یاماہا YBR 125 اور YBR 125G ماہانہ اقساط پر بھی دستیاب!

yamaha-ybr-monthly-installment

پاکستان میں موٹر سائیکل کی مقبولیت سے انکار ممکن نہیں ہے۔ کسی بھی مصروف شاہراہ پر ایک سرسری نظر ڈال کر بخوبی اندازہ لگایا جاسکتا ہے کہ یہاں گاڑیوں سے زیادہ موٹر سائیکلیں استعمال کی جارہی ہیں۔ گزشتہ مالی سال 2015-16 کے دوران موٹر سائیکل کی فروخت سے متعلق اعداد و شمار بھی اس بات کا منہ بولتا ثبوت ہیں کہ موٹر سائیکلیں فروخت ہونے کی شرح گاڑیوں سے کہیں زیادہ تیز ہے۔گاڑیوں کے مقابلے میں موٹر سائیکلوں کی کئی گنا زیادہ تعداد کے پیچھے بہت سے عوامل کار فرما ہیں جن میں نوجوانوں کا شوق، قیمت کا فرق اور ٹریفک کی بے ہنگم صورتحال بھی شامل ہیں۔

مزید پڑھیں: پاکستان میں موٹرسائیکل کی فروخت؛ مالی سال 2015-16 میں 20 فیصد اضافہ

جن اداروں نے ملک کی معاشی اور امن و امان کی صورتحال بہتر ہونے کا بروقت اور سمجھداری سے فائدہ اٹھایا ان میں سے ایک یاماہا (Yamaha) بھی ہے۔ اس ادارے نے کم و بیش پانچ سال تک پاکستان میں کاروبار شروع کرنے کی انتھک کوششیں کیں تاہم متعلقہ سرکاری اداروں کی عدم توجہی کے باعث ان کی کوششیں رنگ نہ لاسکیں۔ سال 2013 میں وفاقی حکومت کی تبدیلی یاماہا موٹر کے لیے خوش قسمت ثابت ہوئی اور انہیں پاکستان میں موٹر سائیکلیں فروخت کرنے کا موقع حاصل ہوا۔ اس موقع کا بھرپور فائدہ اٹھاتے ہوئے یاماہا نے گزشتہ سال YBR 125 پیش کی اور پھر اس کی زبردست کامیابی کے بعد YBR 125G بھی متعارف کروائی۔

Yamaha-YBR-125-and-YBR-125G

یاماہا کی متعارف کروائی جانے والی YBR 125 کی قیمت 129,400 روپے اور YBR 125G کی قیمت 132,400 روپے ہے۔ ایک لاکھ قیمت کو نفسیاتی حد تصور کیا جاتا ہے جو موٹر سائیکل کے شوقین بہت سے افراد کی قوت خرید سے باہر ہے۔ یہی وجہ ہے کہ یاماہا موٹر نے مختلف بینکاری اداروں سے پاکستان میں موٹر سائیکلوں کی ماہانہ اقساط پر فراہمی کے سلسلے کا آغاز کیا۔ اس ضمن میں تازہ پیش رفت میزان بینک کے ساتھ کیا جانے والا معاہدہ ہے جس کے تحت میزان بینک کی “بائیک اجارہ” اسکیم کے ذریعے 10 سے 50 فیصد پیشگی ادائیگی کر کے 1 سے 3 سال تک کی ماہانہ اقساط پر یاماہا کی کوئی بھی موٹر سائیکل حاصل کی جاسکتی ہے۔

کم از کم 10 فیصد پیشگی ادائیگی (مع 1,000 روپے پراسسنگ فیس) کے بعد ماہانہ اقساط کی یہ رہیں گی:

دورانیہ YBR 125 YBR 125G
12 ماہ 11,212 روپے 11,472 روپے
24 ماہ 6,380 روپے 6,528 روپے
36 ماہ 4,815 روپے 4,926 روپے

زیادہ سے زیادہ 50 فیصد پیشگی ادائیگی (مع 1,000 روپے پراسسنگ فیس) کے بعد ماہانہ اقساط یہ رہیں گی:

دورانیہ YBR 125 YBR 125G
12 ماہ 6,491 روپے 6,642 روپے
24 ماہ 3,796 روپے 3,884 روپے
36 ماہ 2,917 روپے 2,985 روپے

میزان بینک کے علاوہ چند دیگر بینکاری ادارے بھی یاماہا موٹر سائیکلیں ماہانہ اقساط پر فراہم کر رہے ہیں۔ ان اداروں میں سے ایک بینک الفلاح بھی ہے۔ میزان بینک کے برعکس بینک الفلاح 3 سے 6 ماہ میں ادائیگی کی سہولت بھی فراہم کر رہا ہے جس پر کوئی مارک اپ (mark up) بھی لاگو نہیں۔ تاہم 12 ماہ اور اس سے زائد عرصے کے لیے بینک الفلاح کی مقرر کردہ ماہانہ اقساط میزان بینک کے مقابلے میں قدرے زیادہ ہیں۔

دورانیہ / برائے YBR 125 بینک الفلاح میزان بینک
(زیادہ سے زیادہ)
3 ماہ 43,133 روپے
6 ماہ 21,567 روپے
12 ماہ 13,048 روپے 11,212 روپے
24 ماہ 7,656 روپے 6,380 روپے
36 ماہ 5,859 روپے 4,815 روپے

یہاں یہ بات بھی قابل ذکر ہے کہ میزان بینک کی “بائیک اجارہ” اسکیم کے تحت سوزوکی (Suzuki) اور ہونڈا (Honda) موٹر سائیکلیں بھی ماہانہ اقساط پر حاصل کی جاسکتی ہیں۔ علاوہ ازیں اگر آپ آسان ماہانہ اقساط پر گاڑی خریدنا چاہتے ہیں تو پاک ویلز کار فائنانس کے صفحہ سے استفادہ حاصل کرسکتے ہیں۔ پاک ویلز اس وقت ملک بھر کے 11 بڑے بینکوں کے ذریعے اپنے صارفین کو بہترین ڈیلز فراہم کر رہا ہے۔

Asad Aslam

A PakWheeler with a degree in mass communication. He tweets as @masadaslam

  • 1 waited for YZF-R25 for almost year!
    Koi sense of responsibility ni hy Yamaha company main

Top