نئی کیا فورٹ 2019ء کی نقاب کشائی؛ پاکستان کے لیے بہترین گاڑی!
اس بات سے تو سب ہی واقف ہیں کہ کیا موٹرز، لکی سیمنٹ گروپ کی اشتراک سے ایک مرتبہ پھر پاکستان میں قدم رکھنے والا ہے۔ پہلے تو کیا اور ہونڈائی دونوں ہی دیوان گروپ کی چھتری تلے کام کر رہے تھے لیکن جب سے دیوان موٹرز نے کوریائی گاڑیوں کی تیاری کا سلسلہ بند کیا ہے، تب ہی سے گاڑیاں بنانے والے کوریائی ادارے نئے پاکستانی شراکت داروں کی تلاش میں تھے۔ اب ہونڈائی نے نشاط گروپ کے ساتھ شراکت قائم کر لی ہے جبکہ کیا موٹرز لکی گروپ کے ساتھ کام کر رہا ہے۔ اور اب تو کیا نے نئی کیا فورٹ 2019 بھی متعارف کروا دی ہے جو پاکستان میں ٹویوٹا کرولا اور ہونڈا سوک کے مقابلے میں کیا موٹرز کا سب سے طاقتور ہتھیار ثابت ہوسکتا ہے۔
امریکا میں جاری ڈیٹرائٹ آٹو شو 2018ء میں کیا موٹرز کی جانب سے فورٹ 2019 کی نقاب کشائی کی گی ہے۔ اس کا انداز پہلے سے زیادہ ہموار اور کوپے سے ملتا جلتا ہے۔ کیا کا کہنا ہے کہ نئی فورٹ 2019 کا انداز کیا اسٹنگر سے اخذ کیا گیا ہے۔ اس کا بیرونی عقبی حصہ پیچھے کی طرف ڈھلوان میں ہے جس سے یہ پہلی نظر ہی میں انہتائی برق رفتار گاڑی محسوس ہوتی ہے۔ نئی کیا فورٹ 182.7 انچ لمبی ہے اس لحاظ سے یہ پرانے ماڈل کی نسبت 3.2 زیادہ لمبی ہوئی۔ اس کے علاوہ یہ پرانی فورٹ کے مقابلے میں 0.7 انچ زائد چوڑائی اور 0.5 انچ اضافی اونچائی کی بھی حامل ہے۔
کیا نے فورٹ 2019 میں نہ صرف سسپنشن کو مزید بہتر بنایا ہے بلکہ اس کے برقی پاور اسٹیئرنگ کو بھی مزید آرام دہ اور استعمال میں آسان بنایا ہے۔
انجن کی بات کریں تو اس نئی گاڑی میں بھی فورٹ کے پچھلے ماڈل کی طرح 2000cc اور 4-سلنڈر انجن شامل ہے۔ یہ انجن 147 ہارس پاور اور 132 فٹ پاؤنڈ ٹارک فراہم کرنے کی قوت رکھتا ہے۔ اس انجن کو 6- اسپیڈ مینوئل یا کیا موٹرز کے نئے ویریئبل ٹرانسمیشن (IVT) کے ساتھ پش کیا جائے گا۔ یاد رہے کہ IVT دراصل CVT ہی کی ایک طرز ہے جسے کیا موٹرز نے اپنے حساب سے ڈھالا ہے۔
آئیے، اب آپ کو کیا فورٹ 2019 کی تصاویر دکھاتے ہیں:
ہم امید کرتے ہیں کہ لکی موٹر نئی فورٹ کو ایک نہ ایک دن پاکستان میں ضرور پیش کرے گا۔ کیا آپ بھی ایسا ہی سوچتے ہیں؟ ہمیں اپنی رائے سے ضرور آگاہ کیجیے۔