مالی سال 2020-21 کی سب سے زیادہ فروخت ہونیوالی گاڑیاں
گزشتہ سال سے پاکستان آٹو مارکیٹ میں کئی نئی گاڑیاں دیکھی گئی ہیں جن میں پروٹون، ایم جی، ہیونڈائی، DFSK پرنس، یونائیٹڈ موٹرز، کِیا اور دیگر شامل ہیں۔ یہ تمام گاڑیاں مارکیٹ میں بِگ تھری (ٹویوٹا، سوزوکی، ہنڈا) کی اجارہ داری ختم کرنے میں اہم کردار ادا کر سکتا ہے۔ ان نئی گاڑیوں میں سے چند گاڑیاں صارفین کا دل جیتنے میں کامیاب بھی رہی ہیں لیکن یہ کہنا بھی غلط نہ ہوگا کہ بِگ تھری کو مات دینا شاید اتنا آسان نہیں ہے۔
پاما کی جانب سے جاری کی جانے والی رپورٹ کے مطابق تمام گاڑیوں کی سیل بہتر رہی ہے لیکن سوزوکی اور ٹویوٹا اب بھی چیمپینز کی فہرست میں ٹاپ پر دیکھی جا سکتی ہیں۔ پاما کے مطابق مالی سال 2020-21 میں سب سے زیادہ فروخت ہونے والی گاڑیوں کی فہرست ذیل میں تفصیل سے بیان کی گئی ہے۔
1- سوزوکی آلٹو
پاما رپورٹس کے مطابق سوزوکی آلٹو کی سیلز کی بات کی جائے تو یہ کہنا غلط نہ ہو گا کہ سوزوکی آلٹو نے مہران کی جگہ لے لی ہے۔ ہزاروں پاکستانی ہر ماہ اپنے اہل خانہ کے لئے یہ چھوٹی ہیچ بیک خریدتے ہیں۔ مالی سال 2020-21 میں سوزوکی نے 37720 آلٹو گاڑیاں فروخت کیں جبکہ گزشتہ سال 30916 گاڑیاں فروخت کی گئیں۔
2- ٹویوٹا یارس
ٹویوٹا یارس گزشتہ سال لانچ کی گئی اور اب یہ گاڑی کرولا، سوِک، اور سٹی کو مات دیتے ہوئے پاکستان کی نمبر ون سیڈان بن چکی ہے۔ اعداد و شمار کی بات کی جائے تو سال کی دوسری سب سے زیادہ فروخت ہونے والی گاڑی کا اعزاز حاصل کر چکی ہے۔ مالی سال 2020-21میں 28295 یارس گاڑیاں فروخت ہوئیں۔
3- ٹویوٹا کرولا
اگرچہ ٹویوٹا کرولا سال کی بہترین گاڑی قرار دی گئی ہے لیکن ٹویوٹا کرولا بھی پاکستان میں سب سے زیادہ فروخت ہونے والی کاروں میں سے ایک ہے۔ مالی سال 2020-21میں 18355 کرولا گاڑیاں فروخت ہوئیں جبکہ گزشہ سال 22140 گاڑیاں فروخت ہوئیں۔
4- سوزوکی کلٹس
آلٹو کے بعد کلٹس بھی سیل ہونے والی سوزوکی کی بہترین گاڑیوں میں سے ایک ہے۔ مالی سال 2020-21میں 17510 آلٹو گاڑیاں فروخت ہوئیں جبکہ گزشتہ سال 2307 گاڑیاں فروخت ہوئیں۔
5- سوزوکی ویگن آر
ایک بار پھر سوزوکی کی گاڑی ویگن آر سب سے زیادہ فروخت ہونے والی 5 بہترین گاڑیوں میں جگہ بنا چکی ہے۔ گزشتہ مالی سال 2019-20 میں 6984 ویگن آر گاڑیاں فروخت کی گئیں جبکہ مالی سال 2020-21میں 12659 گاڑیاں فروخت کی گئیں۔
6- ہںڈا سوِک/سٹی
پاما رپورٹ میں ہنڈا کی دو بہترین سیڈانز سوِک اور سٹی کی جوائنٹ سیلز دی گئی ہے جس کے مطابق مالی سال 2020-21میں 25276 گاڑیاں فروخت ہوئیں۔ ہمیں نہیں لگتا کہ ان اعداد و شمار کے ساتھ ہنڈا کو 6 نمبر رکھا جانا چاہیے لیکن اگر ان اعداد کو دو گاڑیوں کے درمیان تقسیم کیا جائے تو ایک گاڑی کی سیل 12500 بنتی ہے۔ جس کی وجہ سے اس کو 6 نمبر پر رکھا گیا ہے۔
خیال رہے کہ کِیا، پروٹون، چنگان، یونائیٹڈ، اور بہت سی دیگر گاڑیوں کو اس فہرست میں شامل نہیں کیا گیا کیونکہ یہ پاما سے رجسٹرڈ نہیں ہیں۔ اگر یہ کمپنیاں اس فہرست میں شامل ہوتیں تو بھی ہم یقین سے کہہ سکتے ہیں کہ ان کی گاڑیاں فروخت ہونے والی ٹاپ 5 گاڑیوں میں شامل نہ ہوتیں۔