ٹوکیو موٹر شو: ہونڈا 3 خیالی موٹر سائیکل پیش کرے گا
رواں ماہ شروع ہونے والے 44 ویں ٹوکیو موٹر شو 2015 میں ایک طرف گاڑیوں کے شوقین افراد کے لیے نئی ہونڈا سِوک ٹائپ آر پیش کی جا رہی ہے تو دوسری طرف موٹر سائیکل کے دلدادہ افراد کے لیے بھی ہونڈا موٹرز تین خیالی موٹر سائیکل (concept motorcycles) پیش کر رہا ہے۔ ان موٹر سائیکلوں کے نام ہونڈا لائٹ ویٹ سُپر اسپورٹس (Honda Light Weight Super Sports)، ہونڈا نیوِنگ (Honda NEOWING) اور ہونڈا EV-Cub رکھے گئے ہیں۔ ان کی مزید تفصیلات نیچے بیان کی جارہی ہیں۔
ہونڈا لائٹ ویٹ سُپر اسپورٹس
یہ خیالی موٹر سائیکل ہونڈا سی بی آر کی فہرست میں نئے ڈیزائن کا مظہر ہوگی۔ اسے دیکھ کر ہونڈا کی جانب سے پیش کی جانے والی CBR250RR کے ڈیزائن کا بھی اندازہ لگایا جاسکتا ہے۔ اس کا انداز جہاں جذباتی ہے وہیں جدیدت کا بھی اظہار کرتا ہے۔ بلاشبہ یہ بائیک یاماہا کے R3 طرز فکر کا مقابلہ کرنے کی اہلیت رکھتی ہے۔ اس کی زیادہ تفصیلات تو ٹوکیو موٹر شو ہی میں بتائی جائیں گی البتہ جو تصاویر ہمیں حاصل ہوئیں انہیں دیکھ کر اندازہ لگایا جاسکتا ہے کہ یہ ماضی میں پیش کی جانے والی سی بی آر موٹر سائیکل ہی کی طرح اونچی سیٹس اور بڑے سیلنسر کی حامل ہوگی۔
یہ بھی پڑھیں: ہونڈا سِوک ٹائپ آر بمقابلہ ہونڈا CBR بائیک
ہونڈا نیوِنگ
اسے فہرست کی سب سے عجیب موٹر سائیکل کہا جائے تو غلط نہ ہوگا۔ اس کے تین پہیوں سے جہاں چلانے والے کو زیادہ سہولت میسر آئے گی وہیں اس کا انداز کی دلکشی میں بھی اضافہ ہوگا۔ ہونڈا نیوِنگ میں 4 سلینڈر والے برقی انجن لگائے جائیں گے۔ ہونڈا کا کہنا ہے کہ اس میں برق رفتاری کے لیے بہت زیادہ طاقت ہے۔
ہونڈا EV-Cub
اگر آپ طویل عرصے سے موٹر سائیکل چلاتے رہے ہیں تو آپ نے ہونڈا سُپر کب سے متعلق ضرور سنا ہوگا۔ 1958 میں پیش کی جانے والی مذکورہ موٹر سائیکل دنیا میں سب سے زیادہ تیار ہونے والی بائیک ہے۔ یہ تقریباً 9 کروڑ کی تعداد میں تیار اور فروخت کی جا چکی ہیں۔ اب ہونڈا اپنی EV-Cub پیش کر کے ان پرانے دنوں کی یادیں تازہ کرنا چاہتا ہے۔ پہلی نظر میں ہی ایسا لگتا ہے کہ یہ موٹر سائیکل ہونڈا سُپر کب کا جدید انداز ہے۔ اس برقی موٹر سائیکل کو ہونڈا ذاتی استعمال اور کم سفر کرنے والوں کے لیے پیش کرنے کا ارادہ رکھتا ہے۔ اس کی بیٹری کو نچلے حصے میں لگایا گیا ہے تاکہ اسے آسانی سے الگ کیا جاسکے اور پھر دوبارہ بھی لگایا جاسکے۔ یعنی جب آپ موٹر سائیکل کھڑی کر کے جائیں تو اپنے ہمراہ بیٹری بھی لے جائیں۔ بیٹری نہیں ہوگی تو موٹر سائیکل نہیں چلے گی اور یوں چوری کی واردات سے بھی بچ جائیں گے۔
