سوزوکی مہران؛ سال 2017 کی مقبول ترین گاڑی!
1989 میں آمد سے اب تک سوزوکی مہران نے جہاں لاکھوں پاکستانیوں کی محبت سمیٹی وہیں نفرت کی جھرکیاں بھی کھائیں۔ محبت کا سبب کم قیمت اور سستی مینٹیننس رہی جبکہ وقت کے شانہ بشانہ آگے نہ بڑھنے کی وجہ سے یہ ہیچ بیک ناپسندیدہ بھی قرار پائی۔
2017 میں پاک سوزوکی نے 42,985 سوزوکی مہران فروخت کیں اور یوں وہ گزشتہ سال سب سے زیادہ فروخت ہونے والی ہیچ بیک بن گئی۔ اس سے اندازہ لگایا جاسکتا ہے کہ قدیم زمانے سے تعلق رکھنے والی ایک چھوٹی گاڑی کو لوگ آج بھی کس قدر پسند کرتے ہیں۔ یاد رہے کہ اس وقت پاکستان میں سوزوکی مہران کے دو ماڈل VX اور VXR دستیاب ہیں۔
گزشتہ کئی سالوں سے ہم سن رہے ہیں کہ سوزوکی مہران کی پاکستان میں تیاری بند کی جا رہی ہے، لیکن ہر بار یہ باتیں محض افواہ ہی ثابت ہوئیں۔ پچھلے سال نومبر میں ایک بار پھر ایسی خبریں گردش کرنے لگیں کہ اب تو سوزوکی مہران کا آخری وقت آہی گیا ہے اور اس کی جگہ 800cc انجن والی نئی آلٹو پیش کی جانے والی ہے۔ صرف یہی نہیں بلکہ یہ بھی کہا گیا کہ مہران کی مقبولیت کو دیکھتے ہوئے نئی آلٹو کو بھی مہران ہی کا نام دیا جائے۔
ہمیں یہ بھی بخوشی قبول تھا مگر پھر وہی دھات کے تین پات۔ رواں سال کے اوائل میں سوشل میڈیا پر کچھ غیر سرکاری ذرائع نے یہ کہہ کر تمام خوشیوں پر پانی پھیر دیا کی کہ نہ تو مہران کی تیاری بند کی جا رہی ہےاور نہ اسے کسی دوسری گاڑی سے تبدیل کیا جا رہا ہے۔ اس کا مطلب یہ ہے کہ تنقید کا ہر نشتر سہہ لینے کے باوجود ’سوزوکی مہران‘ پاکستانی مارکیٹ میں دم خم کے ساتھ موجود ہے اور آئندہ بھی رہے گی۔
تازہ ترین اعداد و شمار کے مطابق جنوری 2018 میں پاک سوزوکی نے 4324 مہران فروخت کیں۔ اگر ہم دسمبر 2017 سے اس کا موازنہ کریں تو پتا چلتا ہے کہ گزشتہ ماہ 934 اضافی گاڑیوں کی فروخت ہوئی ہیں۔
آئیے، اب مہران کے علاوہ دیگر ہیچ بیک کی 2017 میں فروخت سے متعلق بھی بات کرتے ہیں۔
سوزوکی ویگن آر: پاک سوزوکی نے 2017 میں 24247 ویگن آر فروخت کیں۔ اس طرح یہ مہران کے بعد سب سے زیادہ فروخت ہونے والی ہیچ بیک بن گئی۔ پاک سوزوکی ویگن آر کے دو مختلف ماڈل VXR اور VXL پیش کر رہا ہے۔
سوزوکی کلٹس: پاک سوزوکی نے گزشتہ سال 19404 کلٹس بیچیں۔ یاد رہے کہ سوزوکی پاکستان نے گزشتہ سال دسمبر میں نئی AGS کلٹس 2018 متعارف کروائی تھی۔
سوزوکی سوفٹ: گزشتہ سال سوزوکی نے 4237 سوفٹ فروخت کیں۔
فا V2:
یہ چینی ہچ بیک مقامی مارکیٹ میں خاصی مقبول ہو رہی ہے۔ الحاج FAW کی جانب سے پاک ویلز کو فراہم کیے جانے والے اعداد و شمار کے مطابق 2016 میں 1508 FAW V2 فروخت کی گئی تھیں جبکہ گزشتہ سال 2017 میں یہ تعداد بڑھ کر 2555 تک جا پہنچی ہے۔
