ٹویوٹا کرولا 2017 کا نیا انداز؛ پہلے سے زیادہ پُرکشش اور شاندار!
ٹویوٹا کی یہ روایت رہی ہے کہ وہ ہر تین سال بعد اپنی گاڑیوں کی موجودہ جنریشن کا نیا انداز (facelift) متعارف کرواتا ہے۔ ٹویوٹا کرولا کی نویں اور دسویں جنریشن کے ساتھ بھی یہ سلسلہ جاری رہا یہی وجہ ہے کہ گیارہویں جنریشن کے تین سال مکمل ہونے سے پہلے ہی کرولا کے نئے متوقع انداز سے متعلق چہ مگوئیوں کا آغاز ہوگیا تھا۔ اس حوالے سے ٹویوٹا نے اپنے مداحوں کو زیادہ انتظار کروانا مناسب نہ سمجھا اور مارچ میں کرولا کے نئے انداز کی تصاویر باضابطہ طور پر پیش کردیں۔ اور اب تقریباً 3 ماہ بعد ٹویوٹا نے باضابطہ طور پر روس میں ٹویوٹا کرولا 2017 کا نیا انداز پیش کرنے کا اعلان کردیا ہے جسے بہت جلد دیگر ممالک میں بھی متعارف کروایا جائے گا۔ یاد رہے کہ ٹویوٹا کرولا کی گیارہویں جنریشن کا آغاز سال 2013 سے ہوا تھا جبکہ پاکستان میں اس کی فروخت سال 2014 میں شروع کی گئی تھی۔
یہ بھی پڑھیں: ٹویوٹا کرولا کو “نیا روپ” دینے کی کوشش؛ خفیہ تصاویر منظر عام پر آگئیں!
ٹویوٹا کرولا 2017 کے اگلے حصے میں زبردست تبدیلیاں دیکھی جاسکتی ہیں جو ٹویوٹا کے جدید طرز اور بہتر انداز کی بخوبی ترجمانی کر رہی ہیں۔ گاڑی کے آگے موجود ہیڈلائٹس کے ڈیزائن میں واضح تبدیلی کی گئی ہے اور اب نئی LED لائٹس نے کرولا کو پہلے سے زیادہ پُرکشش بنا دیا ہے۔ اس کے علاوہ اگلی گِرل بھی گزشتہ ماڈل کے مقابلے میں پتلی کی گئی ہے جس کی وجہ سے یہ امریکا میں تیار کی جانے والی کرولا سے کافی ملتی جلتی ہوگئی ہے۔ یوں ہیڈ لائٹس اور گِرل کے نئے ڈیزائن نے کرولا کے اگلے بمپر کو مزید خوبصورت بنادیا ہے۔ البتہ گاڑی کے دیگر حصوں میں کوئی قابل ذکر تبدیلی نہیں کی گئی۔
کرولا کے اندر نظر ڈالیں تو یہاں بھی اگلے حصے یعنی ڈیش بورڈ میں بہت زیادہ بہتری نظر آئے گی۔ ان میں سب سے زیادہ واضح AC وینٹس ہیں جو گول دائرہ میں بنائے گئے ہیں۔ اس کے علاوہ ڈیش بورڈ کے درمیان موجود کنٹرولز اور انسٹرومنٹ پینل کے ڈیزائن میں بھی معمولی لیکن نمایاں تبدیلیاں کی گئی ہیں۔ ملٹی انفارمیشن ڈسپلے (MID) کا نہ صرف سافٹویئر اپڈیٹ کیاگیا ہے بلکہ اب اسے 4.2 انچ کی رنگا رنگ اسکرین کے ساتھ پیش کیا جارہا ہے۔ ٹویوٹا کا دعوی ہے کہ اس نے کرولا کے اندرونی حصے بشمول برقی پاور اسٹیئرنگ کی تیاری میں پہلے سے زیادہ معیاری سازوسامان استعمال کیا ہے جس سے کرولا میں باہر کے شور شرابے سے محفوظ سفر کا لطف دوبالا ہوجائے گا۔
نئی ٹویوٹا کرولا آسان ماہانہ اقساط پر حاصل کرنے کے لیے یہاں کلک کریں
دیگر تکنیکی حوالوں سے کرولا کی گیارہویں جنریشن اور اسی کے نئے انداز کا موازنہ کیا جائے تو گاڑی کے فرش کا زمین سے فاصلہ (گراؤنڈ کلیئرنس) میں معمولی اضافہ ہوا ہے جس سے گاڑی کی اونچائی بھی بڑھ گئی ہے۔ اس سے قبل کرولا کی گراؤنڈ کلیئرنس 135 ملی میٹر تھی جبکہ نئی کرولا کی گراؤنڈ کلیئرنس 15 ملی میٹر اضافے کے بعد 150 ملی میٹر ہوگئی ہے۔ فی الحال ٹویوٹا (Toyota) نے انجن اور گیئر باکس میں کسی قسم کی تبدیلی کا اعلان نہیں کیا۔ روس میں نئی ٹویوٹا کرولا 2017 کی فروخت موسم گرما میں شروع کی جائے گی جبکہ ایشیائی اور یورپی مارکیٹ میں اسے سال 2017 کی پہلی سہہ ماہی کے دوران پیش کیا جائے گا۔ عام طور پر کرولا کا نیا انداز عالمی سطح پر پیش کیے جانے کے چھ سے نو ماہ بعد پاکستان میں متعارف کروایا جاتا ہے۔ اس اعتبار سے دیکھا جائے تو ہماری مارکیٹ میں نئی کرولا 2017 کی آمد بھی آئندہ سال متوقع ہے۔
مزید پڑھیں: ٹویوٹا کرولا 2017 یورپ اور امریکا میں نئے انداز کے ساتھ پیش کی جائے گی
نئی ٹویوٹا کرولا 2017 کا ظاہری انداز
نئی ٹویوٹا کرولا 2017 کا اندرونی حصہ
