سال 2016 میں سب سے زیادہ سرچ کی جانے والی 5 جاپانی گاڑیاں


سال 2016 ختم ہوا چاہتا ہے اور پاک ویلز بلاگ کے قارئین بخوبی جانتے ہوں گے کہ ہم اس سال کے رجحانات پر مختلف مضامین لکھ رہے ہیں۔ اب سے چند روز قبل ہی ہم نے سال 2016 میں سب سے زیادہ سرچ ہونے والی 5 پاکستانی گاڑیوں پر تحریر پیش کی تھی۔ اسی سلسلے کو جاری رکھتے ہوئے آج ہم اپنے قارئین کو ان 5 غیر ملکی گاڑیوں سے متعلق بتارہے ہیں کہ جنہیں سال 2016 میں سب سے زیادہ تلاش کیا گیا۔

پاکستان میں بیرون ممالک بالخصوص جاپانی گاڑیوں کی آمد سے کم قیمت اور حفاظتی سہولیات سے آراستہ چھوٹی گاڑیوں کی خریداری کے رجحان میں تیزی سے اضافہ ہوا ہے۔ مقامی تیار شدہ گاڑیوں کے مقابلے میں جاپانی گاڑیوں کا معیار اور شامل خصوصیات بہت بہتر ہوتی ہیں اور یہی وہ بنیادی وجہ ہے کہ جس نے غیر ملکی گاڑیوں کو غیر معمولی شہرت دلوائی۔ موجودہ صورتحال یہ ہے کہ سیڈان کے علاوہ چھوٹی گاڑیوں سے لے کر مہنگی ہائبرڈ گاڑیوں کے شعبے میں جاپانی گاڑیوں کی بہت زیادہ تعداد نظر آتی ہے۔ ذیل میں سال 2016 کے دوران سب سے زیادہ ڈھونڈی جانے والی جاپانی گاڑیوں کی فہرست دیکھ کر بھی قارئین بخوبی اندازہ لگا سکتے ہیں کہ چھوٹی اور کم قیمت گاڑیوں کی شہرت سب سے زیادہ ہے۔

نمبر 5: ٹویوٹا پریمیو

دسمبر 2001 میں منظر عام پر آنے والی ٹویوٹا پریمیو کو دراصل ٹویوٹا کرینا اور ٹویوٹا کرونا کی جگہ متعارف کروایا گیا تھا۔ بعد ازاں سال 2007 میں ٹویوٹا پریمیو کی دوسری جنریشن پیش کی گئی۔ نئی جنریشن کی ظاہری پیمائش تو پہلی جنریشن سی ہی تھی البتہ اندرونی حصے میں تھوڑی بہت تبدیلیاں کی گئیں۔ ابتدا میں ٹویوٹا پریمیو میں 1500cc (109 بریک ہارس پاور) اور 1800cc (135 بریک ہارس پاور) انجن شامل رہے لیکن ایک سال بعد یعنی 2008 میں 2000cc (155 بریک ہارس پاور) انجن بھی پیش کیا گیا۔ گو کہ پچھلی جنریشن میں بھی یہی انجن شامل رہے تاہم دوسری جنریشن میں شامل کرنے سے پہلے انہیں بہتر بنایا گیا۔

یہ بھی پڑھیں: استعمال شدہ ٹویوٹا پریمیو 2007ء کا مفصل جائزہ

toyota-premio

نمبر 4: ٹویوٹا پاسو

ٹویوٹا جاپان نے 2014 کی تیسری سہہ ماہی کے دوران ٹویوٹا پاسو کا نیا انداز متعارف کروایا۔ اس میں 1000cc (1KR-FE) انجن شامل ہے جو 71 ہارس پاور اور 68 فٹ پاؤنڈ ٹارک فراہم کرتا ہے۔ نئے انداز میں کومپریشن ریشو میں اضافہ، والو ٹائمنگ میں بہتری، تھرمل ایفیشنسی میں 37 فیصد بڑھاوا اور نئے انداز کا ائیرباکس، فلٹر اور پائپس استعمال کیے گئے ہیں۔ 1000cc انجن کے ساتھ CVT گیئر باکس بھی دیا گیا ہے۔ مجموعی طور پر پاسو کا نیا انداز بہت پرکشش ہے بالخصوص پچھلے حصے میں موجود LED اسٹاپ لائٹس رات کی تاریکی میں اپنی مکمل تابناکی کے ساتھ اور بھی خوبصورت لگتی ہیں۔

مزید پڑھیں: ٹویوٹا اور ڈائی ہاٹسو کی مشترکہ کاوش “ٹویوٹا پاسو” سے متعلق اہم معلومات

toyota-passo

نمبر 3: ڈائی ہاٹسو میرا

سال 2006 میں پیش کی جانے والی ڈائی ہاٹسو میرا کی ساتویں جنریشن آج بھی مقبول ہے۔ اس میں 3-سلینڈر موٹر شامل ہے جس کے ساتھ 660cc یا 1000cc انجن بھی پیش کیا جاتا ہے۔ 3-سلینڈر 660cc انجن 58 ہارس پاور فراہم کرتا ہے جبکہ ٹربو ماڈل میں 63 ہارس پاور فراہم کرسکتا ہے۔ اس انجن کے ساتھ آٹو میٹک اور مینوئل گیئر باکس کا انتخاب بھی موجود ہے۔ میرا کے ظاہری حصے پر نظر ڈالیں تو بہت ہلکی سطور اور نقش نظر آئیں گے۔ اگلا حصہ بہت زیادہ ہموار نہیں اور کسی حد تک نئی آلٹو جیسا ہے۔ پانچ دروازوں والی روایتی ہیچ بیک کے علاوہ میرا کا 3 دروازوں والی ماڈل بھی پیش کیا جارہا ہے۔ اس کے علاوہ اگلے پہیوں کی قوت (FWD) اور چاروں پہیوں کی قوت (4WD) سے چلنے والے ماڈل بھی دستیاب ہیں۔ پاکستان میں استعمال شدہ ڈائی ہاٹسو میرا 2015 کی قیمت 10 سے ساڑھے 12 لاکھ روپے تک ہے۔

یہ بھی پڑھیں: سوزوکی آلٹو بمقابلہ ڈائی ہاٹسو میرا – دو چھوٹی جاپانی گاڑیوں کا موازنہ

daihatsu-mira

نمبر 2: سوزوکی آلٹو

چھوٹی گاڑیوں میں مہارت رکھنے والے جاپانی ادارے سوزوکی نے سال 2014 کے آخر میں نئی آلٹو متعارف کروائی۔ اس میں 3-سلینڈر 660cc انجن لگایا گیا ہے جو کار ساز ادارے کے مطابق ایک لیٹر میں 37 کلومیٹر تک سفر کی اجازت دیتا ہے۔ سوزوکی آلٹو کے مختلف ماڈلز میں ٹربو چارجڈ انجن بھی پیش کیا جاتا ہے نیز مینوئل اور CVT گیئر باکس کا انتخاب بھی موجود ہے۔

انداز کی بات کریں تو نئی سوزوکی آلٹو کی مجموعی شکل ڈبے جیسی ہے اور یہ دہائیوں پرانی سوزوکی FX ہی کے شجر نصب سے معلوم ہوتی ہے۔ اس میں بھی پرانی گاڑیوں جیسا ڈبے پر مشتمل ڈیزائن اور چھوٹی ہیڈلائٹس استعمال کی گئی ہیں۔ یہی وجہ ہے کہ اسے موجودہ دور کی دیگر Kei کارز سے مختلف قرار دیا جاتا ہے۔ گاڑی کے دائیں و بائیں حصے بھی بالکل سادہ اور ہموار ہیں۔ پچھلے حصے میں ایک سیدھی لکیر سے شیشے کو میٹل کی شیٹ سے علیحدہ کیا گیا ہے۔ پاکستان میں دستیاب استعمال شدہ آلٹو 2015 لگ بھگ 11 لاکھ روپے میں خریدی جاسکتی ہے۔

مزید پڑھیں: نئی سوزوکی آلٹو 2016 سے متعلق اہم معلومات منظر عام پر آگئیں

suzuki-alto

نمبر 1: ٹویوٹا وٹز

عالمی شہرت یافتہ ادارے ٹویوٹا موٹرز کی مشہور گاڑیوں میں سے ایک ٹویوٹا وٹز چھوٹی ہیچ بیک ہے۔ اسے پانچ دروازوں والی ماڈل کے علاوہ تین دروازوں والی ہیچ بیک کے طور پر بھی پیش کیا جاتا ہے۔ٹویوٹا وٹز کی پہلی جنریشن 1998 سے 2005 تک پیش کی جاتی رہی۔ سال 2005 سے 2010 تک دوسری جنریشن ٹویوٹا وٹز کا چرچہ رہا۔ اورسال 2010 سے اب تک اس کی تیسری جنریشن شہریت کی بلندیوں کو چھو رہی ہے۔ اس میں 5-اسپیڈ اور 6-اسپیڈ مینوئل کے علاوہ 4-اسپیڈ آٹومیٹک اور CVT گیئر باکس کا انتخاب بھی پیش کیا جارہا ہے۔ ٹویوٹا نے وٹز کا ظاہری انداز بناتے ہوئے ہوا کے دباؤ کو بخوبی جھیلنے کے قابل بنایا ہے اور یہی وجہ ہے کہ گاڑی کے اکثر حصہ گولائی یا ڈھلوان سے مشابہ معلوم ہوتے ہیں۔

یہ بھی پڑھیں: ٹویوٹا وِٹز: پہلی سے تیسری جنریشن تک کی مکمل معلومات

toyota-vitz


Top