پاکستان میں دستیاب 7 نشستوں والی گاڑیاں
ایک عرصے سے پاکستان میں 7 نشستوں والی گاڑیوں، جنہیں انگریزی میں Seven Seater کہا جاتا ہے، کا فقدان نظر آرہا ہے۔ یہ گاڑیاں اپنی گنجائش بالخصوص سات افراد کے لیے آرامدہ نشستوں کی وجہ سے بڑے خاندان کے لیے نہایت مفید ثابت ہوتی ہیں۔ ہم یہاں ان پرتعیش گاڑیوں جیسا کہ V8 اور لینڈ کروزر کی بات نہیں کر رہے، بلکہ ان گاڑیوں کا ذکر کر رہے ہیں جنہیں پاکستانی صارفین کی قوت خرید کے لیے مناسب سمجھا جاسکتا ہے۔ تو آئیے آپ کو ایسی ہی چند مناسب قیمت والی سیون سیٹر گاڑیوں سے متعارف کرواتے ہیں۔
ہونڈا BRV
ہونڈا کی جانب سے کچھ عرصہ قبل پیش کی جانے والی ہونڈا BRV بڑے خاندان کے لیے ایک اچھی گاڑی ہے۔ اس میں 1500cc انجن شامل ہے جو نہ صرف کفایت بلکہ کارکردگی کے حساب سے بھی بہترین ہے۔ ہونڈا BRV کی قیمت 22 لاکھ روپے رکھی گئی ہے اور ایک بڑے خاندان کے لیے نئی گاڑی کو مدنظر رکھا جائے تو یہ قیمت بہت مناسب معلوم ہوتی ہے۔
ٹویوٹا پرائیوس ایلفا:
یہ سات نشستوں والی ہائیبرڈ گاڑی ہے جس میں 1800cc انجن شامل ہے۔ پاکستانی مارکیٹ میں اس کی مانگ قابل ذکر رہی ہے۔ پرائیوس ایلفا میں کئی منفرد سہولیات بھی شامل ہیں جو اسے دیگر کے مقابلے میں ممتاز بناتی ہیں۔ اس کے 2013-2014 ماڈل کی قیمت لگ بھگ 28 لاکھ روپے ہے۔
ہونڈا فریڈ:
تکنیکی اعتبار سے دیکھا جائے تو ہونڈا فریڈ دراصل چھ نشستوں والی گاڑی ہے۔ اس کے آگے، درمیانی اور پچھلے حصے میں دو دو افراد باآسانی بیٹھ سکتے ہیں۔ البتہ مسافروں کے دل میں جگہ ہو تو کسی ایک نشست پر ساتواں فرد بھی آ ہی جائے گا۔ اس ہائبرڈ گاڑی میں 1500cc انجن شامل ہے۔ اس کا 2013-2014 ماڈل پاکستان میں 17 سے 18 لاکھ روپے میں دستیاب ہے تاہم مارکیٹ میں اس کی غیر مقبولیت اور پرزوں کی دستیابی کی وجہ سے کم ہی لوگ اسے خریدنا پسند کرتے ہیں۔
ہونڈا کراس روڈ:
پاکستان میں اس گاڑی کا نام بہت زیادہ مشہور و مقبول نہیں۔ ہونڈا کراس روڈ میں 1800cc انجن شامل ہے۔ اس گاڑی کی سب سے زیادہ قابل ذکر بات خوبصورت اور جاندار انداز ہے۔ ہونڈا کراس روڈ میں دور جدید کی تمام سہولیات مثلاً ملٹی میڈیا اسٹیئرنگ، بٹن سے گاڑی اسٹارٹ کرنے کی سہولت اور ہائبرڈ ٹیکنالوجی شامل ہے۔ اس کا 2010-2011 ماڈل تقریباً 30 لاکھ روپے میں خریدا جاسکتا ہے۔
ہونڈا اوڈیسی:
پاکستان میں ہونڈا اوڈیسی بہت کم دیکھی جاتی ہے۔ باوجودیکہ اس میں 2500cc انجن شامل ہے۔ شاید اس کے مشہور نہ ہونے کی بنیادی وجہ وین جیسی شکل ہے۔ ہونڈا اوڈیسی کا 2010-2011 ماڈل لگ بھگ 30 لاکھ روپے میں مل جاتا ہے۔