آہ ۔۔۔ شاہزیب
بچھڑا کچھ اس ادا سے کہ رُت ہی بدل گئی
اک شخص سارے شہر کو ویران کر گیا
سال بھر پہلے کا قصہ ہے میں پاک وہیلز میں نووارد تھا، کےٹی جی کے فورم سے پاک وہیلز کے ذریعے ہی متعارف ہوا۔ شاہزیب کی تقریب شادی میں کے ٹی جی کے دوست مدعو تھے، میری ملاقات کسی سے نہ تھی، میں نے پاک وہیلز کی تھریڈ پر ہی مبارکباد دی۔۔
کچھ وقت گزرا تو کے ٹی جی کی محفلوں میں شرکت کا باقاعدہ آغاز ہوا، دیگر دوستوں کے ساتھ ساتھ شاہزیب سے بھی ملاقاتیں ہوئیں ،،
محبت اپنائیت خلوص اور بے لوث چاہت کا پیکر ہمارا یہ دوست اپنے ملائم شوخ اور بے تکلف رویوں کی وجہ سے کے ٹی جی کی محفلوں کی جان تھا۔ انتہائی اپنائیت سے گلے ملنا ، بے ساختہ گلے میں باہیں ڈال دینا ، کبھی کسی بات کا برا نہ منانا، دیدہ زیب مسکراہٹ اس کے روشن چہرے پر سجی رہتی۔۔
کے ٹی جی کےحوالے سے کوئی مسئلہ کبھی الجھتا تو پریشان ہوجاتا کہ جیسے اس کے گھر پر کوئی کڑا وقت آپڑا ہو۔
رات دیر تک فون پر یا میسیجز پر مشورے کر کے اس کے بہترین اور جلد حل کیلئے کوشاں رہتا، ،
جب تک کوئی بہتر صورت پیدا نہ ہوتی اس کے لہجے سے دکھ صاف چھلکتا محسوس ہوتا،
میرے پیارے دوست تم اچانک ہمیں یوں چھوڑ کر چلے جائوگے یہ تو کبھی سوچا ہی نہ تھا، کے ٹی جی تمہارا گھر تھا اور ہم سب اس گھر کے مکین ، اب تم چلے گئے ہو تو احساس ہوتا ہے کہ تم نے کتنی خاموشی سے ہم سب کے دلوں میں ایسا گھر بنا لیا ہے کہ جو ہمیشہ تمہاری یادوں سے آباد رہے گا۔
جب بھی ہمارے شہر کا موسم خوشگوار ہوتا تھا تو تم کہتے تھے کہ کہیں لمبی ڈرائیو پر چلنا چاہئیے، رمضان کے پہلے ہفتے کے کٹھن ترین دنوں کے بعد اب پھر موسم خوشگوار ہو چلا تھا، تم شاید پھر لمبے سفر پر نکلنا چاہتے تھے
لیکن اس بار تم خوشگوار موسم میں اتنے لمبے سفر پر اکیلے ہی چلے گئے ، کبھی نہ لوٹ کر آنے کیلئے۔۔۔۔
ناصر کاظمی نے کہا تھا۔۔
ہمارے گھر کی دیواروں پہ ناصر
اداسی بال کھولے سو رہی ہے
بالکل سچ کہہ گیا وہ۔۔
پاک وہیلز اور ۔۔۔۔۔
کے ٹی جی کی دیواروں پہ ناصر
اداسی بال کھولے سو رہی ہے
اللہ تمہاری مغفرت فرمائے، تمہارے درجات بلند فرمائے، تمہیں جنت الفردوس میں اعلیٰ مقام عطا فرمائے۔ آمین
Sent from my iPhone using PW Forums