جولائی 2017 اور گلگت بلتستان

[haroonmcs26]

ثانی اور عنصر کے کچھ اور انداز۔

[haroonmcs26]

واپسی کا سفر۔

[haroonmcs26]

کیوائی چشمہ آبشار پر کافی وقت گزار کر اور دوبارہ ترو تازہ ہو کر ہم واپس سڑک پر آ گئے ۔ وہاں سے ہم نے بیس روپے کے حساب سے چار تازہ انجیر کے پتوں سے بنے ہوئے کون نما پیکٹ لیے ۔ اور انکو کھاتے ہوئے واپس گاڑی کے پاس آ ئے۔ سلف مارا اور روانہ ۔چشمے کے پاس گزارا ہوا وقت خوشگوار یاد کی صورت میں ساتھ رہے گا۔

[haroonmcs26]

اچھا دوستو اب اجازت دو۔ آج روئیداد سفر کو کافی وقت دے دیا ۔ اب تھک گیا ہوں اور صبح قربانی بھی کرنی ہے۔ انشاء اللہ پھر جلد ہی مزید روئیداد کے ساتھ حاضر ہوں گا۔ اللہ حافظ۔

[haroonmcs26]

عید الاضحی بہت بہت مبارک ہو۔

[hasibsaied3]

خیر مبارک

[drnuman1]

السلام علیکم اپ کو بھی بہت بہت عید مبارک اللہ اپ کو ہمیشہ اپنی امان میں رکھے امین

[haroonmcs26]

کچھ آگے گئے تو ہمیں سڑک کنارے ایک حادثے کا شکار کار نظر آئی۔اسکی حالت بہت ہی زیادہ خراب تھی اللہ تعالٰی رحم کرے ورنہ اسکی حالت ایسی نہیں تھی کہ کوئی مسافر اسکے اندر رہ کر بچ گیا ہو۔ اللہ سے استغفار اور رحم و کرم کی دعا پڑھتے ہوئے چلتے گئے چند کلومیٹر کے فاصلے کے بعد ہم ایسی جگہ پہنچ گئے جہاں لوگوں کا کافی رش تھا اور ریسکیو 1122 کا واٹر ریسکیور ٹرک بھی کھڑا تھا۔ گاڑی کو ایک طرف کھڑی کرنے کے بعد جب ہم پتا کرنے گئے تو پتہ چلا کہ چند دن پہلے یہاں ایک سیاحوں کی کار بے قابو ہو کر سڑک سے کم از کم سو فٹ کی گہرائی میں بہتے دریائے کنہار میں گری تھی جس میں پانچ مسافر بھی تھے۔ نہ تو مسافروں کا سراغ ملا نہ ہی گاڑی کا ۔ مسافروں کا تعلق ضلع نارووال، پنجاب سے بتایا گیا۔ ابھی بھی نیچے دریا کے کنارے ریسکیو 1122 کے کچھ جوان کھڑے تھے اور کنارے پر ایک ربڑ کی کشتی بھی تھی۔ استفسارپر پتا چلا کہ ریسکیو والوں نے گاڑی کا سراغ لگانے کی کوشش کی لیکن دریا کی بے پناہ طاقت کے سامنے انکی پیش نہ گئی۔ ہمیں بھی اندازہ ہو رہا تھاکہ ایسے تند وتیز پانی میں کشتی ڈالنا اپنی موت کو دعوت دینے کے برابر ہے۔ مزید پتا چلا کہ فوج اور فلاح انسانیت فاؤنڈیشن کی ٹیمیں بھی آئیں لیکن تاحال گاڑی اور لاشوں کو ڈھونڈا نہ جا سکا۔ ظاہر ہے کہ اتنے دن بعد تو زندگی کی امید نہ ہونے کے برابر تھی۔ کسی نے سچ کہا ہے کہ جس شخص کی موت جہاں لکھی ہوتی ہے وہ وہاں پہنچ جاتا ہے۔ اللہ تعالٰی متوفین کی بخشش کرے اور سوگواران کو صبر جمیل عطا کرے۔ اسوقت تو مجھے پتا نہ چلا لیکن بعد میں پتا چلا کہ یہ گاڑی میرے دفتر کے ایک کولیگ امین کے گھر والوں کی تھی۔ امین اور اسکی فیملی کے افراد دو گاڑیوں میں ناران اور کاغان کی سیر کیلئے آئے۔ اگلی گاڑی میں امین کے دو بھائی، بہنوئی اور بھانجے تھے جبکہ پچھلی گاڑی میں امین گھر کے دیگر افراد کے ساتھ تھا۔ امین کے مطابق اگلی گاڑی کے بریک فیل ہو گئے ۔ پہلے وہ پہاڑ کی طرف گئی لیکن وہاں سے گاڑی کو سنبھالا گیا تو سامنے ایک ٹرک آ گیا گاڑی اسکے نیچے گھسنے لگی تو پھر گاڑی کا رخ دریا کی طرف ہو گیا اور تقریبا 100 فٹ کی بلندی سے گاڑی دریا میں جا گری۔ جب گاڑی دریا میں گری تو پتا نہیں کیسے اس میں سے اسکا ایک بھانجا باہر گر گیا اور کچھ آگے دریا کے کنارے لگ گیا اور زخمی حالت میں بچا لیا گیا۔ جسے اللہ رکھے اسے کون چکھے۔ جب ہم وہاں تھے تو اسوقت تک باقی افراد کا کچھ پتا نہیں چلا تھا۔ لیکن جب میں واپس آ کر امین سے ملا تو پتا چلا کہ حادثے کے 8 دن بعد ایک لاش ملی اور 9 دن بعد دوسری وہ بھی کافی آگے جا کر بیسیاں کے پاس۔ لیکن ابھی تک گاڑی اور 2 افرا د کا کچھ پتا نہ چلا تھا۔ ابھی کچھ دن پہلے میری اس سے بات ہوئی تو پتا چلا کہ ایک لاش اور مل گئی ہے ا ور گاڑی بھی مل گئی ہے لیکن ابھی بھی ایک فرد کی لاش نہ مل سکی ہے۔یہ سب قدرت کے فیصلے ہیں کہ اچانک زندگی کا رخ موڑ دیتے ہیں۔ یقینا امین اور اسکے خاندان کیلئے تو یہ سفر موت کا سفر بن گیا تھا جو انکی خوشیو ں کو کھا گیا تھا۔ ہم انکے کیلئے دعا ہی کر سکتے ہیں کہ اللہ تعالٰی انکی مغفرت کرے اور انکو جنت الفردوس میں اعلٰی مقام عطا کرے۔ آمین۔

[haroonmcs26]

کچھ دیر حادثے والی جگہ پر رکنے کے بعد آگے روانہ ہوگئے عصر کی نماز کا وقت ہو گیا تھا اور ہم نے ابھی ظہر بھی اد ا نہ کی تھی۔ راستے میں ایک مسجد دیکھ کر رک گئے۔ مسجد سڑک کے دائیں طرف دریا والی سمت تھی جبکہ سڑک کے دوسری طرف کچھ بلندی پر وضو خانہ اور واش روم تھے۔ واش روم سے فارغ ہو کر وضو کیا ۔ پانی ٹھنڈا تھا لیکن اسوقت خوشگوار لگ رہا تھا۔ جماعت کا بھی وقت ہو گیا تھا۔ جماعت کے ساتھ عصر کی نماز پڑھی ۔ امام صاحب کی رفتار بہت ہی زیادہ تیز تھی ہم بمشکل ہی انکا ساتھ دے پا رہے تھے۔ جماعت سے فارغ ہونے کے بعد ہم نے ظہر کی نماز بھی وہاں ادا کی۔ ثانی نے واش روم کے ساتھ غسل خانہ دیکھ کر غسل بھی کر لیا تھا۔ مسجد سے باہر آئے تو دیکھا کہ سامنے اوپر تقریبا آٹھ دس فٹ کی بلندی پر واش رومز بنے ہوئے تھے اور انکے نیچے دیوار پر سڑک کی جانب ایک آیت اور ایک حدیث لکھی ہوئیں تھیں۔ یاسر نے اس سلسلے میں امام صاحب سے بات کی تو انھوں نے کہا کہ ہم نے ایک مفتی صاحب سے پوچھا تھا اس بارے میں اس میں کوئی حرج نہیں ۔ کیونکہ واش روم بلندی پر ہیں۔ واللہ اعلم۔

[musafir1]

**مشتاق یوسفی لکھتے ہیں
آوارگی اور مونگ پھلی دونوں میں یہ خرابی ہے کہ ایک بار جب شروع کی جائے تو سمجھ نہیں آتا کہ ختم کیسے کی جائے

آپ کے سفر ناموں کی بھی یہی خصوصیت ہے۔ ایک بار جو پڑھنے بیٹھتا ہوں تو مزے لیتے ہوئے وقت گزرنے کا احساس ہی نہیں ہوتا
آپ کی جیسی ڈسپلنڈ اور محتاط پلاننگ میری بھی ہے
کیا ہی لطف آئے کہ کبھی ہم ساتھ سفر کریں۔
کراچی کے قیام کی دعوت کی پیشکش ابھی بھی ادھار ہے
بہت عمدہ اور تفصیلی سفر نامہ ہے**

[qasmi66]

Allah sab ko apni Hifz o Amaan main rakhay, ameen.

[haroonmcs26]

بہت بہت شکریہ آفتاب بھائی۔ مشتاق یوسفی صاحب نے بالکل درست فرمایا ہے ۔ آوارگی بھی ایک نشہ ہے۔ انشاء اللہ جب بھی کراچی کا سفر کیا آپ سے ملاقات بھی ضرور ہو گی۔ اور اللہ نے چاہا تو کبھی نہ کبھی ہم سفر بھی بن جائیں گے۔ حوصلہ افزائی کیلئے تہہ دل سے شکر گزار ہوں۔

[haroonmcs26]

آمین۔

[Atif_Jawaid]

لیکن اتنی بھی تیزی نہیں دکھانی کہ اپنی بجائے کسی اور کی چیز ہی اٹھا لائیں مال غنیمت سمجھ کر

ha ha ha ha ha ha.... bilkul theek kaha ap ne @haroonmcs26 bhai ..

[shoaib.civil87]

Maza a gaya

[haroonmcs26]

شکریہ جناب۔

[haroonmcs26]

گزشتہ سال کی نسبت ایک بات میں دیکھ رہا تھا کہ سڑکیں بہت بہتر ہو گئیں ہیں۔ کئی جگہوں پر نئی تعمیرات ہوئیں ہیں اور کچھ جگہوں پر ہو رہیں ہیں۔ ہمیں کئی جگہوں پر ایف ڈبلیو او والے کام کرتے نظر آئے۔ کئی پرانے پلوں کی جگہ نئے پلوں نے لے لی تھی۔ کئی جگہیں پر تعمیرات کا سامان جیسے سریا، مشینری وغیرہ نظر آ رہی تھی۔

[haroonmcs26]

کاغان کی طرف جاتے ہوئے راستے میں ایک مقام آتا ہے جہاں دو پل ساتھ ساتھ بنے ہوئے ہیں ۔ جس میں سے ایک پل تو لوہے کا ہے جبکہ دوسرا رسوں کے ساتھ بنا ہوا روایتی پل ہے جس پر لکڑی کے تختے استعمال کیے گئے ہیں۔ میرے نزدیک کچھ وقت گزارنے کیلئے ایک بہتر جگہ ہے۔ وہیں پر اگر آپ کا دل کرے تو ٹراؤٹ مچھلی بھی کھا سکتے ہیں وہ بھی بالکل دریا کے پاس رکھی ہوئیں کرسیوں اور میز پر ۔ ہم نے وہاں کچھ وقت گزارنے کا سوچا۔ گاڑی کو سڑک کی بائیں طرف روک دیا۔ اب سڑک کے کنارے ایک ہوٹل کی عمارت تعمیر ہو رہی تھی گزشتہ سال یہاں کوئی عمارت نہیں تھی۔ علاقے میں دھڑا دھڑ تعمیرات ہو رہیں تھیں ۔ جس میں ایک چیز کا مجھے افسوس ہو رہا تھا کہ راستے کی کئی جگہیں جو کہ خوبصورت ہیں اور وہاں کچھ وقت گزارنے کو دل کرتا ہے اب وہ جگہیں وہاں بننے والے ہوٹلز گھیرتے جا رہے ہیں اور ان جگہوں کی خوبصورتی انکے پیچھے چھپتی جا رہی ہے۔ اس سلسلے میں انتظامیہ کو کوئی قدم اٹھانا چاہیئے ۔ کچھ ایسا ہی مری سے نتھیا گلی کی طرف جانے والی سڑک کا ہوا۔ جہاں تقریبا ہر خوبصورت موڑ اور جگہ کو تعمیرات اور ڈھابے نما ہوٹلز نے گھیر لیا ہے۔ بہرحال گاڑی کو پارک کرنے کے بعد ایک کولڈ ڈرنک کی بوتل نکالی اور سڑک سے کچھ نیچے اتر کے دریا کے قریب آ گئے۔ دریا کا جھاگ اڑاتا بہاؤ بہت خوبصورت تاثر پیش کر رہا تھا۔ وہاں پانی میں پاؤں ڈال کر بیٹھنے کا اپنی ہی مزہ تھا۔ لیکن پانی اتنا ٹھنڈا تھا کہ چند لمحوں کے بعد آپ کو پاؤں باہر نکالنے پر مجبور کر دیتا ۔ لیکن ایک بات کا خیال ضرور رکھیں جہاں پہاڑی دریا اپنی خوبصورتی کے لحاظ سے بے مثال ہوتا ہے وہاں بہت خطرناک اور ظالم بھی ہوتا ہے۔ اگر ایک بار اسمیں کوئی گر جائے تو پھر بچنے کے امکانات نہ ہونے کے برابر ہو جاتے ہیں۔ اسلئے دریا کے تیز رفتار دھارے سے مناسب فاصلہ رکھیں اور خاص طور پر تصاویر لیتے وقت خاص خیال رکھیں۔ ہر سال کئی سیاح شوخی شوخی میں دریا کی بے رحم موجوں کی نظر ہو جاتے ہیں۔ فیملیز کیلئے تو بہتر ہے کہ پانی سے فاصلے پر ہی رہا جائے ۔ اس جگہ پر چٹانوں پر کئی جگہ ہدایات لکھی ہوئیں تھیں کہ دریا کے پاس نہ جائیں کیونکہ اس جگہ پر کئی لوگ اپنی جانیں گنوا بیٹھے ہیں۔ویسے اگر آپ چاہیں تو اس مقام پر پتھروں پر بیٹھ کر اور دریا کی قربت میں ٹراؤٹ مچھلی بھی تناول فرما سکتے ہیں۔ لیکن دام 2000 فی کلو کے حساب۔ دریا میں ڈھابے والوں نے کولڈ ڈرنکس کے کریٹس اور منرل واٹر کی بوتلیں رکھیں ہوئیں تھیں اور دریا کا ٹھنڈا پانی انکے لئے فریج کا کام کر رہا تھا۔ ہم نے بھی اپنے ساتھ لائی ہوئی بوتل کو پانی میں ایک مناسب جگہ پر رکھدیا جہاں سے وہ بہہ نہ جائے۔ جب تک وہ ٹھنڈی نہ ہوئی ہم دریا اور گردو پیش کا نظارہ کرتے رہے اور تصاویر بھی اتارتے رہے۔

[haroonmcs26]

دریا جھاگ اڑاتا ہوا نشیب کی طرف بہتا چلا جا رہا تھا۔ سامنے دریا کے اوپر بنے ہوئے دونوں پل۔ رسوں والے پل کے اوپر کھڑے ہو کر اوپر سے بھی دریا کا نظارہ کیا جا سکتا تھا۔

[haroonmcs26]

دریا کے تیز بہاؤ کے کچھ مناظر۔