پیٹرول یا ڈیزل؛ گاڑی کے لیے کونسا انجن اور ایندھن زیادہ مفید ہے؟
اکثر لوگ پیٹرول اور ڈیزل انجن کا فرق پوچھتے ہوئے نظر آتے ہیں۔ آج کل پاکستان میں ڈیزل کی قیمت 72.25 روپے فی لیٹر ہے جبکہ پیٹرول 64.27 روپے فی لیٹر فروخت ہورہا ہے۔ ایک زمانہ تھا کہ دیگر ممالک کی طرح پاکستان میں بھی ڈیزل گاڑیوں کی شہرت زیادہ تھی۔ لیکن پھر پاکستان میں ڈیزل گاڑیوں کا زوال آیا اور اب سڑکوں پر رواں دواں اکثر گاڑیاں پیٹرول پر ہی چلائی جارہی ہیں۔اس مضمون میں ہم ایندھن کی سب سے زیادہ استعمال ہونے والی دو اقسام یعنی پیٹرول اور ڈیزل کے فرق پر بات کریں گے۔
یہ بھی پڑھیں: ڈیزل سے چلنے والی گاڑیاں اب قصہ پارینہ بن چکیں!
ڈیزل انجن
کارکردگی کے اعتبار سے ڈیزل انجن کو پیٹرول انجن پر برتری حاصل ہے۔ چونکہ ڈیزل گاڑھا ہوتا ہے اس لیے پیٹرول کے مقابلے میں انجن کو زیادہ قوت فراہم کرسکتا ہے۔ ایک اندازے کے مطابق ڈیزل میں پیٹرول سے 20 گنا زیادہ توانائی موجود ہوتی ہے۔ دور جدید میں ڈیزل انجن کے ساتھ ٹربو ٹیکنالوجی بھی استعمال کی جارہی ہے۔علاوہ ازیں اگر ٹارک (Torque) کی بات کی جائے تو یہاں بھی ڈیزل انجن کا پلڑا بھاری نظر آتا ہے۔ دورانے سفر موڑ کاٹتے ہوئے گاڑی کی رفتار سے زیادہ اضافی ٹارک کی موجودگی ضروری ہے۔یورپ میں ڈیزل گاڑیاں آج بھی کافی مقبول ہیں۔ چونکہ ڈیزل گاڑیوں سے کاربن ڈائی آکسائیڈ کا اخراج کم ہوتا ہے اس لیے یورپ میں ڈیزل گاڑیوں کے مالکان کو ٹیکس کی مد میں رعایت دی جاتی ہے۔
پیٹرول انجن
چونکہ پیٹرول زیادہ گاڑھا نہیں ہوتا اس لیے انجن کو اسے جلانے میں کم قوت درکار ہوتی ہے۔ یہی وجہ ہے کہ پیٹرول انجن والی گاڑیاں شور زیادہ کرتی ہیں نہ ہی ان میں دوران سفر تھرتھراہٹ کا احساس ہوتا ہے۔ ڈیزل انجن کے مقابلے میں پیٹرول انجن کی بناوٹ پر کم اخراجات آتے ہیں اور یہی وجہ ہے کہ موجودہ دور میں گاڑیاں تیار کرنے والے ادارے پیٹرول انجن ہی کو ترجیح دینے لگے ہیں۔ علاوہ ازیں پیٹرول انجن وزن یں بھی ہلکا ہوتا ہے اس لیے اس انجن کی حامل گاڑیوں کا مجموعی وزن بھی کم ہوتا ہے۔ یوں نہ صرف ڈرائیور کو گاڑی پر گرفت رکھنے میں آسانی ہوتی ہے بلکہ جدید ٹیکنالوجی کے استعمال سے ایندھن کی خاصی بچت بھی حاصل ہوتی ہے۔ ڈیزل انجن کے مقابلے میں پیٹرول انجن والی گاڑیوں کو برق رفتار سمجھا جاتا ہے۔ تاہم تیز رفتاری کے دوران پیٹرول انجن بہت زیادہ ایندھن استعمال کرتا ہے جس سے گاڑی میں ایندھن بچانے کی صلاحیت پر منفی اثرات مرتب ہوسکتے ہیں۔
یہ بھی پڑھیں: ٹویوٹا کی جانب سے ڈیزل گاڑیوں کی تیاری بند کرنے کا عندیہ
ڈیزل اور پیٹرول میں سے کسی ایک کے انتخاب کا بہت زیادہ دارومدار خود آپ کی ترجیحات پر بھی ہے۔ ان دونوں ہی انجنز میں بہت معمولی فرق ہے البتہ تکنیکی اعتبار سے دیکھا جائے تو ڈیزل انجن کی افادیت زیادہ نظر آتی ہے۔ خاص طور پر دور دراز علاقوں اور لمبے سفر پر جانے والے افراد کے لیے ڈیزل انجن والی گاڑیاں ہی بہترین ہیں۔لیکن بدقسمتی سے پاکستان میں اب بہت کم ہی گاڑیاں ڈیزل انجن کے ساتھ دستیاب ہیں۔
اگر آپ بھی اس حوالے سے اپنے تجربات ہم سے شیئر کرنا چاہیں تو بلاجھجک نیچے موجود تبصرہ خانے سے ہمیں لکھ بھیجیے۔