں دونوں ہی کے لیے نقصان کا باعث ہوسکتا ہے۔ اگر آپ کو گاڑی کے بریکس کے کام کرنے سے متعلق ذرا بھی شبہہ ہو تو انہیں ٹھیک کروانے کی ذمہ داری نئے مالک پر نہ ڈالیں بلکہ ایک ذمہ دار انسان ہونے کے ناطے تمام مسائل حل کر کے خریدار کے حوالے کریں۔

یہ بھی پڑھیں: بریکس خراب ہونے کی علامات؛ غفلت جان لیوا ثابت ہوسکتی ہے!

Brake_Fluid_Flush

خراب آئل تبدیل کریں

گاڑی کے انجن میں موٹر آئل کے نام پر گندے اور بدبودار پانی کے ساتھ ہر گز فروخت نہ کریں۔ ایک خریدار چاہتا ہے اسے ہر چیز صاف اور تازہ ملے جن میں انجن آئل بھی شامل ہے۔ اس لیے اگر انجن آئل پرانا ہوچکا ہے تو اسے تبدیل کروالیں۔ اس سے آپ کی گاڑی سے انسیت بھی ظاہر ہوتی ہے کہ آپ اس کا کتنا خیال رکھتے تھے۔ اگر گاڑی کا آئل آپ باقاعدگی سے تبدیل نہیں کروائیں گے تو خریدار یہی سمجھے گا کہ آپ نے اس گاڑی کا خیال نہیں رکھا۔

oil-sludge

دیگر ضروری سامان بھی ساتھ رکھیں

گاڑی کو فروخت کرنے کے ساتھ دیگر ضروری سامان بھی فراہم کریں جن میں ویل جیک، ویل اسپینر اور اضافی ٹائر بھی شامل ہیں۔ خریدار کی نگاہ سے دیکھیں کہ اگر نئی گاڑی مثلاً ٹویوٹا کرولا لینے کی خوشی میں آپ خاندان کے ہمراہ موٹروے کی طرف چلے جائیں اور ٹائر پنکچر ہوجانے کی صورت میں ٹائر تبدیل کرنے کا ضرور سامان میسر نہ ہوتا آپ کو کیسا لگے گا۔ اس سے آپ کی تمام خوشی کافور ہوجائے گی اور پرانے مالک کو کوستے رہیں گے۔ اس لیے آپ بھی ان چیزوں کو گاڑی کے ساتھ ہی نئے مالک کے حوالے کریں۔

یہ بھی پڑھیں: گاڑی کے ٹائر میں پنکچر لگانے کا آسان اور آزمودہ طریقہ

slipped-wheel-jack

یہ چند اہم کام ہیں جو گاڑی فروخت کرنے سے قبل انجام دینا ضروری ہیں۔ اگر آپ بھی گاڑی خریدنے کا فروخت کرنے کے تجربے سے گزرے ہیں تو ہمیں اس موضوع پر اپنی رائے کا ضرور اظہار کریں۔

Top