کیا نئے انداز کی حامل ٹویوٹا کرولا عنقریب پیش کی جانے والی ہے؟

Toyota Corolla

گزشتہ چند دنوں سے نئے انداز کی حامل ٹویوٹا کرولا کی کئی تصاویر گردش کر رہی ہیں۔ قابل افسوس امر یہ ہے کہ ان تصاویر میں نظر آنے والی تمام گاڑیوں کے مالک وہ افراد ہیں کہ جنہوں نے خود بیرون ممالک سے کرولا کو درآمد کیا ہے۔ اس کی وجہ ایک ہی ہے کہ اب لوگ انڈس موٹرز کی جانب سے نئی کرولا کا انتظار کرتے کرتے تھک چکے ہیں اور اب اپنی مدد آپ کے تحت خود ہی من پسند گاڑی درآمد کر رہے ہیں۔ لیکن مجھے یہ بتاتے ہوئے خوشی ہورہی ہے کہ کرولا کے پاکستانی مداحوں کا انتظار اب ختم ہونے والا ہے۔

ٹویوٹا پاکستان کے اندرونی ذرائع نے ہمیں ٹویوٹا کرولا کی پاکستان میں جلد پیشکش سے متعلق آگاہ کیا ہے۔ شعبے کے ماہرین کہتے ہیں کہ عالمی سطح پر نئے انداز کی رونمائی کے تقریباً 6 سے 9 ماہ بعد اسے پاکستان میں متعارف کروائے جانے کی روایت چلی آرہی ہے۔ لہٰذا یہ امید رکھی جاسکتی ہے کہ رواں سال 2017 کی دوسری ششماہی میں ٹویوٹا کرولا کا نیا انداز پاکستان میں بھی دستیاب ہوگا۔ یہاں ٹویوٹا فورچیونر اور ہائی لکس ریوُو کی تقریب رونمائی میں انڈس موٹر کمپنی کے سربراہ کا بیان قابل ذکر ہے کہ جس میں علی جمالی صاحب نے کچھ یوں فرمایا تھا:

ہم پاکستان میں نئے ماڈلز متعارف کروانے کے حوالے سے ٹویوٹا موٹر کارپوریشن کے ساتھ بات چیت کر رہے ہیں مگر ہمارے صارفین کو سمجھنا چاہیے کہ ٹویوٹا ایک عالمی ادارہ ہے اور اس کے دنیا بھر میں کئی ذیلی ادارے ہیں جس کی وجہ سے حتمی فیصلہ کرتے ہوئے مختلف عوامل کو مدنظر رکھنا ضروری ہوتا ہے۔

نئی ٹویوٹا کرولا آسان ماہانہ اقساط پر حاصل کرنے کے لیے یہاں کلک کریں

image

پچھلے کئی ماہ کے دوران پاکستان میں گاڑیوں کے شعبے میں خاصی تیزی دیکھی جارہی ہے اور اس میں ٹویوٹا پاکستان کا حصہ بھی نمایاں ہے۔ صرف نئی گاڑیوں کی بات کریں تو مقامی مارکیٹ میں ٹویوٹا گاڑیوں کا 28 فیصد حصہ بنتا ہے۔ امید کی جارہی ہے کہ نئی آٹو پالیسی پیش کیے جانے اور ملک کی اقتصادی صورتحال میں بہتری کے باعث پاکستان میں گاڑیوں مانگ کی صورت میں نظر آئیں گے۔ علی جمالی اس ضمن میں کہتے ہیں کہ سال 2025 تک ملک میں تیار شدہ گاڑیوں کی فروخت پانچ لاکھ کا ہدف عبور کرسکتی ہے۔

بہرحال، نئی ٹویوٹا کرولا سے متعلق بات کریں تو ذرائع کے مطابق سال 2017 میں اسے پیش کرنے کے امکانات بہت روشن ہیں۔ توقع کی جاسکتی ہے کہ ٹویوٹا کرولا 2017 میں ظاہری اور اندرونی حصے کو نیا انداز دیا جائے گا جبکہ انجن اور گیئر باکس وغیرہ موجودہ کرولا ہی سے استعمال کیے جائیں گے۔


Top