وادی کمراٹ، ایک ان کہی داستان، روئیداد سفر ستمبر 2019، تحریر ہارون الرشید

[haroonmcs26]

جی حسن بھائی میں نے آ پ کے تھریڈ میں پڑھا تھا۔

[haroonmcs26]

آرمرڈ جیکٹ وغیرہ بائیک پر ہی رکھی اور پھر پیدل ہی آبشار کی طرف چل پڑا۔ فاصلہ تھا تو تھوڑا سا لیکن تھا چڑھائی والا۔ آبشار سے کچھ پہلے بابر اور شعیب اپنی بائیکس کے ساتھ موجود تھے۔ آبشار جس پہاڑ سے بہتی ہوئی نیچے آرہی تھی وہ سخت چٹانی پہاڑ تھا جس کے اوپر کچھ پیچھے جنگل بھی نظر آ رہا تھا۔

[haroonmcs26]

جیسے جیسے آبشار کے قریب ہوتے جا رہے تھے اسکی خوبصورتی سامنے آتی جا رہی تھی۔ وہاں ہمارے علاوہ کچھ اور سیاح بھی موجود تھے۔

[haroonmcs26]

آبشار کے اوپر والے حصے پر پانی ایسے لگ رہا تھا جیسے سلو موشن میں بہہ رہا ہو لیکن جب وہ نیچے گر رہا تھا تو اسکی رفتار کافی تیز تھی۔ نیچے گرنے سے پہلے پانی ایک چٹان پر گر کر دو دھارو ں میں تقسیم ہو رہا تھا ۔ اس چٹان کے دائیں طرف ایک چھوٹا سا تالا ب بھی بنا ہوا تھا جس سے پانی نکل کر سامنے کچھ نیچے گہرائی میں گرتا ہوا پھر دائیں طرف ایک چھوٹے نالے کی صورت میں بہتا ہوا جا رہا تھا جو شاید آگے جا کر دریا میں شامل ہو رہا ہو۔

[haroonmcs26]

میں نے آبشار کے پانی میں پیر ڈالے اور اس کی ٹھنڈک کو محسوس کیا۔ پانی ٹھنڈا تو تھا لیکن اگر نہایا جائے تو برداشت ہو سکتا تھا دوسرا دھوپ بھی نکلی ہوئی تھی تو جو ارادہ میں نے نہانے کا بنایا تھا اس کو پورا کرنے کیلئے مجھے یہ آبشار بہتر لگی۔ اس وقت وہاں خواتین وغیرہ بھی موجود نہیں تھیں اسلئے میں جلدی سے واپس بائیک تک آیا اور وہاں سے شیمپو، صابن وغیرہ لیکر واپس آبشار پر پہنچ کر شرٹ اتار دی۔ بنیان اور ٹراؤزر پہنے رکھے کیونکہ اب تو میں نے کپڑے تبدیل کرنے ہی تھے۔ میرے ساتھی مجھے منع کر رہے تھے کہ پانی بہت ٹھنڈا ہے لیکن میں نے نہانے کا مصمم ارادہ کر لیا تھا۔ وہاں کراچی سے تعلق رکھنے والے سیاح بھی تھے وہ بھی کہہ رہے تھے کہ بھائی بیمار ہو جاؤ گے لیکن میں پانی کا اندازہ کر چکا تھا اور امید تھی کہ اسے بر داشت کر جاؤں گا اور آبشار کے دائیں طرف بنے ہوئے تالاب میں داخل ہو گیا۔ پہلے تو سردی کا احساس ہوا لیکن جب میں نے ایک ڈبکی لگا لی تو پانی خوشگوار محسوس ہونے لگا اور مزہ آنے لگا۔ میرے ساتھی کچھ دیر تو مجھے دیکھتے رہے اور پھر ان کو بھی جوش آ گیا اور وہ بھی تالاب میں داخل ہو گئے۔ کچھ دیر نہانے کے بعد ہم لوگ باہر نکل آئے ۔ نہا کر جسم کو تازگی کا احساس ہو رہا تھا جسم ہی نہیں دماغ بھی سکون محسوس کر رہا تھا۔ اس سے پہلے میں نے کئی آبشاروں میں منہ ہاتھ تو دھوئے تھے لیکن نہانے کا اتفاق پہلی بار ہوا تھا۔

[haroonmcs26]

نہانے کے بعد اپنی اپنی بائیکس سے کپڑے لیکر پہنے اور کنگھا وغیرہ بھی کیا۔ میں نے تو ٹوتھ برش بھی کیا۔ مکمل دھوپ نکلنے کی وجہ سے سردی کا احساس بالکل بھی نہیں تھا بلکہ موسم خوشگوار لگ رہا تھا ۔ ارادہ تھا آگے جا کر چائے پی جائے۔

[haroonmcs26]

ایک بار ہم پھر کمراٹ روڈ پر تھے آگے ہمارا ارادہ وادی کمراٹ کے آخری ٹورسٹ پوائنٹ کالا چشمہ جانے کا تھا۔

[haroonmcs26]

کچھ دیر بعد دریا دوبارہ راستے کے بالکل ساتھ آ گیا اور سینری بہترین ہو گئی۔ کہیں جنگل گھنا ہو جاتا اور کہیں چھدرا۔ راستہ اب دشوار ہو گیا تھا کیونکہ اب چڑھائیاں زیادہ مشکل ہو گئی تھیں اور بائیک کے ساتھ ٹانگوں کی بھی جان لگانا پڑ رہی تھی۔ راستے میں اسی طرح چشموں میں سے بھی گزرنا پڑ رہا تھا اور کہیں تو اتنا کیچڑ تھا کہ شوز کو بچانا مشکل ہو رہا تھا۔ دریا کی سینری کمال کی تھی اور کئی جگہوں پر تو بے اختیار سبحان اللہ کہتے ہوئے خود بخود بریک لگ جاتی۔ ایک جگہ ایک کافی لمبا درخت دریا میں گرا ہوا تھا اور تقریباً اسکے آر پار تھا لیکن اس جگہ کی خوبصورتی کو الفاظ میں بیان کرنا مشکل ہے۔پہلے ناران اور مری کے اطراف میں بھی ایسے قدرتی نظاروں کی بہتات تھی لیکن وقت نے ان جگہوں سے انکا کافی قدرتی حسن چھین لیا ہے لیکن کمراٹ ابھی بھی اس قدرتی حسن سے بھر پور وادی ہے۔

[haroonmcs26]

راستے میں کچھ میدانی سا علاقہ آ گیا اور دریا ہم سے کچھ فاصلے پر چلا گیا اور اسی طرح پہاڑوں سے کچھ فاصلہ بن گیا وہاں مقامی لوگ کاشتکاری میں مصروف تھے ۔ وہاں ہم نے مقامی بچوں سے ڈیڑھ لٹر لسی کی بوتل لی جو کہ ہمیں سو روپے میں پڑی۔ جس کو باری باری ہم تینوں نے نوش کیا۔نمکین لسی پی کر طبیعت میں تازگی آ گئی۔

[haroonmcs26]

کمراٹ آبشار والے جنگل سے آگے ہمیں کوئی کار نظر نہیں آئی کیونکہ اب راستہ میں جا بجا پتھر اور ایسی چڑھائیاں تھیں جن سے کار کی باڈی کے لگنے کے چانس تھے البتہ اکا ّ دکاّفور وہیلر گاڑیاں ضرور نظر آئیں۔ وادی کمراٹ کی خوبصورتی کو دیکھتے ہوئے ہمارا سفر سست روی سے جاری تھا۔

[haroonmcs26]

ہم سب آگے پیچھے جا رہے تھے اور جہاں کوئی پیچھے رہ جاتا تو آگے والا رک کر اس کا انتظار کر لیتا۔ بعض جگہوں پر جب پیچھے والا نظر نہ آتا تو ہم یو ٹرن بھی لے لیتے کیونکہ راستہ ایسا تھا کہ بائیک پنکچر یا کوئی اور مسئلہ ہو سکتا تھا لیکن الحمد للہ ہم ایسی تمام چیزوں سے محفوظ رہے۔

[haroonmcs26]

راستے ایک جگہ ہم نے کچھ بائیکرز کو دیکھا جو کہ نیچے دریا کنارے رکے ہوئے تھے ۔ ہم بھی وہاں سڑک پر ہی کچھ دیر رکے رہے اور پھر آگے چل دیئے۔

[haroonmcs26]

کالا چشمہ سے کچھ پہلے ایک چرھائی چڑھتے ہوئے ایک پتھر سے میری بائیک سلپ ہوئی اور گر گئی۔ لیکن آدھی گری اور اس کے ساتھ میں بھی آدھا ہی گرا ۔ میں نے کوشش کی کہ بائیک کو سیدھا کر لوں لیکن چڑھائی کی وجہ سے بائیک سیدھی نہیں ہو رہی تھی ۔ بابر اور شعیب اوپر چڑھائی پر کھڑے آپس میں بات چیت کر رہے تھے انھوں نے مجھے نہیں دیکھا تھا ۔ میں نے ہارن بجا کر انھیں متوجہ کیا اور وہ بھاگ کر آئے اور بائیک سیدھی کرانے میں میری مدد کی۔ اللہ کا کرم ہو ا کہ کوئی چوٹ نہیں آئی۔ کالا چشمہ سے پہلے چند چڑھائیاں مشکل تھی اور یہ ان میں سے ایک تھی۔

[haroonmcs26]

اب ہمیں سامنے کچھ کھوکھے نما دوکانیں نظر آ رہیں تھیں اور وہاں ایک دوکان پر پاکستانی پرچم بھی لگا ہوا تھا۔ لگتا تھا وہی کالا چشمہ ہے کیونکہ کمراٹ جنگل کے بعد یہی دوکانیں آئیں تھیں ۔ لیکن ان سے پہلے والی چڑھائی کافی دشوار گزار تھی۔ بابر کی بائیک کیلئے تو مشکل نہ تھی لیکن میری بائیک کو کچھ کوشش کرنی پڑی اور باقی کوشش میری ٹانگوں نے کی۔ وہاں پہنچ کر پتا چلا کہ واقعی ہم کا لا چشمہ پہنچ گئے تھے۔ میٹر ریڈنگ 27406۔ کالا چشمہ پر ہمیں پہنچنے میں ساڑھے تین بج گئے تھے۔ کمراٹ آبشار سے کالا چشمہ کا فاصلہ ویسے تو تقریباًچھ کلومیٹر ہے لیکن راستے کی دشواری اور ہمارے جگہ جگہ رکنے کی وجہ سے ہمیں دیر ہو گئی۔ ویسے عام طور پر بائیک زیادہ تر پہلے گیئر میں ہی چلتی ہے۔ ویسے ایک چیز ہم نے نوٹ کی کہ ٹورسٹ کال چشمہ کم ہی آتے ہیں کیونکہ یہاں کار تو آ نہیں سکتی یا تو آپ کے پاس بائیک ہو یا فو وہیلر گاڑی۔

[haroonmcs26]

دریا کی ایک چھوٹی سی شاخ جس میں پانی کم تھا اس میں سے ہم اپنی بائیکس کو گزار کر دریا کے کنارے پر لے گئے۔ بائیکس کو پارک کرکے دیکھا تو جگہ واقعی بہت خوبصورت تھی۔ سامنے دریا کے دو دھارے بہتے نظر آ رہے تھے جن میں سے پہلے دھارے میں پانی کم تھا اور تہہ کے پتھر نظر آرہے تھے لیکن دوسرے دھارہ مرکزی تھا جس میں پانی کی مقدار زیادہ تھا اور اسکا بہاؤ بھی زیادہ تھا۔ دونوں دھاروں کے درمیان پتھروں والی خشک جگہ تھیں جہاں کرسیاں اور چارپائی بھی نظر آرہی تھی۔ جبکہ دریا کے پار خوبصورت سر سبز گھنا جنگل موجود تھا جس سے پرے پہاڑ بھی نظر آ رہے تھے۔ بندہ وہاں سکون سے بیٹھ جائے اور اس خوبصورتی کے ساتھ دریا کی موسیقی میں کھو جائے جو دھیمے سروں میں سنائی دے رہی تھی۔ الفاظ اور تصویریں اس جگہ کی خوبصورتی کو بیان نہیں کر سکتیں۔ دریا کے کنارے کے ساتھ ساتھ موجود چھوٹے موٹے گول پتھروں کے اوپر بیٹھنے کیلئے کرسیاں رکھی ہوئیں تھیں۔ جہاں بیٹھ کر کھانے، چائے کے ساتھ اس جگہ کی خوبصورتی کا نظارہ بھی کیا جا سکتا تھا۔ یہ کمراٹ میں دوسری جگہ تھی جہاں پہنچ کر مجھے ایک بار پھر شدت سے احساس ہوا کہ یہ جگہ کم از کم ایک رات گزارنے کا حق رکھتی ہے۔ کیونکہ اتنا کم وقت دینا اس جگہ کی خوبصورتی کے ساتھ نا انصافی کے برابر ہے۔ ذہن میں یہ بھی سوچ تھی کہ اگر دوبارہ یہاں آنے کا موقع ملا تو ایک رات آبشار کے آس پاس کمراٹ جنگل میں اور ایک رات کالا چشمہ کے مقام پر ان شا ء اللہ کیمپنگ ضرور کروں گا۔

[haroonmcs26]

پہلے تو ہم یہ سمجھے کہ کالا چشمہ اس مقام کو کہتے ہیں لیکن جب ہم دوکانوں کے پاس آئے تو پتا چلا کہ کالا چشمہ حقیقت میں بھی ہے جو کہ راستے کے دائیں طرف دوکانوں کے ساتھ ہی تھا۔ کالا چشمہ چند فٹ کے چھوٹے سے پانی کے ذخیرے پر مشتمل تھا ۔ جس میں زیر زمین ہی پہاڑ والی سمت سے پانی آ رہا تھا اور پھر یہ پانی اس ذخیرے میں سے ہوتا ہوا دریا کی طرف جا رہا تھا لیکن پانی کی حرکت محسوس نہیں ہو رہی تھی۔ لوگ اس کالے چشمے کو دیکھنے کو یہاں آتے ہیں لیکن اس میں دیکھنے لائق کوئی چیز بظاہر تو نظر نہیں آ رہی تھی ۔ میرے خیال میں اس جگہ دیکھنے لائق دریا کی طرف تھی۔ ہم اس چشمے کے پاس بیٹھ گئے اور غور سے اس کا ایسے معائنہ کرنے لگے جیسے کوئی سائنسدانوں کی ٹیم آئی ہو۔ پا نی نظر تو بالکل صاف آ رہا تھا البتہ اس جگہ کی دیواروں کے ساتھ ریشے دار کائی ضرور نظر آرہی تھی۔ مقامی لوگوں کے مطابق یہ لیبارٹری ٹیسٹ شدہ پانی ہے اور اس میں قدرتی سلاجیت بھی موجود ہے اور یہ پانی کئی بیماریوں کا علاج ہے۔ بابر اور شعیب اس پر دلچسپ تبصرے بھی کر رہے تھے جو بے ساختہ ہونٹوں پر ہنسی بکھیر رہے تھے۔ میں نے پانی کو ہاتھ میں لیکر دیکھا تو وہ بالکل صاف نظر آیا جبکہ اس چشمے میں اسکا رنگ کچھ سیاہی مائل نظر آ رہا تھا شاید اسی وجہ سے اس کو کالا چشمہ کہتے ہیں۔ وہیں دوکان سے ایک کٹی ہوئی بوتل لیکر جس کو وہ گلاس کے طور پر استعمال کر رہے تھے اس پانی کو پیا تو اس کا ذائقہ بہترین تھا اور فرحت کا احساس دلاتا تھا باقی مقامی لوگوں کے مطابق جو خواص تھے ان کے بارے میں میں کچھ کہہ نہیں سکتا۔ وہیں راستے پر ایک سیاح لڑکا ایک چارپائی پر لیٹا ہوا تھا اور مقامی لوگ اسے کہتے کہ یہ پانی پی کر دیکھو تمھاری ساری بیماریاں دور ہو جائیں گی اور وہ اونچی آواز میں غصہ سے کہتا کہ میں نے نہیں پینا یہ گندہ پانی ۔ میں کراچی سے یہ کالا چشمہ دیکھنے آیا تھا اور یہ نکلا کیا۔ اس کے انداز پر ہمارے اور مقامی لوگوں کے منہ سے ہنسی کے فوارے پھوٹ رہے تھے اور مقامی افراد بار بار اس کو چھیڑ رہے تھے۔ میں نے اس لڑکے کو کہا کہ یار اس پانی کا ذائقہ تو اچھا ہے تو اس نے مجھے آہستگی سے کہا کہ میں نے بھی یہ پانی پیا ہے میں تو مذاق کر رہا ہوں۔

[haroonmcs26]

کالے چشمے کا تفصیلی معائنہ کرنے کے بعد سائنسدانوں کی ٹیم دوبارہ دریا کے پاس آ گئی اور کرسیوں پر براجمان ہو گئی۔ میرا وضو تھا اس لئے میں ایک کوکھے نما جگہ میں نماز پڑھنے چلا گیا ۔ وہاں ایک سائیڈ پر کچھ فاصلے پر واش روم بھی نظر آ رہا تھا لیکن وہ لاک تھا اور اس کی چابی دوکان والے سے لیکر جانی پڑتی تھی اور پانی خود دریا سے بھرنا پڑتا تھا۔ اس سے پہلے ہم نے چائے ، چپس اور بیسن والے ابلے انڈوں کا آرڈر دے دیا تھا اور جب میں نماز سے فارغ ہو کر واپس ساتھیوں کے پاس آیا تو وہ چیزیں آ گئی تھیں۔ چائے بھی اچھی بنی تھی اور چیزیں بھی مزیدار تھی لیکن ایسے علاقے میں جب چائے کا مزہ آنے لگتا ہے تو وہ ختم ہو جاتی ہے۔ تین کپ چائے 150 کے ، تین انڈے 90 اور چپس 100 روپے کی تھی۔

اس ٹور میں میری ساتھی۔

[haroonmcs26]

چائے اور دوسرے لوازمات سے نمٹنے کے ساتھ ساتھ ہم فوٹو گرافی بھی کر رہے تھے اور ماحول سے لطف اندوز بھی ہو رہے تھے۔

[nagar1]

Hm jb kumrat gae they hmara irada tha aabshar k baad kala chashma jane ka lekin wahan mojood logon ne kaha k kala chashma men kuch khas nahi ha isleay na jaen.kuch hm thke hue bhi they aur kuch barish k shuru hone se hmara irada bhi badal gya tha so hm ne kala chashma cancel krdia aur idhr he abshar k samne se drya par kr k jungle main chale gae

[haroonmcs26]

حسن بھائی کالا چشمہ کی اصل خوبصورتی وہ چھوٹا سا پانی کا ذخیرہ نہیں بلکہ اس جگہ کی اور اس تک جانے والے راستے کی خوبصورتی ہے۔ ویاں دریا کی طرف کا منظر بہت ہی خوبصورت ہے۔ میں تو اس کو ریفر کروں گا۔