پاکستان میں FAW کی مزید کونسی گاڑیاں پیش کی جاسکتی ہیں؟
چین سے تعلق رکھنے والا FAW گروپ گاڑیوں کے شعبے میں FAW کے نام سے مختلف طرز کی سواریاں پیش کرتا ہے۔ اس کا صدر دفتر چین کے صوبے جیلن کے سب سے بڑے شہر چانگچون میں واقع ہے۔ دلچسپ بات یہ ہے کہ FAW کو چین کی پہلی کار ساز کمپنی کا اعزاز 1958 میں حاصل ہوا کہ جب انہوں نے ہانگ کی (Hong Qi) متعارف کروائی تھی۔ بعد ازاں FAW نے چینی مارکیٹ کے لیے متعدد برانڈز پیش کیے جن میں سے چند یہ ہیں:
– بیسٹرن (Besturn) جسے بین ٹینگ بھی کہا جاتا ہے
– داریو (Dario)
– اولی (Oley)
– ہانگ کی (Hong Qi)
– جیاژنگ (Jiaxing)
– ہائیما (Haima)
– شین لی (Shenli)
چینی ادارے FAW نے مقامی مارکیٹ کے لیے گاڑیوں کی تیاری اور فروخت کی غرض سے متعدد بین الاقوامی اداروں کے ساتھ بھی کام کیا۔ ان اداروں میں شہرت یافتہ جرمن کمپنیاں آوڈی، ،جنرل موٹرز اور ووکس ویگن کے علاوہ عالمی نمبر ایک ٹویوٹا موٹرز بھی شامل ہے۔ FAW کا شمار چین میں گاڑیاں تیار کرنے والے چار بڑے اداروں میں کیا جاتا ہے۔ اس فہرست میں چانگان موٹرز، ڈونگ فینگ موٹر اور سائیک موٹرز بھی شامل ہیں۔
یہ بھی پڑھیں: کیا FAW کی گاڑیاں سوزوکی کا مقابلہ کرسکتی ہیں؟
اس مضمون میں ہم ان گاڑیوں سے متعلق بات کریں گے کہ جو FAW نے اب تک پاکستان میں متعارف کروائی ہیں۔ اس کے علاوہ آخر میں ان گاڑیاں کا ذکر ہوگا کہ جو پاکستان میں متعارف کروائی جانی چاہئیں۔
پاکستان میں دستیاب FAW کی گاڑیاں
FAW کیریئر
چینی کار ساز ادارے کی سامان برداری گاڑی FAW کیریئر پاکستانی مارکیٹ میں سوزوکی راوی کے مدمقابل سمجھی جاتی ہے۔ اس میں 970cc انجن شامل جو EFI فیول سسٹم کے ساتھ 5000 آر پی ایم پر 60 ہارس پاور اور 4500 آر پی ای پر 80 نیوٹن میٹر ٹارک فراہم کرسکتا ہے۔ کیریئر کی لمبائی 4260 ملی میٹر، چوڑائی 1475 ملی میٹر اور اونچائی 1890 ملی میٹر ہے جبکہ اس کا ویل بیس 2550 ملی میٹر ہے۔ پاکستان میں دستیاب FAW کیریئرز کے تین ماڈلز اور ان کی قیمتیں یہ ہیں:
– FAW کیریئر ڈیک لیس – قیمت: 7,29,000 روپے
– FAW کیریئر فلیٹ بیڈ – قیمت: 7,39,000 روپے
– FAW کیریئر اسٹینڈرڈ – قیمت: 7,49,000 روپے
FAW ایکس-پی وی
یہ پاکستان میں الحاج FAW موٹرز کی جانب پیش کردہ مسافر بردار وین ہے جسے سوزوکی بولان کا حریف کہا جاتا ہے۔ کیریئر کی طرح ایکس-پی وی (X-PV) میں بھی 970cc انجن شامل ہے جو 5000 آر پی پر 60 ہارس پاور اور 4500 آر پی ایم پر 80 نیوٹن میٹر ٹارک فراہم کرسکتا ہے۔ FAW ایکس-پی وی کی لمبائی 3741 ملی میٹر، چوڑائی 1475 ملی میٹر اور اونچائی 1870 ملی میٹر ہے جبکہ اس کا ویل بیس 2450 ملی میٹر ہے۔ پاکستان میں دستیاب FAW ایکس-پی وی کے دو ماڈلز اور ان کی قیمتوں سے متعلق تفصیلات درج ذیل ہیں:
– FAW ایکس-پی وی بمع ڈیول AC – قیمت: 8,99,000 روپے
– FAW ایکس-پی وی اسٹینڈرڈ – قیمت: 8,49,000 روپے
FAW وی 2
پاکستان میں FAW کی مقبول ترین گاڑی وی 2 (V2) ہے جسے سوزوکی ویگن آر اور سوزوکی سوفٹ کا متبادل قرار دیا جاتا ہے۔ اس میں 4-سلینڈر 1298cc انجن شامل ہے جو برقی کنٹرول ملٹی پوائنٹ فیول انجکشن سسٹم کے ساتھ 6000 آر پی ای پر 91 ہارس پاور اور 4500 آر پی ای پر 120 نیوٹن میٹر ٹارک فراہم کرسکتا ہے۔ وی2 کی لمبائی 3760 ملی میٹر، چوڑائی 1680 ملی میٹر اور اونچائی 1530 ملی میٹر ہے جبکہ اس کا ویل بیس 2450 ملی میٹر ہے۔ پاکستان میں FAW وی2 کا صرف ایک ہی ماڈل دستیاب ہے جس میں 2 ایئر بیگز، ایئر کنڈیشننگ، الائے ویلز، اینٹی-لاک بریکنگ سسٹم (ABS)، پاور اسٹیئرنگ بمع ایڈجسٹمٹ کی سہولت، پاور ڈور لاکس، پاور ونڈوز، AM/FM ریڈیو اور سی ڈی پلیئر جیسی سہولیات شامل ہیں۔ اس کی قیمت 10,49,000 روپے ہے۔
یہ بھی پڑھیں: الحاج FAW موٹرز پاکستان میں مسافر گاڑیوں کی تیاری کا آغاز کرے گا
FAW سائیریس
چینی کمپنی FAW کی چھوٹی SUV کا نام سائیریس ہے جو اگلے پہیوں کی قوت (FWD) سے سفر کرنے کی صلاحیت رکھتی ہے۔ اس کے حجم اور پیمائش کو مدنظر رکھتے ہوئے اسے پاکستان میں دستیاب بہترین فیملی کار میں شمار کیا جاتا ہے۔ سائیریس کی لمبائی 4148 ملی میٹر، چوڑائی 1680 ملی میٹر اور اونچائی 1740 ملی میٹر ہے جبکہ اس کا ویل بیس 2655 ملی میٹر ہے۔ الحاج FAW موٹرز کی جانب سے سائیریس کے دو مختلف ماڈلز بنام سائیریس S80 اور سائیریس S80 گرینڈ متعارف کروائے جاچکے ہیں۔ سائیریس S80 میں 1297cc انجن شامل ہے جو 6000 آر پی ایم پر 91 ہارس پاور اور 5500 آر پی ایم پر 120 نیوٹن میٹر ٹارک فراہم کرسکتا ہے۔ جبکہ سائیریس S80 گرینڈ میں 1497cc انجن پیش کیا جارہا ہے جو 5000 آر پی ایم پر 101 ہارس پاور اور 4500 آر پی ایم پر 139 نیوٹن میٹر ٹارک فراہم کرسکتا ہے۔
پاکستان میں دستیاب سائیریس کے دو ماڈلز اور ان کی قیمتیں یہ ہیں:
– FAW سائیریس S80 – قیمت: 17,05,000 روپے
– FAW سائیریس S80 گرینڈ – قیمت: 18,85,000 روپے
سائیریس S80 گرینڈ میں 2 ایئر بیگز، ایئر کنڈیشننگ، الائے ویلز، اینٹی-لاک بریکنگ سسٹم (ABS)، کپ ہولڈرز، پچھلی نشستوں کو تہ کرنے کی سہولیت، امموبلائزر، پاور اسٹیئرنگ بمع ایڈجسٹمنٹ کی سہولت، پاور ڈور لاکس، پاور ونڈوز، دھند میں نظر آنے والی تیز لائٹس، AM/FM ریڈیو کے علاوہ سی ڈی اور ڈی وی ڈی پلیئر بھی پیش کیے جارہے ہیں۔
پاکستان میں FAW کی یہ گاڑیاں بھی پیش کی جانی چاہئیں!
ہانگ کی H7 لگژری سیڈان
ہانگ کی برانڈ کے تحت چین میں پہلی گاڑی 1958 میں متعارف کروائی۔ سرخ پرچم کے نام سے پہچانی جانے والی اس برانڈ کو حکومتی عہدیداران کی پسندیدہ گاڑیوں میں شمار کیا جاتا ہے۔ ہانگ کی کے تحت متعدد سیڈان پیش کی گئیں جن میں H7 کو قابل ذکر مقبولیت حاصل ہوئی۔ ہانگ کی H7 کی لمبائی 5095 ملی میٹر، چوڑائی 1875 ملی میٹر اور اونچائی 1485 ملی میٹر ہے۔ اسے کے تین مختلف ماڈلز 1.8T، 2.0T اور 3.0T پیش کیے جاچکے ہیں جن میں بالترتیب 1800cc، 2000cc اور 3000cc (V6) انجن شامل ہیں۔ ہانگ کی H7 کو پرتعیش سیڈان قرار دیا جاتا ہے اور اگر یہ گاڑی پاکستان میں متعارف کروائی جائے تو اس کی قیمت آوڈی A6 کے مساوی یعنی تقریباً 50 ہزار ڈالر (50 لاکھ پاکستانی روپے) ہوگی۔
ہانگ کی (Hongqi) کے برانڈ سے درج ذیل سیڈان بھی متعارف کروائی جاچکی ہیں:
– ہانگ کی HQ3
– ہانگ کی لیموزین
– ہانگ کی پریمیئم لگژری سیڈان
– ہانگ کی 2004 ایڈیشن لگژری سیڈان
بیسٹرن X80
چینی ادارے FAWکی تیار کردہ کراس اوور SUV کو بیسٹرن ایکس80 (X80) کے نام سے پیش کیا جاتا ہے۔ چین میں بیسٹرن ایکس80 کے 7 مختلف ماڈلز 2 انجن کے ساتھ پیش کیے جاتے ہیں۔MT گرینڈ، MT لگژری اور AT کمفرٹ کو2000cc انجن جبکہ AT فیشن اور AT فلیگ شپ کو 2300cc انجن کے ساتھ پیش کیا جاتا ہے۔ AT لگژری 2000cc اور 2300cc انجن کے ساتھ پیش کیا جارہا ہے۔ اس کی لمبائی 4586 ملی میٹر، چوڑائی 1820 ملی میٹر اور اونچائی 1695 ملی میٹر ہے جبکہ اس کا ویل بیس 2675 ملی میٹر ہے۔
بیسٹرن X80 میں پیش کی جانے والی سہولیات میں متعدد ایئر بیگز، الیکٹرک پارکنگ بریک (EPB)، ٹائر میں ہوا کے تناسب سے آگہی، سینٹرل لاکنگ، دروازوں کے برقی لاکس، 20 کلومیٹر رفتار پر ازخود لاک ہونے والے دروازے، ریموٹ کنٹرول، کروز کنٹرول، اینٹی-لاک بریکنگ سسٹم (ABS)، الیکٹرانک بریک اسسٹ (EBA) اور ٹریکشن کنٹرول بھی شامل ہیں۔چین میں بیسٹرن ایکس 80 کو آرامدے سفر، بہترین انجن، اضافی گنجائش اور حفاظتی سہولیات کی وجہ سے کافی مقبولیت حاصل ہے۔پاکستان میں اگر بیسٹرن X80 کو پیش کیا جاتا ہے تو اس کا براہ راست مقابلہ ہونڈا وِزل سے ہوگا لیکن قیمت میں یہ نئی ہونڈا سِوک (Civic) سے بھی سستی ہوگی۔چین میں بیسٹرن X80 کی قیمت 1,20,000 یوآن ہے جو پاکستانی روپے میں 20,00,000 روپے کے مساوی رقم ہے۔
بیسٹرن B30
چینی مارکیٹ میں دستیاب بہترین سیڈان گاڑیوں میں سے ایک بیسٹرن B30 ہے۔ FAW کی تیار کردہ اس خوبصورت سیڈان کو 1600cc انجن کے ساتھ پیش کیا جاتا ہے۔ اس کی لمبائی 4625 ملی میٹر، چوڑائی 1790 ملی میٹر اور اونچائی 1500 ملی میٹر ہے جبکہ اس کا ویل بیس 2630 ملی میٹر ہے۔ بیسٹرن B30 میں پیش کی جانے والی نمایاں خصوصیات میں متعدد ایئر بیگز، سیٹ بیلٹ باندھنے کی اطلاع، سینٹرل لاکنگ سسٹم، ریموٹ کنٹرول، اینٹی-لاک بریکنگ سسٹم (ABS)، الیکٹرانک بریک اسسٹ (EBA)، الیکٹرانک بریک فورس ڈسٹری بیوشن (EBD)، ٹریکشن کنٹرول، ٹائر میں ہوا کا تناسب بتانے کی سہولت، اونچائی پر چڑھنے میں مددگار نظام کے علاوہ الیکٹرانک اسٹیبلٹی پروگرام بھی شامل ہے۔ چین میں B30 کی قیمت 60 ہزار یوآن (10 لاکھ پاکستانی روپے) سے شروع ہو کر 80 ہزار یوآن (13 لاکھ پاکستانی روپے) تک جاتی ہے۔
یہ بھی پڑھیں: FAW B50 – پاکستانی سیڈان گاڑیوں سے بہت بہتر اور کم قیمت!
اولی ہیچ بیک
چینی کار ساز کمپنی FAW کی جانب سے اولی کے نام سے سال 2012 میں سیڈان اور 2013 میں ہیچ بیک متعارف کروائی گئی۔ اس میں شامل 1500cc انجن کے ساتھ مینوئل اور آٹومیٹک گیئر باکس میں سے ایک کے انتخاب کا موقع بھی دستیاب ہے۔ اولی ہیچ بیک کی لمبائی 4200 ملی میٹر، چوڑائی 1660 ملی میٹر اور اونچائی 1465 ملی میٹر ہے جبکہ اس کا ویل بیس 2525 ملی میٹر ہے۔
یہ بھی پڑھیں: اولی سیڈان – نوجوان کے لیے بہترین گاڑیوں میں سے ایک!
اولی ہیچ بیک میں شامل سہولیات میں سب سے زیادہ قابل ذکر 2 ایئر بیگز، سینٹرل ڈور لاکنگ، ABS، EBD، بریک اووررائیڈ سسٹم، چھت پر برقی کھڑی اور برقی ونڈوز ہیں۔ چین میں اولی ہیچ بیک 60 سے 80 ہزار یوآن میں دستیاب ہے جو پاکستانی روپے میں 12,00,000 سے 15,00,000 کے مساوی رقم بنتی ہے۔ پاکستان میں یہ گاڑی سوزوکی ویگن آر، سوزوکی کلٹس اور ہونڈا سٹی کے مقابلے میں پیش کی جاسکتی ہے۔