جولائی 2017 اور گلگت بلتستان

[haroonmcs26]

ویگن آر کی پک تو بہت اچھی ہے۔ اے سی بھی اچھا ہے۔ میں نے بغیر آرام کیے جگلوٹ سے لاہور تک اس کو ڈرائیو کیا ہے۔ جو کہ ایک لمبا سفر ہے اور میرا خیال ہے 800 کلومیٹر سے زیادہ کا ہی سفر ہوگا ۔ اور اسمیں مجھے مسلسل 25 گھنٹے ڈرائیونگ سیٹ پر گزارنے پڑے۔ کمفرٹ کا لیول ایک سیڈان کا تو نہیں ہے۔ لیکن نارمل ہے۔ اس دفعہ واپسی پر میں نے اس کو موٹر وے پر مسلسل 120 کی سپیڈ پر چلایا ہے کوئی ہیٹ اپ یا دوسرا مسئلہ کا سامنا نہیں کر نا پڑا۔ الحمداللہ اتنے لمبے ٹور ز میں مجھے اس نے معمولی سا بھی تنگ نہیں کیا۔ نہ ہی اسکے ریڈی ایٹر میں مجھے پانی ڈالنے کی ضرورت پڑی اور نہ ہی ہیٹنگ کا ایشو ہو گا۔

[pwuser150242853072]

Thank you so much haroon bhai

[zain15]

۔۔۔ہارون بھائی ۔۔۔الله كريم نے
اپ کو انداز تحریر سے بھی خوب نوازا ہے۔۔۔۔
ویسے ہمارا ٹور پچھلے سال سے کافی زبردست رہا۔
اور انشااللہ اگلے سال دیوسائی پلان پر چند رات قیام کا ارادہ ہے۔۔

[haroonmcs26]

واقعی دیوسائی میں صرف ایک دن گزارنا اتنی حسین جگہ کے ساتھ زیادتی ہے۔ انسان کو کچھ دن وہاں ضرور گزارنےچاہیئے۔ جو آپ نے سوچا ہے وہی میں نے سوچا ہے کہ دوبارہ جب بھی جانا ہوا وہاں کم از کم ایک دو راتیں ضرور گزارنی ہیں۔ دیوسائی دنیا کے شوروغل سے الگ ہی ایک دنیا ہے۔ ہر طرف سکون ہی سکون۔دوسرا زین بھائی حوصلہ افزائی کا بہت بہت شکریہ

[haroonmcs26]

جولائی 2017ء کی آمد سے دو تین ماہ پہلے ہی میں نے اپنے گلگت بلتستان کے سفر کے متعلق منصوبہ بندی شروع کر دی تھی۔ پچھلے سال کی نسبت اس سال مجھے یہ فائدہ تھا کہ میں ایک بار وہاں کے کچھ حصے کو دیکھ آیا تھا اور وہاں کی صورتحال کا کافی اندازہ بھی ہو گیا تھا۔اس دفعہ میرا ارادہ دفتر کے دوستوں کے ساتھ نکلنے کا تھا اور پروگرام بھی پندرہ سے بیس دن کا تھا۔ جیسے ہی میں نے اپنے پروگرام کا آفس میں ذکر کیا تو ایک دوست عنصر نے تو اسی وقت ہی ایڈوانس پیسے بھی پکڑا دیئے۔ وہ کبھی بھی پہاڑی علاقے میں نہیں گیا تھا اسلئے کافی پرجوش تھا۔ ساتھ دو دوستوں ارشد اور علی ناصر نے بھی حامی بھر لی اور کہا کہ جیسے ہی جون کی تنخواہ ملے گی وہ بھی پیسے جمع کروادیں گے۔ ہم کل ملا کر چار افراد ہو گئے اور اس سے زیادہ میں ساتھ لے جانا بھی نہیں چاہتا تھا کیونکہ اس صورت میں گاڑی نے بھی اور ہم نے بھی تنگ ہونا تھا۔ جولائی سے کچھ دن پہلے ارشد اور علی ناصرنے کچھ ذاتی مصروفیات کی وجہ سے معذرت کر لی۔ اب میں اور عنصر رہ گئے۔ یہ وقت کچھ پریشانی کا بھی تھا کہ بنا بنایا پروگرام خراب ہونے کا ڈر تھا۔ کچھ اور دوستوں سے بھی پوچھا لیکن اپنی مصروفیات کی بناء پر اور اپنے چھٹیوں کے طے شدہ پروگرام کی وجہ سے ہمیں کوئی مناسب ساتھی نہ ملا۔ افراد تو کئی تھے لیکن ہمیں ایسے لوگوں کی تلاش تھی جو اس سفر میں بالکل مل جھل کر دوستانہ انداز میں وقت گزار سکیں کیونکہ ایک اچھے سفر کیلئے اچھے ہم سفروں کا ساتھ بھی ضروری ہوتا ہے۔ یہ صورتحال دیکھ کر میں نے پاک وہیل پر ہم سفر ساتھیوں کی تلاش کیلئے ایک تھریڈ بھی شروع کیا اور اپنے پہلے سفر نامے "تین کزنز ، ناران ، ہنزہ اور خنجراب" میں بھی پوسٹ کی۔ کئی لوگوں نے رابطہ بھی کیا۔ وہ سب تیار تھے لیکن کسی کا پروگرام کے شیڈول کا مسئلہ تھا تو کوئی اس بات پر پریشان کہ اتنی چھٹیاں کیسے لی جائیں۔ میں جو ابتدائی پروگرام بنا رہا تھا اس کے مطابق ہمار ا ارادہ 10 جولائی کو روانگی کا تھا اور ہماری واپسی جولائی کے آخر تک ہونا تھی اس میں ہمارہ ارادہ لاہور سے اسلام آباد، مری، پتھریاٹہ، نتھیا گلی ، ایبٹ آباد سے ہوتے ہوئے ناران کاغان اور پھر گلگت بلتستان کا تھا۔ اب ہمیں تو ایک مہینے کی چھٹیاں ہونی تھیں لیکن دوسرے لوگوں کیلئے اتنی چھٹیاں ایک مسئلہ تھیں۔ رابطہ کرنے والوں کو سب سے زیادہ مسئلہ یہی تھا۔ ان میں سے کچھ دوستوں نے تو کہا تھوڑا پروگرام لیٹ کر لو یا کچھ نے کہا کہ دن کم کر لو۔ میں نے ان سے یہی کہا کہ ہم دن کم بھی کریں تو دس دن سے کم تو نہیں کر سکتے۔ اسی صورتحال میں 10 جولائی بھی گزر گیا۔ میں ہم سفر ساتھیوں کو فائنل ہی کر رہا تھا کہ اسی دوران میرے ایک کزنز عبدا لرحمن ثانی نے رابطہ کیا کہ میں اور میرے دو دوست تیارہیں ۔ میں نے کہا کہ اپنے ساتھ صرف ایک ساتھی کو تیار کر لو اس سے زیادہ کرو گے تو ہم تنگ ہوں گے۔ بہر حال 16 جولائی 2017ء کا دن روانگی کیلئے فائنل ہو گیا ثانی کی مصروفیات کی وجہ سے دس دن کا پروگرام بنا۔

[haroonmcs26]

پروگرام کا حتمی منصوبہ تو تیار ہو گیا تھا لیکن تیاریوں کیلئے میرے پاس وقت بہت کم تھا کیونکہ جو بھی تیاری کرنا تھی وہ میں نے کرنا تھی باقی نے تو صرف اپنے کپڑے لیکر وقت مقررہ پر گاڑی میں آ کر بیٹھ جانا تھا۔ کسی سفر کی منصوبہ بندی اور انتظام کرنا آسان نہیں ہوتا کیونکہ اس پر ہی آپ کے سفر کا بہت زیادہ دارومدار ہوتا ہے اور اگر سفر بھی کیمپنگ والا ہو تو اس چیز کی اہمیت اور بڑھ جاتی ہے۔ گرمی کی شدت اور حبس کے موسم میں بھاگ دوڑ کرنا پڑ رہی تھی۔ پہلے سلیپنگ بیگز کا انتظام کرنا پڑا جس کیلئے میں کل رات ہی قصور سے واپس آیا تھا۔ پھر گاڑی کو سوزوکی کی ورکشاپ میں لے جا کر اس کا انجن آئل، آئل فلٹر، ائیر فلٹر تبدیل کروایا۔ گاڑی کی ٹیوننگ اور بریک سروس میں چند دن پہلے ہی کروا چکا تھا۔ مکینک کے مشورے سے میں نے بریک شو تبدیل کروانے کا فیصلہ واپسی تک کیلئے مؤ خر کر دیا کہ واپس آکر کروا لوں گا۔ گاڑی کے ان ابتدائی اخراجات کا کل بل تقریبا ساڑھے پانچ سے چھ ہزار تک بن گیا تھا۔ ظہر کے بعد ورکشاپ سے فارغ ہوا تو گاڑی کی سروس کروانے کیلئے ٹاؤن شپ میں شیل کے پمپ پر گاڑی لے گیا۔ وہاں گاڑی کی سروس کروائی جس میں 350 روپے خرچہ آیا۔ تقریبا 2500 روپے میں وہیں سے گاڑی کی ٹینکی فل کروائی۔ پھر اسی پمپ پر موجود ٹائر شاپ پر ٹائروں کی روٹیشن کروائی جس کو مکینک اپنی زبان میں قینچی مارنا کہتے ہیں۔ سٹپنی کو چیک کروایا تو وہ پنکچر نکلی ۔ مکینک نے کہا کہ پنکچر باہر سے لگاؤ یا اندر سے ۔ میں اتنے لمبے سفر میں باہر سوّے والے پنکچر کا رسک نہیں لے سکتا تھا اسلئے ٹائر کھلوا کر اندر سے پنکچر لگوایا۔ ٹائر شاپ والے کو 850 روپے پکڑا کر گھر واپس آ یا۔ اس سارے کام میں عصر کا وقت ہو گیاتھا اور ابھی بھی ڈھیروں خریداری پڑی تھی جبکہ کل روانگی تھی۔ جسم تھک گیا تھا۔ اس دوران میرے ساتھ میرا پانچ سال کا بڑا بیٹا عبدا للہ بھی تھا۔ اس دوران اسکی کوشش رہی تھی کہ کسی طرح میں ابو کو اس بات پر تیار کر لوں کہ وہ مجھے بھی ساتھ لے جائیں۔ اسکی معصومانہ باتوں پر انکار کرنے کو دل تو نہیں کر رہا تھا لیکن میں یہ بھی جانتا تھا کہ ایک کیمپنگ ٹور میں پانچ سالہ بچے کیلئے بہت مشکلات ہوں گی۔ اسلئے مجبورا اسکو ساتھ شامل نہیں کر رہا تھا۔ اسکو کو قلفی وغیرہ کھلائی اور بہلایا۔ ایک سڑک کنارے پٹھان سے جو کہ ٹوپیاں ، عینک اور رومال وغیرہ بیچ رہا تھا اس سے چار بڑے سائز کے مختلف رنگوں کے رومال خریدے کیونکہ ان کی افادیت مجھ پر پچھلے سال کے سفر میں واضح ہوئی تھی۔ چاہے ان سے منہ صاف کرو یا بطور تولیہ استعمال کرو اور اس سفر میں بھی انھوں نے ہمارا بہت ساتھ دیا۔ ان کو عرف عام میں مولویوں والے رومال یا پرنے کہا جاتا ہے۔ چار رومال 400 روپے کے آئے اور ایک میں نے اپنے لئے پی کیپ بھی لی جس کا جرمانہ 150 روپے تھا۔ واپس گھر پہنچا تو دیکھا کہ ورکشاپ میں پتا نہیں کہاں سے کپڑوں کے ساتھ کالک لگ گئی تھی اور پورے سوٹ کا ستیا ناس ہو گیا۔ ارادہ تھا کہ مغرب کے بعد میٹرو سٹور جا کر باقی خریداری کر لوں گا۔ میں اور میری شریک زندگی مغرب کے بعد جیسے ہی میٹرو سٹور جانے کیلئے نکلنے لگے تو چھوٹے بھائی کی طبیعت اچانک خراب ہو گئی اور وہ بے ہوش ہوگیا۔ فورا ہی ریسکیو 1122 کی ایمبولینس کو کال کر کے اسے جناح ہسپتال لے گئے۔ وہاں جا کر اسکی طبیعت بحال ہوگی۔ شکر ہے اللہ کا ۔ ڈاکٹر نے بتایا کہ کچھ نہیں بس بازاری کھانے کی وجہ سے مسئلہ ہوا تھا اور کچھ دیر بعد ہی اسے ڈسچارج کر دیا۔ گھر واپس آئے تو دس بجے سے زیادہ کا وقت ہو گیا تھا اور میٹرو سٹور گیارہ بجے بند ہو جاتا ہے۔ میں اور شریک سفر اپنے ساتھ دونوں بیٹوں کو لیکر جن کی عمر بالترتیب پانچ اور اڑھائی سال تھیں گاڑی میں سوار ہوئے اور میٹرو پہنچ گئے۔ پونے گیار ہ ہو چکے تھے اور صرف 15 منٹ باقی بچے تھے خریداری کیلئے ۔ بھاگم بھاگ جو کچھ ذہن میں آتا گیا اسے ٹرالی میں بھرتے چلے گئے ۔ کئی چیزوں کی نشاندہی تو عبداللہ نے کی کہ ابو یہ بھی لے لیں ۔ خاص طورپر کیچپ ، چکن سپریڈ اور جام وغیرہ۔ اسے اپنی کام کی چیزیں زیادہ یاد رہتی ہیں۔ سٹور بند ہونے کا اعلان بار بار سپیکر پر ہو رہا تھا۔ اتنے کم وقت میں تقریبا چار ہزار کی کھانے پینے کی چیزوں کی خریداری ہم کر سکے تھے۔ جس میں خاص طور پر ہم نے تیس انڈوں کی پیکنگ بھی لی تھی جن کی تاریخ معیاد تیس دن تھی جو کہ بہت تھی۔ وہاں سے نکل کر جب گرین ٹاؤن عمر چوک پہنچے تو ایک دوکان کو کھلا دیکھ کر سوچا کہ باقی خریداری یہاں سے نہ کر لوں۔ تو کچھ خریداری وہاں سے کی جس کا بل تقریبا 3 ہزار کے کم و بیش میں تھا۔ اس دوران بچے گاڑی میں ہی سو چکے تھے اور شریک زندگی بھی گاڑی میں نیم غنودگی کی حالت میں بیٹھی تھی۔ گھر واپس پہنچے تو 1 بج چکا تھا۔ سارا سامان نکال کر ڈائننگ ٹیبل پر ہی رکھا چھوڑ کر کچھ اور سامان کی سیٹنگ کی اور شدید تھک کر صرف دو گھنٹے کیلئے ہی گہری نیند سو گیا۔

[haroonmcs26]

صبح جلدی اٹھ گیا کیونکہ مجھے پتا تھا ابھی بھی بہت کچھ خریدنے کو ہے۔ عنصر نے میرے پاس 9 بجے پہنچ جانا تھا جس کے بعد ہم نے گھر سے اسلام آباد کیلئے روانہ ہونا تھا۔ ثانی اور اسکے دوست یاسر نے اسلام آباد سے ہمارے ساتھ شامل ہونا تھا کیونکہ دونوں کو اپنے کام کے سلسلے میں ایک اہم میٹنگ کے لئے اسلام آباد جانا پڑا تھا۔ثانی کا تعلق قصور سے تھا اور یہ میرے پچھلے سال کے ٹور میں شامل احمد کا چھوٹا بھائی ہے۔ جبکہ یاسر کا تعلق ننکانہ سے ہے لیکن وہ ڈیوٹی بھائی پھیرو ، قصور میں ہی کرتا ہے۔ سفر کیلئے میں نے ایک موبائل کل ہی خریدا تھا جس کا کیمرہ مجھے اچھا لگا تھا۔ باقی خریداری بھی بھاگم بھاگ کی۔ اسی دوران عنصر بھی پہنچ گیا۔ میں نے اسے کہا تھا کہ ناشتہ نہ کرکے آنا اکٹھے کریں گے۔ اسکے ساتھ ناشتہ کرکے میں نے اسے ڈرائنگ روم میں بٹھایا اور خود بازار کا رخ کیا۔ سامان کی لسٹ میں نے پہلے ہی تیار کر لی تھی۔ جو خریدتا جاتا کاٹتا جاتا۔ بہرحال بڑی تگ و دد اور مشکل سے ساری خریداری مکمل ہو گئی۔ جلدی کی وجہ سے جو سامان خریدا اسکے اخراجات کا اندازہ بھی نہیں لگا سکا اسلئے بتا نہیں سکتا کہ کتنا خرچہ ہو گیا۔ پسینے میں شرابور ہو کر گھر واپس آیا ۔ حقیقت میں دماغ گھوم رہا تھا۔ اور ابھی بھی ایک مشکل کام سامنے تھا یعنی سب چیزوں کو اپنی گاڑی ویگن آر میں رکھنے کا ۔ عنصر سے پوچھا کہ وہ کتنے کپڑے ساتھ لایا ہے تو پتا چلا حضرت صاحب ایک بیگ اور ایک بڑا شاپر بھر کر لائے ہیں اور اتنے کپڑے تھے جیسے وہ پورے مہینے کیلئے جا رہا ہے۔ اس سے کپڑے کم کروائے اور سب کچھ ایک بیگ میں ہی منتقل کروایا۔ آخر کار ساراسامان گاڑی میں منتقل ہو گیا جس کیلئے اچھا خاصا وقت لگ گیا اور ساتھ ہی ہارون صاحب کی بھی بس ہو گئی۔ پچھلے تین دنوں سے نیند بھی پوری نہیں ہورہی تھی اس لیے اس کے بھی جسم پر اثرات تھے ۔ دل کر رہا تھا کہ بس لیٹ جاؤں اور سوجاؤں۔ اوپر سے اس دن بجلی بھی بہت تنگ کر رہی تھی۔ کہیں اس سلسلے میں کام ہو رہا تھا اس لئے صبح 9 بجے سے گئی ہوئی تھی۔ لیکن مجھے پتا تھا کہ اب آرام کا وقت نہیں تھا۔ ثانی وغیرہ کو ہم نے سہ پہر تین بجے اسلام آباد سے لینا تھا اور ظہر کا وقت تو لاہور میں ہی ہو گیا تھا۔ میں جلدی جلدی نہایا اور سفر میں سکون کیلئے ٹراؤزر اور ٹی شرٹ پہن لی ساتھ ہی چپ چپ والی مردانہ سینڈل پہن لی ۔ اس سلیپر نما سینڈل کا میں نے خاص طور پر اپنے ساتھیوں کوکہا تھا کہ یہ لازمی لینی ہے کیونکہ جب چشموں کے پانی میں اترنا ہے تو اس وقت اس کا فائدہ نظر آئے گا۔ پہاڑی علاقوں کے سفر کیلئے میری نظر میں ایک لازمی چیز۔

[haroonmcs26]

قاسم بھائی پوسٹ پسند کرنے کا بہت بہت شکریہ۔

[haroonmcs26]

پچھلے سال کے کیمپنگ ٹور سے ایک فائدہ ہو ا کہ اندازہ ہو گیا کہ کس کس چیز کی ضرورت ہے۔ اس لحاظ سے میں نے اس سال ان چیزوں کا بھی خیال رکھا جو پچھلے سال ساتھ نہیں تھی لیکن جن کی ضرورت محسوس ہوئی اور کچھ غیر ضروری چیزوں کو نکال بھی دیا۔

[qasmi66]

Haroon sb, baat ye hy k itni bareek tafselaat aap de rahay hain k wah wah. You are really taking pain in writing this safarnama. Lagta hy Azadi weekend khush gawar guzray ga IA.

[haroonmcs26]

بھائی جب لکھنا ہی ہے تو ایسا تو لکھو کہ کسی کو فائدہ تو ہو۔ لیکن آپ جیسے بھائیوں کی حوصلہ افزائی سے دل بڑھ جاتا ہے۔ بہت شکریہ

[haroonmcs26]

**لو جی اب تیاریوں اور سامان کا کچھ خلاصہ بھی ہوجائے جو کہ دوستوں کیلئے فائدہ مند ثابت ہو گا۔ **
سواری: سوزوکی ویگن آر،1000سی سی ، ماڈل 2015۔ پچھلے سال کے ٹور میں بھی یہی گاڑی میرے پاس تھی۔ اسکی ساتھ ضروری سامان جیسے پیچ کس، پلاس، سٹپنی، واش شیمپو، دو ڈسٹنگ کے کپڑے، ایک چھوٹا ایئر کمپریسر ٹائروں میں ہوا بھرنے کیلئے، جیک پانا اور راڈ، گاڑی کے کاغذات(کبھی نہ بھولیں)، ایک رسی بطور ٹو چین۔
برتن وغیرہ: گیس کا چولہابمعہ4 کلو گیس، پریشر ککر(لازمی چیز ورنہ پکا پکا کر تھک جاؤ گے لیکن چیز گلے گی نہیں)، ایک چپٹے پیندے والی کڑاہی جس کو سالن، چاول اور چائےوغیرہ مختلف مقاصد کیلئے استعمال کیا جا سکتا ہے۔ 2 گلاس، 4 چمچ، 4 پلیٹیں سٹیل کی ،ایک پکانے والا چمچ، 2 چھریاں، چائے چھلنی ،1 بوتل 20لٹر والی پانی کیلئے ، برتن صفائی کیلئے کپڑا نیز چاول دم پر لگانے کے لئے کپڑا،لیکوئڈ وم بمعہ سپونج۔تھرمس، چھوٹا واٹر کولر۔
کھانے کی اشیاء: 100بلیک اور50 گرین ٹی بیگز،آدھا آدھا کلوکے ایوری ڈے سوکھے دودھ کے پیکٹ، 2 کلو چینی بمعہ اس کا ڈبا، 1 چھٹانک الائچی ، میٹرو سے پیک شدہ 30 انڈے، ایک کپ کیک کا ڈبہ، نیشل اچار کا تقریبا 1 کلو کا ڈبا، نوڈلز کے 8 چھوٹے پیکٹ، مختلف قسم کے بسکٹ کے 2 ڈبے، نمکو اور بھنی ہوئی دال ماش کے پیکٹ، نیشنل لال مرچ پسی ہوئی، 1 کلو گرام کیچپ کا پیکٹ، چکن سپریڈ کا پیکٹ،ایک نمک کا پیکٹ( ہم نے دانے دار نمک لیا تھا لیکن وہ جلدی حل نہیں ہوتا اسلئے بہتر ہے باریک پسا ہوا نمک لے کر جائیں)، ایک الیکٹر ک لائٹر چولہا جلانے کےلئے اور دو عام لائٹر اور ساتھ دو ماچس( کیونکہ زیادہ بلندی پر بعض اوقات آکسیجن کی کمی کی وجہ سے لائٹر نہیں جلتا)، کوکنگ آئل کلو کلو والی دو بوتل، نیشنل کالی مرچ پسی ہوئی،6 بوتلیں ڈیڑھ لٹر والی کولڈ ڈرنک مختلف فلیورمرنڈا، کوک، سپرائٹ، چاروں دالیں اور سفید چنے ایک ایک پاؤ، سوکھا دھنیا نیشنل،نیشنل ہلدی، نیشنل کا ادرک اور لہسن پاؤڈر، 2 کلو چاول، گولیوں اور ٹافیوں کے دو پیکٹ وہاں کے بچوں کے لئے لیکن خود بھی استعمال پر کوئی پابندی نہیں، پنجاب دلیے کے دو چھوٹے پیکٹ اور سویوں کا ایک پیکٹ (یہ دونوں چیزیں اسلئے لی کہ کہیں کسی کا پیٹ خراب نہ ہوجائے)،پاؤ لیموں،3 کلو آلو،3 کلو پیاز، 1 پاؤ ہر ی مرچ، 1 پاؤ ادرک، ہر ا دھنیا، 1 کلو ٹماٹرسخت والے،کچھ زیادہ تو نہیں لے لیا نا۔
**ادویات: پیناڈول اور بروفن کا ایک پتا، پائیوڈین، روئی، سنی پلاسٹ، بینڈیج، پیٹ خرابی کے سیرپ جیسے گیسٹو فل اور ایک اور تھا نام یا د نہیں رہا، 5 پیکٹ جوشاندہ۔سڑپسلز کا ایک پتا، **
ذاتی استعمال کی اشیاء: شناختی کارڈ (کبھی نہ بھولیں اور فیملی کی صورت میں جانے کیلئے نکاح نامہ )جوگرز، سلیپرز سینڈل نما چپ چپ والے (لازمی لے کر جائیں اگر چشموں کے ٹھنڈے پانی کا مزہ لینا ہے ) ، پی کیپ، اونی ٹوپی، چشمہ، جرابیں،3جینز پینٹس، 6 شرٹس(کوشش کریں کہ فل بازو شرٹس لے کر جائیں تاکہ سن برن سے بچ سکیں)، 1ٹراؤزر، 4بنیان ، انڈر وئیر، 1جیکٹ اور ایک گرم جرسی، بیلٹ، موبائل ہنڈ فری، چارجر، لیگی، ہائی نیک۔یہ چیزیں ہر ایک کی اپنی تھی۔ مشترکہ کھاتے میں سے نہیں آئی تھی۔ باقی ہر چیز مشترکہ کھاتے میں سے تھی۔
متفرق اشیاء: 1 پاؤ پولی تھین بیگ (یہ ہمارے بہت کام آئے)، پونڈز کولڈ کریم، فیس واش، فیئر اینڈ لولی بیوٹی کریم (یہ بھول گیا تھا بالا کوٹ سے خریدی)،ویزلین ہیئر آئل، سوئی دھاگہ، ٹوتھ پیسٹ اور ہر ایک کے لئے چار برش اور چار مسواکیں، صابن نہانے والے2 عدد ایک لکس اور ایک ڈیٹول، کپڑے دھونے والاصابن کی ایک گاچی، دو کنگھے ،ایک ایمرجنسی لائٹ، ٹشو پیپر 2 کچن رولز اور ایک روز پیٹل کا ڈبہ، 1 لوٹا، تولیے کے طور پر ہر ایک کے لئے ایک ایک رومال بڑا، چار افراد کے لئے ایک ٹینٹ جو کہ2016 میں دو ہزار میں خریدا، مزیداحتیاط کیلئے 850 میں اس کی آؤٹر شیٹ بھی لی تاکہ بارش سے مکمل بچاؤ ہو سکے ، چار سلیپنگ بیگز ، ایک چٹائی( ساتھ لے جانا بھول گیا جس کی اہمیت کا بعد میں احساس ہوا)، ایک چھتری( یہ بھی گھر بھول گیا بعد میں ناران سے خریدی) ، گاڑی والا موبائل چارجر اور اسکے لئے دو ڈیٹا کیبل چارجنگ کیلئے، موسپل مچھروں کیلئے۔پچھلی دفعہ چارجنگ کیلئے مشکلات کا سامنا کرنا پڑا اسلئے اس دفعہ میں نے ایک یو پی ایس اور 130 پاور کی ایک بیٹری بھی ساتھ رکھ لی۔ ایک انرجی سیور اور ایک زیرو کا پیلا بلب، ایک لمبی تار والی الیکٹرک لیڈ/ایکسٹینسن بکس۔ ٹیسٹر۔

[haroonmcs26]

**ہو سکتا ہے میں کچھ سامان لکھنا بھو ل بھی گیا ہوں بہر حال جو ذہن میں آیا لکھ دیا ویسے میرا خیال ہے تقریبا سارا ہو گیا ہے۔ ویسے بھی تھوڑا سا سامان ہے۔ **

[haroonmcs26]

@awtkhan, @asifcae, @rizwan_mir, @wanderlust, @usmanshafqat, @nishat12, @gull_s_777, @Majid_Hussain, @sulaiman75 @musafir1

[haroonmcs26]

نو بجے روانگی کا ارادہ تھا لیکن سب کاموں کو نمٹاتے نمٹاتے دیر ہوگئی۔ کچھ رقم بطور صدقہ دی۔ یہاں سب دوستوں سے میں یہ ضرور گزارش کروں گا کہ جب بھی کسی ایسے لمبے سفر پر جائیں تو کچھ نہ کچھ رقم صدقہ ضرور کر دیا کریں۔ کیونکہ صدقہ مصیبت کے خلاف ڈھال کا کام کرتا ہے۔ بہرحال 2 بجکر 43 منٹ پر گھر سے روانگی ہوئی۔ میٹر ریڈنگ 52593۔ بہت دیر ہو گئی تھی۔ ثانی کا اسلام آباد سے بار بار فون آ رہا تھا کہ اب نکل بھی آؤ تم لوگوں نے تو بہت دیر کر دی ہے۔ گھر والوں نے شامی کباب بنا کر ساتھ رکھ دیئے تھے۔ سب کی دعائیں لیکر اور اللہ کا نام لیکر روانہ ہوئے۔ روانگی کے وقت لی گئی ایک تصویر،

[haroonmcs26]

اوپر دی گئی تصویر میں دائیں طرف میرا آفس کولیگ عنصر اور بائیں طرف میں۔ ویسے آپ 2016 کے ٹور کی نسبت میرا گیٹ اپ تبدیل دیکھ رہے ہوں گے۔ شکر ہے کہ اللہ نے سنت رسول رکھنے کی توفیق دی۔ اور درمیان میں میری پہاڑی علاقوں کی سواری میری بلیو آئیز ویگن آر۔جس نے میرے شوق کو پورا کرنے میں میرا بہت ساتھ دیا۔ ویلڈن مائی بلیو آئیز۔

[muhammad-noman]

nice thread bro...
waiting for more...!

[usmanqadeer.education]

ما شا اللہ ہارون بھائی آپ کے سفر نامے کا میں خاموش قاری رہا ہوں. میں گزشتہ سات سال سے ان علاقوں کا سفر کر رہا ہوں لیکن آپ کا انداز بیان انتہائی منفرد ہے اور انسان بیٹھے بٹھائے ان علاقوں کے سحر میں گرفتار ہو جاتا ہے. گزشتہ سال بھی اگست میں جب میں گیا تو آپ لے بیان کیے گئے واقعات میرے ذہن میں گردش کرتے رہے. اس سال عید کے فوراً بعد بھی ہمارا ہنزہ و خنجراب کا خوشگوار تجربہ رہا جہاں چھپ شرو کھاتے ہوے آپ کا تجربہ ذہن میں گھومتا رہا.

مزید روداد کا بے صبری سے انتظار ہے

[shado_007]

MA SHA ALLAH very impressive Haroon Bhai... me along with my 4 friends are following your same plan, we will leave from lahore on 16 August morning

[hameed777]

A.O.A.BROTHER-E-AZIZ
AFTER READING THREAD NO.26 I SMILED AND LAUGH VERY MUCH BUT MEANTIME I AM ALSO APPRECIATED REALLY VERY MUCH OF YOUR EFFORTS FOR A ''THANKS LESS JOB'' ''KASH KA MAIN BHI AAP KA SATH SATH HOOTA'' ANYWAY KEEP ITS UP THIS PRACTICE ALLAH TALA SUBHANO AAP KO HIMAT OR HOSLA DAIN..Ameen.
WITH BEST REGARDS/Abdul Hameed