ٹویوٹا کرولا کی قیمت میں مزید اضافے کا امکان

toyota corolla 2014

پاکستان میں ٹویوٹا (Toyota) گاڑیوں کی تیاری و فروخت کے مجاز ادارے انڈس موٹرز کمپنی (IMC) نے مستقبل قریب میں اپنی بیشتر گاڑیوں بشمول ٹویوٹا کرولا کی قیمت میں اضافے کا عندیہ دیا ہے۔ یاد رہے کہ اب سے صرف چار ماہ قبل مئی 2016 میں انڈس موٹرز کمپنی نے ٹویوٹا کرولا میں نئی خصوصیات شامل کرنے کے ساتھ قیمت میں بھی 20 سے 60 ہزار روپے تک اضافہ کیا تھا۔

مزید پڑھیں: ٹویوٹا کرولا میں امموبلائزر سمیت متعدد خصوصیات شامل

حال ہی میں انڈس موٹرز کمپنی کے ماہرین کا ایک اجلاس منعقد ہوا جس میں ہونے والی گفتگو سے اندازہ لگایا جاسکتا ہے کہ امریکی ڈالر اور جاپانی ین کے مقابلے میں پاکستانی روپے کی قدر میں مزید کمی کی وجہ سے گاڑیوں کی قیمت میں اضافہ ہوسکتا ہے۔ اس حوالے سے ٹویوٹا انڈس موٹرز کی ویب سائٹ پر پیش کی جانے والی پریزنٹیشن دیکھنے کے لیے یہاں کلک کریں۔

USD-JPY Parity

علاوہ ازیں پاکستان میں سوزوکی (Suzuki) گاڑیاں فروخت کرنے والے ادارے پاک سوزوکی نے بھی گزشتہ ماہ اگست 2016 میں اپنی گاڑیوں کی قیمت میں 3 فیصد اضافے کا اعلان کیا تھا۔ اس اعلان کے بعد سوزوکی کے نام سے فروخت ہونے والی تمام ہی گاڑیوں کی قیمت میں 20 سے 30 ہزار روپے اضافہ ہوا۔ تاہم انڈس موٹرز کی جانب سے رواں سال دو مرتبہ اضافے کا فیصلہ حیران کن کہا جاسکتا ہے۔

مزید پڑھیں: پاک سوزوکی نے گاڑیوں کی قیمت میں اضافہ کردیا

دوسری طرف انجینئرنگ ڈیولپمنٹ بورڈ (EBD) نے دونوں ہی اداروں انڈس موٹرز کمپنی اور پاک سوزوکی کو قیمتوں میں حالیہ اضافے کی وجوہات بیان کرنے کا کہا ہے۔ تاہم اب تک ان اداروں کی جانب سے EBD کے حکم کو کسی خاطر میں نہیں لایا گیا۔

یہاں یہ بات بھی قابل ذکر ہے کہ مالی سال 2014-15 کے دوران 3.9 ارب روپے منافع کے مقابلے میں انڈس موٹرز کمپنی کو گزشتہ مالی سال 2015-16 میں مجموعی طور پر 9.1 ارب روپے منافع ہوا ہے۔ اس کی بنیادی وجہ مقامی مارکیٹ میں ٹویوٹا کرولا کی بڑھتی ہوئی مانگ ہے جس میں گزشتہ دو سالوں کے دوران متواتر اضافہ دیکھا جارہا ہے۔ علاوہ ازیں ٹویوٹا انڈس موٹرز مستقبل قریب میں نئی ٹویوٹا ہائی لکس ریوو اور ٹویوٹا فورچیونر کی دوسری جنریشن بھی پاکستان میں متعارف کروانے کی تیاریوں میں مصروف ہے۔

ان دونوں گاڑیوں کی آمد پاکستانی ادارے کو کاروباری میدان میں مزید وسعت حاصل ہوجائے گی۔ البتہ یہ تو وقت ہی بتائے گا کہ قیمتوں میں اضافے کے فیصلے سے ٹویوٹا انڈس موٹرز کو خسارے کا سامنا کرنا پڑتا ہے یا نہیں؟ اس حوالے سے اپنی رائے نیچے موجود تبصرہ خانے میں ضرور شامل کریں۔

We all make mistakes in life but I believe in learning from them and that is why I have opted to become an auto-journalist. I have a tech background but I prefer to write and express my views on cars because I am petrol head.

Top