نئی ٹویوٹا پریوس 2016ء کی مزید تفصیلات

2016 Toyota Prius

اب سے کچھ ہفتوں پہلے ٹویوٹا نے پریوس 2016ء کا اجرا کیا جسے دنیا کی بہترین ہائبرڈ گاڑیوں میں سے ایک قرار دیا جاتا ہے۔ ٹویوٹا پریوس کے جلوہ افروز ہونے کا منظر تو قابل دید تھا ہی تاہم ٹویوٹا کی طرف سے اس گاڑی کی مزید تکنیکی معلومات فراہم نہیں کی گئی تھیں۔ ہم نے انٹرنیٹ سے ٹویوٹا پریوس کے ساتھ ملنے والا کتابچہ (جس میں صارفین کے لیے ہدایات شامل ہوتی ہیں) تلاش کیا اور اس سے ہمیں پروس سے متعلق بہت سی نئی چیزیں پتہ چلیں جو ہم آپ کے لیے یہاں تحریر کر رہے ہیں۔

ٹویوٹا پریوس 1800 سی سی انجن کے ساتھ پیش کی جا رہی ہے جس کے ساتھ برقی موٹر بھی ہے۔ پریوس 40 کلومیٹر فی لیٹر فراہم کرسکتی ہے۔ اس بار ٹویوٹا نے پریوس کو چاروں پہیوں پر چلنے والے انداز سے بھی پیش کیا ہے تاہم وہ 30 کلومیٹر فی لیٹر کی کفایت فراہم کرے گی۔

ٹویٹا پریوس کی چوتھی جنریشن کا ڈیزائن پچھلی جنریشن کے مقابلے میں کافی مختلف ہے۔ اس میں جہاں روانی نظر آتی ہے وہیں کچھ جذباتیت بھی ملتی ہے۔ ٹویوٹا کا کہنا ہے کہ اس نے نئی پریوس ڈیزائن کرتے ہوئے ایرو ڈائنامک سمیت کئی جدید تکنیکوں کو مدنظر رکھا ہے۔ اس کے علاوہ پریوس 2016ء پہلے کے مقابلے میں 6 سینٹی میٹر زیادہ لمبی، 1.5 سینٹی میٹر زیادہ چوڑائی اور 2 سینٹی میٹر نیچی بھی ہے۔

گاڑی کے اندر نگاہ ڈالیں تو یہاں پہلے کی طرح 3 اطراف سے جڑا ہوا اسٹیرنگ اور گاڑی کے درمیان میں ایک بڑی ٹچ اسکرین نظر آئے گی۔ گاڑی سے متعلق ڈرائیور کو باخبر رکھنے کے لیے 4.2 انچ کا ڈیجیٹل ڈسپلے لگایا گیا ہے جس میں ہر وہ چیز ظاہر ہوتی ہے جو ڈرائیور کے لیے اہم ہو۔ نئی پریوس میں کئی حفاظتی سہولیات بھی شامل کی گئی ہیں جن ٹکرانے سے قبل خبردار کرنے، لین سے ہٹ کر چلنے پر اطلاع دینے اور گاڑی کے ریڈار سے منسلک ہونے جیسی خصوصیات قابل ذکر ہیں۔

Top