ٹویوٹا فورچیونر 2016 بمقابلہ نسان پاتھ فائنڈر

toyota-fortuner-vs-nissan-pathfinder

اس مضمون میں ہم ٹویوٹا فورچیونر کی دوسری جنریشن اور نسان پاتھ فائنڈر کی چوتھی جنریشن سے متعلق بات کریں گے۔ دوسری جنریشن ٹویوٹا فورچیونر کو گزشتہ سال 2015 کے وسط میں ٹویوٹا ہائی لکس ریوُو کے ساتھ پیش کیا گیا۔ یہ دونوں ہی گاڑیاں عالمی نمبر ایک کار ساز ادارے کی “Keen Look” طرز ڈیزائن پر تیار کی گئی ہیں۔ ماضی میں یہی طرز ڈیزائن ٹویوٹا کرولا (E170) کی تیاری میں بھی استعمال کیا جاچکا ہے اور کافی مقبولیت بھی حاصل کرچکا ہے۔ نئی فورچیونر اور ہائی لکس کے چیسز، گیئر باکس اور انجن بالکل ایک جیسے ہیں لیکن ان کا اندرونی حصہ (interior) ایک دوسرے سے کافی مختلف ہے۔ پاکستان میں نئی فورچیونر کی آمد بہت جلد متوقع ہے تاہم اس کی قیمت سے متعلق کوئی تفصیلا فراہم کی نہیں کی گئیں۔ ماہرین کے مطابق پاکستان میں نئی فورچیونر کی قیمت 50 سے 60 لاکھ روپے کے درمیان رکھی جاسکتی ہے۔

دوسری جانب نسان پاتھ فائنڈر کی چوتھی جنریشن کو سال 2012 میں متعارف کروایا گیا تھا اور اب تک اس کی دو اپڈیٹس بالترتیب سال 2014 اور 2017 میں پیش کی جاچکی ہیں۔ نسان پاتھ فائنڈر کی تیاری میں استعمال ہونے والے پلیٹ فارم پر ماضی میں انفنیٹی QX60، میکسیما، کیوسٹ، مورانو اور الٹیما جیسی گاڑیاں تیار کی جاچکی ہیں۔ نسان پاتھ فائنڈر پاکستان میں تیار نہیں کی جاتی تھی البتہ استعمال شدہ گاڑیوں کی مارکیٹ میں جاپان سے درآمد شدہ نسان پاتھ فائنڈر 60 سے 70 لاکھ روپے میں دستیاب ہے۔

ظاہری انداز (Exterior)

دنوں ہی SUVs خوبصورتی میں اپنی مثال آپ ہیں۔ فورچیونر کی بات کریں تو اس کے اگلے حصے میں شامل پتلی LED لائٹس اس کی دلکشی میں اضافہ کرتی ہیں۔ ٹویوٹا نے اس کا بمپر کافی اوپر رکھا ہے۔ اس کے علاوہ گِرل کو بھی تھوڑا اٹھا کر LED لائٹس سے جوڑ دیا ہے۔ دائیں اور بائیں جانب انگریزی حرف V جیسی کروم گِرل اسے مزید پرکشش بنا رہی ہیں۔ پتلی لائٹس کی وجہ سے یہ گاڑی کافی توانا محسوس ہوتی ہے۔ مجموعی طور پر فورچیونر کا ڈیزائن بذات خود بیان کرتا ہے کہ ٹویوٹا نے اس پر کتنی محنت سے کام کیا ہے۔ نئی فورچیونر کی لمبائی 4795 ملی میٹر، چوڑائی 1855 ملی میٹر اور اونچائی 1835-1850 ملی میٹر (ماڈل کے مطابق) ہے جبکہ اس کا ویل بیس 2745 ملی میٹر ہے۔

نسان پاتھ فائنڈر کو بہتر سے بہتر بنانے کی متعدد کوششیں کی جاچکی ہیں۔ اس کے اگلے حصے میں لائٹس بشمول LED لائٹس کا ڈیزائن بہت اچھا ہے۔ مجموعی طور پر نسان پاتھ فائنڈر کا ڈیزائن اسے جذباتی انداز دیتا ہے۔ اس کی لمبائی 5009 ملی میٹر، چوڑائی 1961 ملی میٹر اور اونچائی 1768 ملی میٹر ہے جبکہ اس کا ویل بیس 2900ملی میٹر ہے۔ فورچیونر کے مقابلے میں نسان پاتھ فائنڈر کا ویل بیس زیادہ ہے۔

یہ بھی پڑھیں: نسان جیوک – چھوٹے خاندان کے لیے منفرد انداز کی جاپانی کراس اوور

اندرونی حصہ (Interior)

ٹویوٹا فورچیونر کے اندر جھانکیں تو آپ کو جدیدیت کا احساس ہوگا۔ یہ حصہ ہائی لکس سے کافی مختلف ہے۔ فورچیونر میں 7 نشستیں موجود ہیں جن میں نونہالوں کے لیے مخصوص 2 نشستیں بھی شامل ہیں۔ پچھلی نشستوں پر اچھی خاصی جگہ موجود ہے تاہم اونچائی کم ہونے کی وجہ سے زیادہ طویل قامت افراد کو بیٹھنے میں مشکل پیش آسکتی ہے۔ فورچیونر میں پچھلی نشستوں سفر کرنے والوں کے لیے ایئر کنڈیشننگ کا بھی خیال رکھا گیا ہے۔ اس کے علاوہ ڈرائیور کو ملٹی فنکشنل اسٹیئرنگ کے ذریعے بھی بہت سہولت فراہم کی گئی ہے۔

چونکہ نسان فائنڈر کی لمبائی اور اس کا ویل بیس فورچیونر سے زیادہ ہے اس لیے مسافروں کے لیے اضافی گنجائش بھی موجود ہے۔ پچھلی نشستیں بھی لیگ روم اور ہیڈروم بہتر ہونے کی وجہ سے آرامدے رہتی ہیں۔ ڈیش بورڈ کا انداز بھی خاصہ جدید ہے اور یہاں متعدد سہولیات مثلاً USB پورٹس وغیرہ بھی شامل ہیں۔ اسٹیئرنگ ویل میں دیئے گئے بٹن ڈرائیور کو بہت سہولت فراہم کرتے ہیں۔ نشستوں کے درمیان کپ ہولڈرز بھی موجود ہے جنہیں مگ ہولڈرز کہا جائے تو غلط نہ ہوگا۔ کیوں کہ یہ روایتی گاڑیوں میں دستیاب کپ ہولڈرز سے تھوڑے بڑے ہیں۔ مجموعی طور پر دونوں ہی SUVs بہت پرکشش، آرامدے اور کثیر گنجائش ہی حامل ہیں۔

انجن (Engine)

ٹویوٹا فورچیونر 6-اسپیڈ مینوئل اور 5-/6- اسپیڈ آٹومیٹک گیئر باکس کے ساتھ پیش کی جاتی ہے۔ پاکستان میں نئی فورچیونر کو 2700cc انجن کے ساتھ بھی پیش کیے جانا متوقع ہے۔ اس میں شامل انجن کی تفصیلات درج ذیل ہیں:

* 2400cc ڈیزل انجن
یہ 2GD-FTV انلائن 4-کامن ریل ڈیزل انجن ہے جو VNT کے ساتھ 3400 آر پی ایم پر 149 ہارس پاور اور 1400-2600 آر پی ایم پر 343 نیوٹن میٹر ٹارک فراہم کرنے کی اہلیت رکھتا ہے۔
* 2700cc پیٹرول انجن
یہ 2TR-FE انلائن 4 پیٹرول انجن ہے جو ڈیول VVT-i کے ساتھ 5500 آر پی ایم پر 160 ہارس پاور اور 3800 آر پی ایم پر 246 نیوٹن میٹر ٹارک فراہم کرنے کی اہلیت رکھتا ہے۔
* 2800cc ڈیزل انجن
یہ 1GD-FTV انلائن 4 کامن ریل ڈیزل انجن ہے جو VNT کے ساتھ 3400 آر پی ایم پر 177 ہارس پاور اور 1400-2600 آر پی ایم پر 420 نیوٹن میٹر ٹارک فراہم کرنے کی اہلیت رکھتا ہے۔
* 3000cc ڈیزل انجن
یہ 1KD-FTV انلائن 4 کامن ریل ڈیزل انجن ہے جو VNT کے ساتھ 3400 آر پی ایم پر 163 ہارس پاور اور 1800-3400 آر پی ایم پر 360 نیوٹن میٹر ٹارک فراہم کرنے کی اہلیت رکھتا ہے۔
* 4000cc پیٹرول انجن
یہ 1GR-FE V6 پیٹرول انجن ڈیول VVT-i کے ساتھ 5200 آر پی ایم پر 278 ہارس پاور اور 3700 آر پی ایم پر 376 نیوٹن میٹر ٹارک فراہم کرنے کی اہلیت رکھتا ہے۔

یہ بھی پڑھیں: نئی ہائی لکس ریوُو اور فورچیونر میں شامل ممکنہ خصوصیات کا جائزہ

دوسری جانب نسان پاتھ فائنڈر میں CVT گیئر باکس پیش کیا جارہا ہے۔ اس میں دو مختلف انجن 2500cc پیٹرول بمع ہائبرڈ اور 3500cc پیٹرول V6 انجن پیش کیے جاتے ہیں۔ 2500cc پیٹرول انجن 5600 آر پی ایم پر 250 ہارس پاور اور 3600 آر پی ایم پر 329 نیوٹن میٹر ٹارک فراہم کرسکتا ہے جبکہ V6انجن 284 ہارس پاور اور 351 نیوٹن میٹر ٹارک فراہم کرنے کی سکت رکھتا ہے۔

مذکورہ دونوں ہی SUVs اپنی جگہ بہترین ہیں تاہم قیمت کے اعتبار سے دیکھا جائے تو نسان پاتھ فائنڈر کے مقابلے میں ٹویوٹا فورچیونر کم قیمت ہے۔ یوں 4×4 گاڑیوں کے اکثر شوقین کے لیے قابل خرید بھی ہے۔ ٹویوٹا نے فورچیونر کا نہ صرف ظاہری انداز بلکہ اندرونی حصے میں شامل خصوصیات پر بھی بہت توجہ کے ساتھ کام کیا ہے۔ ویسے بھی ٹویوٹا اس وقت سرفہرست کار ساز اداروں میں سے ایک ہے اور آف-روڈنگ کے شعبہ میں بھی نمایاں مقام رکھتا ہے۔

حتمی رائے (Verdict)

پاکستان میں گاڑیوں کے شوقین افراد کے لیے ٹویوٹا فورچیونر ہی بہترین انتخاب ہے۔ نہ صرف یہ کہ فورچیونر کی قیمت بہت مناسب ہے بلکہ یہ دیگر حریف گاڑیوں سے بہتر سہولیات اور خصوصیات کی بھی حامل ہے۔ گو کہ نسان پاتھ فائنڈر میں شامل خصوصیات فورچیونر جیسی ہیں تاہم اضافی قیمت کے باعث یہ زیادہ خریداروں کو متوجہ نہ کرسکے گی۔


Top