ٹویوٹا پاکستان کے نئے سربراہ کا اعلان کردیا گیا
پاکستان میں ٹویوٹا گاڑیاں فروخت کرنے والے ادارے انڈس موٹر کمپنی (IMC) کے نئے سربراہ کا اعلان کردیا گیا ہے۔ بحیثیت چیف آپریٹنگ آفیسر ادارے سے وابستہ علی اصغر جمالی کو ترقی دے کر چیف ایگزیکٹو آفیسر کا منصب دینے کا فیصلہ کیا گیا ہے۔ علی اصغر جمالی یکم جنوری 2017 سے موجودہ سربراہ پرویز غیاث کی جگہ یہ عہدہ سنبھالیں گے۔
انگریزی روزنامے بزنس ریکارڈر کے مطابق انڈس موٹرز کی سیکریٹری انعم فاطمہ نے پاکستان اسٹاک ایکسچینج (PSE) کو بھی ادارے میں ہونے والی اہم تبدیلی سے متعلق آگاہ کردیا ہے۔ کمپنی سیکریٹری نے بتایا کہ گزشتہ جمعرات ہونے والی مجلس منتظمین میں انڈس موٹرز کے سربراہ پرویز غیاث نے ادارے کی سربراہی سے مستعفی ہونے کے فیصلہ سے آگاہ کیا۔ مجلس منتظمین نے پرویز غیاث کا استعفی قبول کرتے ہوئے علی اصغر جمالی کو نیا سربراہ نامزد کردیا ہے۔ اس سے قبل علی اصغر جمالی انڈس موٹرز میں مختلف شعبوں میں فرائض سرانجام دے چکے ہیں۔ انہوں نے پاکستان میں نئی ٹویوٹا کرولا کی پیشکش اور کامیاب تشہیری مہم میں بھی کلیدی کردار ادا کیا ہے۔