شاہ بدر بن سعود – دنیاکی واحد بوگاتی وژن گراں تورزمو ہائپر کار کا نیا مالک!
پاک ویلز بلاگ کے مستقل قارئین کو یاد ہوگا کہ اب سے چند ماہ قبل جنیوا موٹر شو میں بوگاتی نے مشہور زمانہ ویرون کے بعد پیش کی جانے والی گاڑی کی جھلک دکھائی تھی۔ دراصل یہ ایک گاڑی کے تصور کی جھلک تھی جس سے اندازہ لگایا جاسکتا تھا کہ بوگاتی کس سمت میں پیش رفت کر رہا ہے۔ اور پھر بوگاتی وژن گراں تورزمو سے نقاب اٹھا دیا گیا۔ اس گاڑی کی خاص بات یہ ہے کہ بوگاتی کی جانب سے اب تک صرف ایک ہی وژن گراں تورزمو ہے۔ کل تک دنیا کی واحد وژن گراں تورزمو کی ملکیت بوگاتی کے پاس تھی تاہم اب اسے ایک نئے مالک نے خرید لیا ہے۔ اور دلچسپ بات یہ ہے کہ اس کا نیا مالک سُپر کارز کے شوقین سعودی شہزادوں میں سے ایک ہے۔
بوگاتی وژن گراں تورزمو کے نئے مالک شاہ بدر بن سعود ہیں جن کا تعلق سعودی عرب کے شاہی خاندان سے ہے۔ ان کے مجموعی اثاثوں کی مالیت 21 ارب ڈالر ہے۔ انہوں نے پچھلے دنوں فرینکفرٹ موٹر شو میں دکھائی جانے والی وژن گراں تورزمو کی ہوبہو گاڑی خرید لی ہے۔ صرف یہی نہیں بلکہ ان کے دل کو بوگاتی کیرون بھی خوب بھائی اور اس حد تک بھائی کے وہ اسے خریدے بغیر بھی نہ رہ سکے۔ یوں سعودی شہزادے نے بیک وقت ایک نہیں بلکہ دو ہائپر کارز اپنے نام کیں جو کم از کم ہمارے لیے تو انتہائی حیرت اور دلچسپی کی بات ہے۔
یہ بھی پڑھیں: یورو 2016 کے ہیرو کرسٹیانو رونالڈو نئی بوگاتی ویرون خریدیں گے!
ہائپر کارز کے زمرے میں شامل ان دونوں گاڑیوں میں بوگاتی کا تیار کردہ 8 ہزار سی سی quad ٹربو W16 انجن شامل ہے۔ یہ انجن 1180 فٹ پاؤنڈ ٹارک کے ساتھ 1500 بریک ہارس پاور بھی فراہم کرتا ہے۔ یوں گاڑی صرف 2.5 سیکنڈ کے انتہائی کم وقت میں 100 کلومیٹر فی گھنٹہ کی رفتار پکڑ لیتی ہے۔ بوگاتی نے اب تک اس بارے میں کوئی تفصیلات فراہم نہیں کیں کہ سعودی شہزادے نے ان گاڑیوں کی نیلامی میں کیا بولی لگائی تھی۔ تاہم کیرون کی 26 لاکھ امریکی ڈالر قیمت دیکھتے ہوئے اندازہ لگایا جاسکتا ہے کہ ان دو ہائپر کارز کو لگ بھگ 70 لاکھ امریکی ڈالر میں نیلام کیا گیا ہوگا۔
اس خبر کے منظرعام پر آنے کے بعد لوگوں میں تاثر پایا جارہا تھا کہ اب دنیا کی پہلی وژن گراں تورزمو سعودی شہزادے کے گیراج میں قید ہو جائے گی اور گاڑیوں کے شوقین افراد مستقبل میں اس کے دیدار سے محروم رہیں گے۔ تاہم بوگاتی نے یہ اعلان کر کے وژن گراں تورزمو کے مداحوں کو تسلی بخشی ہے کہ وہ اسے کیلی فورنیا کے ساحلی علاقے پیبل بیچ پر ہونے والے سالانہ آٹو شو میں بھی دکھائے گا۔
