ہونڈا کے اشتہار میں ہاتھ سے بنائی گئیں ہزاروں تصاویر کا استعمال

tpod

گاڑیاں بنانے والے ادارے اپنی برانڈ کو بہتر سے بہتر انداز میں پیش کرنے پر بہت زیادہ محنت کرتے ہیں اور اسی سلسلے کی ایک کڑی اشتہارات بھی ہیں۔ دنیا بھر میں بہت سے اداروں نے کئی ایک تاریخی اشتہارات بنائے جن میں جاپانی ادارہ ہونڈا بھی شامل ہے۔ ہونڈا کے اشتہارات میں نہ صرف منفرد خیال پنہاں ہوتا ہے بلکہ ادارے کی اپنی پہچان بھی بہت عمدگی سے سامنے آتی ہے۔

حال ہی میں ہونڈا موٹر کمپنی کی طرف سے بننے والا اشتہار بھی اپنی مثال آپ ہے۔ کئی ہونہار مصوروں نے ہاتھ سے تیار کیے گئے خاکوں کی مدد سے ہونڈا کی تاریخ پر اچھوتے انداز سے روشنی ڈالی ہے۔ ہزاروں تصاویر پر مشتمل اس ویڈیو کو ‘پیپر’ کا نام دیا گیا ہے۔ اس کے پیچھے موجود تخلیقی ذہنوں میں اوسکر میں بہترین اینیمیشن کے زمرے میں نامزد ہدایتکار آدم پیسپن (PES) بھی شامل ہیں۔ یہ ویڈیو ہونڈا کی جانب سے جاری مہم “The Power of Dreams” کا حصہ ہے۔

دو منٹ کی اس ویڈیو کا آغاز جاپانی انجینئر اور ہونڈا کے خالق سیوچیرو ہونڈا کے ریڈیو جنریٹر سے ہوتا ہے جو انہوں نے اپنی اہلیہ کی سائیکل کے لیے بنایا تھا۔ اس کے بعد ویڈیو میں ہونڈا انجن کا ارتقا دکھایا گیا ہے کہ وہ سائیکل سے موٹر سائیکل، پھر گاڑی سے جہازوں میں استعمال ہونے کے قابل کیسے بنا۔ اس کے علاوہ ہونڈا کی جانب سے پیش کی جانے والی موٹر سائیکل اور گاڑیوں کو بھی بہت خوبصورتی سے سمویا گیا ہے۔

اس اشتہار کو تیار کرنے کے لیے ایک بڑی میز پر ہاتھ سے بنائے گئے ہزاروں خاکے تہ کر کے رکھے گئے اور پھر انہیں سلسلہ وار کھولا گیا۔ اس ویڈیو کی ٹیگ لائن یہ ہے: آپ نہیں جانتے کہ خواب آپ کو کہاں لے جاسکتے ہیں (You never know where a dream will lead you)۔

امریکن ہونڈا موٹر کمپنی میں مارکیٹنگ کے معاون برائے نائب صدر ٹام پیٹون نے کہا کہ

اس ویڈیو کا مقصد ہونڈا اور اس سے جڑنے والے ہزاروں لوگوں کی سوچ کا اظہار ہے جو ہونڈا کے شریک سفر رہے۔ یہ اشتہار ان لوگوں کی حوصلہ افزائی کرتا ہے جو منفرد سوچنے اور اپنے خوابوں کی تکمیل کے لیے سرگرم ہیں۔ ساتھ ہی یہ ہونڈا کی جدید سوچ اور اس میں شامل ہر فرد کے لیے احترام کے جذبہ کی عکاسی کرتا ہے۔

یہاں ہم مذکورہ اشتہار اور اس کے پیچھے موجود تخلیقی ذہنوں میں سے کچھ لوگوں کی رائے شامل کر رہے ہیں جو ہمیں امید ہے کہ آپ کو ضرور پسند آئے گا۔

ہونڈا کا منفرد اشتہار ‘پیپر’ کے تخلیقی مراحل

Top