وادی کمراٹ، ایک ان کہی داستان، روئیداد سفر ستمبر 2019، تحریر ہارون الرشید

[nagar1]

Theek ha haroon bhai ab agr chkr lga kbhi to zrur jaunga wahan bhi

[haroonmcs26]

وہاں ایک کرایے کی فور وہیلر گاڑی پر آئے ہوئے کچھ سیاحوں سے بھی ہماری ملاقات ہوئی۔ وہ کمراٹ آئے تو ہونڈا بی آر وی اور ویزل پر تھے لیکن پھر راستے کی دشوار گزاری کو دیکھتے ہوئے انھوں نے فور وہیلر کرائے پر لی تھی اور وہ گاڑی تھل سے یہاں تک ان کو چھ ہزار روپے میں پڑی تھی۔ وہ کہہ رہے تھے کہ آپ لوگ اچھے رہ گئے کہ اپنی بائیکس پر یہاں آئے ہیں ورنہ ان کو تو جگہ جگہ گاڑی کرایے پر کرانی پڑی تھی جس کے اخراجات کافی زیادہ تھے۔ ہم نے واپس بھی جانا تھا اس لئے ایک گھنٹہ وہاں قیام کے بعد تقریباً ساڑھے چار بجے ہم نے واپسی کا سفر شروع کر دیا اور اس سے پہلے میں اس حسین وادی کو الوداع کہنا نہ بھولا تھا۔

[haroonmcs26]

واپسی کا ہمارا سفر تیز تھا اور قیام بہت کم تھا۔ راستے میں کمراٹ جنگل میں ایک ہونڈا 125 والے مقامی شخص کی بائیک میں ہوا بھری کیونکہ وہاں کوئی پنکچر شاپ تو نہیں تھی۔ بہرحال پنکچر چھوٹا تھا اور امید تھی کہ وہ تھل پہنچ جائے گا۔ اس کے بعد ہم تھل پہنچ کر بغیر رکے اسی کمراٹ روڈ پر شرینگل کی طرف روانہ ہو گئے۔ مغرب کا وقت ہو چکا تھا اور ہماری کوشش تھی کہ ہم اندھیرا پھیلنے تک شرینگل پہنچ جائیں لیکن بندے کی ہر خواہش پوری نہیں ہوتی اس لئے ہمیں شرینگل سے بہت پہلے ہی اندھیرا ہو گیا۔ شرینگل تھا کہ آنے کا نام ہی نہیں لے رہا تھا ۔ بائیکر ز کا ایک اور گروہ ہمیں فالو کرتا ہوا آ رہا تھا شاید رات ہونے کی وجہ سے وہ ہمارے ساتھ ساتھ چل رہے تھے۔ شرینگل سے پہلے ہم ایک آبادی میں رک گئے اور وہاں جوس پینے کے بعد دوبارہ چل پڑے۔ ہم ممکنہ حد تک تیز چل رہے تھے لیکن اندھیرے اور بلدار اور ٹوٹے پھوٹے راستے کی وجہ سے ہمیں بہر حال احتیاط کرنی پڑ رہی تھی۔زیادہ تر بابر آگے ہوتا جبکہ میں اور شعیب ایک دوسرے کا خیال رکھ کر چل رہے تھے ۔ جیسے تیسے کر کے ہم شرینگل پہنچ گئے لیکن اس وقت ہمیں وہ بہت دور محسوس ہوا تھا ۔ بھوک تو ہمیں لگ رہی تھی لیکن ہمارا ارادہ تھا کہ چکیاتن سے آگے موجود ایک بڑے روڈ سائیڈ ہوٹل سے کھانا کھائیں گے۔ وہ تین بائیکرز کا گروپ ابھی بھی ہمارے پیچھے پیچھے تھا ۔ شرینگل کے بعد سڑک کارپٹڈ ہو گئی تھی اور ہم ممکنہ حد تک تیزرفتاری سے چل رہے تھے ۔ آج صبح سے بائیک چلا رہے تھے تھکاوٹ تو تھی لیکن ابھی ہم نے واپسی کا بہت لمبا سفر طے کرنا تھا۔ چکیاتن کے مقام سے باب کمراٹ جو کہ کمراٹ میں داخلے کا مقام ہے اسے خدا حافظ کہہ کر ہم دیر تیمر گرہ روڈ پر آ گئے۔ اب راستے اور بہتر ہو گیا تھا ۔ اس پر تھوڑا آگے آنے کے بعد ایک پمپ سے ہم نے پٹرول بھی ڈلوایا۔ بابر کی بائیک ٹو سٹروک تھی اور اس وجہ سے اس نے اس میں اوپر سے موبل آئل ڈالنے کیلئے اس کی ایک بوتل بھی خریدی۔ پٹرول پمپ سے کچھ آگے ہی وہ ہوٹل بھی آ گیا۔ جاتے وقت ہم یہاں تھوڑی دیر کیلئے رکے تھے اور ارادہ کیا تھا کہ واپسی پر یہاں سے مچھلی کھا کر جائیں گےکیونکہ سنا تھا کہ یہاں کی مچھلی بہت مشہور ہے اور سستی بھی ہے یعنی چار سو روپے کلو۔ لیکن جب پتا کیا تو مچھلی ندارد۔ وہاں چند کلو مچھلی رکھی بھی تھی لیکن انھوں نے کہا کہ وہ کسی کی ہے۔ درخواست کرنے پر بھی مچھلی نہ ملی تو پھر آدھا کلو کڑاہی کا آرڈر دیدیا۔ بائیکرز کا وہ گروپ کچھ دیر تو ہمارے پاس ہی ٹھہرا رہا لیکن جب انھوں نے دیکھا کہ ان کا تو یہاں ابھی ٹھہرنے کا ارادہ ہے تو وہ آگے روانہ ہو گئے۔ بابر نے مجھے کہا کہ آدھا کلو کڑاہی کم رہ جائے گی ۔ اس پر میں نے کہا کہ کھا ؤ تو سہی ضرورت پڑی تو اور منگوا لیں گے۔ جب کڑاہی ہمارے پاس آئی تو ہم نے دیکھا کہ کڑاہی کے نام پر گوشت کا سالن ہی تھا ۔ ان کے خیال میں گوشت میں چند ٹماٹر اور پیاز کاٹ دیں تو وہ کڑاہی بن جاتی ہے۔ لیکن مجبوری تھی پیٹ بھی بھرنا تھا تو کھانا پڑا اور وہ کڑاہی جس کو بابر کہہ رہا تھا کہ تھوڑی رہ جائے گی وہ بچ بھی گئی۔ روٹیاں کافی بڑی تھیں اسلئے صرف تین ہی کھائی گئیں لیکن وہ بھی ہمیں قسطوں میں ملیں کیونکہ اس وقت ہوٹل کا مالک ملازموں کو انکی اجرت دینے میں مصروف تھا ۔ کھانا کھانے کے بعد میں نے اور بابر نے وہیں اپنی اپنی بائیکس کا انجن آئل خود ہی تبدیل کیا ۔ میرے اور شعیب کے پاس انجن آئل کی بوتلیں پہلے ہی موجود تھیں جو ہم لاہور سے ہی لیکر آئے تھے البتہ شعیب نے آئل تبدیل نہ کیا۔ وہاں سے آگے کے سفر میں شعیب کو ہم نے بطور پائلٹ آگے رکھا اسکے بعد بابر اور سب سے پیچھے میں تھا۔ اندھیرا تو تھا لیکن ٹریفک بہت کم تھی اس لئے مناسب رفتار سے سفر کر رہے تھے۔ کچھ دیر سفر کرنے کے بعد ہمیں نیند محسوس ہونا شروع ہوگئی لیکن اگر رک جاتے تو لاہور کیسے پہنچتے ۔ ہم نے اسی وجہ سے اس ہوٹل سے کھانے کے بعد چائے نہیں پی تھی تاکہ جہاں نیند محسوس ہو وہاں چائے پی جائے۔ راستے میں ایک علاقہ خاگروم آیا وہاں سے کچھ آگے ایک ہوٹل کھلا دیکھ کر وہاں چائے پینے کیلئے رک گئے ۔ تین کپ چائے نوّے روپے کی ملی۔ چائے پینے کے بعد ہم دوبارہ روڈ پر تھے۔ راستے پر ہر تھوڑی دیر بعد چیک پوسٹیں آتی تھیں لیکن کسی نے ہمیں نہ روکا۔ تیمر گرہ سے آگے شعیب جو سب سے آگے بطور پائلٹ چل رہا تھا وہ سائیڈ دیوار سے ٹکراتے ٹکراتے بچا ۔ دراصل وہاں سائیڈ دیوار غیر معمولی طور پر ایکدم اندر کو بنائی گئی تھی اور وہ اپنے سے آگے موجود چھوٹے ٹرک کے پیچھے تیزی سے چل رہا تھا ۔شعیب کا یہ پہلا بائیک ٹور تھا اس وجہ سے اسے زیادہ تجربہ نہ تھا۔ اس پر میں نے اسے پیچھے کر دیا اور خود بطور پائلٹ آگے ہو گیا اور ساٹھ سے اسی کی سپیڈ کے درمیان ڈرائیو کرنے لگا۔ میں تھوڑا ٹیکنیکل طریقے سے سپیڈ مار رہا تھا ۔ میں اپنے سامنے کسی گاڑی کو رکھ کر اس سے کچھ فاصلہ رکھ کر چل رہا تھا تاکہ کسی بھی موڑ یا سپیڈ بریکر یا خراب روڈ کا پہلے پتا چل جائے۔ اور اس طرح تیز رفتاری سے بغیر رکے ہم چکدرہ کو کراس کرکے پل پار کرکے درہ درگئی کی طرف جانے والی سڑک پر آ گئے۔ جب دوبارہ ہمیں نیند محسوس ہوئی تو میں نے بائیک ایک روڈ سائیڈ شاپ پر روک دی۔ اس سے کوک اور چپس کا پیکٹ لیا۔ مجھے پتا تھا کہ اگر میرے ساتھیوں کو پیٹ کا پٹرول نہ ملتا رہا تو وہ سفر کرنے کے قابل نہیں ہو ں گے۔ کوک میں کیفین ہوتی ہے جو کہ نیند کو کسی حد تک کنٹرول کرنے میں مددگار ثابت ہوتی ہے۔ بابر نے کہا کہ آگے کوئی پمپ آئے تو رکنا کیونکہ اسے واش روم استعمال کرنا تھا۔ تھوڑا آگے آ کر اٹک کا ایک بڑا سا پمپ نظر آیا تو میں اس کی طرف مڑ گیا ۔ جب وہاں پہنچے تو پمپ پر نہ بندہ نہ بندے کی ذات حالانکہ پمپ چالو حالت میں تھا لیکن بارہ سے اوپر کا وقت ہو گیا تھا اس لئے شاید وہ لوگ کہیں پڑ کر سو رہے ہوں گے۔ واش روم استعمال کرنے کے بعد بابر نے پٹرول ڈلوانے کیلئے کئی بار آواز بھی دی لیکن جواب ندارد۔ اسلئے ہم دوبارہ آگے روانہ ہو گئے ۔ کئی آبادیوں سے گزرتے ہوئے ہم درہ درگئی کی چڑھائیوں پر پہنچ گئے۔ وہاں نیند شدت سے حملہ کر رہی تھی۔ میں آگے آگے تھا اور بار بار سر کو جھٹک کر نیند بھگا رہا تھا اسکے لئے کبھی اونچی آواز میں تلاوت شروع کر دیتا تو کبھی نعت لیکن نیند تھی کہ ساتھ نہیں چھوڑ رہی تھی ۔ دل کر رہا تھا کہ بائیک کھڑی کر کے سڑک کنارے ہی سو جاؤں۔ رات کے سفر میں اور بالخصوص پہاڑی سفر میں پائلٹ کا کردار بہت اہم ہوتا ہے کیونکہ پیچھے والے اس کی پیروی کرتے آرہے ہوتے ہیں اور اسکا ایک غلط ٹرن پیچھے والوں کیلئے خطرناک ثابت ہوسکتا ہے۔ ایک جگہ درہ درگئی کے ہی ایک موڑ پر نیند سے تنگ آ کر میں رک گیا اور چند منٹ بائیک سے اتر کر نیند بھگانے لگا۔ کچھ بہتری کے بعد پھر چل پڑے۔ ایک تو اس پہاڑی راستے پر بلا کا اندھیرا تھا کہ چند گز آگے سے زیادہ نظر نہیں آ رہا تھا اسلئے کئی جگہوں پر سڑک کے بائیں کنارے اور دیوار کی مدد سے اندازے سے چلنا پڑرہا تھا اور خاص طور پر اس وقت جب سامنے سے کوئی گاڑی آ جاتی۔ اللہ اللہ کرکے ہم درگئی کی چڑھائیاں اور اترائیاں عبور کر گئے۔ اس سے کچھ آگے آرمی چیک پوسٹ تھی۔ ہمارے آگے ایک ٹرک تھا وہ رک گیا تو ہم نے اپنی لین تبدیل کی اور اس کو اوور ٹیک کرکے آگے جانا چاہا تو ایک آرمی والے نے روک لیا وہ اس بات پر غصہ میں تھا کہ ہم نے لین کیوں تبدیل کی۔ اصل میں جب ہم ٹرک کے پیچھے تھے تو ہمیں نظر نہیں آیا کہ آگے چیکنگ ہو رہی ہے۔ ہم نے اس سے معذرت کی کہ ہمیں پتا نہیں تھا کہ آگے چیکنگ ہو رہی ہے۔ بہر حال کرم ہوا کہ اس نے ہمیں شناختی کارڈ چیک کرنے کے بعد جانے دیا۔ کچھ آگے جا کر ایک پمپ دیکھ کر ہم رک گئے اور پٹرول ڈلوایا ۔ تقریبا ً تین بجے کا وقت ہو رہا تھا ۔ اس وقت ہماری نیند اور تھکن سے بہت بری حالت ہو رہی تھی۔ بلکہ بری حالت کیا رونے والے ہوگئے تھے۔ اس تصویر سے شاید آپ کچھ اندازہ لگا سکیں۔

[haroonmcs26]

اسکے بعد ہم چار بجے کے قریب مردان سے پہلے ایک سی این جی اسٹیشن پر نماز کیلئے رک گئے۔ وضو کرکے اسکی چھوٹی سی مسجد میں جا کر میں نے اذان دی اور جب تک سنت پڑھ کر فارغ ہوا تو کئی اور لوگ جو غالباً اسی اسٹیشن کے ملازم تھے آ گئے۔ با جماعت نماز پڑھنے کے بعد ہم وہیں مسجد میں لیٹ گئے کہ کچھ دیر آرام کر لیں۔ تقریباً ایک گھنٹہ وہاں آرام کرنے کے بعد تھکاوٹ کچھ کم محسوس ہو رہی تھی۔ اسکے بعد ہم نان اسٹاپ مردان سے ہوتے ہوئے جی ٹی روڈ پر پہنچ گئے اور وہاں ایک ٹرک ہوٹل سے برنچ کیا ۔ راستے میں ایک مکینک سے شعیب نے اپنی بائیک کا انجن آئل تبدیل کروایا ۔روات سے اسلام آباد /راولپنڈی جانے والی سڑک کے پاس ہم نے بابر کو الوداع کہا اور خود لاہور کی طرف روانہ ہو گئے۔ گرمی کا احساس بڑی شدت سے ہورہا تھا اس وجہ سے راستے میں جگہ جگہ املی آلو بخارے کا شربت اور پانی پینے کیلئے رکتے رہے ساتھ نیند بھی بہت تنگ کر رہی تھی۔ ویسے میرا تو یہ مشورہ ہے کہ لاہور اور راولپنڈی کے درمیان کا سفر رات کا ہی بہتر ہوتا ہے۔ تقریباً ظہر کے قریب جہلم سے پہلے ایک پمپ پر پٹرول ڈلوانے کیلئے رکے اور اسکی مسجد میں نماز ادا کرنے کے بعد میں تو آرام کرنے کیلئے لیٹ گیا اور ڈیڑھ گھنٹے تک نیند پوری کی لیکن شعیب اس دوران باہر ہی پھرتا رہا۔ پھر وہاں سے نان اسٹاپ گوجرانوالہ تک آئے ۔ وہاں تھوڑی دیر رک کر ایک جگہ پانی پیا اور دوبارہ روانہ ہو گئے ۔ اب بائیک پر بیٹھنا مشکل ہو رہا تھا لیکن بیٹھنا تو تھا ہی۔ گوجرانوالہ میں ہی رات کی کی تاریکی چھانا شروع ہو گئی تھی ۔ گوجرانوالہ سے لاہور تک کافی تیز ڈرائیونگ کی ۔ شاہدہ کے قریب کافی رش تھا اس سے نکلنے میں کچھ وقت لگا اور پھر ہم نے مزنگ چونگی کے قریب شربت والے کے پاس جا کر بریک لگائی۔ شربت پی کر طبیعت کچھ بحال ہوئی اور وہاں شعیب کو الوداع کہہ کر میں اپنے گھر گرین ٹاؤن کوئی رات کے دس بجے کے اردگرد پہنچ گیا۔ نہانے اور کھانے کے بعد نیند کی وادی میں ڈوب گیا ۔ وادی کمراٹ کو تو بہت پیچھے چھوڑ آیا تھا لیکن خوابوں اور خیالوں میں وہ ابھی بھی ساتھ تھی اور رہے گی۔

ختم شد۔

فی امان اللہ۔ ہارون الرشید ، لاہور۔

[umans]

Thank you Haroon bhai. It is always treat to read your writings.

[haroonmcs26]

شکریہ جناب۔ یہ آ پ لوگوں کی حوصلہ افزائی ہے جو مجھے لکھنے کا حوصلہ دیتی ہے۔

[sajid65]

Thank you for a wonderful Safarnama.
It was really awesome trip.

Really enjoyed the Trip.

[asim.shah]

wonderfull jnb..

[raza988]

Lagta hai wapsi pe aap jaldi pohanch gaye camp tk.!

[haroonmcs26]

بہت شکریہ جناب۔ آ پ لوگوں کو پسند آ یا میرے لئے اتنا ہی کافی ہے۔

[haroonmcs26]

شکریہ عاصم بھائی

[haroonmcs26]

واپسی کے سفر کو وقت کم لگتا ہے کیونکہ واپسی پر چڑھائی کم آ تی ہے۔ لیکن واپسی پر تھکاوٹ کسر پوری کر دیتی ہے۔ واپسی پر چھوٹی کٹورہ جھیل کے بعد تو ہمیں بہت ہمت کرنا پڑی تھی

[nagar1]

Haroon bhai kia Ye "Basanti" ab bhi wahin khari thi? Huts aur abshar k darmian

[haroonmcs26]

نظر تو نہیں آ ئی۔ کہیں پردہ نہ کرا دیا ہو ہم سے

[nagar1]

Wapis chali gyi ho g...ya ap se sharma gyi ho g​

[haroonmcs26]

[haroonmcs26]

[haroonmcs26]

[haroonmcs26]

[ishaque.rafique]

Apkiii tahreer jitni baar read kryen utnaaa hi zyadaaa maza ata hai . Salute !!!