‏2019ء کی 6 محفوظ ترین کاریں!


جیسے جیسے کار انڈسٹری اپنے پر پھیلاتی جا رہی ہے، جدید کاریں بھی معیار کے اعتبار سے بہتر ہوتی جا رہی ہیں۔ 

2019ء میں چند محفوظ ترین کاروں کے ٹیسٹ لیے گئے اور اس تحریر میں موجود تمام ماڈلز کو یورو NCAP کی جانب سے مکمل فائیو-اسٹار سیفٹی ریٹنگ دی گئی، ہم ان 5-اسٹار سیفٹی کاروں پر ایک نظر ڈال رہے ہیں کہ ٹیسٹ کے ہر معیار اور کسوٹی پر یہ گاڑیاں کس طرح پوری اتریں۔ 

مرسڈیز GLE 

ہماری فہرست میں پہلی کار مرسڈیز GLE ہے اور ہم بلاجھجک یہ کہہ سکتے ہیں کہ مرسڈیز بنانے والے ہرگز یہ دیکھ کر خوش نہیں ہوئے ہوں گے کہ ان کی نئی نویلی SUV کریش ٹیسٹ کے لیے دھاتی بیریئر سے ٹکرائی گئی لیکن انہیں یہ فخر بھی ضرور ہوا ہوگا کہ ان کی بنائی گئی گاڑی کو پوری فائیو اسٹار سیفٹی ریٹنگ ملی کیونکہ اس نے بالغ افراد کی حفاظت میں 91 فیصد، بچوں کی حفاظت میں 90 فیصد اور سائیکل سوار کی کھوج لگانے میں زیادہ سے زیادہ پوائنٹس اسکور کیے۔ ایک SUV کے لیے یہ بہت متاثر کن اعدادو شمار ہیں! 

مرسڈیز B-کلاس 

مرسڈیز اپنی نئی مرسڈیز B-کلاس کے ساتھ اس فہرست میں ایک مرتبہ پھر آتا ہے، جس کے نام میں تو B ضرور آتا ہے لیکن سیفٹی ٹیسٹ میں اس نے A حاصل کیا ہے۔ B-کلاس نے اگلی نشستوں پر بیٹھے بالغ افراد کی حفاظت میں 96 فیصد اور بچوں کی حفاظت میں 90 فیصد اسکور حاصل کیا جو ظاہر کرتا ہے کہ B-کلاس ایک پرفیکٹ فیملی کار ہے جو آپ کو اور آپ کے اہلِ خانہ کو محفوظ رکھ سکتی ہے۔ واحد چیز جو اس گاڑی میں اتنی زبردست نہیں تھی وہ لین-کیپنگ اسسٹ فیچر ہے جس نے NCAP کی جانب سے کیے گئے دیگر ٹیسٹ کے مقابلے میں نسبتاً کم اسکور حاصل کیا البتہ مجموعی طور پر یہ محفوظ ترین گاڑیوں میں سے ایک ہے۔ 

ٹویوٹا RAV4 

ٹویوٹا RAV4 بھی ان گاڑیوں میں سے ایک ہے کہ جس نے امتیازی نمبروں کے ساتھ سیفٹی ٹیسٹ پاس کیا، اس کی چوڑی چکلی عمودی صورت اسے “جاندار” شکل دیتی ہے۔ جبکہ درحقیقت یہی صورت 65 کلومیٹر فی گھنٹے کی رفتار سے کسی دھاتی بیریئر سے ٹکرانے کی صورت میں آپ کی جان بچاتی ہے کیونکہ یہ 93 فیصد بالغ افراد کی حفاظت اور 87 فیصد چائلڈ پروٹیکشن اسکور رکھتی ہے، ٹویوٹا RAV4 کی زبردست ساخت اور سیفٹی آلات کی بدولت۔ 

ٹویوٹا کرولا 

جب معاملہ سیفٹی کا ہو تو نئی ٹویوٹا کرولا بھی اپنا نام منوانے لگی ہے۔ 2020ء کرولا راہ گیروں کو محفوظ رکھنے میں بہت متاثر کن ہے۔ ٹیسٹ میں بلائنڈ اسپاٹ میں سے آتے ہوئے ایک بچے (ڈمی) کا پتہ لگانا تھا ساتھ ہی رات کے وقت ایک راہ گیر کا بھی کہ جس میں کرولا کا سیفٹی سسٹم حادثات کے امکان ہی کا خاتمہ کر سکتا ہے۔ جب معاملہ مسافر کی حفاظت کا ہو تب بھی یہ متاثر کرتا ہے کیونکہ کرولا نے تمام کریش ٹیسٹ میں اندر موجود بالغ افراد کی حفاظت میں 95 فیصد اور بچوں کے لیے 84 فیصد اسکور حاصل کیا۔ سستی ترین گاڑی بھی محفوظ ترین ہو سکتی ہے، شاباش ٹویوٹا! 

لیکسس UX 

جب معاملہ سیفٹی کا ہو تو فینسی نظر آنے والی گاڑی کو بھی نظر انداز نہ کیا کریں، UX بھی محفوظ ترین کاروں کی فہرست میں آتی ہے۔ لیکسس ثابت کرتا ہے کہ اس کے پاس اسٹائل کے ساتھ ساتھ دَم بھی ہے جس نے یورو NCAP میں فائیو-اسٹار حاصل کیا اور تمام کریش ٹیسٹ میں بڑے اسکور حاصل کیے۔ اس نے گاڑی میں موجود بالغ افراد کی حفاظت میں 96 فیصد اور بچوں کی حفاظت میں 85 فیصد نمبر حاصل کیے جو اسے آج کی محفوظ ترین گاڑیوں میں سے ایک بناتے ہیں۔ 

ٹیسلا ماڈل 3 

اب آتی ہے 2019ء میں یورو NCAP میں ٹیسٹ کی گئی کاروں میں سب سے زیادہ محفوظ گاڑی جو ٹیسلا ماڈل 3 ہے۔ یہ گاڑی ہموار جدید ترین شکل و صورت کے ساتھ آتی ہے لیکن یورو NCAP نے اسے کریش ٹیسٹ کے لیے براہِ راست دیوار پر دے مارا۔ حیرت نہیں ہوئی کہ جدید ٹیکنالوجی کے حامل خودکار ڈرائیونگ فیچرز نے اس گاڑی کو سیفٹی اسسٹ ٹیسٹ میں 94 فیصد نمبرز حاصل کرنے میں مدد دی جو یورو NCAP کے ٹیسٹ میں کسی بھی گاڑی کے حاصل کردہ سب سے زیادہ نمبرز ہیں۔ مزید یہ کہ اس نے گاڑی میں موجود بالغ افراد کی حفاظت میں 96 فیصد اور بچوں کی حفاظت میں 86 فیصد نمبرز حاصل کیے۔ 

تو یہ تھی آج کی محفوظ ترین گاڑیاں اور اچھی خبر یہ ہے کہ نئی کرولا کی اگلے سال پاکستان آمد متوقع ہے تو ہم کہہ سکتے ہیں کہ کم از کم اس کے بہترین ماڈلز تو محفوظ ہوں گے حالانکہ ساتھ ہی قیمت بھی زیادہ ہوگی۔ 

تصویر: Rocketint


Google App Store App Store
Awais Yousaf

I'm a crazy car guy. I want an aeroplane hangar full of cars. Is that too much to ask for?

Top