پروٹون X70 کی ڈیلیوریز شروع کر دی گئیں
گاڑیوں کی بڑھتی قیمتیں اور ڈیلیوریز میں تاخیر کے باعث ملکی انڈسٹری بدترین بحران کا شکار ہے۔ پروٹون پاکستان بھی ان کمپنیز میں شامل ہے جو عالمی وبا کورونا کی وجہ سے لگائی پابندیوں اور سٹیٹ بینک کی جانب سے لیٹر آف کریڈٹ نہ جاری کرنے کے باعث ڈیلیوریز میں تاخیر کا سامنا کر رہی ہے۔ لیکن کمپنی کی جانب سےصارفین کیلئے ایک اچھی خبر سامنے آئی ہے۔
ذرائع کے مطابق پروٹون X70 کی ڈیلیوریز کا آغاز کر دیا گیا ہے۔ کمپنی نے طلب کو پورا کرنے کے لیے گودام اور اسپیئر پارٹس کی سپلائی کی تنظیم نو کی ہے۔ یعنی کہ ہم جلد ہی مقامی سڑکوں پر کراس اوور SUV دیکھ سکیں گے۔
ڈیلرشپ کو ڈیلیور کیے جانے والی کراس اوور کی چند تصاویر یہ ہیں۔
یہ پروٹون کے صارفین کے لیے ایک بہت اچھی خبر ہے کیونکہ اس سے قبل کمپنی کو اس معاملے پر ردعمل کا سامنا کرنا پڑا ہے۔ ہم امید کرتے ہیں کہ پروٹون تمام مسائل کو حل کرتے ہوئے صارفین کی شکایات کو ختم کرے گا۔
قیمت میں اضافہ
گزشتہ روز پروٹون کاروں کی قیمتوں میں اضافہ دیکھا گیا۔ ایک نوٹیفکیشن میں الحاج آٹوموٹیو نے کہا کہ قیمتوں میں اضافے کی وجوہات میں روپے کے مقابلے میں امریکی ڈالر کا چڑھاؤ، عالمی سپلائی چین میں خلل اور فریٹ چارجز میں اتار چڑھاؤ شامل ہیں۔ مزید برآں، حکومت نے لیٹر آف کریڈٹ (LC) کھولنے پر پابندیاں عائد کر دی ہیں، جس سے CKD کٹس کی مطلوبہ مقدار کی درآمد کے چیلنجز میں اضافہ ہو گیا ہے۔
پاکستان میں پروٹون ایکس 70 کی قیمت
اور پاکستان میں پروٹون X70 کی نئی قیمتیں یہ ہیں۔
- پروٹون X70 پریمیم FWD ویرینٹ کی قیمت میں 900000 روپے کا اضافہ کیا گیا ہے جس کے بعد گاڑی کی قیمت 6400000 روپے سے بڑھ کر 7300000 روپے ہو چکی ہے۔ اسکے علاوہ پرانی بکنگ والوں کو 7100000 ادا کرنا ہوں گے۔
- پروٹون X70 ایگزیکٹیو AWD ویرینٹ کی قیمت میں 800000 روپے کا اضافہ کیا گیا ہے جس کے بعد گاڑی کی قیمت 6050000 روپے سے بڑھ کر 6850000 روپے ہو چکی ہے۔
کیا آپ نے پروٹون X70 بُک کروائی ہے؟ اس خبر کے بارے میں آپ کیا سوچتے ہیں؟ کمنٹ سیکشن میں اپنی رائے کا اظہار کریں۔