سوزوکی کلٹس بمقابلہ زوتیے Z100؛ دو نئی گاڑیوں کا موازنہ
آٹو پالیسی 2016-21 نافذ ہوجانے کے بعد گاڑیوں کے شعبے میں بہت مثبت تبدیلیاں رونما ہورہی ہیں۔ تاہم اوسط-قیمت اور چھوٹی گاڑیوں کی فہرست پر نظر ڈالیں تو یہ اب بھی بہت محدود نظر آتی ہے۔
پاکستان میں چھوٹی گاڑیوں، جنہیں انگریزی میں ہیچ بیک کہا جاتا ہے، بہت زیادہ پسند کی جاتی ہیں۔ بالخصوص ان گنجان آباد شہروں میں جہاں کی اکثر آبادی متوسط طبقے سے تعلق رکھتی ہے اور چھوٹی گاڑیاں اس طبقے کی سفری ضروریات کو بخوبی پورا کرتی ہیں۔ اور یہیں مقابلہ ہوتا ہے زوتیے Z100 اور سوزوکی کلٹس کے درمیان۔
تاریخ
اس سے پہلے کہ ہم تکنیکی اعتبار سے دونوں گاڑیوں کو پرکھنا شروع کریں، بہتر ہوگا کہ قارئین کو ان کی تاریخ سے آگاہ کرتے ہیں تاکہ آپ بہتر طور پر ان کا تقابل سمجھ سکیں۔
22 اپریل 2017 کو پاکستان میں سوزوکی کلٹس کے تیسرے دور کا آغاز ہوچکا ہے۔ نئی سوزوکی کلٹس نے پوری کلٹس برانڈ کو ایک نئی جہت سے روشناس کروایا ہے اور یہ اب تک پیش کی جانے والی تمام کلٹس کے مقابلے میں کہیں زیادہ عمدہ انداز کی حامل ہے۔
دوسری طرف، ایچ آر ایل موٹرز نے چینی ادارے زوتیے کے ہمراہ کم قیمت گاڑیاں متعارف کروانے کا سلسلہ شروع کیا ہے اور مارکیٹ میں پیش کی جانے والی پہلی گاڑی زوتیے Z100 ہے۔
ظاہری انداز
سوزوکی کلٹس کی تیسری جنریشن ایک چھوٹی یعنی ہیچ بیک ڈیزائن کی حامل ہے۔ اس کے اگلے حصے میں زاویائی انداز کی حامل کروم گِرل موجود ہے جس کے دائیں اور بائیں خوبصورت ہیڈلائٹس بمع روایتی گول فوگ لائٹس (دھند کو چھاٹنے والی تیز روشنیاں) شامل ہیں۔ جبکہ پچھلے حصے میں نئے اور منفرد انداز کی حامل اسٹاپ لائٹس موجود ہیں۔ سوزوکی کلٹس کا مجموعی انداز خاصہ منفرد اور ہموار نظر آتا ہے۔ یہی وجہ ہے کہ اسے پاکستان میں دستیاب درآمد شدہ جاپانی گاڑیوں کے ہم پلہ سمجھا جاسکتا ہے۔
زوتیے کے ظاہری انداز کی بات کریں تو یہ بین الاقوامی سطح پر تین مختلف ماڈلز، اسٹینڈرڈ، کمفرٹ اور ایلائٹ، میں پیش کی جارہی ہے۔ اس میں الائے رمز کے علاوہ برقی آئینوں کی خصوصیت سب سے زیادہ قابل ذکر ہے۔
اندرونی حصہ:
سوزوکی کلٹس کے اندر جھانکیں تو دلکش اور جدت کا احساس ہوگا جو کہ ایک چھوٹی فیملی ہیچ بیک میں اضافہ خوبی شمار ہوتی ہے۔ کہیں کہیں آپ کو سیاہ چمڑے کا استعمال نظر آئے گا جو گاڑی کی خوبصورتی میں مزید اضافہ کرتا ہے۔ تیسری جنریشن سوزوکی کلٹس کی نمایاں خوبیوں میں دو ایئربیگز، پاور ونڈوز، سی ڈی پلیئر بمع آکس اور یو ایس بی اور پاور مررز شامل ہیں۔ سوزوکی کلٹس کا اندرونی حصۃ مجموعی طور پر بہت کشادہ اور آرامدہ معلوم ہوتا ہے۔
جبکہ زوتیے Z100 میں کہیں زیادہ قابل ذکر سہولیات موجود ہیں جن میں کار چوری سے بچانے کا نظام، الائے ویلز، برقی آئینے، پاور ونڈوز، سینٹرل لاکنگ، ایئر کنڈیشننگ، 2 اسپیکرز پر مشتمل اسٹیریو سسٹم بمع ریڈیو + ایم پی تھری کی قابلیت، برقی پاور اسٹیئرنگ، ٹرپ کمپیوٹر اور 4.5m ٹرننگ ریڈیئس سب سے زیادہ قابل ذکر ہیں۔
رنگ:
سوزوکی کلٹس 7 مختلف رنگوں میں دستیاب ہے۔ جس میں سرخ، بھورا، سفید، سیاہ، نیلا، نقرئی اور ہلکا خاکی رنگ شامل ہیں۔ جبکہ Z100 صرف چار رنگوں، سفید، سرخ، نیلے اور نقرئی رنگ ہی میں پیش کی گئی ہے۔
انجن کی قابلیت اور کارکردگی
سوزوکی کلٹس کی تیسری جنریشن میں 1000cc انجن (K10B) موجود ہے جو DOHC اور 12 والو پر مشتمل ہے۔
زوتیے Z100 یورو 4 معیارات کے حامل 1000cc انجن کے ساتھ پیش کی گئی ہے۔ یہ انجن 3-ان لائن 12 والو کا حامل ہے اور اسے 5-اسپیڈ مینوئل گیئر سے منسلک کیا گیا ہے۔ یوں Z100 کا انجن اور گیئر، 3500 آر پی ایم پر 67 بریک ہارس پاور اور زیادہ سے زیادہ 66.4 فٹ پاؤنڈ ٹارک فراہم کرتے ہیں۔ اس کی زیادہ سے زیادہ رفتار 150 کلومیٹر فی گھنٹہ ہے۔ ایچ آر ایل کا دعوی ہے کہ زوتیے ایک لیٹر ایندھن میں 18.9 کلومیٹر کا باآسانی سفر کرسکتی ہے۔ Z100 میں موجود 35 لیٹر ایندھن کی گنجائش دیکھتے ہوئے کہا جاسکتا ہے کہ ایک بار “ٹینک” پورا بھروانے پر یہ 660 کلومیٹر تک سفر کرسکتی ہے۔
حفاظتی سہولیات
سوزوکی کلٹس 2017 کے دونوں ہی ماڈلز میں بغیر چابی دروازہ کھولنے اور امموبلائزر کی خصوصیات شامل ہیں۔ کلٹس VXL ماڈل میں 2 ایئربیگز اور ABS بریکس دیے گئے ہیں جبکہ کم قیمت یعنی VXR ماڈل میں یہ دونوں چیزیں موجود نہیں۔ اس کے علاوہ حفاظتی بیلٹس اور نونہالوں کے لیے خصوصی سیٹس بھی دونوں ماڈل میں رکھی گئی ہے۔
جبکہ زوتیے Z100 کے تمام ہی ماڈلز میں ABS کے علاوہ EBD، ایئر بیگز اور گاڑی چوری ہونے سے بچانے کا نظام شامل ہے۔
قیمت
سوزوکی کلٹس کے دونوں ماڈلز کی قیمتیں درج ذیل ہیں:
- کلٹس 2017 VXR – 12,50,000 روپے
- کلٹس 2017 VXL – 13,91,000 روہے
ایچ آر ایل موٹرز کی متعارف کردہ زوتیے کی بات کریں تو 1000cc انجن اور مینوئل ٹرانسمیشن والی Z100 کی قیمت 11,72,000 روپے رکھی گئی ہے۔ ان کا مزید کہنا ہے کہ آپ صرف 25 ہزار روپے کے عوض اپنی گاڑی آج ہی بُک کرواسکتے ہیں۔
خلاصہ
گاڑیوں کے شعبے میں نئے ادارے کم ہی آرہے ہیں اور اس کی بنیادی وجہ یہی خیال ہے کہ گاڑیاں بنانے والے مقامی اداروں نے اس شعبے میں اپنی اجارہ داری قائم کر رکھی ہے، تاہم ایچ آر ایل یعنی حبیب رفیق گروپ موٹرز اس خیال کو تبدیل کرنے کے لیے پرامید ہے جس کی مثال پاکستان میں متعارف کروائی جانے والی چینی ساختہ زوتیے Z100 ہیچ بیک سے لی جاسکتی ہے۔
بہرحال، یہ بات اپنی جگہ مسلم ہے سوزوکی کلٹس اپنے بہتر انجن، دلکش انداز اور منفرد سہولیات کے علاوہ ادارے کی وارنٹی کے باعث بھی پاکستانیوں کی اولین ترجیح ہوتی ہے۔