کشمیر جنت نظیر، جولائی 2019۔ روئیداد سفر۔ تحریر ہارون الرشید

[haroonmcs26]

اگر آپ مہنگی جیپ ہائر نہیں کرنا چاہتے اور بائیک کی سخت رائیڈ بھی نہیں کرنا چاہتے تو جانئے کہ آپ کیسے رتی گلی جھیل تک پہنچ سکتے ہیں اور وہ بھی کم سے کم آخراجات میں۔

[haroonmcs26]

کشمیری بھائیوں سے اظہار یکجہتی کیلئے پانچ فروری 2021ء کو میر پور گئے۔جس کی ویڈیو کہانی یہ ہے۔

[haroonmcs26]

راجکماری منگلا دیوی کے قدیم قلعے کا دورہ۔ اس کے دورے کیلئے سرکاری اجازت کی ٖضرورت ہے۔

دیکھیے اس قلعہ کی تفصیلات اس ویڈیو میں۔ چینل کو سبسکرائب ٖضرور کریں۔

[haroonmcs26]

الحمدللہ، میری نئی ہمسفر "جیسی" ۔

[nagar1]

Mubarak ho haroon bhai .. Umeed ha nae hamsafar k sath boht se sfrname tehreer krenge ....

[gemini]

Congratulations on your new purchase. Model and Make? 125 CC? May you have many a safe adventures on this bike.

[haroonmcs26]

بہت شکریہ حسن بھائی۔ ان شاء اللہ

[haroonmcs26]

شکریہ۔ سوزوکی جی ایس ۔ایس ای 150 سی سی ۔ ماڈل 2021

[nomee2004]

Mashallah Bhai app ky safar ki dastan bohat he amazing hai iam alos biker and do many bikes tours Allah app ko mazeed kamyabi dy

bohat he acha or detail sy likha hai pictures bohat he aalaw han baqi pictures or detail kb shar karen karen

[haroonmcs26]

حوصلہ افزائی کیلئے آپ کا شکر گزار ہوں۔ جزاکم اللہ خیرا۔ ان شاء اللہ باقی کا سفر نامہ بھی جلد ہی مکمل کر دوں گا۔

[nomee2004]

ary nahi Bhai kyoin sharminda karty han hume bs app jasy bikers ki waja sy hume hosly mily bohat sy tours karny ky

[haroonmcs26]

نعمان بھائی چاہے کوئی نیا سیاح ہو یا پرانا حوصلہ افزائی اس کے لئے تازہ ہوا کے جھونکے کی طرح ہوتی ہے جو اس کو نئے سفروں، ان کو تحریر کرنے یا ان کا وی لاگ بنائے پر مزید اکساتی ہیں۔ اس لئے آپ کے الفاظ میرے لئے اہیمیت رکھتے ہیں۔

[haroonmcs26]

ویسے تو بائیک کی ٹینکی میں فیول کافی تھا لیکن پھر بھی میں نے دواریاں سے مزید دو لٹر پٹرول ڈلوایا جو ہمیں ایک سو تیس روپے فی لٹر کے حساب سے پڑا۔ جب گیلن میں سے پٹرول ڈلوایا جاتا ہے تو ریٹ بھی پمپ سے کچھ زیادہ ہی ہوتا ہے لیکن اٹھمقام کے بعد پٹرول پمپ نظر نہیں آتے۔ دواریاں سے چند کلومیٹر آگے جا کر سڑک کے کنارے ایک مسجد دیکھ کر نماز ادا کی اور دوبارہ آگے چل پڑے ۔ کیونکہ ہمارا ارادہ اندھیرا ہونے سے پہلے شاردہ پہنچنے کا تھا اس لئے ہم قیام نہیں کر رہے تھے۔ دواریاں کے بعد تو سڑک کافی بہتر تھی لیکن جیسے جیسے ہم شاردہ کے قریب آتے جا رہے تھے تو سڑک کی حالت خراب ہوتی جا رہی تھی ۔ کچھ حصے تو بالکل آف روڈ کا منظر پیش کر رہے تھے لیکن اتنا نہیں کہ ہماری بائیک کو کوئی مشکل پیش آ ئی ہو۔ کچھ چشموں کو بھی پار کر نا پڑا جو سڑک سے گزر کر دریا کا حصہ بن رہے تھے۔ جب ہم خواجہ سر ی سے گزر رہے تھے جو کہ ایک چھوٹا قصبہ ہے تو اس وقت سورج کی کرنیں پہاڑوں سے آخری ملاقات کر رہیں تھیں اور اس آخری ملاقات نے جو منظر تخلیق کیا تھا اس نے ہمارے قدم روک لئے۔ دور برفپوش چوٹیوں پر جب سورج کی آخری کرنیں پڑ رہیں تھیں تو برفپوش چوٹیاں سونے کی بنی ہوئی لگ رہیں تھیں اور ایسے لگ رہا تھا جیسے ان کے اوپر کسی نے انگارے دہکا دیئے ہوں۔

[haroonmcs26]

راستے میں ہلکی ہلکی بوندیں پڑنا شروع ہوئی تو ہم نے سامان کو پالیتھین شیٹ سے کور کیا لیکن رکنے کی بجائے سفر جاری رکھا کیونکہ بوندیں ابھی بہت ہلکی تھیں کچھ دیر بعد وہ بھی ختم ہو گئیں۔اندھیرا ہوتے ہوتے ہم شاردہ پہنچ گئے۔ حسب معمول کہیں رکنے سے پہلے ہم نے شاردہ بازار کا ایک چکر لگا یا اور ایک زیر تعمیر ہوٹل کو کیمپ لگانے کیلئے منتخب کر لیا۔ اس کے بعد شاردہ کے بازار سے کچھ آگے شاردہ کے مشہور لکڑی اور لوہے سے بنے پل کو پار کیا اور دوسری طرف آ گئے جہاں شاردہ کی آبادی اور دریا کنارے کافی کھلی جگہ تھی جس کو عام طور پر کیمپنگ سائٹ کیلئے استعمال کیا جاتا ہے۔ شاردہ کا وہ مشہور پل اونٹ کی کوہان کی طرح درمیان سے اونچا اور دونوں اطراف سے نیچا تھا لیکن مضبوط تھا کیونکہ اس کے اوپر سے گاڑیاں بھی گزر رہیں تھیں۔ پل کو پار کرنے کے بعد اس سے دائیں طرف مڑ گئے اور کچھ ہوٹلوں کے پاس سے گزرنے کے بعد ہم دریا کے کنارے پر واقع کھلی جگہ پر آگئے جو کہ کیمپنگ سائٹ تھی۔ کچھ دیر وہاں رک کر اس کا جائزہ لیا لیکن پھر ہمیں کیمپنگ کیلئے وہ زیر تعمیر ہوٹل زیادہ بہتر لگا جس کا ہم پہلے ہی انتخاب کر چکے تھے ۔ اندھیرا چھا رہا تھا اس وجہ سے ہم کچھ دیر بعد وہاں سے پھر اسی پل کے ذریعے واپس شاردہ بازار میں آ گئے۔ اس کے بعد ہم ایک ہوٹل میں آ گئے جس کا نام میرے خیال سے گوجرانوالہ ہوٹل اینڈ ریسٹورنٹ تھا ۔ وہاں کچھ دیر بیٹھنے کے بعد ہم نے سیخ تکہ کا آرڈر دیا۔ جب سیخ تکہ اور روٹی ہمارے سامنے آ گئی تو ہم انتظار کرنے لگے کہ رائتہ یا چٹنی آ جائے تو کھانا شروع کریں لیکن جب کوئی ہل جل نظر نہ آئی تو ہوٹل والے سے پوچھا کہ چٹنی کہاں ہے تو وہ ہمیں حیرت سے دیکھنے لگا ۔ پتا چلا کہ یہاں تکہ بوٹی کے ساتھ رائتہ کا کوئی سین نہیں ہوتا۔ جب ہم نے کہا کہ بھائی ہم خشک تکہ بوٹی کے ساتھ روٹیوں کو کیسے کھائیں گے تو وہ وہاں سے تھوڑی سے دہی نکال کر لایا لیکن وہ فری نہیں بلکہ ہمیں پچاس روپے میں پڑی۔ کھانے کے بعد چائے پی ۔ کل بل دو سو ساٹھ روپے بنا۔ اتنی دیر میں عشاء کی نماز کا وقت ہو گیا اور قریب ہی موجود مسجد سے اذان کی آواز سن کر بائیک کو ہوٹل کے سامنے ہی پارک چھوڑ کر مسجد میں چلے گئے۔ مسجد کے وضو خانہ اور واش روم جانے کیلئے کچھ نیچے اترنا پڑا ۔ وہاں سے فارغ ہو کر مسجد میں نماز ادا کی اور دوبارہ اپنی بائیک کے پاس آ گئے۔اب بازار میں چہل پہل کم ہو گئی تھی اس لئے ہم نے بھی بائیک کو کک لگائی اور بازار کے آغاز میں ہی اس زیر تعمیر ہوٹل میں آ گئے جو کافی بڑا تھا ۔ میٹر ریڈنگ 24096۔ ٹینٹ ایستادہ کرنے کے بعد سامان کو اندر رکھنے اور بستر وغیرہ سیٹ کرنے کا معاملہ آیا تو طلحہ اسی طرح اپنے روایتی سست انداز میں کام کرنے لگا ۔ میں نے اسے کہا کہ تم باہر آؤ اور سامان مجھے پکڑاؤ۔ ٹینٹ میں جا کر وہی سامان جو وہ آدھے گھنٹے میں سیٹ کرتا تھا وہ میں نے چند منٹ میں ہی سیٹ کر دیا ورنہ مجھے آدھا گھنٹہ باہر کھڑا رہ کر انتظار کر نا پڑتا کہ کب طلحہ اوکے کا سگنل دے اور میں اپنے بستر کی گرمائی میں لیٹوں۔ جب ایسی جگہ کیمپ لگاتے ہیں تو ہر لمحہ یہ بھی دھڑکا لگا رہتا ہے کہ کوئی آ کر منع نہ کر دے لیکن ہم نے اس زیر تعمیر ہوٹل کے بالکل آخر میں دریا کی طرف والے ہال میں کیمپ لگا یا تھا اس وجہ سے ہمارے نظر آنے کا چانس ذرا کم تھا ۔ بائیک کو بھی ہم نے ٹینٹ کے قریب ہی کھڑا کر دیا تھا اور اس کے بعد اپنے اپنے بستروں میں گھس گئے۔ طلحہ تو فوراً ہی سو گیا جب کہ مجھے نیند نہیں آ رہی تھی کچھ دیر بعد جب میں نیم غنودگی کی حالت میں تھا تو دو افراد وہاں آ گئے اور وہ ٹینٹ کو دیکھ کر تبادلہ خیال کرنے لگ گئے شاید وہ اس زیر تعمیر ہوٹل کے مالکان وغیرہ تھے وہ ٹارچ جلا کر دیکھنے لگے لیکن میں نے کوئی حرکت نہ کہ کی کہ دیکھیں کیا کرتے ہیں۔ بس یہ خطرہ تھا کہ کہیں نادر شاہی حکم جاری نہ کر دیں کہ فوراً اپنا بوریا بستر گول کرو لیکن انھوں نے دیکھا کہ سیاّح ہیں اور سو رہے ہیں تو وہ واپس چلے گئے۔ مجھے نیند نہیں آ رہی تھی عجیب سے بے چینی تھی ۔ موبائل نکال کر کچھ دیر قرآن پاک کی تلاوت کی اور پھر اللہ کا ذکر کرتے کرتے میں بھی نیند کی وادی میں کھو گیا۔

[haroonmcs26]

انیس جولائی 2019ء (نوواں دن)

صبح نماز ادا کرنے کے بعد پیکنگ کی اور قریب ہی موجود ایک حمام میں گرم پانی سے غسل کرکے ترو تازہ ہو گئے ۔ طلحہ نے وہاں سے کٹنگ بھی کروائی۔ غسل کے پچاس روپے کے حساب سے سو روپے ادا کیے۔ اس کے بعد رات والے ہوٹل میں جا کر ناشتہ کا آرڈر دیا جو کہ چائے اور پراٹھوں پر مشتمل تھا ۔ ناشتہ کیلئے ہم نے ہوٹل کی پچھلی جانب اوپن ایئر جگہ کو منتخب کیا جہاں گہرائی میں بہتے ہوئے دریائے نیلم ،اس کے پار کیمپنگ سائٹ اور شاردہ کی آبادی کا نظارہ کیا جا سکتا تھا۔ دھوپ بھی خوب نکلی ہوئی تھی اور ہم خوبصورت نظارے کے ساتھ دھوپ بھی سینک رہے تھے۔دریا کے درمیان میں ایک جزیرہ نما جگہ بھی بنی ہوئی تھی اور دریا اس کے دونوں اطراف میں بہہ رہا تھا ۔

[haroonmcs26]

ناشتہ کا بل جو کہ 150 روپے بنا تھا ادا کرکے ہم شاردہ سے آگے وادی کیل کی طرف روانہ ہو گئے۔ کیل جانے کیلئے شاردہ کے پل پر جانے کی بجائے سیدھا دریا کے ساتھ جاتی ہوئی سڑک پر سفر کرنا پڑتا ہے۔ آگے ہمارے سامنے پہاڑی بکریوں کا ایک ریوڑ آ گیا جس میں بڑے قد آور ، لمبے سینگوں اور لمبے بالوں والے جانور تھے۔ کچھ دیر ان کے گزرنے کا انتظار کیا اور پھر دوبارہ چل پڑے۔ خوبصورت دریائے نیلم کے ساتھ صبح کے سفر کا لطف آ رہا تھا ۔ وقت تقریباً ساڑھے آٹھ کا ہو رہا تھا۔

[haroonmcs26]

ابھی تک ہم دریا کے بائیں کنارے کے ساتھ سفر کر رہے تھے لیکن کچھ فاصلہ طے کرنے کے بعد ایک پل کے ذریعے دریا کو عبور کیا اور پوسٹ پر اندراج کرانے کے بعد آگے روانہ ہو گئے ۔ کچھ دیر بعد ہم دوبارہ دریا کے ساتھ ساتھ سفر کر رہے تھے ۔ اب اردگرد کے نظاروں میں ایک ڈرامائی سی تبدیلی رونما ہو گئی تھی ۔ دریا کے دونوں اطراف جنگل زیادہ گھنا اور سبزہ بھی بہت زیادہ ہو گیا تھا اور ہمیں اس بات کی صداقت کا یقین آ گیا جو اکثر سیّاح کہتے ہیں کہ وادی نیلم کی اصل خوبصورتی شاردہ کے بعد ہے ۔ سڑک پر رش بھی نہیں تھا کبھی کبھار اکّا دکّا گاڑی یا موٹر سائیکل گزرتی ورنہ ہم تھے اور دل و دماغ کو پر سکون کرنے والے مناظر۔ جا بجا چشمے پہاڑوں کی بلندی سے اتر کا دریا سے مل رہے تھے۔

[haroonmcs26]

سڑک کنارے پتھروں پر بڑی بڑی چھپکلیاں بہت نظر آ رہیں تھیں جو دھوپ سینکنے میں مصروف تھی۔ جب کسی پتھر پر بیٹھنا ہو تو ان کی وجہ سے بہت دیکھ بھال کر بیٹھنا پڑتا تھا ۔ ان چھپکلیوں کو پنجاب میں کیڑو کا نام بھی دیا جاتا ہے ۔ ان کی تعداد کے پیش نظر ہم نے وادی کیل کو وادی کیڑو کا نام دے دیا۔ ہمارا سفر خوبصورت قدرتی نظاروں سے لطف اٹھاتے ہوئے جاری تھا کہ اچانک رنگ میں بھنگ پڑ گیا۔ تقریباً آدھے راستے میں میں نے محسوس کرنا شروع کیا جیسے بائیک پر میرا مکمل کنٹرول نہیں ہے ۔ میں بائیک کو دائیں لے جاتا تو بائیں جانے کی کوشش کرتی اور بائیں لے جاتا تو دائیں جانے کی کوشش کرتی۔ ایسے لگ رہا تھا جیسے بائیک کا اگلا اور پچھلا حصہ الگ الگ حرکت کر رہے ہوں۔ کچھ دور تک تو میں آف روڈ کو اس کی وجہ سمجھتا رہا لیکن جب یہ مسئلہ زیادہ ہی بڑھا تو میں نے بائیک کا روک کر معائنہ کیا لیکن مجھے کوئی چیز نظر نہ آئی جو میرے خیال میں مسئلہ پیدا کر رہی ہو۔ پھر میں نے سوچا شاید ہنڈل کے نٹ بولٹ یا شاک کا کوئی مسئلہ نہ ہو۔ ایک راہ گزر سے کسی مکینک کا پوچھا تو اس نے بتایا کہ مکینک تو کیل جا کر ہی ملے گا۔ ہم نے آہستہ آہستہ اپنا سفر جاری رکھا کہ اس کے سوا کوئی چارہ بھی نہیں تھا لیکن پریشانی بن گئی تھی کہ ہم تو آج ہی تاؤ بٹ جانے کا پروگرام بنا رہے تھے اور واپسی کا ہم نے نوری ٹاپ والے راستے سے سوچا تھا لیکن اب ہم صرف یہ سوچ رہے تھے کہ کسی طرح بائیک کا مسئلہ حل ہو جائے۔ اس پریشانی اور مشکل ڈرائیونگ جس میں بائیک کو ڈگمگانے سے کنٹرول کرنا پڑ رہا تھا ہمیں تصاویر اور ویڈیوز بنانے کا کہاں خیال رہنا تھا ۔ کوئی مشکل چڑھائی آتی تو میں پہلے ہی طلحہ کو اتار دیتا لیکن پھر بھی بائیک ڈگمگاتی ہوئی چل رہی تھی۔ کیل سے کچھ پہلے سیکورٹی چیک پوسٹ پر اندراج کرانے کے بعد کیل کے شروع میں ہی ایک موٹر بائیک مکینک کو دیکھ کر ہم رک گئے۔ وہ ابھی نیا نیا استا د لگ رہا تھا ۔ میں نے اسے مسئلہ بتایا تو پہلے اس نے ہینڈل کے نٹ بولٹ وغیرہ چیک کیے اور پھر شاک وغیرہ کو بھی دیکھا لیکن کسی چیز میں نقص نظر نہ آیا۔ جب وہ بیٹھ کر ہینڈل کے آس پاس دیکھ رہا تھا تو اس کی نظر ٹینکی کے نیچے چیسیز پر پڑی تو دیکھا کہ چیسیز کے نیچے والی پتری جو کہ اچھی خاصی چوڑی ہوتی ہے کریک ہو گئی ہے۔ یہ دیکھ کر میں پریشان ہو گیا کیونکہ میں تو کوئی نٹ بولٹ کا مسئلہ سمجھ رہا تھا ۔ مکینک نے کہا کہ میں آپ کو بائیک کی سیٹ اور ٹینکی کھول دیتا ہوں آپ بائیک کو آگے کیل اڈے میں لے جائیں وہاں ارشاد نام کا ایک ڈینٹر ہو گا وہی یہ کام کر سکتا ہے۔ ہمارے پاس کوئی اور چارہ نہیں تھا ۔ سارا سامان اتار کر مکینک کی دوکان پر رکھا اور سیٹ کھلوا ئی ۔ ٹینکی کے بولٹ کھلو ا لئے لیکن ٹینکی اسی طرح لگی رہنے دی تاکہ بائیک کو اسٹارٹ کرکے ہی آسانی سے لے جایا جا سکے کیونکہ آگے چڑھائی تھی اور میں پیدل ہی بائیک کو لے کر آگے چل پڑا۔ طلحہ مکینک کی دوکان پر ہی رک گیا۔ کیل کا مین چوک جہاں سے اڑنگ کیل کا بھی راستہ نکل رہا تھا اور جہاں جامع مسجد بھی تھی وہ اچھے خاصے فاصلے پر تھا ۔ اب میں سوچ رہا تھا کہ سیٹ وغیرہ نہ ہی کھلواتا تو اچھا تھا کم از کم اتنی ایکسر سائز تو نہ ہوتی اور آسانی سے بائیک پر بیٹھ کر آ جاتا لیکن اب تو جو ہونا تھا وہ ہو چکا تھا۔ مین چوک سے تھوڑا آگے بائیں طرف ایک گلی سے ایک کافی چوڑی جگہ پر آ گیا جہاں مختلف قسم کے مکینک ہی مکینک تھے اور کافی گاڑیاں بھی کھڑی تھیں۔ ارشاد ڈینٹر کا پوچھا تو وہ اس کی دوکان بائیں قطار میں تقریباً درمیان میں تھی۔ ارشاد ایک نو جوان ڈینٹر تھا ۔ اس نے بائیک کو چیک کیا اور پھر شکنجہ لے آیا تاکہ چیسیز کے نیچے والے دونوں حصوں کو ملا سکے۔ شکنجہ اچھا خاصا زور لگا تا ہے اور اس وجہ سے کوئی ایسی جگہ نہیں مل رہی تھی جہاں اس کو ایڈجسٹ کر سکے کیونکہ بائیک کے فٹ ریسٹ وغیرہ اتنی مضبوط جگہیں نہیں تھیں کہ شکنجہ کے زور کو برداشت کر سکیں۔ پھر اس نے کچھ زنجیروں کی مدد سے کسی نہ کسی طرح اس کو ایڈ جسٹ کر کے کافی تگ و دد کے بعد دونوں حصّوں کو ملا ہی دیا اور پھر اچھی طرح اس کو ویلڈنگ بھی کر دیا لیکن اس سارے عمل میں کوئی دو گھنٹے لگ گئے کیونکہ اس کو ساتھ ساتھ دوسرا کام بھی دیکھنا پڑ رہا تھا ۔ بہر حال اس کی مہربانی کہ اس نے کسی نہ کسی طرح وقت نکال کر بائیک کا کام کر دیا اور مزدوری بھی بہت مناسب لی جو کہ پانچ سو روپے تھی۔ میں نے اس کا شکریہ ادا کیا اور پھر اسی طرح پیدل ہی بائیک کو واپس مکینک کے پاس لے آیا۔ طلحہ وہاں بیٹھے بیٹھے مرجھا گیا تھا لیکن میں شکر کر رہا تھا کہ یہ مسئلہ ایسی جگہ پیش آیا جہاں مکینک میسر تھا ورنہ اگر تاؤ بٹ یا نوری ٹاپ کے راستے پر ہوتا تو پھر کیا بنتا۔جب ٹینکی اور سیٹ وغیرہ کو فٹ کر رہے تھے تو ایک اور مسئلہ سامنے آ گیا۔ ریس کی کیبل کی تار کاربو ریٹر کے پاس سے تقریباً ٹوٹنے والی تھی اور اس علاقے میں سوزوکی سپرنٹر کی کیبل تو ملنے سے رہی ۔ میں نے بائیک کے ساتھ لگے بکس سے کلچ والی تار نکالی کہ اس کو اس کی جگہ لگا دیں تو چیک کرنے پر پتا چلا کہ اس کی اوپر لیور میں لگنے والی مکھی کا سائز زیادہ بڑا تھا ۔ سامنے ایک دوکان سے ریتی مانگی اور کافی دیر رگڑ رگڑ کر مکھی کو چھوٹا کیا اور پھر کاربو ریٹر کے پاس جگاڑ لگاکر اسکو ایڈ جسٹ کیا اور اس کو بجلی کی تارکے اندر موجود کاپر وائرز کے ذریعے اچھی طرح باند ھ دیا۔ اب ہمیں دو مسئلوں کے ساتھ سفر کرنا تھا ایک وہ چیسیز کے نیچے والی پتری اور دوسرا ریس کی تار اور یہ چیز پریشانی پیدا کر رہی تھی کہ اب کیا ہو گا۔ مجھے اندازہ ہو گیا تھا کہ یہ سب مسئلے در اصل رتی گلی ٹریک کا انتقام تھا ۔ رتی گلی ٹریک بائیکرز کو کوئی نہ کوئی سزا دیتا ضرور ہے۔ مکینک کو دو سو روپے ادا کیے اور سامان کو دوبارہ بائیک پر لوڈ کیا۔ ہم گیارہ بجے سے پہلے کیل پہنچ گئے تھے لیکن اس ساری تگ و دد میں تقریباً تین گھنٹے سے زیادہ لگ گئے اور وقت دو کا ہو گیا تھا ۔ صبح جس جوش اور خوشی کے ساتھ ہم کیل کے سفر سے لطف اندوز ہو رہے تھے وہ تھکاوٹ اور پریشانی کی وجہ سے ماند پڑ گیا تھا ۔ یاد آیا کہ آج تو جمعہ ہے یہ سوچ کر جب جامع مسجد پہنچے تو پتا چلا کہ جمعہ تو ہاتھ سے نکل گیا ہے اور وہاں صرف یہی جامع مسجد تھی ۔بہر حال بائیک کو مسجد کے سامنے پارک کرکے ہم مسجد میں آئے اور نماز ادا کرنے میں مشغول ہو گئے۔

[haroonmcs26]

نماز سے فارغ ہوئے تو بارش شروع ہو گئی۔ بائیک کو پیرا شوٹ کور سے ڈھانپ کر دوبارہ مسجد میں آ کر بارش کے رکنے کا انتظار کرنے لگے۔ بارش بہت تیز ہو رہی تھی۔ اس مسجد میں کوہاٹ سے ایک تبلیغی جماعت بھی آئی ہوئی تھی۔ کچھ دیر بعد اس جماعت کے امیر صاحب اٹھ کر ہمارے پاس آ گیا ۔ ان سے کچھ ویسے گپ شپ ہوئی اور کچھ دین کے بارے میں بات چیت ہوئی۔ اتنی دیر میں تبلیغی جماعت والوں نے چائےتیار کی اور ہمیں بھی مدعو کر لیا۔ چائے مزیدار تھی جس نے ہمیں کافی حد تک پر سکون کر دیا۔ چائے کے دوران ان سے بات چیت چلتی رہی۔ ہمارا ارادہ تو تاؤ بٹ کا تھا لیکن وقت تقریباً چار بجے کا ہو گیا تھا اور اب یہ ممکن نہیں تھا۔ اس لئے ہم نے سوچا کہ آج اڑنگ کیل دیکھ کر واپس کیل میں شب بسری کرتے ہیں اور علی الصبح تاؤ بٹ کے لئے روانہ ہو جائیں گے۔ مسجد سے باہر نکل کر مسجد سے چند قدم آگے ایچ بی ایل بینک کی اے ٹی ایم پر آ گئے۔ پیسے ہمارے پاس کم رہ گئے تھے اور ہم اٹھمقام سے ہی اے ٹی ایم سے پیسے نکالنے کی کوشش کر رہے تھے لیکن ہر جگہ لنک ڈاؤن ہی ملا اور ایسا ہی کیل کی اے ٹی ایم مشین کے ساتھ بھی تھا۔ اس سے ایک نصیحت ہمیں ضرور مل گئی کہ جب کبھی دور دراز پہاڑی علاقوں کا سفر کرنا ہو کیش ضرور ساتھ رکھو جبکہ ہم نے سوچا تھا کہ جب مزید پیسوں کی ضرورت پڑے گی تو اے ٹی ایم سے نکلوا لیں گے۔ تقریباً چار بجے ہم اپنی بائیک کو مسجد کے سامنے ہی پارک کرکے پیدل ہی اڑنگ کیل کیلئے روانہ ہو گئے۔ تقریباً مسجد سے تھوڑا دائیں جا کر سامنے ہی مرکزی سڑک سے ایک سڑک کچھ گہرائی کی طرف جا رہی تھی۔ پہلے کچھ فاصلہ ہم نے گہرائی کی طرف طے کیا اور پھر چڑھائی شروع ہو گئی ۔ چڑھائی کے آخر میں ایک پارکنگ بھی موجود تھی اور کچھ نیچے گہرائی میں کھیل کا میدان بھی تھا ۔ اس چڑھائی سے کیل بازار کی طرف کا منظر:

[haroonmcs26]

چڑھائی کے بعد ہم کچھ آگے بائیں طرف جانے والے ایک کچے راستے کی طرف مڑ گئے جو گہرائی کی طرف اتر رہا تھا ۔ اب دریا ہمارے دائیں ہاتھ پر بہہ رہا تھا ۔کچھ ہی دیر میں ہم چیئر لفٹ کے پاس تھے جو لوگوں کو اڑنگ کیل کی طرف لے کر جاتی تھی۔ ہمیں یہاں تک پہنچے میں تقریباً بیس منٹ لگے تھے۔ چیئر لفٹ سے پہلے ایک چھوٹا سا سیکورٹی کا کیبن بنا ہوا تھا وہاں اپناشناختی کارڈ جمع کروایا پھر ہم نے سو روپے فی کس کے حساب سے چیئر لفٹ کی ٹکٹ خریدی اور وہاں رکھے بنچوں پر قطار میں بیٹھ کر اپنی باری کا انتظار کرنے لگے۔ ہم اپنی پانی کی بوتل بائیک پر ہی بھول آئے تھے اس وجہ سے چیئر لفٹ پوائنٹ کے ساتھ ہی موجود دوکان سے پانی کی بوتل خریدی۔ وہاں سے اڑنگ کیل کیلئے کرایہ پر لکڑی کی ہائیکنگ اسٹک بھی مل رہیں تھیں لیکن ہم نے اس کی ضرورت محسوس نہ کی لیکن اگر کسی کو چڑھائی میں کوئی مسئلہ ہو تو یہ ہائیکنگ اسٹک کافی فائدہ دیتی ہیں اور ہماری معلومات کے مطابق اڑنگ کیل والی طرف کچھ چڑھائی بھی تھی ۔ میں اس دوران میں اڑنگ کیل سمت والی پہاڑیوں کا مشاہدہ کرنے میں مصروف رہا جہاں پہاڑوں پر بادل تیر رہے تھے۔ کیل اور اڑنگ کیل کے درمیان دریا ئے نیلم بہہ رہا تھا اور آس پاس ہمیں کوئی پل بھی نظر نہیں تھا اس وجہ سے پار جانے کیلئے چیئر لفٹ کی ضرورت تھی۔ ایک مقامی شخص کے مطابق پل کافی آگے تھا اور اس طرف اچھا خاصا چکر پڑ جانا تھا۔