ٹویوٹا S-FR کا جدید انداز ٹوکیو آٹو سلون میں دکھایا جائے گا

toyota-s-fr-racing-concept-003-1

میرے حلقہ احباب میں بہت سے لوگ مختصر گاڑیاں پسند کرتے ہیں۔ یہ بات اپنی جگہ کہ ہمیں چھوٹی گاڑیاں چلانے کا زیادہ تجربہ نہیں لیکن پھر بھی ہمیں ایسی گاڑیاں نہ صرف پسند آتی ہیں بلکہ بعض اوقات انہیں اپنی سڑکوں پر چلتا دیکھنے کی خواہش بھی پیدا ہوتی ہے۔ اس وقت جس مختصر اسپورٹس کار کا سب سے زیادہ چرچا کیا جا رہا ہے وہ ٹویوٹا کی نئی S-FR تصوراتی گاڑی ہے۔

ٹویوٹا S-FR کو رواں سال ٹوکیوں موٹر شو میں پیش کیا گیا تھا۔ وہاں اس گاڑی کو زبردست پذیرائی حاصل ہوئی اور شعبے کے نامور صحافیوں نے بھی اسے سراہا۔ یہ گاڑی اپنی پیش رو GT86 سے پوری 10 انچ چھوٹی ہے۔ یہ ان تین گاڑیوں کی فہرست کی دوسری گاڑی ہے جنہیں پیش کرنے کا وعدہ ٹویوٹا نے کیا تھا۔ پہلی گاڑی GT86 تھی، دوسری S-FR ہے اور آخری گاڑی ٹویوٹا سُپرا ہوگی۔

میں پہلے بھی ایک بلاگ میں ذکر کرچکا ہوں کہ S-FR دیکھ کر مجھے ٹویوٹا کی معروف 2000GT یاد آتی ہے۔ تاہم S-FR کا انداز ٹویوٹا کی اسپورٹس 800 کوپے سے لیا گیا ہے جو 1965 سے 1969 کے دوران میں تیار کی گئی تھی۔ S-FR اور اسپورٹس 800 کی اگلی روشنیاں اور چھت کا اوپری حصہ بہت زیادہ ملتا جلتا ہے۔

یہ بھی پڑھیں: ٹوکیو موٹر شو میں ٹویوٹا کی ایک اور دلچسپ گاڑی پیش

ٹویوٹا بہت آہستہ لیکن ثابت قدمی سے نئی گاڑی پیش کرنے کی جانب گامزن ہے۔ تازہ خبر یہ ہے کہ ٹویوٹا S-FR کو اپنے گیزو ریسنگ ڈیپارمنٹ کے حوالے کردیا ہے جو اسے 15 تا 17 جنوری تک ٹوکیو آٹو سلون میں دکھائیں گے۔ گیزو ریسنگ جاپانی کار ساز ادارے ٹویوٹا کا ہی شعبہ ہے جس نے S-FR کے انداز کو مزید جذباتی بنا دیا ہے۔ پہیوں، چھت، اگلے بمپر اور کناروں کے نقش و نگار کو بہتر بنایا گیا ہے۔ پچھلے حصے پر بھی اضافی کام کیا ہے جس میں ایک خوبصوت پر بھی شامل ہے۔

نئی S-FR عام گاڑی سے دو انچ نیچی ہے۔ بریکس کو بھی بہتر بنا گیا ہے اور اب گاڑی زیادہ جلدی رک جاتی ہے۔ بدقسمتی سے اب تک گاڑی کی کارکردگی سے متعلق معلومات حاصل نہیں ہوسکیں۔ S-FR کا اصلی ماڈل 1500 سی سی انجن کے ساتھ پیش کیا گیا تھا جس کی رفتار 130 بریک ہارس پاور تھی۔ اب دیکھنا ہے کہ نئی S-FR اسپورٹس کے انجن میں کیا بہتری کی گئی ہے۔ جب تک اس گاڑی سے باقاعدہ پردہ نہیں اٹھایا جاتا کیوں نہ تصاویر سے لطف اندوز ہولیا جائے۔

Top