Karachi to West Sind & Bahawalpur Region - Feb 2017

[ahmedmemon1]

Traveling—it leaves you speechless, then turns you into a storyteller. Ibne Batuta.

مستنصر حسین تارڑ صاحب کے سفرنامے کے بعد، بھائی عبدالوحید طارق اور بھائی رضوان خان صاحبان کے سفرنامے پڑھ کر یوں لگا جیسے کہ میں خود اس سفر پر تھا، نہایت عمدگی سے اپنے جذبات کا اظہار کیا۔ ایک ایک تصویر دیکھ کر دل شالیمار باغ ہوگیا، نکلنے سے پہلے کی تیاریاں، ہائی وے پر اگتا سورج، نامانوس علاقوں کی صبحیں، شامیں، راتیں، لوگ، سڑکیں، ڈھابے اور ان پر موجود منجیاں، چائے کے کپ، لدے پھندے ٹرک/ٹرالر، لہلہاتے کھیت، پہاڑ، چراہ گاہیں، جھیلیں، دکانیں، جانور وغیرہ ہر ہر ایک چیز۔

دراصل یوں کہہ لیں، بھائی وحید نے ہمت بندھائی تو بھائی خان نے ڈھارس۔ اب ہمت اور ڈھارس میں کیا فرق ہے، اس سے کیا فرق پڑتا ہے۔ قصہ مختصر یہ کہ، باکمال لوگ، لاجواب سروس۔

یوں تو ماضی میں گھارو، حیدرآباد، ننگرپارکر، وغیرہ تک گاڑی چلا چکا ہوں، اس دفعہ حدوں کو پار کرنے کی ٹھان لی ہے۔ معلوم نہیں کہ بچپن ہی سے، ڈر کیوں نہیں لگتا، خلل کہیے یا بہادری، گھر والوں، رشتہ داروں ، دوستوں کے تمام تفکرات اور اشکالات کا بس یہی جواب دیا کہ اللہ مالک ہے۔ لیکن آپ سے کیا پردہ، آپ کو راز بتلا دیتا ہوں، دراصل میں نہیں چاہتا، مرنے کے بعد میری روح ہائی وے پر بھٹکتی، روڈ ٹرپ پر جاتے لوگوں کو ستائے، تو قوم کے عظیم ترین مفاد میں، یہ انتہائی قدم اٹھا ہی لیئے۔

کورے ۲۰۰۵ کا ماڈل ہے، اپنے سندھی بھائیوں کی پسندیدہ گاڑی، دوست سے چار پانچ سال پہلے خریدی تھی، میں شاید دسواں یا گیارہواں خریدار ہوں، ٹھیک ٹھاک چلتی ہوئی گاڑی تھی، مگر کم بخت چلتی تھی ایسے جیسے رینگ رہی ہو،حد یہ کہ ایک بار تو کچھوا جیت گیا۔ میرے گمان کے مطابق سب سے پہلا خریدار اندرون سندھ کا رہائشی ہوگا، ہر ہفتے اپنے گاوں فراٹے بھرتے ہوئے گاڑی بجاتا جاتا ہوگا۔ اس کے بعد کے کسی نے اس میں ۶۶۰ سی سی کا انجن ڈلوادیا تھا۔ دوست سے پہلے والے میمن بچے نے تو، وہ نیلی پیلی لائیٹیں ہوتی ہے ناں جو پوری گاڑی کے نیچے لگائی جاتی ہیں، وہ لگائی ہوئی تھی، عجیب شوخ نوجوان تھا کوئی، ریڈئیل ٹائیر لگانے کا شوق تھا مگر اچھے لگاتے ہوئے غالبا موت پڑگئی ہوگی، سستے رم کو فٹ کرنے کے لئے بولٹ پر ھتوڑے برسوادئیے، اسطرح کون درگت بناتا ہے؟ گویا یہ کہ کوئی چیز ٹوٹ جائے کوئی کلپ کھوجائے، چاہے ڈیش بورڈ کا ڈھکن ہو یا ائیر فلٹر کا کلپ، ایک کیل سب پہ بھاری۔ وہ کمزور دل میمن افراد جن کا بی پی بڑھ چکا ہے، ان کے مداوے کے لئے، میں کچھی میمن ہوں، اور مجھے میمن ہونے پر کوئی شرمندگی نہیں، اور ہاں سارے میمن کنجوس نہیں ہوتے۔

سب سے پہلے ۸۵۰ سی سی کا انجن ڈلوایا، سسپنشن وغیرہ کا تسلی بخش کام کروایا، نئے رم/ٹائیر ڈلوائے، ڈیش بورڈ بھی لگوالیا، غرض یہ کہ، آپ کے بھائی نے حتی الامکان کوشش کرڈالی ہے کہ تفریح کے دوران قسمت کو تفریح کرنے کا موقع کم از کم دیا جائے۔ نتیجہ یہ کہ بجٹ رکھا تھا کچھ، اور کچھ اور ہی ہوگیا۔ مگر، شاہراہ فیصل پر رات تین بجے ہوٹل میٹروپول سے ڈرگ روڈ سات منٹ میں پہنچ کر، خوشی کی نہ جانے کس منزل پر جا پہنچا، کیا بتاوں۔ آپ سوچ رہے ہوگے دوسری گاڑی ہی خرید لیتا، وہ ٹھیک ہے، مگر آپ کا بھائی بنک سے لون لینے کا قائل نہیں۔ بنانے کا دل گردہ تو تھا، نئی خریدنے کی اوقات نہیں، پرانی لیکر سابقہ مالکان کو گالی دینے کا شوق نہیں۔

پروگرام تو، سندھ اور پورے پنجاب کے علاقوں میں موجود بیشتر تفریحی مقامات کی سیر تھا، مگر وہی کچھ ناگزیر وجوہات کی بنا پر، بھاگتے چور کی لنگوٹی کے مصداق، صرف مغربی سندھ اور بہاولپور پر ہی اکتفا کرلیا۔

کالج کے بعد کبھی بھی اتنی زیادہ اردو نہیں لکھی، کیا کریں، یونیورسٹی میں انگریزی، نوکری میں انگریزی، گویا کہ اردو، کالج کے بعد بس بولی رہ جاتی ہے۔ ایسا نہیں کہ مجھے انگریزی پسند نہیں، مگر میرے بھائ جذبات کے اظہار کے لئے مادری زبان سے بہتر کوئی ذبان دیکھی ہو تو میری معلومات میں اضافہ کردو۔

اب اس پروگرام کو پورا کرنے میں جن چیزوں کی ضرورت ہے، وہ ہیں زندگی، پیسہ، وقت۔ چونکہ الحمداللہ، فی الحال یہ تینوں چیزیں میسر ہیں تو چلتے ہیں پھر۔

اس آوارہ گردی پر مائل دل کی صدا پر سدا لبیک کہنے والی وہی خاتون ہیں جو میری ذندگی کی ہمسفر ہیں۔

سفر کچھ یوں ہے

West Sind

11/02/2017
- Ranikot - The Great Wall of Sind
- Lal Shahbaz Qalandar Shrine - Sehwan

• Gorakh Hills - The Murree of Sind (12/02/2017)
• Moen Jo Daro (13/02/2017)
• Sadhu Bela (14/02/2017)

Bahawalpur

• Fort Abbas (16/02/2017)

17/02/2017
- Lal Suhanra
- Noor Palace

18/02/2017
- Gulzar & Darbar Palaces
- Quaid e Azam Park

19/02/2017
- Shrine of 4 Sahaba R.A.A
- Derawar Fort
- Derawar Mosque
- Graveyard of Nawabs of Bahawalpur
- Cholistan Desert

Sind
20/02/2017
- Kot Diji - Khairpur
- Hala Shrine Makhdoom Sarwar Nooh R.A.
- Hala Handicrafts Market

21/02/2017
- Resham Gali, Hyderabad
- Haji Rabri, Hyderabad
- The Bombay Bakery, Hyderabad
- Back to Karachi

Gadgets Used:
- Zong 4G device - 6 hours battery
- Power Bank
- Android Mobiles ( Lenovo for selfies, Huwaei for communication, QMobile as backup)
- Mobile Network SIMS (UFone, Telenor, Zong, Mobilink)
- Selfie Stick with Blue Tooth
- Nikon D3300 Camera with Tripod
- 2 Laptops
- Power Extension
- Different plugs
- Car Cigarette Lighter to USB Device
- Plenty of USB to android pin cords
- Car Android Mobile holder
- Android Google Map App was really great help

Hotel Rates:
- Sehwan: Rs. 800/= per day
- Gorakh Hills: Rs. 3000/= per day
- Sukkur: 1500/= per day
- Bahawalpur: 1000/= per day
- Ahmedpur East: 2200/= per day
- Khairpur: 2000/= per day
- Hyderabad: 800/= per day

Petrol: Rs. 14,000/=

الحمداللہ یہ سفر تو اپنے اختتام کو پہنچا، مگر اگر اللہ کی مرضی شامل رہی تو ایک نئ کہانی کے ساتھ اگلے کچھ مہینوں میں پھر حاضر ہوجائوں گا۔ احباب سے درخواست ہے کہ تنقیدی نظر سے دیکھ کر جہاں جہاں اصلاح محسوس ہو، بلا جھجک مطلع کردیں، عین نوازش ہوگی۔

[ahmedmemon1]

11 February 2017

کراچی سے تقریبا صبح چار بجے روانہ ہوئے، پیٹرول ڈلوا کر آگے بڑھے۔ بحریہ ٹائون سے لیکر ڈی-ایچ-اے تک کا سفر روڈ کی ابتر صورتحال سے کچھ کوفت میں گزرا، (نئ کاریں آرام سے گزر رہی تھیں) مگر پھر جب اچھی روڈ شروع ہوئ تو پھر فراٹے بھرنے شروع کردیئے۔

مہران یونیورسٹی سے کوئ آدھا گھنٹہ قبل ایک پیٹرول پمپ پر نماز فجر کےلئے رکے، وضو کیا تو ٹھنڈ پے گئ، کھلے آسمان کے نیچے وضو خانہ اور بلا کی ٹھنڈ، اوئے ہوئے۔

آگے بڑھے ہی تھے کہ ایک ڈائ ورژن آگیا، مگر میں ایک ٹرک کے پیچھے اچھی روڈ پر چلتا رہا، مہران یونیورسٹی سے کچھ پہلے روڈ پھر ٹھیک ہوگئ، تو خوشی خوشی جامشورو-سیہون روڈ پر مڑ گیا، اچھا لگ رہا تھا، ٹریفک کم تھا۔

ایسے کچھ دس کے قریب ٹرالروقتا فوقتا نظر آئے، پوری روڈ گھیر رکھی ہے۔

پھر چنگی آئ اور سندھ پولیس کی چوکی پر موجود واحد جاہل سپاہی نے میری پنگی بجا دی، کراچی میں بڑے بڑے بے غیرت دیکھے ہیں، مگر اس سپاہی سے زیادہ نہیں، نہ جانے اس کی چنگی والوں سے سیٹنگ تھی یا کیا، اس نے تاڑ لیا کہ بندہ کراچی سے ہے، بیچ سڑک کے آ کھڑا ہوا (ایک لمحے کو تو مجھے بھی شک ہوا کہ میں کہیں چرس، ہیروئین یا اسلحہ وغیرہ تو نہیں لے کر جا رہا)۔ جاتے جاتے میں نے اس سے کہا، تم کراچی آکر دیکھو، کوئ پولیس والا فیملی والی گاڑی کو نہیں روکتا، مگر جس کو حرام کا چسکا لگ چکا ہو، وہ قبر حشر سے کیا ڈرے گا۔

موڈ اتنا خراب ہوا کہ حضرت اویس قرنی رٓض کے مزار پر جانا تھا، غلط روڈ پر آگیا، پھر واپس نیشنل ہائ وے پر آیا اور رنی کوٹ کی جانب بڑھنے لگا۔ نوٹ فرمائیں کہ ایک مزار ملک شام میں بھی انہی صحابی کے نام سے ہے، کون سا صحیح ہے، اس کا علم نہیں۔

رنی کوٹ
تقریبا 9 بجے کے اریب قریب پہنچے، میں امید کررہا تھا، کوئ سرکاری دفتر ہوگا، مگر نہ بندہ نا بندے کی ذات، مجھے تو بہت ہی اچھا لگا، فیملی ساتھ تھی اور کوئ تھا نہیں، اطمینان سے گھومے، تو کچھ ہی دیر بعد ایک اسکول کے بچے اپنے فیلڈ ٹرپ کے لئے اترتے نظر آئے۔

ارادہ تو میری کوٹ جانے کا بھی تھا، مگر اپنی گاڑی بلیلہ ڈارلنگ کو میں کسی رسک میں نہیں ڈالنا چاہتا تھا۔ ویسے تو سب ٹھیک تھا گاڑی میں مگر جب بھی اسپیڈ بریکر پر گاڑی آتی تو اگلے سسپنش کی طرف سے ایک خفیف سی آواز آتی، روانگی سے قبل اپنے مکینک کو دکھائ بھی تھی، اس نے کہا کہ اتنی ہلکی آواز ہے کہ سمجھ نہیں آرہا کیا مسئلہ ہے۔ پس یہی کارن بنا کہ بنا میری کوٹ دیکھے، رنی کوٹ سے نکلنے کی ٹھان لی۔

روانگی کے لئے ابھی پر ہی تولے تھے کہ دو گاڑیاں آکر رکیں جس میں مرد حضرات رنی کوٹ کا دیدار کرنے آئے تھے۔ ہم نے نیشنل ہائ وے کی جانب سفر شروع کیا تو رستے میں مزید سیاح رنی کوٹ کی جانب جاتے نظر آئے جن میں فیملیاں بھی شامل تھیں۔

روڈ کی حالت نسبتا مخدوش ہے، مگر حکومت سندھ کی ریسٹوریشن کی کاوش قابل ستائش ہے، جو کہ انہوں نے رنی کوٹ کے دروازے اور ٹاور پہ کی ہے۔

Ranikot - The Great Wall of Sind

Ranikot taking Sun Bath

The Great Wall of Sind

سیہون شریف
رنی کوٹ سے واپس نیشنل ہائ وے پر اترے، اور بڑھ دیئے سیہون کی جانب۔ اب ٹریفک کچھ بڑھ گیا تھا۔ کچھ ہی گھنٹوں بعد پہنچے سیہون، گوگل میپ اور زونگ کی 4 جی کنکشن، لاجواب کمبی نیشن، سیدھے حضرت لعل شہباز قلندر رٖح کے مزار والی روڈ پر پہنچے، دو مسئلے پیش آئے، کار کو کہاں پارک کیا جائے اور کس ہوٹل میں رکا جائے۔ بہرحال کچھ ہی دور چلے تو ایک جگہ پارکنگ اور اس سے ملحق گیسٹ ہائوس نظر آیا، آئو دیکھا نہ تائو اور لے چلا گاڑی کو پارکنگ میں، ایک بچہ آیا، پوچھا کمرہ چاہیے، ہم نے کہا دکھائو، قابل قبول تھا، کم پیسوں میں مناسب ہی لگا، ہزار مانگے، آٹھ سو میں بات طے ہوئ، گاڑی گیسٹ ہائوس کے اندر پارک کی، اور سامان رکھوا کر آرام کیا۔

چائے منگوانی تھی، بچے کو کہا دودھ پتی نہیں سادی لانا، اس کے ککھ سمجھ کچھ نہ آیا، ایک آدھ اور بندے کو سمجھانے کی کوشش کی، وہی انجام۔ بہرحال ہوٹل والے کے پاس جاکر اس کو سمجھایا تو اس نے کہا، سمجھ گیا، کھیری والی چائے نہیں چاہیے، میں نے کہا، اس نے بات سمجھ لی۔ خیر کمرے میں آگیا، تھوڑی دیرمیں چائے آگئ، جب پہلا گھونٹ لیا تو مزہ آگیا، کراچی میں اب کوئٹہ والوں کی چائے زہر لگنے لگی ہے، تیز پتی، زیادہ میٹھا، کیا مزہ رہا چائے کا؟

ہوٹل کے مالک کا بیٹا اکیس سال کا وجیہہ نوجوان تھا، کافی دیر ہم دونوں گپ شپ کرتے رہے، میں نے اس سے بہترین ریسٹورنٹ کے لئے مشورہ مانگا تو اس نے سیہون ریسٹورنٹ کا پتہ سمجھایا۔ روم سروس والا لڑکا اگرچہ پوری طرح اردو نہیں سمجھ پا رہا تھا مگر نہایت چاق و چوبند اور تابیدار تھا۔

ایک عجیب و غریب روایت یہاں کے مقامی لوگوں میں مشہور ہے۔ کہتے ہیں حضرت لعل شہباز قلندر رح کے آنے سے پہلے یہاں ایک صوفی بزرگ حضرت بودلا بہار رح رہا کرتے تھے اور اس وقت یہاں کا ظالم حاکم قصائ کے نام سے مشہور تھا۔ حضرت بودلا بہار اکثر کہتے کہ ظلم بند کردے یہاں ایک بڑے بزرگ (حضرت لعل شہباز قلندر رح) آنے والے ہیں، بلآخر ظالم حاکم قصائ نے ان کے ٹکڑے ٹکڑے کرکے غالبا ھانڈی میں ڈال دیئے۔ پھر جب حضرت لعل شہباز قلندر رح یہاں تشریف لائے تو انہوں نے حکم دیا اور ھانڈیوں سے حضرت بودلا بہار رح کے ٹکڑے اٹھے اور وہ پھر سے انسانی شکل میں آگئے۔ ساتھ ہی حضرت لعل شہباز قلندر رح کی بددعا سے اسی ظالم حاکم قصائ کا محل الٹا ہوگیا۔ واللہ عالم۔

کہتے ہیں آج بھی اس قلعے کے آثارسیہون میں موجود ہیں، ہم بہرحال وقت کی کمی کے سبب وہاں نہیں جاسکے۔

رات کے کھانے کے لئے سیہون ہوٹل گئے، چنچی میں بیٹھ کر۔ یہ ہوٹل سندھ کی جانی پہچانی شخصیت پیر مظہر الحق صاحب کا ہے۔ کھانا اچھا تھا۔ کھانے کے بعد اس ہی چنچی میں بیٹھ کر مزار آئے۔ بچپن میں والد صاحب یہاں لے کر آئے تھے، اب کافی کچھ بدلا سا لگ رہا تھا۔ مگر درگاہ سے متصل بازار کی گلی میں آج بھی چادریں ٹنگی ہوئی تھیں۔

Shrine Lal Shahbaz Qalandar

مزار سے واپسی پر سندھی ٹوپی خریدی، دو وجوہات تھیں ایک تو یہ کہ اگلی دفعہ کوئ منحوس پولیس والا شہری بندہ سمجھ کر نہ لوٹے اور دوسرا یہ کہ لوگ غلط رستہ نا بتادیں۔ یہی وجہ تھی یا کچھ اور پورے سفر میں دونوں خباثتوں سے محفوظ رہے۔ الحمداللہ۔

اس کے بعد ہوٹل پہنچے اور سوگئے صبح جلدی اٹھنے کا ارادہ تھا۔

[asifcae]

seems like a great trip... waiting for more details

[ahmedmemon1]

صبح کا ناشتہ سیہون ریسٹورنٹ پر کیا، اور چلے جوہی کی طرف۔ نیشنل ہائ وے اچھی تھی، وہیں سے جوہی لنک روڈ پر گاڑی موڑی، جوہی کے اندرون شہر سے ہوتے ہوئے واہی پاندی کی طرف بڑھے۔

یہیں پاک وھیلز پر، رضوان خان بھائ کےاستفسار پر جمن جمالی کا موبائل نمبر کسی نے ڈال رکھا تھا، بڑا کام آیا وہ نمبر، کراچی سے ہی کمرہ (3000 روپے) اور پوٹوھار(4500 روپے) کی زبانی بکنگ کروا رکھی تھی۔
Juman Jamali: 0300 2700930
Mukhtiar (Driver): 0334 2202921

مختیار واقعی ایک ماہر ڈرائیور ہے اور بے حد اچھے اخلاق کا حامل بھی۔ ڈرائیور سے ہم ایک دن پہلے ہی سے رابطے میں تھے، آج ہی کے دن انہوں نے ہمیں واہی پاندی کے پیٹرول پمپ پر پہنچنے کا کہا تھا۔

Wahi Pandi Petrol Pump by Ahmed Memon, on Flickr

گورکھ ہلز

Gorakh Hills Restaurant & Resort by Ahmed Memon, on Flickr

تقریبا دن کے 12:30 بجے واہی پاندی مختیار کی بتائی ہوئ جگہ (پیٹرول پمپ) پر پہنچے۔ سامان پوٹوھار میں رکھوایا، گاڑی لاک کی، 100 روپے گاڑی پارک کرنے کے دیئے اور1 بجے روانہ ہوئے۔ مختیار نے بتایا کہ ہمیں دو گھنٹے لگے گیں گورکھ پہنچنے میں۔

Potohar Full with over Belongins by Ahmed Memon, on Flickr

مختیار کے مطابق، اس علاقے کے خانہ بدوش کسی زمانے میں گورکھ کی پہاڑیوں کے بارے میں بتاتے تھے کہ وہاں بھیڑیئے ان کے جانور کھا جاتے ہیں، مقامی سندھی زبان میں بھیڑیئے کو گورکھ کہتے ہیں۔ ساتھ ہی ساتھ اس نے بتایا کہ، بھٹو سے کسی گورے نے کوئٹہ جانے کی فرمائش کی، تو اسے اونٹ پکڑا دیا گیا، وہ جب کوئٹہ جانے نکلا تو راستے میں گورکھ کی چوٹی پر قیام کیا اور کوئٹہ کے بجائے یہیں رک گیا۔ واپسی پر اس نے بھٹو مرحوم کو اس علاقے کے بارے میں اطلاع دی۔

ایک سوال آتا ہے ذہن میں، اگر گورے ہمیں غلام نہ بناتے تو کیا ہمیں مری، گورکھ، شملہ، ڈارجلنگ وغیرہ جیسے ھل اسٹیشن ملتے؟

Way towards Gorakh Hills by Ahmed Memon, on Flickr

Beautiful Hill down to Gorakh Hills by Ahmed Memon, on Flickr

ہم واقعئ 2 گھنٹے میں گورکھ میں تھے، دن 3 بجے کا وقت تھا، سورج نکلا ہوا تھا، آسمان صاف تھا، مگر ہلکی سی ٹھنڈک تھی، گمان ہوا کہ رات میں تو خوب ٹھنڈک ہوجائے گی۔

Gorakh Restaurant by Ahmed Memon, on Flickr

Gorakh Resort by Ahmed Memon, on Flickr

تندور سے ملحق حصے میں موجود غیر معمولی صحتمند موٹا مرغا۔
Big Fat Chicken at Gorakh Restaurant by Ahmed Memon, on Flickr

ہم دونوں میاں بیوی کی سو فیصد حلال سیلفی
Halal Selfie by Ahmed Memon, on Flickr

اب تو وہاں اور ریسٹ ہائوس بن رہے ہیں۔ کچھ تصویر کشی کی اور ریسٹ ہائوس کی جانب گئے کمرہ میں سامان رکھوایا اور کھانے کے لئے واپس ریسٹورنٹ پہنچے اور مشورہ سے ریسٹورنٹ کے احاطے میں باہر کھلے میں تخت پر بیٹھ کر دوپہر کا کھانا تناول فرمایا اور چائے کے مزے لئے۔ اس کے بعد واپس کمرے میں پہنچے، عصر کی نماز کی تیاری کی، نماز ادا کی اور تقریبا دوڑے کہ زیرو پوائنٹ پر سورج غروب ہوتا دیکھیں

Sunset at Zero Point Gorakh Hills by Ahmed Memon, on Flickr

ہم دس منٹ لیٹ تھے، مختیار نے ہمیں پوٹوھار میں بٹھایا اور صرف 2 یا 3 منٹ میں زیرو پوائنٹ پہنچا دیا، یہاں زیادہ ٹھنڈک تھی بلوچستان کی خوبصورت پہاڑیوں کے نظارے سے لطف اندوز ہونے سے پہلے، ڈوبتے سورج کی تصویریں لی، اور پھر وہیں گھومتے رہے۔

Zero Point - Gorakh Hills

Bonfire at Gorakh

کچھ دیر بیٹھ کر واپس ریسٹورنٹ پہنچے اور آگ کا الائو روشن کروایا، کافی کے چسکے کے ساتھ آگ کی تپش سے لطف اندوز ہوتے رہے۔ مریخ بھی نظر آرہا تھا کھلا صاف آسمان اور ستاروں بھرا جو کراچی کی روشنیوں میں ممکن نہیں ہوتا۔

Mars from Baluchistan

یہیں پہاڑیوں سے خیرپور ناتھن شاہ اور سیہون کی روشنیاں نظرآتی ہیں، ہماری خوش قسمتی کہ ہمیں چاندنی رات ملی، سندھ والی طرف سے تھوڑا خوفناک نارنجی چاند نکلا۔

Moon from Sind Side on Gorakh

Moon at Gorakh Resort

لوڈ شیڈنگ یہاں ہوتی ہے مگر فورا ہی جنریٹر اسٹارٹ کردیا جاتا ہے۔

کافی دیر وہاں بیٹھے رہنے کے بعد کمرے کی جانب بڑھے، یہاں کبھی کبھی یوفون کے سگنل آجاتے ہیں، ہم نے ریسٹورنٹ پر موجود وی-پی-ٹی-سی-ایل سے گھر پر خیر و عافیت کی اطلاع دے دی تھی۔

سونے کے بعد ہم صبح صادق سے پہلے اٹھے اور نکل کھڑے ہوئے سورج چاچو کو دیکھنے۔

یہ جو بچپن سے پڑھتے چلے آئے تھے کہ فجر کا وقت اس وقت شروع ہوتا ہے جب رات کا اندھیرا, صبح کی سفیدی سے الگ ہوجاتا ہے، اس کا مشاہدہ اس دن کیا۔

Subah Sadiq at Gorakh Hills

سردی بے اتنہا لگ رہی تھی، تین چار تو ٹی شرٹ پہن رکھی تھیں، دو دو جرابیں، شال وغیرہ اس کے باوجود تھوڑی دیر شال ہٹانے پر ٹھنڈ لگنی شروع ہوجاتی۔ اس سیلفی کو لینے کے لئے چاند کی طرف اشارہ کر رہا ہوں، اتنی سی دیر میں انگلیاں ہلکی ہلکی سی شل ہورہی تھیں، کیمرہ کا بٹن دبانا بھی کچھ دشوار ہو رہا تھا۔

Sunrise at Gorakh
Sunrise seen from Gorakh Restaurant

اب جب کہ سورج پورا نکل چکا تھا تو سردی کی شدت میں بھی کمی آئ، ریسٹورنٹ کے باہر ہی بیٹھ کر ناشتہ کیا، اور پھر کچھ دیر میں واپسی کی تیاری شروع کردی اور9 بجے نکل پڑے۔

ہم 11 بجے واہی پاندی کے پیٹرول پمپ پہنچے، زرا فریش ہوئے اور نکلے موئن جو دڑو کی طرف۔

[ahmedmemon1]

موئن جو دڑو

تیرہ فروری کو ہی، شام میں پہنچے موئن جو دڑو، بچپن میں کتابوں میں پڑھنا اور سامنے سے دیکھنا یکسر مختلف تجربہ رہا۔

Main Gate Moen Jo Daro by Ahmed Memon, on Flickr

Moen Jo Daro Museum 1 by Ahmed Memon, on Flickr

Moen Jo Daro Museum 2 by Ahmed Memon, on Flickr

ہم نے میوزیئم میں موجود گائڈ کی خدمات حاصل کیں، اور اکرام (ٹپ) کے طور پر سو روپے گائڈ کو دیئے۔ گائڈ نے بتایا کہ یہاں سے دو مورتیاں ملی، ایک کو کنگ پرائسٹ کا نام دیا گیا، اور دوسری کو ڈانسنگ گرل، دونوں کیوں کے برطانوی راج میں دریافت ہوئ تھی لہذا موجودہ بھارت ہی میں تھی، بھٹو صاحب نے کنگ پرائسٹ تو واپس لے لیا مگر ڈانسنگ گرل ابھی بھی بھارت میں ہی ہے۔ کنگ پرائسٹ کی اصل کراچی میوزیئم کی زینت ہے، جبکہ یہاں اس کی نقل رکھی گئ ہے۔

Skeleton by Ahmed Memon, on Flickr

گائڈ نےآگاہ کیا کہ، یہاں سے صرف چودہ انسانی ڈھانچے ملے، اور میوزیئم میں چودہ مختلف ڈھانچوں کی متفرق ہڈیاں رکھ کر ایک انسانی ڈھانچہ کی شکل دی گئ ہے۔

خوب دل بھر کر تصویر کشی کی اور پھر باہر نکلے سائٹ کی طرف۔ یہاں کچھ دیر ادھر ادھر دیکھنے کے بعد، گائڈ کی خدمات حاصل کیں، اور 100 روپے اکرام دیئے۔

Budhist Stupa - Moen Jo Daro by Ahmed Memon, on Flickr

Roof Ruins Remainins by Ahmed Memon, on Flickr

Roof Ruins below Stupa by Ahmed Memon, on Flickr

بدھ مت کا اسٹوپا دراصل گری ہوئ چھت کے ملبے کے اوپر تعمیر کیا گیا تھا، اس چھت کے ملبے میں برتنوں کے ٹکڑے، انسانی ڈھانچوں کی بوسیدہ ہڈیاں، سیپیاں، تارکول وغیرہ آپ اپنی آنکھوں سے بھی دیکھ سکتے ہیں۔ مزید کریدا اس لئے نہیں گیا کہ اسٹوپا گر سکتا تھا۔

سکھر

سائٹ دیکھنے کے بعد ہم نے گاڑی سکھر کی جانب ڈال دی۔ کچھ ہی گھنٹوں میں ہم سکھر کی ملٹری روڈ پر تھے، اس ہی روڈ پر تین گیسٹ ہائوس دیکھے اور پھر 1500 روپے میں ڈیسنٹ نامی گیسٹ ہائوس میں کمرہ بک کروالیا، دو دن یہیں قیام کرنا تھا، اور کل کے روز ہمیں سادھو بیلا جانا تھا۔

کھانے کی تلاش میں پہنچے لاثانی ہوٹل اور مٹن کڑاہی آرڈر کی، ساتھ تاکید کی کہ گوشت گلا ہوا ڈالنا۔ مگر جب کڑاہی آئ تو گوشت میرے مطلب کا نہیں تھا، اس لئے میں نے شوربے پر ہی اکتفا کیا، بل ادا کرتے وقت ویٹر نے رائے طلب کی تو میں نے بتادیا کھانا کھا کر مزہ نہیں آیا، تو اس نے کہا میں آپ کو دوسری کڑاہی لاکر دیتا ہوں، جس پر میں نے اسے منع کیا کہ میں نے شوربا تو کھا ہی لیا ہے تو کوئ گل نئ۔

کھانا کھانے کے بعد گیسٹ ہائوس پہنچے اور کچھ دیر بعد خواب خرگوش میں تھے۔

[ahmedmemon1]

14th February 2017

سادھو بیلا، سکھر

Sadhu Bela by Ahmed Memon, on Flickr

Sadhu Bela to other bank by Ahmed Memon, on Flickr

Entrance Bank to Sadhu Bela by Ahmed Memon, on Flickr

یہ جزیرہ پر واقع ایک سو سالہ پرانا مگر فعال مندر ہے۔ اس میں داخل ہونے کے لئے آپ کو محکمہ اوقاف سے پیشگی اجازت درکار ہوتی ہے۔ ہم جب یہاں پہنچے تو معلوم ہوا کہ ہمیں شہر میں موجود اوقاف کے دفتر سے اجازت نامہ لانا ہوگا، میں نے وہاں موجود صاحب سے کہا کہ آپ کوشش کر کے دیکھ لو، یہیں سے اجازت مل جائے کیوںکہ میرے گمان میں یہی تھا کہ محکمہ اوقاف قریب ہی میں واقع ہوگا۔ تو ان صاحب نے 60 روپے جو کہ اصل فیس ہے طلب کی اور ساتھ شناختی کارڈ بھی مانگا، میں نے شناختی کارڈ دیا اور وقت بچانے کے شکریہ کے طور پر40 روپے بتا کر زیادہ دیئے، چونکہ اس بندے نے خود سے اضافی پیسے مانگے نہیں تھے اور ہم ٹہرے بے ضرر لوگ تو یہ ذیادہ پیسے حلال ہی تھے۔ وہاں کشتی مندر ہی کی جانب جا رہی تھی کے-ٹی-این ٹی وی والوں کو لے کر، تو ہمیں بھی ساتھ ہی بٹھا دیاگیا، ہمیں بتایا گیا کہ مندر کے اندر ہم کیمرہ استعمال نہیں کرسکتے۔ میرے بلند آواز میں سلام کے جواب میں خاموشی پر اندازہ ہوا کہ وہ سب ہندو تھے۔

Balcony of Sadhu Udaas Info Room by Ahmed Memon, on Flickr

Door of Sadhu Udas Info Room by Ahmed Memon, on Flickr

بہرحال ایک منٹ میں ہی ہم مندر کے سامنے تھے۔ وہاں کچھ لمحے ادھر ادھر دیکھنے کے بعد ہم نے گائڈ چاہیئے کی صدا لگائ۔ مندرمیں ہمارے، ٹی وی والوں اور مندر کے خدمتگاروں کے علاوہ اور کوئ نہیں تھا۔ تھوڑی ہی دیر میں ہمیں، راجیش نامی خدمتگار، گائڈ کے طور پر دیا گیا۔

راجیش نے ہمیں سادھو اداس (جنہوں نے اس مندر کی بنیاد رکھی تھی) کا کمرہ کھول کر اندر آنے کا اشارہ کیا، ہمارے اندر داخل ہونے کے بعد انہوں نے سادھو اداس کے بارے میں کافی معلومات دیں۔ ان سادھو نے شادی نہیں کی تھی، نہ ہی ان کے چیلوں نے، یہاں تک کہ موجودہ گدی نشین بھی غیرشادی شدہ ہیں۔

سادھو اداس سو سال کے ہونے کے باوجود نوجوان لگتے تھے، جب بھی لوگ ان سے طویل عمری میں بھی بالک لگنے کا سبب پوچھتے تو وہ بتاتے، کہ انہوں نے کبھی بھی زندگی میں انگلی ڈال کر ناک صاف نہیں کی، کیونکہ ناک میں انگلی ڈالنے سے، نسوں پر بوجھ پڑتا ہے جس سے زندگی کم ہوتی ہے۔

اس کے بعد ہمیں باہر کے احاطے میں تصویر کشی کی اجازت دی گئ، جس کو ہم نے بھرپور طریقے سے استعمال کیا۔

Hanuman Temple - Sahu Bela by Ahmed Memon, on Flickr

Berry by Ahmed Memon, on Flickr

راجیش نے بتایا کہ بیر کا درخت سادھو نے اپنے ہاتھوں سے لگایا تھا اور اس کے بیر ہمیشہ میٹھے ہوتے ہیں۔ ان کے کہنے پر میں نے ایک بیر اٹھایا، صاف کر کے کھایا، واقعی میٹھا تھا۔

Ganesh Temple - Sadhu Bela by Ahmed Memon, on Flickr

Naag Devta by Ahmed Memon, on Flickr

Exterior Artwork at Sadhu Bela by Ahmed Memon, on Flickr

کچھ دیر تصویر کشی کے بعد ہم نے راجیش سے درخواست کی کہ ہمیں مندر میں موجود ہنومان اور گنیشا کا مندربھی دکھائیں، جو انہوں نے قبول کیا۔

جب ہم سب کچھ دیکھ چکے تو راجیش ہمیں باغ کی طرف لے گیا، اور ہم نے وہاں کچھ تصویریں لی، اس کے بعد ہمیں کہا گیا کہ آخری کشتی نکلنے والی ہے اگر ہم نے اسے بھی چھوڑا تو اگلی کشتی سات بجے آئے گی۔ اس وقت تین بج رہے تھے۔

Sahu Bela Boat by Ahmed Memon, on Flickr

لہذا ہم نے جلدی کی اور مندر کے باہر آکر کشتی کا انتظار کرتے ہوئے مزید کچھ تصاویر لیں۔ اور پھر کشتی آئ، ہم بیٹھے اور دوسرے کنارے پہنچ گئے۔

مندر کے بعد گیسٹ ہائوس کی جانب بڑھے، رستہ میں دوپہر کا کھانا کھایا اور کمرے میں پہنچے۔ اب اگلے دن ہمیں بہاولپور جانا تھا۔

[ahmedmemon1]

15th February 2017

آج کے دن صرف سفر کرنا تھا، تقریبا 11 بجے سکھر سے روانہ ہوئے، رستہ میں تین جگہ آرام/نماز وغیرہ کے لئے رکتے ہوئے، تقریبا 7 بجے بہاولپور پہنچے اور نزدیک ہی ایک دو گیسٹ ہائوس سے کرایہ معلوم کرکے، بلآخر ایک اوسط سے گیسٹ ہائوس میں رکے۔ 1000 روپے کرایہ طے پایا۔

کھانے کے لئے شائ گن (یا مقامی لوگوں کے مطابق، شیگن/شایگاں) ریسٹورنٹ پہنچے کھانا کھایا، اور پھر پیدل ہی واپسی۔ یہ ہوٹل فوارہ چوک سے کچھ ہی منٹ کی مسافت پر دبئی چوک پر واقع ہے، ہوٹل کے عین سامنے دبئی محل ہے۔

کل صبح ہیمیں فورٹ عباس جانا ہے۔

**

**

اگلی دفعہ پلاننگ میں گنے کی کرشنگ کے سیزن کو بھی ملحوظ خاطر رکھیں گے، انشااللہ۔

ہمیں چھوٹی گاڑی اور ذیادہ دلیر ہونے کا فائدہ ملا۔ دو مواقع ایسے آئے کہ ایک طرف ٹرالر کی لمبی قطار ۳۰ یا ۴۰ کی رفتار سے چلتے ہوئے اور دوسری جانب گنے سے لدے پھندے ٹریکٹر ساکت کھڑے ہوئے، اماں کراچی والے کہاں اتنی دیر رک سکتے ہیں۔ بڑی کاریں تو خیر ناممکن تھا کہ بیچ میں موجود جگہ سے نکل پاتیں، حیرت تو یہ تھی کہ چھوٹی گاڑی والے بھی بے بس نظر آرہے تھے، اتنے میں آپ کا بھائی ہارن اور ڈپر کا والہانہ استعمال کرتا ہوا، بچتا بچاتا بلآخر نکل ہی گیا۔ یوہو، یوپی۔ اب آپ کا بھائی تھا اور خالی سڑک۔

یہ والا اوورٹیک نسبتا کم خطرناک تھا، آپ دیکھ سکتے ہیں، ایک طرف تو گنے سے بھرے ٹریکٹروں کی ایک نہ ختم ہونے والی قطار اور دوسری جانب ایک ٹرالر، آپ کے پاس دو ہی آپشنز ہیں، یا تو بہت آہستہ آہستہ ٹرالر کے پیچھے چلتے رہیں، یا تو ناپ تول کر ڈپر دیتے ہوئے بائیں جانب سے اوورٹیک کریں۔

[ahmedmemon1]

16th February 2017

فورٹ عباس

بہاولپور سے صبح 11 براستہ یزمان روڈ، فورٹ عباس جانے کے لئے نکلے۔ رستے میں رکتے رکاتے، باغوں کے قریب سے کینو خریدتے، پہنچے شہر فورٹ عباس۔ صرف یک طرفہ خالص سفر ہی ڈھائی گھنٹے کا تھا، جسے ہم نے تین/ساڑھے تین کا بنادیا۔

Yazman Road - Ant View by Ahmed Memon, on Flickr

گمان یہ تھا کہ، کوئ بڑا قلعہ ہوگا، جس کی فصیلیں فاصلہ ہی سے نظر آتی ہونگی، مگر ندارد۔ مقامی لوگوں سے پوچھنا شروع کیا تو، پہلے تو معلوم ہوا یہ قلعہ نہیں سمجھتے، البتہ اگر کلہ کہو، تو فورا سمجھ آجاتی ہے۔ ایک آدھ نے بتایا بھی کہ اب تو قلعہ ختم ہوچکا، مگر چونکہ ہم اتنی دور سے آئے تھے، تو دیکھے بغیر تو جانا ممکن ہی نہیں تھا۔ پوچھتے پوچھتے پہنچے اور حیرانیوں کی بلندی پر جا پہنچے۔

اس قلعہ کے بارے میں کوئ معلومات نہیں مل سکی، نہ ہی یہ کہ کیا فورٹ عباس کے قصبے کا نام اسی قلعے کی وجہ سے پڑا؟ ایک مقامی بزرگ جو قلعہ کی دیوار سے متصل مکان کے پاس یی ملے انہوں نے بھی لاعلمی کا اظہار کیا۔ کہا کہ شاید قریب ہی موجود رینجرز آفس سے قلعہ کی کچھ پرانی تصاویر مل جائیں، وہ بھی معلوم کر کے دیکھ لیا، وہاں بھی کوئ تصویر نہیں تھی۔ اس ہی قلعے کے پاس ایک اور بزرگ بائیک پر جاتے جاتے ہمیں دیکھ کر حیرانی سے رکے، ان کے سامنے اپنے سوال رکھے تو انہوں نے بھی لاعلمی کا اظہار کیا۔

میرا گمان ہے کہ اس قلعے کے پیچھے کوئ کہانی نہیں ہوگی، یا تو کہانی میں کوئ دم نہیں ہوگا۔ اس قلعہ کی اہمیت فوجی اعتبار سے اہم لگتی ہے، جبھی تو آج کے دور میں بھہ اس ہی علاقے میں رینجرز کے دفاتر موجود ہیں۔ یہاں سے بھارتی سرحد محض 15 یا 20 کلومیٹر دور ہے۔

Fort Abbas Front by Ahmed Memon, on Flickr

قلعہ کے ساتھ تعمیر شدہ گھر

Fort Abbas Wall & Newly Constructed Home by Ahmed Memon, on Flickr

قلعہ کا پچھلا حصہ

Fort Abbas Backside by Ahmed Memon, on Flickr

قلعہ کا ٹاور

Fort Abbas Tower Remainings by Ahmed Memon, on Flickr

ایسا لگتا ہے کہ یہ پرانا گھر دراصل اس قلعے کی باقیات کے اوپر بنایا گیا تھا۔

Fort Abbas Ruins by Ahmed Memon, on Flickr

Fort Abbas Ruins & Old Construction by Ahmed Memon, on Flickr

مسجد کے سامنے رہنے والے لڑکے نے بتایا کہ مسجد اصل میں قلعہ کے ہی زمانے کی تھی اور اس لڑکے کے نانا نے صرف مسجد کے مخدوش حصوں کو دوبارہ تعمیر کیا تھا۔ مسجد کی آج کی عمارت دیکھ کر اس میں قلعہ کے دور کی کوئی بات نظر نہیں آتی۔
Mosque Renovated By Local by Ahmed Memon, on Flickr

فورٹ عباس ریلوے اسٹیشن

Fort Abbas Railway Stop by Ahmed Memon, on Flickr

فورٹ عباس کا چائے والا

Tea Break by Ahmed Memon, on Flickr

اینٹ کی بھٹی میں اینٹیں تیاری کے مراحل میں

Bricks Baking by Ahmed Memon, on Flickr

[ahmedmemon1]

17th February 2017

لال سہانرا نیشنل پارک

Lal Suhanra - What to do by Ahmed Memon, on Flickr

صبح گیارہ بجے روانہ ہوئے، آج پھر براستہ یزمان روڈ جا رہے تھے، گوگل میپ نے سفر کا دورانیہ ڈیڑھ گھنٹہ بتایا۔ جو کل نہ کر پایا، آج وہ تصویر کشی کی، خوب دل بھر کے۔

Camel cart at Yazman Road by Ahmed Memon, on Flickr

Donkey Cart at Yazman Road by Ahmed Memon, on Flickr

Tractor at Yazman Road by Ahmed Memon, on Flickr

Lal Suhanra Road by Ahmed Memon, on Flickr

Lal Suhanra Children Park by Ahmed Memon, on Flickr

Trees from bottom at Lal Suhanra by Ahmed Memon, on Flickr

A tree in Lal Suhanra by Ahmed Memon, on Flickr

Rhino at Lal Suhanra by Ahmed Memon, on Flickr

تقریبا ایک بجے پہنچے لال سہانرا، یہاں آکر معلوم ہوا کہ شیر والی سفاری اب نہیں کرائ جاتی، اندر کینٹین والے سے پوچھا تو اس نے بتایا یہاں مچھروں کی بہتات کی وجہ سے شیروں کو لاہور بھیج دیا گیا ہے ( وہاں تو شیر پہلے ہی سے موجود ہیں)، خیر جی سانوں کی، یہ تو اب صرف بچوں کا ہی پارک ہے، ہیاں شیر تو دور کی بات ہرنوں کو بھی کھلا نہیں چھوڑا ہوا۔ آنے کا مقصد بڑی بے دردی سے فوت ہوگیا۔

نور محل، بہاولپور

فوجی بھائیوں نے عوام کے لئے بھی کھول رکھا ہے، فی بندہ تیس روپے لئے جاتے ہیں۔ ہر طرف سفید شلوار قمیض اور کالی ویسکوٹ میں ملبوس فوجی جوان عوام میں گھلے ملے نظر آئیں گے۔

NoorMahalDay by Ahmed Memon, on Flickr

میں نے، ایک فوجی نوجوان کی گائڈ کے طور پر خدمات حاصل کیں اور کچھ سوال بھی کئے، مثلا یہ جو تیس روپے کا ٹکٹ لگایا ہوا ہے یا سوینئر کی دکان لگائ ہے اس کا کوئ حصہ کیا نواب صاحب کے خاندان کو بھی جاتا ہے، تو معلوم ہوا نہیں یہ اب پاکستانی فوج کی ملکیت ہے۔

یہ سن کر حیرت ہوئ کہ نواب صاحب نے قیام پاکستان کے وقت قائد اعظم کو سات کروڑ روپے پاکستانی خزانہ میں ڈالنے کے لئے حوالے کئے تھے اور رولز رائیس بھی دی تھی۔ بہاولپور کی ریاست قیام پاکستان کے پچاس دن بعد پاکستان میں ضم ہونے والی پہلی ریاست تھی۔

بڑے لوگ بڑی باتیں: سنا کہ یہ محل نواب صاحب نے اپنی اہلیہ کے لئے بنوایا تھا، تکمیل کے بعد جب وہ محل کی غالبا بالکونی میں آئیں تو انہیں سامنے قبرستان نظر آیا وہ ایسی انکاری ہوئیں کہ محل میں رات تک نہ گزاری۔ مجبوری کا نام شکریہ، نواب صاحب نے کوئی ٹینشن نہیں لی۔ اس ہی محل کو اس دور میں ریاستی میٹنگ کے لئے استعمال کیا جانے لگا۔ چلو یہ سن کر اطمینان ہوا کہیں تو ہم میں بھی نوابوں والی خصوصیت موجود ہے، ہم بھی اپنی بیگم کی ناں کو ہاں میں نہیں بدل سکتے۔

محل کے بیرونی مناظر

Hajj Car of Nawab at Noor Mahal by Ahmed Memon, on Flickr

Nawab Hajj Car by Ahmed Memon, on Flickr

Caravan Side pose at Noor Mahal by Ahmed Memon, on Flickr

Caravan at Noor Mahal by Ahmed Memon, on Flickr

Tuc Shop at Noor Mahal by Ahmed Memon, on Flickr

محل کے اندرونی مناظر

Piano of Nawab at Noor Mahal by Ahmed Memon, on Flickr

خوبصورت لالٹین
Lantern at Noor Mahal by Ahmed Memon, on Flickr

دروازے کی ناب
Knob of a door - artwork by Ahmed Memon, on Flickr

چھت، محل کے مرکزی ہال سے
Roof of Noor Mahal Hall by Ahmed Memon, on Flickr

نور محل رات کے وقت
محل کی باہر والی تمام لائٹیں مختصر سے وقت کے لئے کھلی اور بند ہوگئ، صرف اتنی کھلی رہی جن سے اتنا دلفریب نظارہ نہیں آرہا تھا۔ لہذا میں انتظارمیں بیٹھ گیا، جیسے ہی تمام کی تمام لائٹیں کھلی میں لگا دے مار ساڑھے چار اور تصویر کشی کی انتہا کردی۔

Noor Mahal Entrance at night by Ahmed Memon, on Flickr

Noor Mahal at Night Full Lights on by Ahmed Memon, on Flickr

یہیں فوج کے ماتحت ایک ریسٹورنٹ ہے، وہیں مٹن ھانڈی کھائ، فوجی ویٹر نے کھانا لانے میں دیر کی اور پوچھنے پر بتایا کہ دو بریگیڈئر صاحبوں نے بک کروایا ہوا ہے، اس لئے دیر لگی، بہرحال کھانا کھا کربل مانگا مہربان ویٹر نے بتایا کہ اس نے دیری کی تلافی کی خاطر بل میں ۲۰ فیصد رعایت دلوادی ہے، فوجی بھائیوں کو بھی ۲۰ فیصد ہی رعایت ملتی ہے۔

اگرچہ کل والی تھکن تو نہ تھی مگر کھانے کے بعد بستر کے علاوہ کیا اچھا لگتا ہے؟ پھر بھی عیدگاہ چوک کے قریب بہاولپور کی مشھور پان کی دکان خالو جی پان شاپ پہنچے، یہاں تین دکانیں خالوجی پان شاپ کے نام سے تھیں، معلوم ہوا کہ یہ تینوں آپس میں رشتہ دار ہیں۔ میں نے البتہ خرم والی خالوجی پان شاپ سے پان لئے، واہ، کیا سواد تھا پان میں، مزہ آگیو۔

Khaloo Jee Pan Shop Bahawalpur

اس کے بعد ہوٹل واپس روانہ ہوئے، مگر پھر گاڑی کے دروازے اور شیشے کو ریپئر کروانے کے لئے مکینک کی دکان تلاش کرنے لگے، تھوڑی دیر بعد بلآخر ایک دکان کھلی نظر آئ، جمعہ کا دن تھا اور کراچی کی طرح بہاولپور میں بھی مکینک حضرات جمعہ کو دکانیں بند رکھتے ہیں، پھر نو بجے کا عمل بھی تھا بہاولپور والے اس وقت غالبا اپنے گھروں میں موجود رہنا پسند کرتے ہیں۔

خیر ورکشاپ جاکر مسئلہ بتایا اور ساتھ ہی ساتھ ٹیوننگ کے پیسے بھی معلوم کئے۔ پھر مکینک محمد اکبر سے ٹیوننگ کرنے کا بھی کہا، کچھ دیر لگی، کام ختم ہونے کے بعد محمد اکبر نے بتایا کہ سسپنشن میں بھی مسئلہ ہے لہذا پروگرام میں ردوبدل کیا اور ذہن بنا لیا کہ غالبا ہم کل دریوار فورٹ نہ جا پائیں۔ محمد اکبر کو کل صبح صبح آنے کا کہہ کر گاڑی لے کر ہوٹل روانہ ہوئے۔

گاڑی بہتر لگ رہی تھی، واپس ہوٹل آئے اور کچھ ہی دیر بعد نیند کی آغوش میں۔

[ahmedmemon1]

18th February 2017

آج کے دن کی سرگرمیاں طے شدہ نہ رہی تھیں، سوائے گاڑی کو مکینک محمد اکبر کے حوالے کرنے کے، ہوٹل سے چیک آوٹ کیا اور پہنچےمحمد اکبر کے ہاں اور گاڑی وہیں چھوڑدی، ارادہ تھا رکشہ پکڑ کر کیمرہ کی مارکیٹ گھوم آئیں، مگر مکینک کی زرہ نوازی، ہمیں اپنی بائک دیدی۔ اور ہم دونوں پہلے تو مارکیٹ گھومتے رہے، ایک دکان پر رک کر دریافت کیا کہ نکون کی دکان کہاں ہوگی تو دکاندار نے پتہ سمجھایا، میرا گمان تھا، بہاولپور میں کیمرہ کا ٹرائ پوڈ ملنا مشکل ہوگا، خاص طور پر نکون کا ڈیلر تو نہیں مل سکتا، مگر میرا یہ گمان بھی غلط ثابت ہوا۔ عین جس جگہ اور نام کی دکان اس بندے نے بتائی تھی وہیں مجھے دکان نظر آئی۔ دکان کے مالک کے پاس مکمل معلومات تھیں، یہ ایک اور زور کا جھٹکا، دھیرے سے لگا۔ وہاں سے ساڑھے پانچ ہزار کا ٹرائی پوڈ خریدا۔ قریب ہی دستکاری اشیا کی ایک بڑی دکان نظر آئی، اس میں داخل ہوئے اور گھر والوں کے لئے چولستانی دستکاری والی اشیا خریدی۔

ہھر پہنچے قائداعظم پارک اور وہاں چائے کے گھونٹ لیتے ہوئے طے کیا کہ گلزار اور دربار محل میں سے جو ممکن ہوا دیکھ آئیں۔ دونوں ہی محلوں پر پہنچ کر چہچہاتے ہوئے فوجی بھائیوں کو سلام کیا ادھیڑ عمر شخص سے اس چلبلے پن کی شاید وہ توقع نہیں کررہے تھے اس لئے بے اختیار ہنسنے لگے، مجھے تو ماحول کو خوشگوار کرنا مقصود تھا اور میرا مشن کامیاب ہوا، پھر اپنی خواہش کا اظہار کیا ھمدردی حاصل کرنے کے لئے یہ بھی بتادیا کہ ہم کراچی سے آئے ہیں مگر نہیں بھائ بڑے پیار سے منع فرما دیا۔ میں نے پوچھا کوئ جگاڑ تو بتا دو، تو بتایا کہ اگر کوئ فوجی افسر کہے تو ہمیں اندر گھومنے کی اجازت مل سکتی ہے۔

فی زمانہ اعتبار سے زیادہ حفاظت ضروری ہے۔ مان لیا باس۔ مگر اقرباپروری کی آڑ میں سراسر غلط ہے۔ سب سےاوپر قانون ہونا چاہیئے۔ یہی اقربا پروری مسلک، زبان، جامعات، ذات وٖغیرہ کے نام پر پرائیوٹ اداروں میں بھی نظر آتی ہے۔ آپ سیاح کا شناختی کارڈ رکھ لو، ٹکٹ لگادو اور اگر یہ نہیں کرنا ہے تو پھر کسی بھی شخص کو چاہے وہ آپ کا جاننے والا ہی کیوں نہ ہو نا آنے دو۔ یہ کیا کہ اگر ہمارا کوئی فوجی جاننے والا نہیں ہے تو ہم نہیں جاسکتے لیکن امجد کے بھائی کے سسر کے دوست فوج میں کرنیل ہیں تو وہ گھوم آئے؟

Gulzar Mahal Entrance, Bahawalpur

Gulzar Mahal Inside from Outside, Bahawalpur

Darbar Mahal Model, Bahawalpur

Darbar Mahal Details

بہاولپورسے محبت

ایک بات طے ہے، بہاولپور میں جس بندے سے بھی دس منٹ سے زیادہ بات ہوئ وہ بے حد خوش اخلاق ملا، اس رویے میں دیہی و شہری یا داڑھی والا یا کلین شیو کی کوئ تفریق نہیں۔ خاص طور پر جب انہیں معلوم ہوتا کہ ہم گھومنے کی خاطر کراچی سے یہاں آئے ہیں۔

ایک دکان کے مالک اور نور محل میں فوجی گائڈ نے بھی تصدیق کی کہ بہاولپور کے نوابی خاندان کی نسبت نبی اکرم صلی اللہ علیہ وسلم کے چچا حضرت عباس رضی اللہ تعالی عنہہ سے ملتی ہے۔ اب یہ وجہ ہے یا کچھ اور داڑھی والے مرد اور پردہ/نقاب والی خواتین کسی دوسرے شہر کے مقابلے میں زیادہ نظر آئیں۔

شائگن ریسٹورنٹ کے عملے سے کافی دیر گفتگو رہی، عام طور پر تو ہر ہوٹل والا خوش اخلاق ہی ہوتا ہے، مگر یہاں زرا معمول سے ہٹ کر محبت اور اپنائیت محسوس ہوئ اور اصل چیز یعنی کھانا تو تھا ہی لاجواب۔

Shaigan Restaurant, Bahawalpur

اس ریسٹورنٹ کے مالک آرٹ کے بڑے شوقین معلوم ہوتے ہیں، کافی ساری پینٹنگز لگی ہوئ ہیں، مجموعی طور پر سارا انٹیریئر ڈیزائن ہی آنکھوں کو بھلا لگتا ہے۔ یہاں موجود تمام فن پاروں میں سے مجھے یہ بے حد پسند آیا۔

Painting in Shaigan Restaurant

بہاولپور سے احمد پور شرقیہ

عصر کے وقت ہمیں گاڑی تیار ملی، ٹیسٹ ڈرائیو لی، تو مزہ آگیا۔ بھائ اکبر صاحب سے مل کر رخصت لی اور روانہ ہوئے احمد پور شرقیہ، یہاں نیشنل ہائ وے پر ہی ایک ہوٹل میں چیک ان کیا۔ کل دیراور قلعہ جانے کا ارادہ ہے، انشااللہ۔

[ahmedmemon1]

19th February 2017

قلعہ دیراور، بہاولپور

صبح تقریبا نو بجے پرل ہوٹل، احمد پور شرقیہ سے چیک آووٹ کرکے، چل پڑے قلعہ دیراور کی جانب۔ گوگل میپ ایپ سے مدد لینے سے پہلے ہوٹل کے منیجر صاب سے بھی معلومات لے لیں۔ تقریبا ساڑھے دس بجے دیراور کے علاقے میں پہنچے سب سے پہلے چار اصحاب رسول صلی اللہ علیہ وسلم کی قبروں کی زیارت کی۔

پھر دیراور مسجد پہنچے، خوبصورت مسجد، آج بھی یہ مسجد مقامی بچوں کو قرآن کی تعلیم فراہم کر رہی ہے، جس نے بھی یہ مسجد بنائ ہوگی، اس کی قبر میں آج بھی نور ہوگا، انشااللہ۔ اللہ سبحانہ تعالی ہم سب کو صدقہ جاریہ کی کثرت کرنے کی توفیق عطا فرمائے آمین۔

اس کے بعد قلعہ دیراور پہنچے، 20 روپے فی کس دروازے پر موجود صاحب کو دیئے۔ چونکہ اتوار کا دن تھا، اس لئے کافی لوگ موجود تھے، لڑکے بالے گاڑیوں اور بائکوں پر آئے ہوئے تھے، فیملی کے ساتھ بھی لوگ موجود تھے۔

اندر سے قلعہ کم اور کھنڈر زیادہ لگتا ہے۔ کوئ جگہ ایسی نہیں جہاں ٹوٹ پھوٹ نہ ہوئ ہو۔

قلعہ خوب اچھی طرح سے کھنگالا اس کے بعد باہر نکلے، ڈیڑھ بجے دوپہر کا عمل تھا اور کافی دیر سے میرا گلا خشک ہورہا تھا، لہذا پانی پیا۔ پھر اونٹ کی سواری کی۔

پھر قلعہ سے باہر نکلنے لگے تو کیا دیکھتے ہیں کہ کسی اسکول یا کالج کی کافی ساری بچیاں قلعہ کی جانب بڑھ رہی ہیں، اس کے علاوہ فیملیاں، لڑکے بالوں کے جتھے، واہ بھئ۔

مسجد کے قریب دکان سے دیراور کے بارے میں کتاب خریدی، قیمت 180 روپے تھی۔

رستہ پوچھ کر پکی سڑک سے نوابوں کے قبرستان پہنچے، قبرستان کے چوکیدار نے بتایا یہاں آنے کی اجازت لینی ہوتی ہے، ہم نے کہا، یہاں تو آپ چاہو تو کسی کو بھی جانے دو، مگر وہ نہ مانا، اس طرح کے مواقع پر عام طور پر میں پیسہ نہیں دیتا، ماننے میں خیر ہے

اس مقام پر، بجائے اس کے کہ ہم قبرستان دیکھ کر عبرت پکڑتے یا اس کی خوبصورتی کو آنکھوں میں اتارتے، مقامی دو تین بچے گاڑی کے پاس آکر ہمیں دیکھنے لگے، ہم چپس کھا رہے تھے، تو ان کے ساتھ (اچھے بچوں کی طرح) اپنی چپس شیئر کیں، تھوڑی دیر میں کافی بچے جمع ہوگئے تو ہم نے ساری چپس بچوں میں بانٹ دی۔ ان تمام دس بارہ بچوں میں ایک ہی بچی تھی جس کی اردو صاف تھی، یہ سارے بچے صرف قرآن کی تعلیم حاصل کرتے ہیں۔

اس کے بعد تقریبا پانچ گھنٹے کی ڈرایئونگ کرکے پہنچے کنال روڈ خیرپور اور ہماری خوشی کی کوئ انتہا نہ رہی جب ہم نے اپنے من پسند ریسٹورنٹ سجاد کو دیکھا، آئو تائو تو دیکھنا ہی نہیں تھا، پرجوش انداز سے ریسٹورنٹ میں داخل ہوئے اور کھانا کھایا ایسا لگا جانے کتنے عرصے بعد اپنا کھانا کھایا ہے۔ سجاد ریسٹورنٹ رانی پور کے سندھیوں کا ہے اور سندھی چاہے تھر کا ہو یا کہیں کا بھی ان کے کھانوں میں مصالحہ جات خوب ہوتے ہیں۔

اچھا ہوٹل ڈھونڈنے کا مرحلہ آیا تو کچہری روڈ پر ریڈ بیلس پر ریٹ معلوم کئے پھر پنج گولا پر معلوم کئے تو بہتر ریڈ پیلس ہی لگا، لہذا ادھر ہی ہولئے۔

تصویر کشی ملاحظہ فرمائیں۔

پرل ہوٹل، احمد پور شرقیہ

Pearl Hotel, Ahmedpur East

Ahmedpur East - Derawar Road

اب یہ واقعی اصحاب رسول صلی اللہ علیہ وسلم کی قبریں ہیں یا نہیں، اس کے بارے میں کسی محقق کی ضرورت ہے، لیکن چونکہ یہ بات مسلم ہے کہ تقریبا ڈیڑھ لاکھ صحابہ میں سے اکثر کی قبریں مکہ یا مدینہ میں موجود نہیں ہیں، کیونکہ اللہ سبحانہ تعالی نے صحابہ اکرام رض کے خروج کو دین اسلام کی مزید ترویج کا سبب بنایا اس لئے یہ بات بعید از قیاس بھی نہیں کہ یہ اصحاب کی قبریں ہیں۔

Graves of Sahab RA

دیراور فورٹ کا وہی پرانا تصویری زاویہ، جس فوٹوگرافر نے بھی یہ زاویہ پہلی بار لیا ہوگا، وہ یقینا ایک جینئس ہوگا۔

Derawar Fort, Bahawalpur

اس وقت گرمی اتنی تھی کہ قلعہ میں داخل ہونے سے پہلے اگرچہ میں نے پانی پی لیا تھا، اس کے باوجود میرا گلا خشک ہورہا تھا، اس وقت ڈیڑھ بجے کا عمل تھا۔

Derawar Fort, Bahawalpur

قلعہ کی خوبصورتی

Derawar Fort Towers

Wood Texture at Tower of Derawar Fort

Artwork at Derawar Fot

Beautiful Mosque near Derawar Fort

Main Gate of Mosque near Derawar Fort

Mosque Mahrab to Fort View

Mosque as seen from Tower of Fort

Mosque from Derawar Fort

قلعہ کے تہہ خانے کے رستے میں موجود دریچے سے توپ کی تصویر۔ وہیں سنا کہ اس تہہ خانے میں ایک کمرہ گولہ بارود کو ذخیرہ کرنے کے لئے استعمال ہوتا تھا، واللہ عالم۔

Underground room passage window Derawar Fort

ٹاور کے اوپر سے نیچے کا نظارہ

Top of Derawar Fort Tower

Derawar Fort - An Angle

اس قلعہ کی اندرونی حالت بے حد ابتر ہوچکی ہے، ایک ٹاور کی حالت ملاحظہ فرمائیں۔

Fort needs serious attention

بہاولپور کے نوابوں کا قبرستان بغیر اجازت کے جا نہیں سکتے۔

Graveyard of Nawabs of Bahawalpur

پیارے پیارے مقامی بچے، یہ سب نوابوں کے قبرستان کے قریب بستی میں رہتے ہیں۔

Local Children near Graveyard of Nawabs of Bahawalpur

سندھ میں سورج غروب ہورہا ہے۔

Sunset in Sind

سجاد ریسٹورنٹ، خیرپور پر متعین گارڈز

Sajjad Restaurant, Khairpur

الوداع سجاد، اب انشااللہ کراچی میں ہی زیارت ہوگی

Sajjad Restaurant, Khairpur

[farooq05]

Zabardast

[ahmedmemon1]

20th February 2017

صبح گیارہ بجے ریڈ پیلس ہوٹل، کچہری روڈ، خیرپور سے قلعہ کوٹ ڈیجی کی جانب روانہ ہوئے، رات کو ہم نے شہر کے اندر جابجا پولیس کی موبائلیں کھڑی دیکھی تھیں، اب بھی جگہ جگہ پولیس کی موبائلیں پورے سندھ میں کھڑی دیکھیں۔ تقریبا آدھہ گھنٹے بعد ہمیں قلعہ کوٹ ڈیجی نظر آنے لگا۔ بھاگم بھاک اس کی طرف لپکے۔

قلعہ کوٹ ڈیجی

یہ قلعہ سندھ کے حکمران ٹالپر خاندان کا تھا اور غالبا صرف فوج کے لئے استعمال ہوتا تھا، جس میں جابجا چوکیاں، فصیلیں، سیکورٹی ٹاور بنائے گئے تھیں۔ یہ قلعہ اتنا بڑا ہے کہ آپ تقریبا 4 گھنٹے لگا کر تسلی سے اسے دیکھ سکتے ہیں۔ پھر اس کے بعد ٹالپر حکمرانوں کا رہائشی محل الگ ہے اور ہڑپہ تہزیب کی نوادرات کا میوزیئم الگ کل ملا کر اگر آپ نے ایک دن میں سب کچھ دیکھ لیا تو گویا آپ نے کمال کردیا۔ ہم تو صرف 3 گھنٹے میں قلعہ اور اس کی چیدہ چیدہ جگہیں ہی دیکھ پائے، جس میں گھوڑوں کا اصطبل، حوض، ٹارچر سیل، عمر قید خانہ (جو کہ واقعی خانہ ہی تھا)، پھانسی گھاٹ، بادشاہ کے بیٹھنے کی جگہ، موسیقی کے پروگرام کے لئے مختص حصہ (موجودہ دور میں مختص کیا گیا) اور اسلحہ ڈپو، ٹاور، فصیلیں وغیرہ شامل ہیں۔ یہ عسکری حفاظت کے نکتہ سے زبردست قلعہ تھا اور کافی بڑا بھی۔

آج پیر کا دن تھا مگر پھر بھی دن کے بارہ بجے رش لگا پڑا تھا، ایک اسکول والے آئے ہوئے تھے، پھر نوجوان لڑکوں کی ٹولیوں کی آمد کا سلسلہ شروع ہوا (کچھ تو جیکب آباد سے آئے تھے) اور جس وقت ہم روانہ ہورہے تھے، اسوقت فیملیاں چلی آرہی تھیں۔ زیادہ تر لوگ اریب قریب ہی کے لگ رہے تھے۔

کوئی شرارت ہی کارفرما لگتی ہے کہ سندھ کو جان بوجھ کرپسماندہ رکھ کر کچھ شیطانی فوائد حاصل کئے جارہے ہوں۔ ورنہ عوام تو بڑی ہی محبت والی ہے پھر کیونکر لوگ رات تو رات دن میں سفر کرنے سے کتراتے ہیں، کیونکر سندھ کی پولیس باقی صوبوں سے زیادہ کرپٹ ہے؟

میں خود پہلے کبھی اندرون سندھ، بغیر مقامی رہبر کے نہیں گیا، مگر میں نے دیکھا سندھ میں بھی لوگ ویسے نہیں جیسا کہ ہم نے سن رکھا تھا، کوٹ ڈیجی کے لوگ واقعی بڑے پیارے ہیں، مجھے دکاندار، استاد، مقامی مزدور سے بات کر کے احساس ہوا کہ وہ واقعی خوش ہوتے ہیں، جب دور دراز سے لوگ ان کے علاقوں میں تفریح کی غرض سے آتے ہیں۔ یہی محبت اور ربط واہی پاندی اور جوہی کے علاقوں میں بھی نظر آیا اور عزت و اکرام جو مٹھی میں ملی تھی وہ تو بس لاجواب تھی۔ بہاولپور اگرچہ سندھ میں نہیں ہے مگر، ہائے اس کا مقابل کوئ نہیں اب تک۔ جس مکینک محمد اکبر سے میں نے بہاولپور میں گاڑی کی مرمت کروائ تھی وہ روزانہ فون کرکے پوچھتا ہے کہ گاڑی صحیح چل رہی ہے یا نہیں

ھالا، سندھ

ارادہ تو خیرپور سے حیدرآباد جانے کا تھا مگر سوچا کہ ھالا کے دستکار بڑے مشہور ہیں تو عزیز و اقارب کے لئے کوئ انمول تحفے ہی لیتے چلیں، اس غرض سے ھالا میں داخل تو ہوگئے مگر شیخ گوگل میپ کا دماغ پورے دن چل چل کرشاید بہک کر تھک چکا تھا۔ لہذا مقامی بندے سے مارکیٹ کا اتا پتا معلوم کرکے پہنچے درگاہ کے قریب، گاڑی پارک کی سیدھے مارکیٹ میں۔ واہ بھئ، یہاں بھی فلسفہ نفرت غلط ثابت ہوا، کیا ملنساری اور خلوص، واہ۔

یہاں مخدوم سرور نوح رحمتہ اللہ علیہ کی درگاہ پر حاضری دینے گئے تو پولیس اور گارڈ سے اجازت لی اندر جانے کی تو انہوں نے کہا بلکل جاسکتے ہیں، انہوں نے میری تلاشی لی تو میں نے درخواست کی کہ بھائ اچھی طرح سے تلاشی لو، ساتھ ہی میں نے اہلیہ کا ھینڈ بیگ لیا اور ان سے درخواست کی کہ اس کی بھی اچھی طرح تلاشی لیں اور خدارا اس کو اپنی پریکٹس بنائیں، میں نے ان سے کہا کہ ہمیں تو یہ سب اس لئے کرنا چاہیئے کہ ہم تو اندرونی اور بیرونی دہشت گردی کا شکار کئ سالوں سے ہیں، ناں کہ جب سو ڈیڑھ سو لاشیں گرجائیں اور تلاشی لیتے وقت ہم بندے کے ظاہری حلیہ سے بلکل متاثر نہ ہوں، ہر ایک کو شک کی نگاہ سے دیکھیں۔ اس مختصر سے لیکچر پر پولیس والوں نے بلکل برا نہیں منایا، بلکہ مزید عاجزی اور خلوص کے ساتھ خیرباد کہا۔ درگاہ میں جاکر فاتحہ پڑھی اور واپس دکان پر پہنچے۔

زنانہ سوٹ 800 روپے اور مردانہ سوٹ 600 روپے کا جو کہ اگر کراچی کی کسی بڑی دستکار کی دکان پر پہچے تو ہزاروں می بکے۔ یہ دکاندار ستر سال سے اس مارکیٹ میں ہے اور شروع دن سے ہے۔ اس نے بتایا کہ جنید جمشید اپنی حیات میں ھالا سے بھی کپڑے تیار کروایا کرتا تھا۔ اس نے کہا کہ ایکسپورٹ کوالٹی ڈالنے کے لئے تھوڑا معاوضہ بڑھادیا جائے تو دنیا کے کسی کونے میں بھی ھالا کی چیزیں بک سکتی ہیں۔ ان ہی کی دکان سے سامان دبئ بھی جاتا ہے۔ میں نے جو چیزیں بہاولپور فرید گیٹ کے قریب ایک بڑی دستکاری کی دکان سے خریدی اس سے ملتی جلتی چیزیں یہاں تقریبا آدھی قیمت پر فروخت ہورہی ہیں۔

رات کو گیارہ بجے ھالا سے نکلے اور ایک گھنٹے میں حیدرآباد پہنچے اور سیدھا بریز فش پوائنٹ آٹو باھن روڈ پر رکے اور مشہور زمانہ مچھلی نوش فرمائ۔ وہاں کے گارڈ سے مشورہ کیا کہ کس ہوٹل میں رکیں، اس نے بتایا کہ یوں تو پیچھے علاقے میں بھی گیسٹ ہائوس ہیں مگر ان کی شہرت اچھی نہیں آئے دن پولیس کے چھاپے پڑتے ہیں، ہم کو ریلوے اسٹیشن پر موجود کسی ہوٹل میں رکنا چاہیئے۔ لہذا ہم نے مشورہ پر عمل کرنے میں ہی خیر سمجھی اور جا پہنچے سیدھے ریلوے اسٹیشن، ایک دو ہوٹل میں معلومات کی اور بلآخر ایک ہوٹل میں قیام کرلیا۔ اور یوں ہمارا ایک اور بے حد مصروف دن تمام ہوا۔

تصویر کشی حصہ:

Red Palace, Kachery Rd, Khairpur, Sind

Kot Diji Fort from distance

Kot Diji Fort Information

ہمارے مقامی گائڈ کے مطابق، پس منظر میں موجودہ ٹالپر خاندان کی رہائش گاہ ہے
Kot Diji Tower View From Another Tower

ٹارچر سیل

Torture Cell

ٹاور سے باغ کا نظارہ
A garden near Kot Diji Fort

ایک ٹاور سے دوسرے ٹاور پر نظر
Kot Diji Fort Outside

معصومانہ سوال یہاں یہ بنتا ہے کہ پھانسی دینے والا سپاہی گر نہیں جاتا ہوگا؟ اور دوسری بات یہ کہ، پھانسی یافتہ مجرم تو ہارٹ اٹیک ہی سے مرجاتا ہوگا

زرا اونچائی پر غور فرمائیں

Hangman - Kot Diji

گائڈ کے مطابق ہرے برے علاقے میں نظر آنے والی عمارت، حاکم کا محل ہے۔ میرے اندازے کے مطابق اس کا نام فیض محل ہے۔
Down from Kot Diji Fort

ڈجی کوٹ کا ذخیرہ آب

Water Reserve at Kot Diji

گائڈ کے مطابق یہاں حاکم بیٹھا کرتا تھا
Royal Sitting Area - Kot Diji

موجودہ دور میں اس چبوترے پر موسیقی کی محفلیں سجائ جاتی ہیں، جس میں مقامی فنکار اپنے فن کا مظاہرہ کرتے ہیں۔

Used for Musical Events - Kot Diji

پس منظر میں سڑک سے متصل ٹیلا دراصل دریائے سندھ کے قریب آباد ہڑپہ تہزیب کے کھنڈرات ہیں۔

Kot Diji Ancient Civilization Ruins from Kot Diji Fort

ٹاور سے ٹاور تک کا نظارہ

Kot Diji Fort Outside

غالبا گھوڑوں کا اصطبل

Kot Diji Stable

گارے/مٹی اور اینٹوں سے بنائ گئ دیواریں

Bricks & Mud - Wall at Kot Diji

فصیل کے نیچے کھڑکی والے کمروں میں موجود راہداری

Corridor Light & Design - Kot Diji Fort

بلکل نیچے محکمہ ثقافت کوٹ ڈیجی کا احاطہ ہے، غالبا یہاں کچھ نوادرات بھی یہیں، یا وہ الگ سے خزانہ کے طور پر جانا جاتا ہے۔

Archaeological Place - Kot Diji

خوبصورت ٹاور

Fort Tower from other tower

سزائے عمر قید پانے کے لئے لوگ یہاں ڈال دیئے جاتے تھے۔

Life edanger- Kot Diji

Entrance Gate - Kot Diji

یہاں دن کے وقت میں بہت ساری چمکادڑیں موجود ہوتی ہیں اور ایک شور و غل برپا کیا ہوتا ہے۔ انہی کی وجہ سے دیواریں اور چھتیں خراب ہیں۔

Roof Art - Kot Diji by Ahmed Memon, on Flickr

کوٹ ڈیجی قلعہ چھوڑنے کے بعد۔

Alta Vista - Khairpur District

گدھے کی سواری اور دنیا و مافیہا سے بے نیازی۔ اس بھائی نے تاڑ لیا کہ میں ان کی تصویر کے لئے بے قرار ہوں تو قریب آکر رکے اور جب میں نے تصویر لے لی تو پوچھا کہ ہوگیا، میں نے اثبات میں سر ہلایا تو چلتے بنے۔

Man & Donkey - Khairpur District

با بائے سورج انکل۔
اس وقت ہم بینظیرآباد (نوابشاھ) کے قریب سے گزر رہے تھے

Sunset in Benazirabad (Nawabshah), Sind

سندھی چائے والا

Chai Wala at Fazal Ganj, Khairpur, Sind

ھالا کے قصبے میں موجود مخدوم سرور نوح رحمتہ اللہ علیہ کے مزار کے مین گیٹ کے سامنے کھڑی موبائل

Police Van - Near Dargah, Hala, Sind

مزار میں موجود قبریں

Inside Shrine Makhdoom Sarwar Nooh RA - Hala, Sind

مزار میں مسجد، محراب کے پس منظر میں اولیا رح کی قبریں

Mosque in Shrine Makhdoom Sarwar Nooh RA - Hala, Sind

ھالا کی دستکاری اشیا کی مارکیٹ، مزار کے برابر گلی میں موجود ہے، اس ہی بازار کی سب سے پہلی اور قدیم ترین دکان۔

Handicrafts Shop - Hala, Sind

[mehran]

Loved the photography. Great visit. Thanks for sharing.

[ahmedmemon1]

21st February 2017

صبح 11 بجے ہوٹل سے چیک آووٹ کیا اور قریب ہی ہوٹل میں ناشتہ کیا اور گاڑی میں بیٹھ کر ریشم گلی پہنچے۔

ریشم گلی بازار حیدرآباد
پہنچے روشن مارکیٹ، ایک ہی دکان کھلی ملی، یہاں لوگ بہت دیر سے دکانیں کھولتے ہیں۔ ہم اس بازار کی واحد کھلی دکان میں داخل ہوئے چوڑیاں اور زنانہ کپڑے خریدے۔ دکاندار لڑکا وسیم بڑا ہی سلجھا ہوا نوجوان تھا، جب اس نے دیکھا کہ میں رستہ سمجھ نہیں پارہا تو وہ میرے ساتھ ساتھ پیدل چلا اور حاجی ربڑی والے کی دکان پر پہنچایا جہاں سے میں نے گھر والوں کے لئے ربڑی خریدی، ہھر وسیم ہی٘ پیدل پارکنگ تک لایا۔ میں نے شکریہ کے طور پر کچھ ربڑی دینی چاہی تو منع کرنے لگا، کافی مشکل سے مانا۔ پھر کہا کہ وہ مجھے بمبے بیکری تک بھی چھوڑ سکتا ہے، جس پر میں نے شکریہ ادا کیا اور بتایا کہ انشا اللہ میں وہاں تک پہنچ ہی جائوں گا، وسیم سے رخصت لی، پارکنگ والے کو پیسے دیئے اور گاڑی میں بیٹھ کر گوگل میپ کے زریعے بومبے بیکری پر رکے، ہماری خوش قسمتی، کسی لمبی قطار میں لگے بغیر کیک خریدے اور پھر روانہ ہوئے کراچی کی جانب۔ راستے میں دوپہر کا کھانا کھایا پھراپنا سفر جاری رکھا۔

تصویر کشی

دی بومبے بیکری، حیدرآباد

The Bombay Bakers, Hyderabad, Sind, Pakistan

حیدرآباد کی مشہور چوڑیاں، روشن بازار، ریشم گلی، حیدرآباد، سندھ، پاکستان

Bangles Shop in Resham Gali, Hyderabad, Sind, Pakistan

کراچی واپسی

حیدرآباد سے کچھ آگے وقفے وقفے سے ڈائ ورژن آتے گئے، اتنے خراب کے کراچی سے بہاولپور تک ایسی خراب روڈ پر اتنی دیر تک گاڑی نہیں چلائ ہوگی۔ الحمداللہ تقریبا دو گھنٹے میں بلآخر کراچی پہنچ ہی گئے۔

Old toll plaza Karachi

کراچی کی مغرب

Sunset in Karachi on Super Highway

[ahmedmemon1]

Zabardast " class="emoji" alt="">

پسندیدگی کا شکریہ

Loved the photography. Great visit. Thanks for sharing. " class="emoji" alt="">

[right]

ادا سائیں سندھ خوبصورت نہیں بے انتہا حسین ہے اور یہاں کے لوگ باقی ماندہ ملک کی مانند بے انتہا محبت والے ہیں۔

جزاک اللہ
[/right]

[a_k]

Wow, felt like i was there !

Great Trip, Pics & Narration

[ahmedmemon1]

Wow, felt like i was there !

Great Trip, Pics & Narration

ادا سائیں بندہ شکریہ ادا کرتا ہے

[ahmedmemon1]

seems like a great trip... waiting for more details

شکریہ ادا آصف۔

دادا آپ کی تصاویر اور ان کی کوالٹی تو لاجواب ہے ہی، آپ کے زاویے آپ کو منفرد کرتے ہیں۔

آپ سے پنجاب کے تفریحی مقامات کی معلومات درکار ہیں۔ کون کون سے مقامات دیکھنے لایق ہیں۔

میری اپنی لسٹ میں کچھ نام درجہ زیل ہیں۔

ہڑپہ
سون/ساکیسار ویلی
رامکوٹ قلعہ
روہتاس فورٹ
کٹس راج مندر
ٹیکسلا
کلر کہار
کھیوڑہ - گھوم چکے
لاہور بھی تقریبا ہوچکا
اسلام آباد تو جانو ہے
مری میں گھر لے کر کچھ مہینے رکنے کا ارادہ ہے

عین نوازش ہوگی۔

[mrkhan_9]

بھیّا احمد میمن، آپ نے تو مجھے ساتویں آسمان پر بٹھا دیا۔ بھلا کہاں مستنصر حسین تارڑ، کہاں عبدالوحید طارق بھائی اور کہاں میں ناچیز۔
سچّی بات تو یہ ہے کہ ان عظیم حضرات کے ساتھ اپنا نام پڑھ کر خوشی سے رونگٹے کھڑے ہوگئے لیکن حقیقت یہی ہے کہ اتنی مناسب بات نہیں لگتی۔ خیر آپ کی عزّت افزائی کا تیہ دل سے شکر گزار ہوں۔
آپ نے ماشأاللہ بڑی خوبصورتی سے اپنے خیالات اور احساسات کی ترجمانی اپنے خوبصورت الفاظ میں کی ہے۔ سفر نامے کا ابتدایہ پڑھ کر کہیں سے بھی یہ محسوس نہیں ہوا کہ آپ کچھی میمن ہیں لیکن پھر پڑھ کر حیرت ہوئی کہ آپ نے اپنی مادری زبان اردو کو کہا!
آپ کا مزیدار سفر نامہ مزے مزے لے لے کر پڑھ رہا ہوں۔ اور جیسے جیسے آگے بڑھتا رہونگا اپنے خیالات کا اظہار کرتا رہونگا۔