ٹویوٹا پھر بازی لے گیا؛ 2015 میں گاڑیوں کی ریکارڈ فروخت

Toyota Prius

جاپانی کار ساز ادارے ٹویوٹا موٹر کارپوریشن نے گزشتہ سال 2015 میں 1 کروڑ 1 لاکھ (10,151,000) سے زائد گاڑیاں فروخت کرنے کا سنگ میل عبور کیا اور یوں دنیا میں سب سے زیادہ گاڑیاں فروخت کرنے والا ادارے کا اعزاز اپنے نام کیا۔ یہ مسلسل چوتھا موقع ہے کہ ٹویوٹا نے ایک سال میں دنیا کے دیگر تمام اداروں سے زیادہ گاڑیاں فروخت کیں۔

ٹویوٹا کے سب سے بڑی حریف ووکس ویگن کو گزشتہ سال منظر عام پر آنے والے ڈیزل گیٹ اسکینڈل کی وجہ سے شدید بحران کا سامنا کرنا پڑا۔ ووکس ویگن کی فروخت 2 فیصد کم رہی یوں جرمن کار ساز ادارے کی فروخت ہونے والی گاڑیوں کی تعداد 99 لاکھ رہی۔ سال 2015 کے ابتدائی ماہ ووکس ویگن کے لیے شاندار رہے اور فروخت کے اعتبار سے ٹویوٹا کو پیچھے چھوڑ چکا تھا تاہم ڈیزل گیٹ اسکینڈل کے بعد ادارے کو پہنچنے والے دھچکے نے سال کے آخر تک اس برتری کو ختم کردیا۔ اسکینڈل کی وجہ سے ووکس ویگن کو متعدد ممالک میں گاڑیوں کی تیاری سے روک دیا گیا تھا۔

یہ بھی پڑھیں: مالی سال 2016 کی پہلی ششماہی کے دوران گاڑیوں کی فروخت میں 53 فیصد اضافہ

کرولا، پرایوس، لینڈ کروزر اور متعدد پرتعیش SUV بنانے والے ادارے ٹویوٹا نے سال 2016 کے لیے 1 کروڑ 1 لاکھ سے زائد گاڑیاں فروخت کرنے کا ہدف رکھا ہے۔ یاد رہے کہ سال 2015 میں ٹویوٹا گاڑیوں کی فروخت طے کیے گئے ہدف (1 کروڑ) سے کہیں زیادہ رہی تھی۔

ڈیٹرائیٹ سے تعلق رکھنے والے ادارے جنرل موٹرز کی فروخت 0.2 فیصد اضافے کے بعد 98 لاکھ تک پہنچ چکی ہے۔ شیورلیٹ، اوپل، کیڈلِک اور بوئیک جیسے معروف ناموں کے ساتھ کام کرنے والی کمپنی GM سات دہائیوں سے بھی زیادہ عرصے تک گاڑیوں کی فروخت میں سرفہرست رہی ہے۔ تاہم 2008 میں ٹویوٹا نے جنرل موٹرز کی سبقت کا خاتمہ کردیا تھا۔

سوزوکی اور ٹویوٹا کی ممکنہ شراکت داری سے متعلق خبریں سامنے آنے کے بعد جاپان کی نیکائی اشاریہ میں مذکورہ اداروں کے حصص کی قیمتوں میں زبردست اضافہ ہوا۔ اب تک موصول ہونے والی اطلاعات کے مطابق ٹویوٹا اور سوزوکی ابھرتی ہوئی مارکیٹوں کے لیے مختصر گاڑیاں بنانے کی مشترکہ کوششوں کے بارے میں غور وخوص کر رہے ہیں۔ ٹویوٹا اس وقت دنیا کا نمبر ایک کار ساز ادارہ بن چکا ہے جبکہ چھوٹی گاڑیوں کی تیاری میں ہم وطن سوزوکی کو ملکہ حاصل ہے۔

سال 2015 کے دوران ٹویوٹا نے پاکستان میں بھی زبردست منافع کمایا۔ جون 2014ء میں گیارہویں جنریشن ٹیوٹا کرولا کی آمد کے بعد سے اب تک 50 ہزار سے زائد فروخت ہوچکی ہے۔ یہ پاکستان کی تاریخ میں تیار ہونے والی کرولا کی سب سے بڑی تعداد ہے۔ ہونڈا نے بھی گزشتہ سال نئی سِوک عالمی سطح پر متعارف کروادی ہے اور اب دیکھنا ہے کہ اس کی پاکستان آمد ٹویوٹا کرولا کی فروخت میں کمی لا پاتی ہے یا نہیں۔

Top