کشمیر جنت نظیر، جولائی 2019۔ روئیداد سفر۔ تحریر ہارون الرشید

[haroonmcs26]

دربار کے سامنے ہی ایک مسجد موجود تھی جس کے قریب ہی واش روم بھی موجود تھے لیکن جب میں نے ان کو استعمال کیا تو دیکھا ان میں صفائی کا انتظام انتہائی نا قص تھا۔

[haroonmcs26]

پیر چناسی ٹاپ کا رقبہ جس پر گھوما جا سکتا تھا وہ بہت زیادہ نہیں تھا البتہ دربار کی ایک سائیڈ پر بیٹھنے کی جگہ موجود تھی جہاں کیمپنگ بھی کی جا سکتی تھی۔ ہمیں اصل مزہ یہاں کے راستے پر بائیک کی سواری میں آیا ۔ دربار کے احاطہ کے باہر ایک ملنگ اور چند اور مقامی لوگ کچھ جڑی بوٹیاں بھی بیچ رہے تھے۔ اس ملنگ کے مطابق ان میں سے ایک چھوٹے چھوٹے پتوں والی بوٹی کے قہوہ کو معدہ کے امراض جیسے جلن، تیزابیت وغیرہ کیلئے استعمال کیا جاتا ہے، لمبے لمبے پتوں کو شوگر کے علاج کیلئے اور ان کی دھونی سے نظر بد کا علاج کیا جاتا ہے، ایک لکڑی نما بوٹی جو مجھے کسی پودے کی جڑ لگی اسے معدہ کے زخموں کے علاج کیلئے استعمال کیا جاتا ہے جس کا نام اس ملنگ نے بڈ پیوا زخم حیات بتایا، ان سے کچھ کم موٹائی والی لکڑی کو کشمیری چائے میں استعمال کیا جاتا ہے، ایک اور پودے کی جڑ تھی جس کا نام وہ بمبارڈ پتا رہا تھا اس سے جگر مثانہ کی گرمی کا علاج کیا جاتا تھا اور یہ سب سے مہنگی تھی بقول اس کے یہ دور سے آتی ہے ۔ میں نے بھی پچاس پچاس روپے کی تین بوٹیاں خریدیں جن میں ایک تو معدہ کی تیزابیت والا قہوہ، دوسری معدہ کے زخم اور تیسری شوگر کیلئے استعمال ہوتی تھی۔ بادل تیزی سے گھر کر آ رہے تھے اس لئے ہم نے مناسب سمجھا کہ موسم کے خراب ہونے سے پہلے یہاں سے واپسی کا سفر شروع کردیں ۔تقریباً ڈیڑھ بجے ہم واپس مظفر آباد کی طرف روانہ ہو گئے ۔ اس سے پہلے میں نے بائیک کا ایئر فلٹر دوبارہ لگا دیا کیونکہ واپسی کا سفر زیادہ تر اترائی والا تھا اور میرے خیال میں اب اس کو ہٹانے کی ضرورت نہیں تھی۔

[haroonmcs26]

پیر چناسی ٹاپ کا پینو رامک نظارہ۔

[haroonmcs26]

پنج پیر راکس ٹاپ پر بائیک رائیڈنگ اور ٹاپ کی تفصیلات۔ سیاحتی مقامات کی معلومات کیلئے چینل کو سبسکرائب کریں اور بیل آئیکون بھی دبائیں۔

[haroonmcs26]

پنج پیر راکس کے راستے میں ایک خوبصورت آبشار

[naheedmir]

Hi Haroon,
Really awesome view and beautiful waterfall.
Keep exploring Pakistan with vive spirit.

All the best,

[haroonmcs26]

بہت شکریہ ناہید میر صاحبہ۔ میرے جیسے لوگ مستنصر حسین تارڑ کی قبیل سے تعلق رکھتے ہیں۔ جب ہم روزمرّہ زندگی کی یکسانیت اور گھن چکر سے تنگ آ جاتے ہیں تو ہمارے جسم میں ایک بے چینی کی کیفیت پیدا ہو جاتی ہے اور اس کی تسکین قدرت کے ان حسین مناظر کو دیکھنے اور ان کے ساتھ وقت گزارنے سے ہوتی ہے اس لئے ہم جیسے آوارہ گرد ان ویرانوں کا رخ کرتے ہیں جن کی خامشی پر تقریر بھی فدا کی جا سکتی ہے۔

[naheedmir]

@haroonmcs26,
It seems as you have a high literary taste and love for nature. I am a great admirer of Mustansar Hussain Tararr. Nature has a healing effect. We must spend our leisure time in the company of nature as it is best to soothe our stressed nerves and make us capable to face the new challenges of life with new zeal and zest.

Have blessed times,

[haroonmcs26]

آپ نے درست فرمایا۔

[haroonmcs26]

پیر چناسی ٹاپ کے راستے کی صورتحال اور ٹاپ کی تفصیلات ویڈیو کی صورت میں۔ اگلی قسط کیلئے چینل کو سبسکرائب کریں، شکریہ

[haroonmcs26]

واپسی کا سفر کافی تیز تھا۔ اترائی والا راستہ تھا اور بائیک کا زور بھی بہت کم لگ رہا تھا لیکن اس کی رفتار کو کنٹرول کرنے کیلئے اسے چھوٹے گیئرز میں چلانا پڑ رہا تھا ۔ تقریباً آدھے راستے میں ایک جگہ ہم رکے تاکہ بریکس کوبھی آرام مل جائے ۔ مظفر آباد سے چند کلومیٹر پہلے ایک مسجد کے آگے بریک لگائی۔ موسم خراب تھا اور بہت ہلکی سی بارش ہو رہی تھی اسلئے ہم نے بائیک کو پیراشوٹ کور سے ڈھانپا اور مسجد میں نماز کی ادائیگی کیلئے داخل ہو گئے۔ جب ہم نماز ادا کر رہے تھے تو تیز بارش شروع ہو گئی ۔ بارش کی وجہ سے ہمیں کچھ دیر مسجد میں رکنا پڑا اور جب بارش رکی تو دوبارہ مظفر آباد کی طرف رواں دواں ہو گئے۔ راستے میں ہمیں ڈی جی خان سے آنے والا تقریباً بیس بائیکرز کا ایک گروپ بھی ملا اور ان میں سے چند کے ساتھ ہلکی پھلکی گپ شپ بھی ہوئی۔ مظفر آباد واپس پہنچ کر بازار میں موجود حافظ فوڈز کے سامنے بریک لگائی۔ ابھی کھانے کا وقت نہیں ہوا تھا اس لئے سوچا کہ کچھ ہلکا پھلکا کھا لیا جائے تو ایک ایک سموسے کا آرڈر دیا ۔ ویسے تو سموسہ بیس روپے کا ایک تھا لیکن اگر سموسہ چاٹ کا آرڈر ہو تو قیمت بڑھ جاتی ہے۔ حافظ فوڈز کا سٹنگ ایریا بیسمنٹ میں تھا اور صاف ستھرا تھا ۔ کھانے کا معیار بھی اچھا تھا۔ جب ہم بائیک پر بیٹھ کر روانہ ہونے والے تھے تو ایک بھکارن ہمارے پاس آئی۔ اس وقت میرے پاس کوئی چھوٹا نوٹ نہیں تھا صرف ایک پانچ روپے کا سکہ تھا۔ جب میں نے اس کے کٹورے میں وہ سکہ ڈالا تو وہ میری طرف غصے سے دیکھنے لگی ۔ اس سے پہلے کہ وہ کچھ کہتی ہم آگے روانہ ہو گئے۔ ساڑھے چار کا وقت ہو گا جب ہم مظفر آباد سے وادی نیلم کی طرف روانہ ہوئے۔مقامی افراد سے راستہ پوچھ کر ہم نے سفر کا آغاز کیا اور راستے میں بھی کئی افراد سے تصدیق کرتے رہے کہ ہم درست راستہ پر ہیں۔ مظفر آباد مرکزی شہر سے کچھ آگے ایک مقامی آبادی آئی جہاں سڑک کی صورتحال کافی ابتر تھی گڑھے اور پانی کی وجہ سے بہت آہستہ آہستہ بائیک چلانا پڑ رہی تھی لیکن جلد ہی سڑک کی صورتحال بہتر ہوگئی۔ ایک جگہ سے دریا کا پل عبور کر کے دوسرے کنارے پر آئے جہاں سبزی منڈ ی بھی لگی ہوئی تھی اور اسکے بعد ہمارا سفر دریا کے ساتھ ساتھ تھا۔ ایک جگہ شہر سے کچھ باہر نکل کر دریا کا نظارہ کرنے کیلئے رک گئے۔ دریا کا پانی اچھل اچھل کر بہہ رہا تھا جیسے وہ چھوٹی سی جگہ پر قید ہونے پر مشتعل ہو ۔جب آبادی کو پیچھے چھوڑا تو ٹریفک بھی کم ہو گئی اور سفر کی رفتار بھی بہتر ہو گئی۔ اب ایک طرف دریا اور دوسری طرف پہاڑ تھا ۔ کبھی سڑک کچھ بلندی کی طرف جاتی اور کبھی نشیب کی طرف ۔ ایک جگہ تو سڑک سیدھی کافی طویل مسلسل نشیب کی طرف جا رہی تھی اور میں سوچ رہا تھا کہ اب تو ہم اترائی کی طرف جا رہے ہیں واپسی پر یہی اترائی ایک مشکل چڑھائی ثابت ہو گی۔ کئی جگہ اطراف سے کچھ پہاڑی نالے دریا میں شامل ہو رہے تھے جن کے اوپر کنکریٹ یا لوہے کے پل بنے ہوئے تھے۔ ہلکی پھلکی بوندا باندی بھی شروع ہو گئی تھی لیکن اتنی نہیں تھی کہ بھیگ جاتے۔ ایک جگہ رک کر سامان کو پولیتھین سے کور کر لیا جبکہ برساتی وغیرہ ہم نے شولڈر بیگ میں رکھی ہوئی تھی جس کو ضرورت کے وقت فوری استعمال میں لایا جا سکتا تھا۔ لیکن جلد ہی بارش بند ہو گئی لیکن پتا کچھ نہیں تھا کہ کب دوبارہ شروع ہو جائے کیونکہ آسمان پر بہت گہرے بادل چھائے ہوئے تھے۔ ایک جگہ پانچ بجے کے بعد رک کر بائیک کو بھی تھوڑا ریسٹ دیا اور خو د بھی کیا ۔ مسلسل بائیک کا سفر انسان پر اثر انداز ضرور ہوتا ہے خاص طو ر پر بائیک پر بیٹھنا اور پتھر کے تو ہم بھی نہیں بنے ہوئے تھے اس لئے ریسٹ کرنا بھی ضرور ی تھا۔ کل کی بارش کی وجہ سے میرے شوز مکمل بھیگ گئے تھے ۔ میں نے انھیں بائیک کے سیفٹی راڈ کے ساتھ لٹکایا ہوا تھا تاکہ وہ سوکھ جائیں اور میں نے چائینہ کی واٹر پروف سینڈل پہنی ہوئی تھی ۔

[haroonmcs26]

دریائے نیلم کا شمار پاکستان کے خوبصورت ترین دریاؤں میں ہوتا ہے اور ہم اسی خوبصورت دریا کے ساتھ محو سفر تھے لیکن جہاں پہاڑی دریا کی خوبصورتی کی مثال دی جاتی ہے وہاں یہ کبھی کبھی کسی زہریلے سانپ کا روپ بھی اختیار کر لیتا ہے جو خوبصورت ہونے کے ساتھ ساتھ انتہائی خطرنا ک بھی ہوتا ہے اور اگر انسان لا پرواہی کا مظاہرہ کرے اور احتیاط کا دامن ہاتھ سے چھوڑ دے تو پھر اس جیسا سفاک بھی کوئی نہیں ۔جس کا اندازہ ہمیں کچھ آگے جا کر ہو بھی گیا۔ پنجگراں سے کچھ پہلے ایک موڑ اور پل کے پاس کافی رش تھا ۔ استفسار پر پتا چلا کہ کوئی کیری ڈبہ دریائے نیلم میں گر گیا تھا ۔ مقامی افراد کے مطابق دو لاشیں اب تک نکالی جا چکی تھیں اور ایک زخمی بھی تھا جسے میں نے خود بھی دیکھا جس کو لوگ ہسپتال پہنچانے کا انتظام کر رہے تھے ۔ باقی افراد کا کچھ پتا نہیں لگ رہا تھا۔پہاڑی دریا میں لاشیں بھی مشکل سے ہی ملتی ہیں یہ میدانی علاقوں کے دریاؤں جیسا نہیں ہوتا ۔ دوران سفر ایسے واقعات ایک سیّاح پر اثر انداز ہوتے ہیں اور وقتی طور پر اسکے دل و دماغ میں ایسے خیالات پیدا کر دیتے ہیں کہ میں گھر سے اتنی دور کیا کر رہا ہوں اگر مجھے کچھ ہو گیا تو کیا میرے گھر والوں کو میری کوئی خبر بھی ملے گی یا نہیں اور انسان کے دل میں مایوسی اور اداسی جیسی کیفیات جنم لیتی ہیں لیکن جلد ہی ان خیالات کے خلاف انسان کا دل و دماغ مزاحمت بھی شروع کر دیتا ہے کہ موت تو کہیں بھی آ سکتی ہے اور جہاں لکھی ہے اسے بھی کوئی ٹال نہیں سکتا اور جلد ہی آوارہ گرد اس کشمکش سے باہر نکل آتا ہے اور جو کچھ کمزور دل کے ہوتے ہیں وہ واپسی کے بارے میں سوچنے لگ جاتے ہیں۔ خوبصورت مگر بے رحم دریائے نیلم کی ایک تصویر۔

[haroonmcs26]

کچھ دیر وہاں رک کر ہم دوبارہ آگے روانہ ہو گئے۔ قدرت نے انسان کو ایسا بنایا ہے کہ کچھ وقت گزرنے کے بعد وہ غم و اداسی کی کیفیت سے باہر آ جاتا ہے اور ہم بھی دوبارہ راستے کی خوبصورتی میں کھو گئے ۔ مقامی لوگوں نے دریا کے کنارے جہاں انھیں مٹی والا قطعہ زمین ملا وہاں فصلیں کاشت کی ہوئی تھیں جو کہ ایک سر سبز و خوبصورت سیڑھی کے زینوں کی طرف نظر آ رہی تھیں اور ان کا نظارہ آنکھوں کو تراوٹ بخش رہا تھا ۔

[haroonmcs26]

سوا چھ بجے ہم پنجگراں پہنچ گئے جو کہ نیلم روڈ پر ایک چھوٹا سا قصبہ ہے۔ رات قریب تھی اس لئے ہم نے سوچا کہ بجائے آگے جانے کے یہیں رات گزاری جائے ۔ بازار سے گزرتے ہوئے ہم نے کیمپ لگانے کیلئے ایک جگہ کا انتخاب بھی کر لیا جو کہ ایک زیر تعمیر خالی دوکان تھی۔ کیمپنگ ٹور کے دوران میرا یہی طریقہ کار ہو تا ہے کہ پہلے جس علاقے میں کیمپ لگانا ہو وہاں ایک راؤنڈ لگا کر جگہ کا انتخاب کر لو اور پھر کسی ہوٹل میں کھانا کھا کر رات ہونے کا انتظار کرو اور جیسے ہی دوکانیں بند ہوں کیمپ لگاؤ اور سو جاؤ۔بازار کے اختتام پر ایک پمپ پر جا کر ہم نے بریک لگائی وہیں ایک طرف بائیک کو کھڑا کر دیا ۔ اتنے میں بارش شروع ہو گئی۔ ہم نے جلدی جلدی سامان اور بائیک کو کور کیا اور فوراً پٹرول پمپ کے سامنے ہی موجود براڈوے ہوٹل کی طرف دوڑ لگا دی ۔ اب بارش بہت زیادہ تیزی کے ساتھ ہو رہی تھی اور میں شکر کر رہا تھا کہ ہم پہلے ہی رک گئے ورنہ اگر دوران سفر اتنی تیز بارش مل جاتی تو ہم ایک بار پھر بھیگ جاتے ۔ ہوٹل میں بیٹھ کر کھانے کا پوچھا تو ہوٹل والوں نے بتایا کہ کھانا تیار ہے لیکن تازہ روٹیاں کچھ دیر بعد ملیں گی۔ ہمیں بھی کوئی جلدی نہیں تھی بلکہ ہم تو وہاں بیٹھ کر وقت بھی گزارنا چاہتے تھے اسلئے کھڑکی کے پاس ہی کرسیوں پر براجمان ہو گئے۔ وہاں مقامی لوگوں کی زبان سے ایک اور افسوسناک واقعہ کی خبر ملی کہ آگے ایک مقامی گاؤں لسنہ میں آسمانی بجلی کی وجہ سے گہرا بادل پھٹ پڑا اور اس کا پانی ایک مقامی نالہ میں گرا جس سے اس نالے میں شدید طغیانی پیدا ہو ئی اور اس نے گاؤں کو اپنی لپیٹ میں لے لیا جس سے اب تک کی اطلاعات کے مطابق تقریباً چالیس افراد لقمہ اجل بن چکے تھے اور کچھ کا پتا نہیں چل رہا تھا ۔ ان شہید افراد میں تقریباً بارہ افراد تبلیغی جماعت کے بھی تھے جنھوں نے اسی گاؤں کی ایک مسجد میں قیام کیا ہوا تھا اور یہ مسجد اسی نالے کے کنارے پر آباد تھی۔ اب مجھے خیالوں میں وہ بادل نظر آیا جس کا نظارہ میں نے پیر چناسی ٹاپ سے کیا تھا اور جو مجھے ایک ٹھوس دیوار کی طرح نظر آ رہا تھا اور اس جیسا ٹھوس بادل اس سے پہلے میں نے نہیں دیکھا تھا اور بدنصیب گاؤں اس بادل کا شکار ہو گیا۔ یہ واقعہ کچھ ایسا تھا کہ جیسے آپ ایک بالٹی سے آہستہ آہستہ ایک گلاس میں پانی ڈال رہے ہوں اور آپ اچانک ہی پوری بالٹی اس گلاس پر انڈیل دیں تو پانی اس گلاس سے نکل کر اردگرد رکھی چیزوں کو خراب کر دیتا ہے اور یہی اس بادل کے پانی نے کیا تھا اور آسمانی بجلی کی وجہ سے بادل نے اپنا سارا پانی ایکدم اس نالے میں چھوڑ دیا جو اس گاؤں کی تباہی کا باعث بن گیا ۔تقریباً سات بجے ہم نے کھانا کھایا ۔ ڈیڑھ سو روپے کی دال اور قیمہ مکس کروایا ستر روپے کی سات روٹیاں جو کہ پنجاب کی روٹیوں جیسی ہی پتلی تھیں۔ بعد میں ہم نے پچاس روپے کی دو چائے بھی پی۔ اسی دوران اسی ہوٹل میں وزیر اعظم آزاد کشمیر کی بھی آمد ہوئی جنھوں نے اپنے سٹاف کے ساتھ اوپر کی منزل پر بیٹھ کر کھانا کھایا اور اس دوران ہوٹل کے عملے کی دوڑیں لگی رہیں ۔ وزیر اعظم صاحب اسی بد قسمت گاؤں کا دورہ کرکے آئے تھے اور اب واپس مظفر آباد جا رہے تھے۔لوگوں کے مطابق آگے راستہ بند تھا اور پتا نہیں کہ کب کھلے۔ کچھ نے تو ہمیں کہا کہ آپ لوگ واپس چلے جاؤ ۔ واپسی کا خیال ہی مجھے اداس کر رہا تھا کہ اتنی دور آ کر واپسی کا سفر آسان نہیں کیونکہ اس ٹور کے بارے میں میں نے پورا سال سوچا تھا اور منصوبہ بندی کی تھی ۔ پھر سوچا کہ رات تو گزاری جائے صبح ہو گی تو پھر ہی فیصلہ کریں گے۔ جب وزیر اعظم چلے گئے تو ہم اوپر والی منزل پر جا کر واش روم سے فارغ ہو ئے اور وضو کرنے کے بعد اپنی بائیک کو لیکر کچھ پیچھے اس بازار میں اسی زیر تعمیر خالی دوکان کے پاس پہنچ گئے جس کو ہم نے اپنا کیمپ لگانے کیلئے منتخب کیا تھا ۔ جلدی جلدی کیمپ لگا کر سامان کو اس کے اندر منتقل کیا اور بائیک کو بالکل اس دوکان کے ساتھ لگا کر لاک کیا اور اس پر پیرا شوٹ کور ڈال کر ٹینٹ میں گھس گئے ۔ وہیں نماز ادا کرنے کے بعد نیند کی وادیوں میں کھو گئے لیکن سوتے سوتے بھی واپسی کا خیال سوہان روح بنا ہوا تھا۔ ہمارے کیمپ اور کیمپ سائٹ کی ایک تصویر۔

[naheedmir]

Hi there,
You have mentioned each and every moment of your tour. Nice briefing of your cool journey. When one reads about the details of your tours, one is encouraged to visit the hilly areas on bikes with one's own camping system.
Your planning is all good.

Wish you all the best for future trips.

[haroonmcs26]

میرا روئیداد سفر لکھنے کا مقصد ہی یہ ہے کہ نئے سیاحوں کو ان علاقوں کے بارے میں معلومات دے سکوں اس وجہ سے میری کوشش ہوتی ہے کہ باریک سے باریک تفصیلات بھی تحریر کروں جیسے راستے کی صورتحال، کھانے کا ریٹ وغیرہ۔اس سے پہلے میں اپنی گاڑی اور پبلک ٹرانسپورٹ پر بھی سفر کر چکا ہوں اور ان کے کئی سفر نامے پاک وہیلز پر موجود بھی ہیں۔ اب بائیک پر میں اپنے سفر کے دوران ان علاقوں کو شامل کرتا ہوں جہاں کار نہیں جاتی اور صرف فور بائی فور وہیکلز ہی جا سکتی ہیں۔ اس سفر میں بھی میں نے کئی ایسی جگہوں کا دورہ کیا۔جو لوگ تحریری صورت میں روئیداد سفر پڑھنا چاہتے ہیں ان کیلئے میں سفر نامے لکھتا ہوں اور ویڈیو کو پسند کرنے والوں کیلئے اپنے یو ٹیوب چینل پر ویڈیوز اپ لوڈ کر دیتا ہوں۔ بہت شکریہ۔

[haroonmcs26]

سولہ جولائی 2019ء ۔

صبح کی نماز کیمپ میں ہی ادا کی اور پھر دوبارہ سو گئے اور سکون سے اٹھے۔ سامان پیک کرکے قریب ہی موجود ایک مسجد سے اچھی طرح منہ ہاتھ دھوئے اوربالوں داڑھی کو شیمپو کیا اور وہیں نماز چاشت ادا کی۔ اسکے بعد ہم اسی ہوٹل میں آ گئے جہاں سے رات کا کھانا کھایا تھا ۔ ناشتہ میں چائے کے ساتھ تین پراٹھے تناول کیے اور کل بل بنا 125 روپے۔ ہوٹل میں اسی بد نصیب گاؤں کا قصّہ چھڑا ہوا تھا ۔ آگے راستے کے بند ہونے کے متعلق لوگوں کی مختلف رائے تھی۔ اس لئے ہم نے فیصلہ کیا کہ آگے چلا جائے پھر جو بھی صورتحال ہو گی اس کے مطابق فیصلہ کریں گے۔

[haroonmcs26]

تقریباً دس بجے ہم پنجگراں سے آگے روانہ ہوئے ۔ پنجگراں کے پٹرول پمپ سے دو سو کا پٹرول میں نے پہلے ہی ڈلوا لیا تھا ۔ میں ٹینک کو مکمل فل نہیں کروا رہا تھا اور اس میں لٹر ڈیڑھ لٹر کی گنجائش رکھ رہا تھا تاکہ اونچے نیچے راستوں پر پٹرول چھلکے نہ۔ کل کی نسبت آ ج موسم بہت کھلا ہوا تھا ۔ کہیں بادل اور کہیں دھوپ ۔ رات کی نیند کے بعد ہم ترو تازہ تھے اور راستے کی خوبصورتی سے لطف اندوز ہو رہے تھے اور کبھی کبھی کوئی حمدیہ یا نعتیہ کلام پڑھنا شروع کر دیتے۔ سڑک کی حالت بہترین تھی اور کوئی مشکل چڑھائی یا اترائی بھی نہیں تھی لیکن رفتار دوسرے تیسرے گئیر والی تھی۔

Uploading...

[haroonmcs26]

اس طرح چہکتے ، گنگناتے ہوئے ہم دھانی آبشار پر پہنچ گئے۔ یہ آبشار پنجگراں سے تقریباً تین کلومیٹر آگے مین روڈ کے ساتھ ہی ہے۔ آبشار ہو اور آوارہ گرد نہ رکے یہ تو ممکن ہی نہیں تھا ۔ ہم نے بھی اپنی بائیک کو سڑک سے اتار کر دائیں طرف ایک نسبتاً ہموار جگہ پر پارک کیا۔ بائیک کے مکمل لوڈ ہونے کی وجہ سے ہم اسکو کسی ہموار جگہ ہی پارک کرتے تھے تاکہ وہ گر نہ جائے۔

[haroonmcs26]

مظفر آباد سے دھانی آبشار تک کی ویڈیو کہانی۔