2 days road trip to Dharab lake, Soon valley, uchali lake, Sakesar Base and Namal lake Mianwali on 8-9 October 2016

[Aqeel1982]

jaisay he hum Sakesar base mein enter huye to wahan per duty per PAF employee ne sab k id card check kiye register mein entry ki aur hamay bataya k ap yahan per visit to ker saktay hain but ap night camping nahi ker saktay iski permission nahi hai. ya to hamay guest houses mein kisi PAF k employee k reference se booking kerwani hogi ya night se pehle base se nikalna hoga. khair hum ne apney links use ker k guest house mein booking kerwa li aur camping ka plan cancel ker diya. Jaisay he hum first tier security clearance kerwa k agay barhay to haseen manazar dekhney ko milay.

view of Uchali lake from Sakesar base road

another excellent view from base road

friends taking pics

[Aqeel1982]

Finally base pohnch he gaye and there was quite strong security layers,which definitely we didn't take pictures for obvious reasons. they kept our ID cards that will be returned to us when we will leave the base.

[rehankillbill]

Arre aqeel koi baat nahi yaara mera phela trip Ziarat ka aisa he kuch gaya hai so let it go and enjoy

[Aqeel1982]

Base k employees ne hamay hamara kamra dekhaya aur hum ne apney dost ka shukria ada kiya jis ne bohat he munasib price mein behtreen kamra dilwa diya jis mein her cheez thi aur hum 6 person araam se rahay. Kamray mein samaan rakhney k baad aur thora fresh honay k baad hum ne baki bachi light ka faida utha ker base ka chakkar laganay aur Base ki mess mein Chaye peenay ka irada banaya. Wahan bhe officer protocol dekh ker dil khush hogaya aur dost k liye dil se duayen nikli. yeh pics base ki west side se le gayi hain jo bohat he dilkash manzar tha but light kam honay ki waja se sara area cover nahi ker saka:

[Aqeel1982]

Raat ka khana mess mein khaya aur us k baad phir walk k liye niklay to jungli area honay se waja se is cheez se samna hua

yes its a pig/boar.

[Aqeel1982]

Raat k khanay k baad aik bar phir chahaye k aadi logon ki efforts shoro....

Naveed ustad her fun mola

[asim.shah]

nice trip ,,,, what is location of dharab lake ?

[asim.shah]

han aik dor mai islamic international k hostels jb faisal mosque ki basement mai thy tb wahan hostel mai b ajaty thy,,,, wahaan tu line mai lgy hoty thy.... sb sy big sb sy agay phir bari bari height k mutabik...

[Aqeel1982]

asim shah - main ne ooper Dharab lake ka raasta aur google map ka image share kiya hai jis mein Dharab dam road ki choti si line nazar arahi hai - pls look at that, if you still need more info i can help. for generally speaking yeh Chakwal aur Balkasar k pas hai motorway M2 se raasta aata hai iska

[Aqeel1982]

Raat ko base ki hostel room mein stay k baad subah fresh ho ker nashta ker k aur tamam bakaya jaat ada ker k hum ne Sakesar se agay Namal Lake mianwali ki taraf jana tha jo k west ki taraf banti aur hum eastern gates se enter huye thay aur hamaray Id Cards bhe wahan he jama thay. lihaza pehle hamay wahan ja ker card liye aur phir hum Sakesar-Namal road chal diye aur Rasta bohat he zabadast aur dekhey se taluq rakhta tha, kiun k base pahar ki top per waqaye thi so hum ooper se neechay jarahay thay to hum doore doore tak k area dekh saktay thay, chand pics share kerta hon:

[Aqeel1982]

Kuch daer baad yehi bal khata road jab kuch medaani alaqay mein daakhil hua to aisa sa manzar pesh ker raha tha:

[Aqeel1982]

Approx 1hr chalnay k baad jab Sakesar wala road khatam hua to yeh aik aur road se ja milta hai jisko Dhibba Karsial road kehtay hain, aam alfaaz mein jab is road ki T ban jaye to ap left turn lain aur wo road seedha mianwali talagang main road per pohncha dega. wahan se ap ne again T shape turn se left murna hai. main road per approx 7-8 Km chalnay k baad apko doore se he Namal College ki building nazar aye gi, wo aik chota sa kacha road hai us per neechay jana hoga, wahan us alaqay k aik mashoor baba ka darbar hai jiska naam BABA HAFIZ JEE hai,

hum jab wahan pohnchay to wahan Urs horaha tha jiski waja se bohat rush tha aur traffic buri tarah phansi hui thi, single road aur beshumar traffic thi, jaisay jaisay agay jatay rahay traffic k halaat kharab hotay gaye, yeh hardly 1.2Km ka road hamay cross kertay huye 1Hr lag gaya. traffic ki surat e haal dekh k hum ne decide kiya k traffic hum gari se nikal ker khud control kertay hain, yeh area kafi backward honay ki waja se hum log pant t-shirts se main wese he alag nazar arahay thay aur kuch logon ne hamay dekh ker traffic kholney mein madad bhe ki aur instructions follow bhe ki aur aakhir kar hum namal lake pohnch he gaye.
yeh koi proper picnic spot nahi hai, lihaza yahan koi facilities bhe nahi hain na koi shade na koi bench aur na he koi paani ka intazam. hamaray paas apna tent majood tha so hum ne sab se pehle usko setup kiya takay hum baki kaam us k saye main ker sakay.

piyas se bura haal tha aur koi paani ka intazam bhe nahi tha, hum ne urs se paani ka pata kiya per kuch na mila wahan se to hum ne apney cooler se cold drinks he peena shoro ker di.
Is k baad hamay aik local thekedar sab ka samna hua, jab unho ne doore se hamara tent dekha to hamaray pas aye aur bolay k ap yahan machli ka shikar kernay aye ho kia? aur kehney laga k main ne yahan ka aik crore rupees ka theka liya hua hai tp shikar se pehle mujh se permission leni hogi, ham ne bataya k hamara koi aisa programe nahi hai. phir us ne kaha k agar koi cheez chahaye ho to batana hum ne foran pakanay k liye paani ki darkast ki to us ne bola k meray deray se le lo, 2 bandon ko cooler de ker pani lenay bheja to itni doore se half cooler utha ker le ker aanay k baad unki apni halat patli hogayi aur dono gari k saye mein beth gaye bcoz tent mein kafi heat jama horahi thi stove ki waja se aur phir tent k ooper se thori si fly sheet utari aur uski windows open ki.

[Aqeel1982]

hum ne gari se cooking ka saman nikala aur Naveed ne jaldi jaldi se cooking ki tayyari shoro ki like piyaz tomato etc katay to yad aya k dahi nahi hai aur wo dahi lenay gaye to traffic ka rush kam ho chuka tha, hum ne tent mein he intazar kiya jab tak khana tayyar ho hum log cooking k sath jo samjh aata raha kertay rahay aur end per rice ka bera qarak ho chuka tha

Hamay Sakesar mein camping ki permission to na mili per hum ne yahan per apna yeh shoq poora ker liya, jab hum ne yahan tent lagaya to urs se kafi saray log jo wapis gharon ko ja rahay thay hamara tent dekh k bohat heraan huye aur iski pictures bhe bana rahay thay

[Aqeel1982]

Bhook bohat lag rahi thi aur khanay ka shiddat se intazar tha is liye jaisa bhe pakka khana para, hum ne chaval aur tamaz cheezain ghar se he le li thi aur chicken hum ne kal aatay huye he raastay se le ker cooler mein freeze ker liya tha aur Sakesar mein mess k freezer mein rakhwa diya tha. khanay k intazar mein gup shap kertay rahay:

is gari k background mein aap jo Kikkar dekh rahay hain, is k peechay entry ka road hai jab traffic phanssi hui thi to main ne wahan se rush area cross ker k directly lake area main aanay ki try ki to garmi ki waja se main ne shoes change ker k chappal pehni hui thi to meray payoon mein bohat bara aik Kanta chubb gaya aur taqreeban foot thumb ki bone tak chala gaya, ap logon se request hai k jab bhe kisi aisay area mein jayen to apney foot ki care lazmi karain bcoz uneven jaga rocks aur kantay ki waja se sab se ziada foot injured honay ka khatra hota hai, hamaray paas koi first aid kit bhe nahi thi ap kuch pics mein dekh saktay hain k main tissue se blood rok raha hon

[Aqeel1982]

khair khana kuch aisa tayyar hua aur sabar shukar se kahaya:

[Aqeel1982]

Lake ki ziada ter pics doosray phone aur camera mein thi jo is waqt meray paas nahi hain but background mein ap kuch lake ka hissa dekh saktay hain aur sorroundings kic pics bhe upload kerta hon:

Mianwali Talagang road logistics k aitebar se kafi busy route hai heavy traffic k liye.

Khanay k baad hum ne pack kiya, tent lagatay waqt hum kafi thak gaye thay traffic jam ki waja se is liye pics nahi banayi lekin packup ki kuch pics li thi:

aik cheez aur note karay k hum log apna kachra yahan bhe jama ker rahay hain, yeh wo cheez hai jo hamaray tourist log hamesha ignore ker detay hain aur anjanay mein hum khud apney mulk aur khoobsurat maqamat ko nuqsaan pohncha rahay hotay hain, kiun k in areas mein koi safari k kaam per mamoor nahi hota lihaza hamay khud he jama kerna chahaye, jin shopping bags mein ap cold drinks chips aur doosra saamaan latay hain uski shopping bags mein wapis bhe le ja saktay hain

[Aqeel1982]

aik kam aur jo main apki tawajja mein lana chahta hon wo hai k hum ney bacha hua khana idher udher zaya kernay se behtar samjha k kisi ghareeb ko de dain, kiun k ghar pohcnhney tak yeh kharab ho chuka hoga kiun k hamari baraf bhe khatam hogayi thi, wahan per kafi log thay so hum ne baki rice aur raita waghaira kuch beggars ko de diya unka bhe kaam hogaya aur hamara zaya honay se bhe bach gaya.

[Aqeel1982]

yeh mera first ever travel blog tha aur umeed hai apko pasand aye ga, hala k mujhe andaza hai k itna acha nahi likha gaya but main ne is mein 2 msgs denay ki koshish ki hai
1) most importan msg which i always conisder in my mind: we should try to explore new areas, her koi baar baar unhi jagon per jayen to uska kia faida, new jaga per ja ker ap mazeed logon ko wahan k baray mein batatay hain is tarah wo log bhe apko dekh ker wahan jana shoro karen gay aur unhay dekh ker koi aur jaye ga aur isi tarah tourism mazeed expand hoga.
2) hum apni enjoyment mein yeh bhool jatay hain k hamaray baad bhe wahan kis ne aana hai, koi bhe cheez khayen to uski bottle wraper ya box simbhaal ker rakh lain aur munasib jaga per dalain agar koi bin na ho to phir bhe apki zimay dari hai k usay gari mein rakh lain jab tak koi dispose kernay ki jaga na milay.

umeed hai ap apney next trip per in dono points ko follow karain gay...

[asim.shah]

yes i got it thanks..

[Aqeel1982]

@haroonmcs26 sir ap ka blog perh k main ne bhe aik try ki hai, go k urdu mein nahi likh saka bcoz it takes a long time for me to write in that manner but still tried my first attempt here