سال 2017ء کے دوران پاکستان میں آوڈی کی تین نئی گاڑیاں پیش کی جائیں گی
جرمنی سے تیار شدہ نئی گاڑیاں درآمد اور فروخت کرنے والا ادارہ آوڈی پاکستان رواں سال 2017ء میں تین نئی گاڑیاں متعارف کروانے کی منصوبہ بندی کر رہا ہے۔ ملک میں صارفین کی کثیر تعداد رکھنے والے ادارے نے گزشتہ سال آوڈی A3 پیش کر کے سب کو حیران کردیا تھا۔ انتہائی کم قیمت پر متعارف کروائی جانے والی A3 سیڈان کی آمد سے جرمن گاڑیوں سے منسوب بہت زیادہ مہنگا ہونے کے تاثر کی نفی ممکن ہوپائی۔ حال ہی میں آوڈی پاکستان نے اپنے صارفین کے لیے گاڑیوں کی مرمت اور مینٹی نینس سروس بھی شروع کردی ہے جس سے اندازہ لگایا جاسکتا ہے کہ پاکستان میں آوڈی اپنے کاروبار کو مزید وسعت دینے کا خواہش مند ہے۔
پاکستان میں پیش کی گئی گاڑیوں پر نظر ڈالیں تو جنوری 2017ء میں یہاں ٹویوٹا فورچیونر پیش کی جاچکی ہے جبکہ فروری اور مارچ میں ہونڈا BR-V اور سوزوکی سیاز کی آمد متوقع ہے۔ البتہ جرمن گاڑیوں کی مارکیٹ پر نظر ڈالیں تو ایسا محسوس ہوتا ہے کہ آوڈی پاکستان یہاں جرمن گاڑیاں فروخت کرنے والے تمام ہی اداروں سے بازی لے جانا چاہتا ہے۔ ذرائع کے مطابق آوڈی پاکستان کم از کم تین نئی گاڑیاں ملک میں متعارف کروانے کی کوششوں میں مصروف ہے۔ یہ تین گاڑیاں کون سی ہیں؟ آئیے ہم آپ کو بتاتے ہیں:
آوڈی Q2
گو کہ آوڈی کو ہمیشہ ایک پرتعیش اور مہنگی گاڑیوں کا برینڈ تصور کیا گیا ہے تاہم حقیقت میں یہ اپنے صارفین کو کم قیمت گاڑیاں بھی فراہم کر تا آرہا ہے۔ اسی ضمن میں آوڈی پاکسان نے 1000cc ٹربوچارجڈ انجن کی حامل Q2 متعارف کروانے کا فیصلہ کیا ہے۔ سال 2017ء کی پہلی سہہ ماہی میں متوقع یہ گاڑی اگلے پہیوں کی قوت سے چلنے کی صلاحیت کی حامل ہوگی۔ ذرائع بتاتے ہیں کہ پاکستان میں آوڈی Q2 کی قیمت 30 سے 33 لاکھ روپے تک رکھی جاسکتی ہے جو دیگر حریف گاڑیوں کے مقابلے میں بہت کم ہے۔
یہ بھی پڑھیں: آوڈی پاکستان نے اپنی سروسز کے نرخ جاری کردیئے
آوڈی Q5
آوڈی کی یہ اسپورٹس یوٹیلٹی وہیکل نہ صرف اپنے خوبصورت انداز کی وجہ سے مشہور بلکہ اسے مختلف انجن کے انتخاب کی وجہ سے بھی پسند کیا جاتا ہے۔ آوڈی Q5 میں تین مختلف انجن پیش کیے جاتے ہیں جن میں 2000cc پیٹرول اور ڈیزل انجن کے علاوہ ایک 3000cc ڈیزل انجن بھی شامل ہے۔ 2000ccڈیزل انجن کی حامل آوڈی Q5 کو بہت زیادہ مقبولیت حاصل رہی ہے جس کی بنیادی وجہ دیگر ماڈلز کے مقابلے میں کم قیمت ہے۔ جبکہ 3000cc ڈیزل انجن کو اس کے بہترین ماڈل SQ5 میں پیش کیا جاتا ہے۔ 2000cc پیٹرول انجن کی بات کریں تو یہ ایندھن بچانے کی قابلیت بھی رکھتا ہے اور یوں کم خرچ میں زیادہ سفر ممکن ہوپاتا ہے۔ توقع کی جارہی ہے کہ آوڈی Q5 کو تین مختلف ماڈل یہاں متعارف کروائے جاسکتے ہیں جن میں سادہ ماڈل SE، اوسط درجے کا اسپورٹ ماڈل اور بہترین S لائن شامل ہوگا۔ آوڈی پاکستان رواں سال کی تیسری سہہ ماہی میں آوڈی Q5 کی قیمت اور دیگر تفصیلات کا اعلان کرے گی۔
آوڈی A5 اسپورٹس بیک
کوپے طرز کی سیڈان طرز کی کوپے آوڈی A5 اسپورٹس بیک درحقیقت آوڈی A7 ہی کا ایک ماڈل کہا جاسکتا ہے جو قیمت اور آسائش میں قدرے کم ہے۔اس گاڑی کو پیش کرنے کا مقصد جرمن سیڈان رکھنے کے خواہشمند خریداروں کو بہترین گاڑی فراہم کرنا ہے۔ آوڈی پاکستان رواں سال 2017ء کی پہلی سہہ ماہی میں اس کی قیمت اور دیگر تفصیلات جاری کرے گا۔
