پاکستان میں دستیاب 2 دروازوں والی منفرد، دلکش اور کم قیمت گاڑیاں

daihatsucopen_1

ہمارے ملک میں دو دروازوں والی گاڑیوں کو زیادہ شہرت حاصل نہیں ہوئی لیکن بہت سے گاڑیوں کے شوقین افراد ایسے بھی ہیں جو اس طرز کی گاڑیوں پر گہری نظر رکھتے ہیں۔ اس کے علاوہ سستی گاڑیاں رکھنے کے خواہشمند افراد بھی دو دروازوں والی گاڑی میں دلچسپی لیتے نظر آئے ہیں۔ اب سے کوئی دس بارہ سال پہلے جب پہلی بار بڑی تعداد میں ٹویوٹا وِٹز درآمد کی گئیں تو ان میں دو دروازوں والی وِٹز بھی شامل تھیں۔ روایتی چار دروازوں والی گاڑی کے مقابلے میں ان کی قیمت میں 50 ہزار روپے سے بھی زائد کا فرق تھا یوں کم خرچ بالانشین پر یقین رکھنے والے لوگوں نے دو دروازوں والی سستی وِٹز کا انتخاب کیا۔

یہ بھی پڑھیں: ٹویوٹا وِٹز: پہلی سے تیسری جنریشن تک کی مکمل معلومات

عام تاثر یہ ہے کہ دو دروازوں والی گاڑی محض تفریح یا پھر اسپورٹس کار ہی میں نظر آتے ہیں۔ حالانکہ مغربی ممالک میں ایسا کچھ نہیں ہے۔ وہاں لوگ ایسی گاڑیوں کو بھی عام ہی شمار کرتے ہیں۔ لیکن پاکستان جیسے ممالک میں لوگ شاذ و نادر ہی ایسی گاڑی خریدتے ہیں۔ اگر آپ بھی ان شوقین مزاج لوگوں میں سے ہیں جو دو دروازوں والی گاڑی لینا پسند کرتے ہیں تو چند بہترین گاڑیاں پیش خدمت ہیں۔

ہونڈا سی آر-زی (Honda CR-Z)

یہ دو دروازوں والی ہائبرڈ اسپورٹس کار ہے۔ تکنیکی اعتبار سے تو آپ کو پچھلی جانب بھی ایک دروازہ نظر آئے لیکن وہ مسافروں کے لیے نہیں بلکہ سامان رکھنے کی جگہ یعنی “ڈگی” کے لیے ہے، اس لیے اس کا تذکرہ کرنے کی ضرورت نہیں۔ اس گاڑی کی خاص بات یہ ہے کہ پاکستان میں آپ کو یہ نئی اور استعمال شدہ دونوں ہی صورتوں میں دستیاب ہے۔ نئی ہونڈا CR-Z لینا چاہیں تو ہونڈا ایٹلس کے ذریعے خرید سکتے ہیں اور اگر بیرون ملک سے استعمال شدہ گاڑی منگوانا چاہیں تو یہ بھی ممکن ہے۔ اس میں 1500 سی سی انجن کے ساتھ ہائبرڈ موٹر لگائی جاتی ہے جو تقریباً 135 ہارس پاور قوت فراہم کرسکتی ہے۔ ہونڈا ایٹلس پر دستیاب نئی ہونڈا CR-Z کی قیمت 35 لاکھ روپے ہے۔ البتہ درآمد شدہ 2011-2012 ماڈل کی یہ گاڑی 15 سے 17 لاکھ روپے تک مل جاتی ہے۔ ہمارے یہاں یہ آٹومیٹک ٹرانسمیشن کے ساتھ دستیاب ہے تاہم امریکا میں اسے 6-اسپیڈ مینوئل ٹرانسمیشن کے ساتھ بھی پیش کیا جاچکا ہے۔ یہ چھوٹی اور خوبصورت گاڑی ہے جسے آپ اکثر سڑکوں پر دیکھ سکتے ہیں۔

ہیونڈائی کوپے (Hyundai Coupe)

پاکستان میں یہ گاڑی اس وقت پیش کی گی جب ہیونڈائی اور دیوان فاروق موٹرز ملک ہی میں گاڑیاں تیار اور فروخت کر رہے تھے۔ اس وقت چند ہی ہیونڈائی کوپے فروخت ہوئیں تھیں۔ یہ اگلے پہیوں پر چلنے والی دو دروازوں والی گاڑی ہے جس میں 2 ہزار سی سی ٹوِن کیم انجن لگایا جاتا ہے۔ بین الاقوامی مارکیٹ میں یہ تیبورن (Tiburon) کے نام سے V6 انجن کے ساتھ بھی پیش کی جاتی ہے۔ یہ خوبصورت اور دلکش اسپورٹس کوپے ہے جس کا 2006-07 ماڈل باآسانی 16 لاکھ روپے میں مل جائے گا۔

نسان 350زی (Nissan 350Z)

فیئرلیڈی Z کو قومی اور بین الاقوامی دونوں ہی سطح پر بہت پسند کیا گیا۔ یہ گاڑیاں پاکستان میں تیار تو نہ کی جاسکیں البتہ اسے پسند کرنے والوں نے درآمدی ڈیوٹی میں کمی اور بیرون ممالک سے گاڑیاں منگوانے میں آسانیاں پیدا ہونے کے بعد ضرور حاصل کیا۔350 زی اور مزدا (Mazda Rx8) قابل ذکر تعداد میں درآمد کی گئیں۔ 350 زی میں انتہائی طاقتور 3500 سی سی انجن 6 اسپیڈ ٹرانسمیشن سے منسلک کیا گیا ہے۔ یہ پچھلے پہیوں کی قوت سے چلنے والی گاڑی ہے اس لیے اس چلانے اور سفر کرنے کا تجربہ بہت دلچسپ رہے گا۔ شاید یہی وجہ ہے کہ جب نوآموز ڈرائیور حضرات کے ہاتھ یہ خوبصورت گاڑی لگی، انہوں نے ڈرفٹ کرنے کی کوشش میں اسے بدصورتی بنانے میں کوئی کسر نہ چھوڑی۔ بہرحال، اب بھی آپ صاف ستھری نسان 350زی تقریباً 26 سے 30 لاکھ روپے میں خرید سکتے ہیں۔

350z Daytona Blue 3

350z Daytona Blue 2

350z Daytona Blue 1

ڈائی ہاٹسو کوپن (Daihatsu Copen)

اب کچھ ایسی گاڑیوں کی بات کرلیتے ہیں جو دو دروازوں کی خصوصیت کے ساتھ حجم میں چھوٹی بھی ہوں۔ ان میں سب سے پہلے ڈائی ہاٹسو کوپن کا نام لیا جانا چاہیے۔ یہ دو نشستوں والی Kei کار ہے جو اگلے پہیوں کی قوت سے سفر کرتی ہے۔ آپ کو کوپن کا 2008-2009 ماڈل تقریباً 25 لاکھ روپے میں مل جائے گا جو اس طرح کی گاڑی کے لیے بہت زیادہ ہے۔ کوپن 660 سی سی ٹربوجارچڈ انجن اور 1300 سی سی نیچرلی ایسپریٹڈ انجن کے ساتھ بھی پیش کی جاتی ہے تاہم ایسی بہت کم گاڑیاں پاکستان میں دستیاب ہیں۔

daihatsucopen_1 daihatsucopen_2 daihatsucopen_3

سوزوکی جیمنی (Suzuki Jimny)

اگر آپ اکثر بیرون شہر سفر کرتے ہیں تو پھر سوزوکی جیمنی آپ کے لیے بہترین ہے۔ یہ دراصل تین دروازوں والی گاڑی ہے البتہ اس کا ایک دروازہ عقب میں ہے۔ جمنی کے اندر بھی وہی انجن لگایا گیا ہے جو مشہور زمانہ سوزوکی پوٹوہار (Potohar) میں استعمال ہوتا رہا ہے۔ یہ مضبوط گاڑی ہے جسے آپ بلاجھجک شہر سے باہر طویل سفر کے لیے بھی لے جاسکتے ہیں۔ پاک سوزوکی میں نئی جیمنی کی قیمت 22 لاکھ 93 ہزار روپے ہے۔ استعمال شدہ جیمنی کا 2009-2010 ماڈل تقریباً 10 لاکھ روپے میں مل جاتا ہے۔

1998_Suzuki_Jimny

یہ چند گاڑیاں ہیں جو باآسانی آپ کو مارکیٹ میں مل جائیں گی۔ دو دروازوں والی گاڑیوں کے مقابلے میں تین دروازوں والی ہیچ بیکس زیادہ دستیاب ہیں۔ ان میں ٹویوٹا وِٹز (Toyota Vitz) کے علاوہ ڈائی ہاٹسو میرا بھی قابل ذکر ہے۔ اس کے علاوہ دو دروازوں والی گاڑیوں میں سوزوکی کاپوچینو بھی شمار ہوتی ہے جسے بیرون ملک سے درآمد کیا جاتا ہے۔ اگر آپ جرمن گاڑی خریدنا چاہتے ہیں تو دو دروازوں والی مرسڈیز بینز (Mercedes Benz) کے علاوہ BMW کی Z سیریز بھی مارکیٹ میں دستیاب ہے۔ ایک بات یہاں بتاتا چلوں کہ ایسی گاڑیاں مشکل ہی سے ملتی ہیں اور اگر آپ خرید لیں تو شاید اس کی دیکھ بھال پر بھی آپ کو زیادہ توجہ دینا پڑے گی۔

Top