ہونڈا وِزل کی مدمقابل ٹویوٹا C-HR میں ٹربوچارجڈ 1200cc انجن لگایا جائے گا

01-2017-toyota-c-hr-hybrid-geneva-1

چند روز قبل ہم نے قارئین کو جاپانی کار ساز ادارے ٹویوٹا کی نئی کراس اوور سے متعلق بتایا تھا جس کا نام Toyota C-HR رکھا گیا ہے۔ ہمارے کے قارئین نے ہونڈا وِزل کی اس ممکنہ مقابل گاڑی کے حوالے سے کافی دلچسپی کا اظہار کیا ۔ پاک ویلز کے سوشل میڈیا صفحات پر بھی اس خبر کے حوالے سے کافی گفتگو کی جارہی ہے۔ اس گاڑی کو جنیو آٹو شو 2016 میں عوام کے سامنے پیش کیا گیا تھا اور اب ہم اس حوالے سے مزید معلومات اپنے قارئین تک پہنچا رہے ہیں۔

ٹویوٹا نے اس خبر کی تصدیق کردی ہے کہ C-HR میں 122 ہارس پاور فراہم کرنے والا 1800 سی سی 4-سلینڈر انجن + ہائبرڈ برقی موٹر لگائی جائے گی۔ ٹویوٹا پرایوس (Toyota Prius) کی طرح اس میں بھی eCVT گیئرباکس شامل ہوگا۔ C-HR ٹویوٹا کے نئے عالمی آرکی ٹیکچر (TNGA) پر بنائی جائے گی جسے نئی پرایوس کی تیاری میں بھی استعمال کیا جارہا ہے۔ منتخب مارکیٹوں میں C-HR کو 2000 سی سی نیچرلی ایسپریٹڈ انجن اور CVT گیئر باکس کے ساتھ بھی پیش کیا جائے گا۔

پاک ویلز کے ذریعے ہونڈا وزل یا کوئی دوسری گاڑی پاکستان منگوانے کے لیے یہاں کلک کریں

دلچسپ بات یہ ہے کہ ٹویوٹا C-HR کے ماڈلز میں 1200 سی سی ٹربو چارجڈ انجن بھی شامل کیا گیا ہے۔ یہ ماڈل پیٹرول سے چلنے والے عام 4 سلینڈر انجن کا حامل ہوگا جو 115 ہارس پاور فراہم کرسکے گا۔اسے 6-اسپیڈ مینوئل یا پھر CVT گیئرباکس کے ساتھ پیش کیا جائے گا۔ چونکہ اس کا انجن دیگر ماڈلز کے مقابلے میں کم شمار کیا جائے گا اس لیے ممکن ہے کہ اس پر ٹیکس بھی کم ہی لاگو ہو۔ اگر ایسا ہوا تو بہت جلد جاپان سے درآمد کی جانے والی استعمال شدہ گاڑیوں کی فہرست میں ٹویوٹا C-HR بھی شامل ہوجائے گی۔

Toyota C-HR Turbo Engine

ٹویوٹا نے بتایا ہے کہ نئی C-HR میں متعدد حفاظتی سہولیات شامل ہوں گی جو ‘ٹویوٹا سیفٹی سینس سسٹم’ کا حصہ ہیں۔ ان میں گاڑی کی ممکنہ ٹکر سے بچاؤ کا نظام، لین کی خلاف ورزی پر مطلع کرنے، پیدل چلنے والوں سے خبردار کرنے، خود کار لائٹس اور کروز کنٹرول بھی شامل ہیں۔ یہ وہ سہولیات ہیں کہ جو عام طور پر صرف پرتعیش گاڑیوں جیسے لیکسز کا ہی حصہ سمجھی جاتی تھیں۔

یہ بھی پڑھیں: ہونڈا HR-V اور ہونڈا وِزل ہائبرڈ ؛ جامع و مختصر جائزہ

ٹویوٹا C-HR کے اندر جھانکیں تو وہاں آپ کو LED لائٹس کے ساتھ بالترتیب مڑنے کے اشارے نظر آئیں گے۔ ٹویوٹا نے اب تک اس گاڑی کے اندرونی حصے کی کوئی تصویر پیش نہیں کی لہٰذا مزید جاننے کے لیے ہمیں مزید انتظار کرنا پڑے گا۔ البتہ بیرونی انداز کے حوالے سے بتایا گیا ہے کہ اسے ٹویوٹا ڈیزائن اسٹوڈیو کیلی فورنیا میں ڈیزائن کیا گیا ہے۔

ٹویوٹا نے نئی C-HR کی قیمت سے متعلق بھی معلومات فراہم نہیں کیں لیکن یہ ضرور بتایا ہے کہ اسے یورپی مارکیٹ کے لیے ٹویوٹا ترکی کے کارخانے میں تیار کیا جائے گا۔ یورپ میں ٹویوٹا C-HR کا مقابلہ مزدا CX-3، نسان جوک اور ٹویوٹا کے روایتی حریف ہونڈا کی HR-V اور وِزل سے ہوگا۔

تصاویر بشکریہ آٹو بلاگ

Fazal Wahab

I am Civil Engineer by Profession and have love for High Rise Towers and Underground construction. But Automobiles is my first love. Its my passion to know and share about anything new in automobile industry.

Top