جولائی 2017 اور گلگت بلتستان

[haroonmcs26]

جھیل میں تیرتے اور اڑتے ہوئے آبی پرندے۔

[haroonmcs26]

ہم جھیل کی لمبائی کے رخ دوسرے کنارے کے قریب پہنچ گئے تھے۔ ثانی اور یاسر بھی پہنچ گئے تھے لیکن وہ اس جگہ پر جہاں سے جھیل کی پہلی جھلک نظر آ تی ہے وہیں بیٹھ گئے۔ جیسا کہ میں نے پہلے بھی بتایا کہ جھیل کی پہلی جھلک اتنی پر کشش نہیں ہے اور وہ بھی یہی سمجھ کر وہیں بیٹھ گئے۔ وہ ہمیں واپسی کیلئے آوازیں مار رہے تھے اور ہم انکو ہاتھ کے اشاروں سے اپنی طرف بلا رہے تھے لیکن انھوں نے ہماری بات نہیں مانی اور کچھ دیر بعد واپسی کیلئے روانہ ہو گئے۔ ساتھیوں کی وجہ سے ہمیں بھی واپس ہونا پڑا ورنہ ہمارا ارادہ تو اپنا چکر مکمل کرنے کا تھا۔ اسی راستے سے جس سے چل کر آئے تھے ہم واپس اپنی گاڑی کے پاس پہنچ گئے۔

[haroonmcs26]

ایک عجیب و غریب تراش کا پتھر۔

[haroonmcs26]

گاڑی میں بیٹھ کر اس کو چلاتے ہوئے جھیل کے ابتدائی مقام پر آگئے ۔ وہاں بورت لیک نامی ایک ہوٹل بھی تھا جس کو اس وقت نئے سرے سے تیار کیا جا رہا تھا۔ ہم گاڑی کو وہاں پارک کرکے اس کے اندر گئے وہاں مزدور مستری کام کر رہے تھے جبکہ اوپر کی منزل میں کچھ لوگ ناشتہ تیار کر رہے تھے۔ ہم نے انھیں سلام کیا او ر کچھ گپ شپ کی۔ انھوں نے ہمیں چائے کی پیش کش کی لیکن ہم نے شکریہ کے ساتھ انکار کر دیا۔ اس کے بعد ہم دوبارہ اپنی گاڑی کے پاس آ گئے ۔ وہا ں ایک کتا بیٹھا ہوا تھا۔ کتے کو دیکھ کر ہم سوچ میں پڑگئے کہ کہیں پیچھے ہی نہ پڑ جائے یہاں تو بھاگا بھی نہیں جائے گا۔ کتے کی طرف کن انکھیوں سے دیکھتے ہوئے گاڑی کے پاس آ گئے۔ کتا اٹھ کر ہماری طرف آیا ۔ ہم نے دوڑنے اور اس پر پتھر سے وار کرنے کا مصمم ارادہ کر لیا لیکن کتا ہمارے پاس آ کر دم ہلانے لگا۔ شاید وہ بھوکا تھا۔ ہم نے گاڑی میں سے بسکٹ اورکپ کیک نکال کر اس کے آگے ڈال دیئے جن کو اس نے خوشدلی کے ساتھ قبول کر لیا۔ عنصر سے میں نے گاڑی میں بیٹھنے کا کہا لیکن اس نے کہا کہ تھوڑا سا فاصلہ ہے میں پیدل ہی چلتا ہوں ۔ جب عنصر نے پیدل چلنا شروع کیا تو وہ کتا بھی اس کے ساتھ ہو لیا۔

[haroonmcs26]

[bilal.tariq.18041]

Haroon Bhai I also visited borith lake in 2014 it was very peaceful place no construction was there just few people grazing animals. The place was so peaceful that even whistling of small birds in far distance could be heard.

Then I went again in 2016 and I saw construction was going on of the same hotel and annoying sound of construction work ruined my visit.

I was very surprised that why our environment friendly and educated Hunza people allowed to builtd this hotel. It's very obvious that if people would live there the seepage from drains of this hotel will go street inside the lake. If it gets polluted then those birds won't come. Hunza people should do something to stop this hotel if they really care for environment. But they are mostly interested in criticizing tourists and do not spare any moment to insult them but don't see mistakes of their own.

@haroonmcs26 Bhai I am not against hunza people they are Pakistani like us but they are very critic. They should respect tourists and earn respect in return.

[haroonmcs26]

بلال بھائی جہاں تک گلگت بلتستان کے لوگوں کا تعلق ہے تو میرا اب تک کا تو تجربہ بہت خوشگوار رہا ہے باقی آ پ کو پتا ہی ہے اچھے برے لوگ ہر جگہ ہوتے ہیں۔ دوسری بات جس کی آپ نے نشاندہی کی وہ ہے ایسی خوبصورت جگہوں پر تعمیرا ت کی۔ اس بات پر میں آپ کی بھر پور تائید کرتا ہوں۔ کوئی ایسا طریقہ کار ہونا چاہیئے کہ قدرتی مناظر والی جگہوں پر تعمیرات کرتے وقت یہ خیال رکھنا چاہیئے کہ ان جگہوں کی قدرتی خوبصورتی اور اندا ز متاثر نہ ہوں ورنہ ایک وقت آئے گا کہ حضر ت انسان کی یہ تعمیرات باقی رہ جائیں گی لیکن فطرت اپنی اصل شکل کھو دے گی۔ ایسا ہمارے شمالی علاقوں میں کئی جگہوں پر ہو چکا ہے۔ میں گیارہ سال کی عمر میں 1992 میں جب مری گیا تھا تو مری قدرتی مناظر سے بھر پور جگہ تھی۔ لیکن اب دیکھیں تو انسان کی تعمیرات ہی نظر آتیں ہیں لیکن مری کی اصل خوبصورتی کہیں کھو گئی ہے۔ مری سے ایوببہ نتھیا گلی روڈ کو دیکھیں تو یہ شمالی علاقوں کی خوبصورت سڑکوں میں سے ایک ہے لیکن اب راستے میں ہر اچھے پوائنٹ کو ڈھابوں اور ہوٹلوں نے گھیر لیا ہے اور قدرتی مناظر کو ہماری آنکھوں سے دور کر دیا ہے۔ یہی حال اب وادی ناران کاغان کا ہو رہا ہے۔ ہر اچھے پوائنٹ پر ہوٹل تعمیر ہو رہے ہیں۔ ناران کے بازار سے کچھ ہی پہلے جہاں لوگ دریائے کنہار کے ساتھ وقت گزارا کرتے تھے وہاں اب ہوٹلوں اور ٹینٹ ویلج والوں نے قبضہ کر لیا ہے۔ اسی طرح کا معاملہ جھیل سیف الملوک کے ساتھ ہو رہا ہے۔ یہ صورتحال کافی پریشان کن ہے گورنمنٹ اور مقامی لوگوں کو اس بات پر ضرور توجہ کرنی چاہیئے ان کو احساس کرنا چاہیئے کہ لوگ یہاں یہ ہوٹل اور تعمیرات دیکھنے نہیں آتے وہ ان خوبصورت نظاروں کی ٹھنڈک اپنی آنکھوں میں اتارنے آتے ہیں جب یہ نظارے ہی نہ ہوں گے تو چاہے وہاں آپ دنیا کے خوبصورت ترین ہوٹل بنا دیں لوگ نہیں آئیں گے۔

[haroonmcs26]

جھیل میں ہم نے ہوٹل کے پاس ہی ایک کشتی بھی دیکھی تھی۔ ہم نے اسکے مالک کو تلاش کرنے کی بہت کوشش کی لیکن وہ حضرت وہاںموجود ہی نہیں تھے ورنہ اس خوبصورت جھیل میں کشتی رانی کا بھی لطف اٹھا لیتے۔ بہر حال نو بج کر دس منٹ پر ہم جھیل سے روانہ ہوئے اور گاڑی کو احتیاط سے واپس شاہراہ قراقرم پر لے آئے۔ ثانی اور یاسر بورت جھیل کو جانے والے راستے کے پاس ہی ایک کیمپنگ سائٹ میں بیٹھے تھے ۔ ہارن دیا تو صرف ثانی آیا یاسر اسکے ساتھ نہیں تھا۔ اس نے بتایا کہ یاسر شدید ناراض ہے اور اس نے کہا کہ میں نے نہیں جانا۔ پوچھنے پر پتا چلا کہ انھوں نے عنصر کو میری طرف اس وجہ سے بھیجا کہ وہ مجھے واپس بلا لائے لیکن عنصر بھی وہاں جا کر مگن ہو گیا۔ میں گاڑی کے پاس رہا اور عنصر اور ثانی اسے منانے گئے ۔ کافی دیر کی منت سماجت کے بعد بالآخر یاسر مان گیا اور انکے ساتھ واپس آ گیا۔ لیکن اس میں ہی دس بج گئے۔ روانہ ہونے کے بعد گلمت کے علاقے میں ہی ایک ایل پی جی گیس کی دوکان دیکھ کر رک گئے ۔ میٹر ریڈنگ 53956۔سوچا کہ کوکنگ سلنڈر میں گیس ہی بھروا لیں یہ نہ ہو کہ گیس ختم ہو جائے۔ لیکن جب گیس بھروائی تو اس میں صرف تین پاؤ گیس ہی بھر ی جا سکی اسکا مطلب یہ کہ ابھی اس میں تین کلو سے زیادہ گیس موجود تھی۔ گیس کے بل کے سو روپے ادا کرکے آگے اسی ہوٹل سے جس سے ہم نے خنجراب جاتے ہوئے پانی بھرا تھا اس سے دوبارہ پانی بھر لیا۔میٹر ریڈنگ 53958۔

[haroonmcs26]

جب میٹر ریڈنگ 53962 تھی تو ہم عطاء آباد جھیل پر پہنچ گئے ۔ لیکن ہم وہاں رکے بغیر آگے بڑھتے چلے گئے ۔ اب صورتحال یہ تھی کہ ثانی اور یاسر کو ڈیوٹی کے سلسلے میں ان کے آفس سے کالیں آ رہیں تھیں لیکن وہ کسی نہ کسی طرح ٹال رہے تھے۔ لیکن پھر صورتحال ایسی ہو گئی کہ ان میں سے ایک کی واپسی ضروری ہو گئی۔ اگر ایک بھی واپس نہ جاتا تو پھر دونوں کو واپس جانا پڑ جاتا تو دونوں نے باہمی گفت و شنید کے بعد یہ فیصلہ کیا کہ ثانی واپس جائے گا ۔ اس کے لئے ثانی کو گلگت سے بٹھانا پڑنا تھا۔ تیزی سے واپس ہوتے ہوئے ہم گنیش کے قصبے میں اسی ڈرائی فروٹ کی دوکان پر پہنچ گئے جہاں سے ہم نے خنجراب جاتے وقت خوبانیاں خریدیں تھیں۔ وہاں سے ہر کسی نے گھر والوں کیلئے ڈرائی فروٹ خریدے۔ اخروٹ 280 روپے فی کلو، خوبانی 400 روپے فی کلو، خشک شہتوت 250 روپے فی کلو، بادام 400 فی کلو۔ دوکان کا نام تھا محسن ڈرائی فروٹ۔ وہاں سے آفتابی سلاجیت کے پیکٹ بھی خریدے فی پیکٹ 50 روپے۔ پیاس محسوس ہو رہی تھی تو دوکان دار سے پانی کا کہا۔ اس نے ایک لڑکے کو پانی لانے کو بھیجا۔ جب وہ پانی لیکر آیا تو پانی کچھ عجیب سا تھا۔ وہ لوگ اسے ہنزہ واٹر کہ رہے تھے۔ اس میں ایسے لگ رہا تھا جیسے مٹی اور ریٹ کی لپٹیں چل رہی ہوں۔ عنصر نے ایک گھونٹ پی کر اپنے گلاس کا پانی پھینک دیا جبکہ میں نے ہمت کر کے آدھا گلاس پی لیا۔ کافی بھاری پانی تھا۔ لیکن وہاں کے رہنے والے اس پانی کے عادی تھے۔ وہاں سے روانہ ہوئے تو بریک علی آباد پی ایس او پمپ پر لگائی ۔میٹر ریڈنگ 53992۔ ہم نے ثانی کو گلگت بس اسٹینڈ پر چھوڑ کر سکردو کیلئے روانہ ہونا تھا اسلئے سوچا کہ گاڑی کی ٹینکی فل کروا لیں پتا نہیں آگے فیول کی کیا صورتحال ہو۔ وہاں گاڑیوں کی لمبی قطار لگی ہوئی تھی ۔ ہم بھی اس قطار کا حصہ بن گئے ۔ 71اعشاریہ 30 روپے فی لٹر کے حساب سے 1500 روپے کا 21 اعشاریہ 05 لٹر پٹرول میں ٹینکی فل ہو گئی۔ پٹرول ڈلوانے کے بعد میں وہی پر واش روم گیا اور پھر آگے روانہ ہو گئے۔ دنیور میں عنصر کے مشورے سے70 روپے کی شملہ مرچ لی کہ آ ج شملہ مر چ پکائیں گے۔ دنیور سے آگے ہم گلگت جانےوالے راستے پر مڑ گئے۔ سیدھے بس اسٹینڈ پر گئے تو وہاں پتا چلا کہ راوالپنڈی کیلئے صبح 7 بجے گاڑی روانہ ہو گی۔ اسکی سیٹ بک کروائی اور اسے گلگت میں مرکز میں چھوڑا جہاں وہ رات گزار کر صبح روانہ ہو جاتا۔ ہم شام پانچ بجکر پینتیس منٹ پر سکر دو کیلئے روانہ ہو گئے۔ عام طورپر ہم میدانی علاقوں میں رات کو سنسان راستوں پر سفر نہیں کرتے لیکن گلگت بلتستان میں اس لحاظ سے میں نے امن پایا کہ آپ کو راستے میں چوری ڈکیتی کا کوئی ڈر نہیں ۔ مسئلہ ہے تو صرف راستے کے دشوار گزار ہونے اور لینڈ سلائیڈنگ کا۔

[haroonmcs26]

علی آباد پی ایس او پمپ۔

[haroonmcs26]

گلگت شہر میں داخلے کا راستہ ۔

[haroonmcs26]

گلگت بس اسٹینڈ۔

[haroonmcs26]

بس اسٹینڈ کے اردگرد کے مناظر۔ گلگت میں موسم کچھ گرم ہی تھا۔

[nagar1]

Haroon bhai glt men hun kal khunjrab se wapsi pa net chlaya aur apki thread parhi.unhi jghon pa tha jahan se ap is sfr name men hain

[haroonmcs26]

زبردست۔ میرا بھی کسی طرف نکلنے کا پروگرام ہے لیکن ابھی پروگرام فائنل نہیں ہوا۔ کزن کے ساتھ جانے کا پروگرام تھا لیکن اسکی والدہ سر جری کے سلسلے میں ہاسپٹل ایڈمٹ ہیں جس کی وجہ سے جا نہ سکے۔

[haroonmcs26]

شام ہو رہی تھی اور اگر ہم خود کھانا پکانے لگ جاتے تو شاید فارغ ہوتے ہوتے اندھیرا ہی ہو جاتا اسلئے سوچا کہ کھانا کسی ہوٹل سے ہی کھا لیا جائے۔ گلگت بس اسٹینڈ کے آس پاس دیکھا لیکن جہاں سے پتا کرو پراٹھا یا بریانی جو کہ ہمارا کھانے کا موڈ نہیں تھا ۔ جب کئی جگہ سے پتا کرنے پر سالن روٹی کی صورتحال نظر نہ آئی تو ہم روانہ ہو گئے کہ راستے میں کسی ہوٹل سے کھائیں گے۔ ویسے مجھے تو عجیب لگا کہ شام کے وقت بھی وہاں پراٹھا ہی ہر جگہ نظر آ رہا تھا۔ جب آپ گلگت جاتے ہیں تو گلگت بس اسٹینڈ سے پہلے ہی بائیں طرف نا ٹکو کی کیمپ سائٹ نظر آتی ہے جوکہ درختوں سے گھری ہوئی جگہ پر واقع ہے اگر آپ کا کیمپنگ کا ارادہ ہو تو وہاں کیمپ لگایا جا سکتا ہے۔ گلگت سے نکل کر ہم دوبارہ شاہراہ قراقرم پر آگئے ۔ اب ہم ہنزہ کی بجائےچلاس والی سائیڈ پر سفر کر رہے تھے۔ شاہراہ پر ایک جگہ ایک ہوٹل دیکھ کر رک گئے وہاں پوچھنے پر پتا چلا کہ اس وقت دال ماش ہی میسر ہے۔ دو دال ماش کا آرڈر دیا ۔ سلاد کا بھی کہا لیکن ان علاقوں میں آپ سلاد کا آرڈر نہ ہی دیں تو بہتر ہے کیونکہ سلاد کے نام پر موٹی موٹی کٹی ہوئی پیاز کے چند ٹکڑے اور اسی طرح ایک ٹماٹر کے بڑے کٹے ہوئے پانچ چھ ٹکڑے۔ کھانا کا کل بل بنا 250 روپے ۔ کھانا کھانے کے بعد ہمارا سفر دوبارہ شروع ہو گیا۔ راستے میں کہیں رکے بغیر ہم شاہراہ قراقرم سے سکردو جانے والے موڑ پر پہنچ گئے۔ میٹر ریڈنگ 54133۔ شاہراہ قراقرم سے جو سڑک نیچے کی طرف جا رہی تھی وہ کافی ڈھلوان میں تھی۔ احتیاط سے گاڑی کو چلاتے ہوئے کچھ دور موجود اس پل پر پہنچ گئے جو کہ سکردو کو باقی گلگت بلتستان سے جوڑتا ہے۔ یہ پل لکڑی اور لوہے سے ملا کر بنایا گیا ہے جس کو بڑے بڑے آہنی رسے سہارا دیتے ہیں۔ ایک وقت میں ایک گاڑی پل کو پار کر رہی تھی ہم بھی اپنی باری پر پل سے گزر گئے۔ پل سے گزرنے پر تھوڑی سی چڑھائی چڑھنے کے بعد سڑک زیادہ تر نشیب کی طرف ہی سفر کرتی ہے۔ راستہ بالکل سنسان تھا۔ ہم رکے بغیر ممکن حد تک تیزی سے سفر کر رہے تھے۔ ہم نے ایک انجان راستے پر اس وقت سفر کا رسک لیا تھا۔سڑک زیادہ چوڑی نہیں تھی۔ ایک ایسی چوڑائی والی سڑک جیسا کہ پنجاب کی کسی دیہات کی طرف جاتی ہے۔۔ ایک سنگ میل

[haroonmcs26]

دن دن ہی ہوتا ہے اور رات رات ہی۔ جب تک دن کی روشنی تھی تب تک تو اتنا مسئلہ محسوس نہیں ہوا لیکن جیسے ہی رات کا اندھیرا چھا یا تو اس راستے پر ڈرائیونگ کرنا آسان نہ رہا ۔ اوپر سے سڑک کی حالت بھی اتنی اچھی نہیں تھی۔ کہیں تو سڑک ایک اونٹ کے کوہان کی طرح اٹھتی کہ آگے دوسری طرف کیا ہے کچھ نظر نہیں آتا اور کہیں اتنی خراب ہو جاتی کہ گاڑی کو ابھرے پتھروں سے بچانے کیلئے بہت آہستہ چلانا پڑتا۔ نہ بندہ نہ بندے کی ذات اور نہ ہی کوئی آبادی نظر آرہی تھی۔ یا اگر آس پاس کوئی آبادی ہو تو رات کے اندھیرے کی وجہ سے نظر نہیں آ رہی تھی۔ راستے میں کئی جگہ گیڈر اور لومڑ ہی نظر آئے۔ صاف لگ رہا تھا کہ رات کے وقت استعمال ہونے والا راستہ نہیں ہے۔ عنصر کیمپ سے پہلے تو سڑک کافی خراب حالت میں تھی۔ عنصر کیمپ ایف ڈبلیو او والوں کا اس علاقے میں بیس پوائنٹ ہے جہاں انکی مشینری وغیرہ ہوتی ہے۔ اندھیرے میں ہمیں وہاں بس ایک کرین ہی نظر آئی باقی انکے قیام کی جگہیں اندھیرے کی وجہ سے نظر نہیں آ رہیں تھیں۔ بہت احتیاط سے ڈرائیونگ کرنا پڑ رہی تھی۔ دن ہوتا تو یہ صورتحال نہ ہوتی۔ جب میٹر ریڈنگ 54154 تھی تو ہم ہنوچل پہنچ گئے جو کہ ایک چھوٹی سی آبادی نظر آرہی تھی۔ سڑک پر ٹریفک نہ ہونے کے برابر تھی۔ جب میٹر ریڈنگ 54160 تھی تو سس حراموش کے قصبے میں پہنچ گئے۔ مین سڑک پر تو ہمیں اتنی زیادہ آبادی نظر نہ آئی لیکن وہاں ہم نے ہسپتا ل اور پولیس اسٹیشن کے بورڈ دیکھے جس سے لگ رہا تھا کہ اتنی چھوٹی آبادی بھی نہیں۔ سسی حراموش سے گزرے تو دیکھا آگے سے گاڑیاں ہی گاڑیاں آ رہیں تھیں جو کہ بہت عجلت میں نظر آرہیں تھیں ۔ انکی تیز رفتاری کی وجہ سے ہم نے اپنی گاڑی ایک سائیڈ پر روک دی کہ یہ قافلہ گزر جائے۔ بعد میں پتا چلا کہ راستے میں لینڈ سلائیڈ ہونے کی وجہ سے یہ گاڑیاں کافی دیر سے وہاں رکی ہوئیں تھیں اور اب راستہ کلیئر ہونے پر وہاں سے نکلی ہیں۔ انکی رفتار سے ہی لگ رہا تھا جیسے کوئی عرصے بعد جیل سے رہا ہو کر نکلا ہو۔ جب وہ قافلہ گزر گیا تو ہم بھی آگے بڑھ گئے ۔ اللہ کی ہر کام میں مصلحت ہوتی ہے۔ ہو سکتا ہے اگر ہم شام کی بجائے جلدی ہی سکردو جانے والے راستے پر آ جاتے تو ہمارا وہ وقت لینڈ سلائیڈنگ کی نظر ہو جاتا۔ وہاں ایک پی ایس پمپ سے وضو کیا اور کچھ دیر گاڑی کو آرام بھی دیا۔ وہاں ایک بڑی عمر کا بندہ بھی تھا اب پتا نہیں وہ پمپ کا مالک تھا یا مینیجر وہ کافی اکھڑ مزاج تھا۔ اس سے کچھ پوچھو تو اکتائے ہوئے اندازمیں جواب دے رہا تھا لیکن ہمیں اس سے کیا لینا ہم تو کچھ دیر رک کر آگے روانہ ہو گئے۔ اندھیرے کی وجہ سے راستے کی تصاویر بھی نہ لی جا سکیں ۔ جب میٹر ریڈنگ 54164 تھی تو ہم شاٹوٹ پہنچ گئے ۔ عنصر کیمپ کے بعد سے راستہ کچھ بہتر ہو گیا تھا۔ اب ساتھیوں پر غنودگی کا غلبہ ہونے لگا تھا اور اسکے اثرات مجھ پر بھی ہو رہے تھے۔ بار بار ان کو کہہ کر اٹھاتا لیکن پھر وہی صورتحال۔ شنگس کے علاقے میں پہنچے تو وہاں پہلے ایک آرمی کیمپ آیا اس سے آگے گئے تو ایک ہوٹل آ گیا۔ ہوٹل میں صرف چائے اور کھانے پینے کا انتطام نظر آ رہا تھا قیام کی جگہ نظر نہیں آئی۔ راستے کی صورتحال کی وجہ سے میں نے کیمپ لگانا مناسب نہ سمجھا دوسرا گرمی کا موسم تھا اور کیمپ میں رات گزارنا آسان نہیں تھا۔ کاؤنٹر پر موجود ایک شخص سے رات گزارنے کیلئے کسی جگہ کا پوچھا تو اس نے ہمیں اس کمرے سے پیچھے ایک اور کمرہ دکھایا جہاں ایک کھڑکی سے گزر کر جایا جاسکتا تھا۔ وہاں قالین بچھا ہوا تھا لیکن کچھ گرمی محسوس ہو رہی تھی۔ بندہ اچھا تھا اس نے اچھا مشورہ دیا کہ بہتر تو یہ ہے کہ آپ تھوڑا آگے جائیں وہاں آپ کو ایک ہوٹل میں سونے کا انتظام مل جائے گا اور چارپائی بھی مل جائے گی۔ ہم اسکا شکریہ ادا کرکے آگے روانہ ہو گئے۔ جب میٹر ریڈنگ 54187 تھی ایک ہوٹل پر پہنچ گئے جس کا نام تھا پاکستان ہوٹل۔ تقریبا رات کے دس بج رہے تھے۔ یہ ہوٹل ڈرائیور ہوٹل ٹائپ تھا جیسا کہ عام طور پر سڑک کے کنارے ہوتے ہیں۔ باہر چارپائیاں بھی بچھی ہوئیں تھیں۔ اگر چارپائی پر سونا ہو تو 100 روپے کے حساب سے چارپائی میسر تھی۔ ہم نے تین چارپائیوں اور بستر کے ساتھ ایک کمرہ لے لیا جو کہ ہمیں 400 روپے کا پڑا۔ کمرہ کوئی ہوٹل جیسا کمرہ نہیں تھا ۔ صرف ایک سادہ کمرہ جس میں تین چارپائیاں اور ایک سست رفتار پنکھا۔ بہرحال ہمیں اس علاقے میں اس سے بہتر کی توقع بھی نہیں تھی۔ ویسے میں نے ساتھیوں سے کہا بھی کہ اگر تم ساتھ دو اور جاگتے رہو تو میں سفر جاری رکھ سکتا ہوں لیکن وہ نہ مانے۔ اسلئے وہیں پڑاؤ کر لیا۔ وضو کیا ہوا تھا ساتھ ہی ایک کمرے میں نماز ادا کی اور واش روم سے فارغ ہو کر چارپائی پر سونے کیلئے لیٹ گیا۔ کسی کا کچھ کھانے کا موڈ نہیں تھا۔ پرس وغیرہ ہم نے گاڑی میں ہی رکھ دیئے تھے۔ ابھی کچھ دیر ہی گزری تھی کہ عنصر میرے آفس کے ایک کولیگ سیف کے ساتھ کمرے میں داخل ہوا ۔وہ تقریبا دس پندرہ لڑکوں کے ایک گروپ کے ساتھ بائیک ٹور پر تھا ۔ وہ لوگ استور سے دیوسائی اور وہاں سے سکردو ہوتے ہوئے واپس آ رہے تھے۔ اس کے ساتھ دوبارہ کمرے سے باہر آ گیا تا کہ اس کے ساتھیوں سے بھی ملاقات کی جا سکے۔ وہ لوگ چائے پینے کیلئے یہاں رکے تھے اور انکا ابھی آگے جانے کا ارادہ تھا۔ ایکدوسرے کے ساتھ سڑک کی صورتحال کا تبادلہ ہوا۔ انھوں نے بتایا کہ استور اور راما والا روڈ انتہائی خراب حالت میں ہے اسلئے دیوسائی اور وہاں گاڑی لے جانے سے منع کیا۔ مزید پوچھنے پر بتایا کہ ابھی بھی سکردو کا تقریبا پانچ گھنٹو ں کا سفر باقی ہے لیکن مجھے اندازہ تھا کہ موٹر سائیکل پر پانچ گھنٹوں کا سفر ہے تو گاڑی پر کچھ زیادہ ہی لگنا ہے۔ انھوں نے جیپ کرایوں کا ایک بروشر بھی دیا جس میں سکردو سے ہر علاقے کا جیپ کا کرایہ درج تھا۔ انکے کئی ساتھی کافی تھکے نظر آ رہے تھے لیکن پھر بھی وہ کچھ دیر بعد وہاں سے روانہ ہو گئے۔ اسکے بعد ہم بھی نیند کی وادی میں کھو گئے۔

[haroonmcs26]

ساتواں دن مورخہ 22 جولائی 2017ء

رات کو اتنی گہری نیند آئی کہ صبح آنکھ کھلی۔ ہوٹل والے سے نما ز کیلئے پوچھا تو اس نے بتایا ہوٹل سے بائیں طرف تھوڑا سا آگے مسجد ہے۔ ہوٹل کے ایک نل سے وضو کرنے کے بعد میں مسجد کو دیکھنے نکلا ۔ راستہ بلندی کی طرف کی مقامی آبادی کی طرف جا رہا تھا میں کافی آگے تک گیا لیکن مجھے تو کوئی مسجد نظر نہیں آئی۔ مایوس ہو کر واپس آیا تو ساتھیوں سے پتا چلا کہ مسجد تو بالکل ہوٹل کے ساتھ ہی ہے ۔ اصل میں مسجد کی بناوٹ ہی ایسی تھی کہ میں اسے ایک عام کمرہ ہی سمجھا۔ اسی چکر میں نماز قضا ہو گئی۔ بہر حال قضا نماز ادا کی اور ناشتہ ہوٹل میں ہی کیا۔ 20 روپے کے حساب سے تین پراٹھے اور 20 روپے کے حساب سے تین کپ چائے۔ کوئی مہنگا سودا نہیں تھا اور کوالٹی کے لحاظ سے بھی کام ٹھیک تھا۔ ہوٹل کا مالک/مینیجر بھی کافی تعاون کرنے والا بندہ تھا۔ ہوٹل کے باہر ہی ایک شو کیس میں اسی علاقے کے پہاڑوں سے نکالے گئے قیمتی پتھر تھے ۔ ہوٹل کے مالک کے مطابق یہ مقامی لوگوں کا پیشہ بھی ہے کہ وہ پہاڑوں میں سے یہ پتھر ڈھونڈ کر بیچتے ہیں۔ لیکن ہمیں تو ان پتھروں کے تعلق کوئی اتنی زیادہ معلومات نہیں تھی کسی نے سچ ہی کہا ہے کہ جوہری ہی ہیرے کی قدر جانتا ہے۔ ناشتے سے فارغ ہو کر 6 بجکر 53 منٹ پر ہم وہاں سے آگے روانہ ہو گئے ۔

[haroonmcs26]

صبح کی پہلی تصویر جس سے آپ علاقے کا اندازہ لگا سکتے ہیں۔

[haroonmcs26]

سنسان اور ویران پہاڑوں کے درمیان سے گزرنے والی سڑک جس پر ہر وقت لینڈ سلائیڈنگ کا خطرہ موجود رہتا ہے۔ یہ اللہ کی ذات ہی ہے جس نے ان پہاڑوں کو باندھ کر رکھا ہوا ہے۔