ٹویوٹا کی جانب سے وِکٹر شیپرڈ کے لیے تُندرا 2016 کا تحفہ
گزشتہ کئی دنوں سے ٹویوٹا تُندرا خبروں کی زینت بنا ہوا ہے جس کی وجہ ٹویوٹا نہیں بلکہ وِکٹر شیپرڈ نامی امریکی شہری ہے۔ وکٹر شیپرڈ نے گزشتہ دس سالوں کے دوران اپنے ٹویوٹا تُندرا 2007 میں 10 لاکھ میل سفر کیا ہے لیکن اس کے باوجود ان کا ٹرک بالکل نیا لگتا ہے۔ اس سے اندازہ لگایا جاسکتا ہے کہ ٹویوٹا کی گاڑیاں کتنی پائیدار اور قابل بھروسہ ہوتی ہیں۔ اب تازہ ترین خبر یہ ہے کہ وِکٹر کے پاس ایک نیا تُندرا ٹرک ہے جسے وہ ایک بار پھر دس لاکھ میل سے زائد چلانے کا عزم رکھتے ہیں۔
جب وِکٹر شیپرڈ اپنے پرانے تُندرا ٹرک کو امریکی ریاست نیو اورلینز میں قائم ٹویوٹا ڈیلر شپ لے کر گئے تو وہاں موجود ہر شخص یہ دیکھ کر حیران رہ گیا کہ 10 لاکھ میل مسافت کے باوجود اس کی حالت بالکل نئے ٹرک جیسی ہے۔ ٹویوٹا اس سے اتنا متاثر ہوا کہ انہوں نے وِکٹر کو پرانے ٹرک کے بدلے میں بالکل نیا ٹویوٹا تُندرا 2016 دینے کا فیصلہ کیا اور وہ بھی بالکل مفت!
یہ بھی پڑھیں: ٹویوٹا تُندرا 2007؛ 10 لاکھ میل چلنے کے باوجود بھی بالکل نئی جیسی حالت!
وِکٹر شیپرڈ امریکی ریاست لاس اینجلس میں رہتے ہیں تاہم انہیں کاروباری مقاصد کے لیے شمالی ڈکوٹا، وائیومنگ اور ورجینیا تک سفر کرنا پڑتا ہے۔ ایک اندازے کے مطابق وِکٹر نے سالانہ 1 لاکھ 25 ہزار میل سفر کیا اور یوں دس سال سے بھی کم عرصے میں ان کا اوڈومیٹر 10 لاکھ میل کا سنگ میل عبور کرگیا۔
مجھے یقین ہے کہ ہمارے بہت سے قارئین BBC کے مشہور پروگرام ٹاپ گیئر کی وہ قسط دیکھ چکے ہوں گے کہ جس میں پرانے ہائی لکس ویگو (Hilux Vigo) ٹرک کو توڑنے کے لیے مختلف حربے استعمال کیے گئے لیکن اس کے باوجود وہ ناکارہ نہیں ہوا۔ آپ چاہے ٹویوٹا کے مداح ہوں یا ناقد، ایک بات تو تسلیم کرنی ہی پڑے گی کہ ٹویوٹا کی گاڑیاں زیادہ طویل عرصے ساتھ دیتی ہیں۔ یہی وجہ ہے کہ پاکستان میں ٹویوٹا گاڑیوں کی پسند اور مانگ میں مسلسل اضافہ ہورہا ہے۔ اس کی ایک مثال ٹویوٹا کرولا XLi سے لی جاسکتی ہے جو اس وقت پاکستان میں سب سے زیادہ فروخت ہونے والی گاڑیوں میں سے ایک ہے۔
ٹویوٹا نے ارادہ ظاہر کیا ہے کہ وہ وِکٹر شیپرٹ کے تُندرا 2007 (Toyota Tundra) پر تحقیق کرے گا اور اس کی بہترین حالت کے پیچھے کار فرما خصوصیت معلوم کرنے کی کوشش کرے گا۔ ہوسکتا ہے ٹویوٹا کو اس میں کوئی ایسی چیز مل جائے جس سے وہ مستقبل میں اپنی گاڑیوں کی پائیداری میں مزید اضافہ کرسکے۔
