ویڈیو – نئی ہنڈا سوِک میں کوالٹی کنٹرول کے مسائل
نئی ہنڈا سوِک مارچ 2022 لانچ کی گئی۔ گاڑی کی لانچ سے قبل صارفین میں کافی جوش و خروش تھا۔ ہنڈا سوِک پاکستانیوں کی پسندیدہ کاروں میں سے ایک ہے۔ یہی وجہ ہے کہ لوگوں کو گاڑی کا بے صبری سے انتظار تھا لیکن ملتان کے ایک شہری کی جانب سے شئیر کی گئی ایک ویڈیو نے دیگر صارفین کو پریشانی میں مبتلا کر دیا ہے۔
ویڈیو میں ہنڈا اٹلس کے کوالٹی کنٹرول پر سوال اٹھایا گیا ہے۔ اس ویڈیو میں صارف کا کہنا ہے کہ اس نے مکمل سیاہ رنگ کے انٹیرئیر والی سوِک بُک کروائی لیکن گاڑی کے تین ڈور پینلز کا رنگ سیاہ ہے جبکہ حیران کن طور پر چوتھے ڈور پینل کا خاکی (بیج) رنگ کا ہے۔ صارف کا کہنا تھا کہ وہ اتنی بڑی کمپنی کی جانب سے اس قسم کی غلطی کی امید نہیں کرتا۔
یہ یقینا ایک افسوسناک خبر ہے کیونکہ اس طرز کے واقعات آپکی خوشی کو ضائع کرنے کیلئے کافی ہوتے ہیں۔ اس کے علاوہ کمپنی کو اس طرز کے مسائل سے بچنے اور اپنی ساکھ کو بہتر بنانے کیلئے کوالٹی کنٹرول پر دھیان دینا چاہیے۔
ہم امید کرتے ہیں کہ ہنڈا اُس صارف سے رابطہ کرتے ہوئے اس کا مسئلہ فوری حل کرے گا۔
سوزوکی آلٹو کا پینٹڈ ڈور
خیال رہے کہ یہ کوئی پہلا واقعہ نہیں ہے۔ چند ہفتے قبل سوزوکی آلٹو خریدنے والے ایک صارف کو اسی طرز مسئلے کا سامنا تھا کیونکہ اسے پینٹڈ ڈور والی آلٹو بیچی گئی تھی۔
صارف نے پینٹڈ ڈور کی تصاویر بنا کر سوشل میڈیا پر بھی شیئر کیں جس کے بعد کافی ہلچل دیکھی گئی۔
صارف نے کہا کہ انہوں نے اتوار بازار سے کار نہیں خریدی کہ جہاں آپ کو کار کی حالت چیک کرنے کے لیے ایک مکینک کے ساتھ جانا پڑتا ہے۔ اُس نے کمپنی کی ڈیلرشپ سے گاڑی خریدی ہے اور کوئی بھی صارف کمپنی کی مجاز ڈیلرشپ سے پینٹ شدہ نئی کار کی توقع نہیں کر سکتا۔
اس واقعے کے بارے آپ کا کیا خیال ہے؟ کمنٹس سیکشن اپنی رائے کا اظہار کریں۔