کشمیر جنت نظیر، جولائی 2019۔ روئیداد سفر۔ تحریر ہارون الرشید

[haroonmcs26]

کچھ دیر انتظار کرنے کے بعد بالآخر ہماری باری آ گئی اور دیسی ساختہ ڈولی نما لفٹ میں بیٹھ کر ہم دوسرے کنارے کی طرف چل پڑے۔ میں اور طلحہ لفٹ کے اگلی طرف بیٹھے تھے تاکہ سامنے کے مناظرکو اچھی طرح دیکھ سکیں۔ لفٹ کا سفر چند منٹ میں ختم ہو گیا اور ہم دوسری طرف کے پہاڑ کی تقریباً آدھی بلندی پر موجود چیئر لفٹ پوائنٹ پر پہنچ گئے۔ وہاں موجود شخص نے دروازہ کھولا اور ہم بائیں طرف جانے والی کنکریٹ کی پختہ روش پر چل پڑے۔ آگے کا سفر ہمیں پیدل ہی طے کرنا تھا ۔ کنکریٹ کا راستہ ابھی تھوڑا ہی تعمیر ہوا تھا اور مقامی لوگوں کے مطابق یہ گھوڑوں اور خچروں کیلئے تعمیر کیا جا رہا تھا ۔ کنکریٹ کے راستے کے بعد کچا پگڈنڈی نما راستہ شروع ہو گیا ۔ بارش کی وجہ سے راستے پر بہت زیادہ پھسلن تھی اور کیچڑ تھا ۔ راستے کے ساتھ ساتھ رسیاں بندھی ہوئیں تھیں جن کو پکڑ پکڑ کر لوگ چڑھ رہے تھے لیکن پھسلن اتنی زیادہ تھی کہ ہم نے کئی مر دو خواتین کو دیکھا جن کے کپٹروں پر کیچڑ لگی ہوئی تھی جو کہ پھسلن کی وجہ سے گرنے کا نتیجہ تھی۔ میرے اور طلحہ کے جوگرز اچھی گرپ والے تھے اس وجہ سے ہمیں پھسلن کی وجہ سے کوئی مسئلہ پیش نہیں آ رہا تھا ۔ حالانکہ کچھ دیر پہلے ہی بارش ہوئی تھی لیکن وہاں گھنے جنگل کی وجہ سے بہت حبس تھی اور کچھ دیر میں ہی جسم سے پسینہ پھوٹ پڑا اور ہمیں اپنی جیکٹس اتارنی پڑ گئی۔ دوسرا چڑھائی کافی زیادہ تھی جس کی وجہ سے سانس بھی پھول رہا تھا اس وجہ سے ہم کچھ دیر بعد رک کر سانس بحال کرتے اور پھر چلنا شروع کر دیتے۔ وہاں مقامی بچے ہر سیّاح کے پاس بار بار آ کر پوچھتے کہ ہم آپ کے سامان کو اوپر لے چلتے ہیں فاصلہ زیادہ ہے وغیرہ وغیرہ ۔ کچھ سیّاح ان کی خدمات معاوضہ کے بدلے حاصل کر لیتے اور ہمارے جیسے بجٹ ٹور کرنے والے کہہ دیتے کہ ہمیں کوئی ضرورت نہیں ۔ پیچھے مڑ کر دیکھیں تو جنگل میں سے کہیں کہیں سے کیل کی آبادی اور اس کی طرف کے پہاڑوں کی جھلک نظر آ جاتی۔

[haroonmcs26]

تقریباً بیس منٹ سے آدھے گھنٹے کی پیدل اور مشکل ہائیک کے بعد بالآخر ہم پہاڑ کی بلندی پر پہنچ گئے۔ اب گھنا جنگل بھی ختم ہو گیا تھا اور اس کی جگہ اکاّ دکّا درختوں نے لے لی تھی لیکن سر سبز گھاس ہر طرف نظر آ رہی تھی اور اس کے درمیان سے ایک پگڈنڈی آ گے کی طرف جارہی تھی۔

[haroonmcs26]

کیل سے یہاں تک ہمیں تقریباً ایک گھنٹہ لگ گیا تھا ۔ وہ پگڈنڈی آگے جا کر سیدھے اور دائیں دو حصوں میں تقسیم ہو رہی تھی ۔ ہمیں دائیں طرف کا منظر زیادہ پر کشش لگا اس وجہ سے ہم دائیں طرف مڑ گئے۔ سبزہ ہر طرف پھیلا ہوا تھا جس میں جا بجا بہت سے لکڑی کے بنے ہوئے گھر نظر آ رہے تھے اور وہ جگہ ایک چھوٹے پہاڑی گاؤں کا منظر پیش کر رہی تھی۔ پہلے یہاں پر یہ گھر بہت کم تھے اور اس علاقے کا قدرتی حسن بہت زیادہ تھے لیکن اب انسانی سر گرمیوں نے اس کو بھی متاثر کیا تھا ۔ ہم جس پگڈنڈی پر جا رہے تھے وہ گھروں کے پاس سے گزر کر آ گے جا رہی تھی ۔ بارش کی وجہ سے اس پر جا بجا کیچڑ اور پانی تھا اور ہم اس سے بچتے بچاتے آگے بڑھ رہے تھے ۔ ہماری سمت میں کوئی اور سیّاح نظر نہیں آ رہا تھا اور مقامی بھی اکّا دکّا نظر آ رہے تھے۔ شروع شروع میں مجھے اڑنگ کیل نے مایوس کیا تھا لیکن جیسے جیسے ہم آگے بڑھتے جار ہے تھے مقامی آبادی کم سے کم ہوتی جارہی تھی اور قدرتی حسن میں اضافہ ہوتا جا رہا تھا۔

[haroonmcs26]

وہاں ہمیں گاڑیاں بھی نظر آئیں جو اس بات کی دلیل تھی کہ یہاں آنے کا کوئی زمینی راستہ بھی ہے۔ کئی گھروں کے آس پاس لکڑی کی باڑ بھی نظر آ رہی تھی اور ہم کسی بھی ایسی ممنوعہ جگہ پر جانے سے گریز کر رہے تھے اور ان باڑوں کے پاس سے گزرتے کچے راستے پر گامزن تھے۔ اب ہم اڑنگ کیل کی خوبصورتی سے لطف اندوز ہو رہے تھے اور شروع کی مایوسی والا تاثر ایک خوش گوار احساس میں تبدیل ہو گیا تھا۔

[haroonmcs26]

اب مقامی مکانات تقریباً ختم ہو چکے تھے اور ہم جس حصے میں تھے لگتا تھا کہ اس طرف سّیاح بہت کم آتے تھے کیونکہ پگڈنڈی نما راستے بھی ختم ہو گئے تھے اور ان کی جگہ کافی بڑی گھاس نے لے لی تھی۔ تھوڑا سا آگے گئے تو اس بلندی سے نظر آنے والے منظر کی خوبصورتی نے بے اختیار سبحان اللّہ کہنے پر مجبور کر دیا ۔ اڑنگ کیل کی اصل خوبصورتی اب ہمارے سامنے آئی تھی۔ نیچے گہرائی میں ایک نالہ بہہ رہا تھا اور اس نالے کے پار ایک وسیع سبز قالین نما میدان تھا جس میں جا بجا درخت اور جنگل موجود تھا ۔ کمال کا منظر تھا جس کی خوبصورتی کو کیمرے کی آنکھ دکھانے سے قاصر تھی۔ بہت دیر مبہوت ہو کر میں اس منظر کو دیکھتا رہا اور سوچتا رہا کہ کاش ہمارا اتنا وقت کیل میں ضائع نہ ہوتا تو ہمارے پاس اس جگہ کی خوبصورتی کو دل میں اتارنے کیلئے کافی وقت ہوتا۔ اس سبزے کے میدان سے آگے پھر سر سبز پہاڑ و ں کی بلندیاں سر اٹھا رہی تھی جن میں کئی جگہ ہمیں چشمے اور برف بھی نظر آرہی تھی۔ اس میدان میں مقامی گھر بھی نہ ہونے کے برابر تھے اور اڑنگ کیل کا بے پناہ قدرتی حسن نظر آرہا تھا۔

[haroonmcs26]

کچھ دیر وہاں تصاویر اتارنے کے بعد ہم بائیں طرف چل رہے تھے کیونکہ آگے تو گہرائی تھی اور وہاں بجلی کی تاریں بھی کافی نیچے لگی ہوئیں تھیں۔ کچھ فاصلہ بائیں طے کرنے کے بعد دوبارہ سے مقامی آبادی اور ہوٹل نظر آنا شروع ہو گئے تھے۔ لیکن ان کی تعداد ابھی کم تھی اور اس سر سبز میدان میں وہ بھی خوبصورت لگ رہے تھے۔

[haroonmcs26]

ہم آہستہ آہستہ بائیں طرف نیچے کی طرف اترتے جا رہے تھے ۔ کئی گھر تو اس میدان میں اتنے خوبصورت نظر آرہے تھے جیسے وہ اس قدرتی حسن کا حصہ ہوں۔

[haroonmcs26]

ہم اب اس نالہ نما چشمے کے پاس پہنچ گئے تھے اور اس کے ساتھ ساتھ ہی بائیں طرف چل رہے تھے۔ اب ہم نے واپسی کا سفر شروع کر دیا تھا کیونکہ چیئر لفٹ کےاوقات کار ساڑھے چھ بجے تک تھے اور تب تک اس کے پاس پہنچنا ضروری تھا ۔ میرا دل تھوڑا اداس بھی تھا کہ کچھ اور وقت ہوتا تو اس نیچے والے میدان میں اتر کر کچھ وقت قدرتی مناظر کے ساتھ گزارتے جو مجھے کیمپنگ کیلئے ایک خوبصورت جگہ نظر آ رہی تھی۔ وقت کی کمی کے با وجود ہم نے واپسی کیلئے مختلف راستے کا انتخاب کیا تھا تاکہ اڑنگ کیل کو زیادہ سے زیادہ دیکھ سکیں۔ کچھ گہرائی میں اترنے کے بعد ہم دوبارہ بلندی کی طرف چڑھنا شروع ہو گئے جہاں بہت سے ہوٹل نظر آرہے تھے اور سیّاحوں کی بھی کافی تعداد موجود تھی۔ ہم جس طرف سے گئے تھے اس کی خوبصورتی کے آگے یہ جگہ کچھ بھی نہیں تھی ۔ ان میں سے بہت سے سیّاح تو انہیں ہوٹلوں کے آس پاس اپنا وقت گزار کر چلے جاتے ہوں گے حالانکہ اڑنگ کیل کی اصل خوبصورتی تو آگے تھے۔ ان سیّاحوں میں بہت سے تو یہاں رات گزارنے آئے تھے اور انھوں نے ہوٹل بھی بک کرائے ہوئے تھے جبکہ باقی نے آج ہی واپس لوٹنا تھا ۔ کئی جگہ پر کچھ سیّاح بار بی کیو میں مصروف تھے اور کچھ کرسیوں پر بیٹھے سکون فر ما رہے تھے۔ ہم ان کے پاس سے گزرتے ہوئے چیئر لفٹ کی طرف گہرائی میں میں اترتے چلے گئے۔

[haroonmcs26]

واپسی کا سفر تیز تھا اور ہم تقریباً وقت سے کچھ پہلے ہی چیئر لفٹ کے پاس پہنچ گئے اور لائن میں لگ گئے جہاں کچھ دیر انتظار کرنے کے بعد ہماری باری آ گئی اور ہم لفٹ میں بیٹھ کر دوسری طرف پہنچ گئے ۔ وہاں سیکورٹی کیبن سے اپنا شناختی کارڈ وصول کرنے کے بعد ہم کیل کی طرف روانہ ہو گئے ۔ راستے میں طلحہ نے ایک جیپ کے ساتھ تصویر اتروائی اور پھر ہم کھیل کے میدان کے پاس سے گزرتے ہوئے کیل کے مین بازار میں پہنچ گئے۔

[haroonmcs26]

کیل پہنچ کر ہم سیدھے اے ٹی ایم پر گئے لیکن وہاں دوبارہ مایوسی ہوئی۔ جب ہم اے ٹی ایم سے باہر نکلے تو ہمیں تبلیغی جماعت کا ایک ساتھی مل گیاپہلے تو اس نے ہمیں خشک میوہ جات پیش کئے جن میں سے ہم نے تھوڑے سے شکریہ کے ساتھ قبول کر لئے پھر اس نے کہا کہ اب آپ کا کیا پروگرام ہے ۔ میں نے کہا کہ ہمارا ارادہ کیل میں کہیں کیمپنگ کرنے کا ہے اور صبح تاؤ بٹ جائیں گے تو اس پر اس نے کہا کہ رات آپ لوگ ہمارے ساتھ قیام کریں ۔ ہمیں کیا اعتراض ہو سکتا تھا کیونکہ رات تو کہیں بھی گزر جانی تھی چلو ان کے ساتھ کچھ دین کی باتیں سیکھنے کا موقع مل جاتا اور نمازیں بھی با جماعت ادا ہو جاتیں۔ ہم ان کے ساتھ ہی مسجد میں آ گئے۔ نماز مغرب کے بعد کچھ دیر درس ہوا اور پھر ہم نے ان کے ساتھ ہی کھانا کھایا ۔ پھر سب لوگ ٹولیوں کی صورت میں بیٹھ کر دینی باتوں میں مشغول ہو گئے ۔ اسی طرح عشاء کی نماز کے بعد بھی کچھ دیر درس ہوا اور پھر انھوں نے ہمیں قہوہ اور خشک میوہ جات میں بھی شریک کیا۔ با اخلاق لوگ تھے اور ہمارے انکار کے باوجود انھوں نے اپنے کھانے پینے میں ہمیں شریک رکھا اور مہمانوں کی طرح ہمارا خیال رکھا۔ اس کے بعد سبھی لوگ سونے کیلئے لیٹ گئے ۔ ہم نے بھی اپنے سلیپنگ بیگز نکالے اور اپنے سرہانے کے قریب ہی موبائل چارجنگ پر لگا کر سو گئے۔ بائیک ہم نے پہلے ہی مسجد کے احاطہ کے اندر پارک کر دی تھی۔

[haroonmcs26]

شاردہ سے کیل اور اڑنگ کیل کے سفر کی ویڈیو داستان۔ برائے مہربانی میرے چینل کو سبسکرائب کریں اور بیل کے نشان کو بھی دبائیں تاکہ آنے والی تمام ویڈیوز آپ کو بر وقت مل سکیں۔ شکریہ۔

[nomee2004]

Mashallah Harron Bhai bohat he khoob...Keep it Up Main taqreeban 4 dafa Neelum Valley gya hon jis main sy TaoButt sirf aik dafa baqi kel or arrang kel tak he
Har dafa aik alag sa ehsas hota hai jany ka aik alag he maza hai hala ky 1 sy 2sri dafa main jagah logo ko bhati nahi hai per main jahan bhi 2sri ya 3 sri dafa gya usi jazby ky sath gya jasy pehli dafa jata hai insan

[haroonmcs26]

بہت شکریہ نعمان بھائی۔ اگر آپ کو فطرت سے محبت ہے تو وہاں جا کر آپ لطف اندوز ہی ہوں گے چاہے جتنی دفعہ بھی جائیں۔ حالانکہ میں ان علاقوں کو دیکھ چکا ہوں لیکن پھر بھی خواہش ہے کہ دوبارہ بھی دیکھوں کچھ اور زیادہ وقت وہاں گزاروں اڑنگ کیل کے پچھلے میدان میں کیمپنگ کروں

[nomee2004]

Bilkul theek kaha haroon bhai asal cheez insan ki fitri muhabat hai jo hamesha app ko un elaqon sy jory rakhti hai...
main 7/8 year sy tours kar raha ghar waly hamesha kehty ky wahan tu ja chuky ho dubara kyoin wahin jana tu mera jawab hamesha yehi hota hai ky muhabbat khench leti hai wahan ki ... Mera bhi dil bohat karta hai ky kuch zada waqt ho jo apni pasand deedah jagah per guzry per hum thehry nokri paisha log us waja sy pura pura waqt hota hai or chuti bhi puri puri

[haroonmcs26]

درست فرمایا آپ نے ہر فطرت کے دلدادہ کے گھر والے ایسے ہی کہتے ہیں جب وہ بار بار پہاڑوں کا رخ کرتا ہے۔ لیکن اپنے شوق کے ساتھ ساتھ اپنے خاندان کو بھی وقت دینا اور ان کے اخراجات کو پورا کرنا بھی ایک سعادت کی بات ہے ۔ اس وجہ سے ہمیں بہت سوچ سمجھ کر اور اپنے وقت کو بہت طریقے سے نکالنا پڑتا ہے۔ بعض اوقات تو کئی کئی ماہ پلاننگ کرو لیکن پھر کوئی نہ کوئی ایسی مجبوری ہو جاتی ہے کہ سب پلان چوپٹ ہو جاتا ہے۔ لیکن اس طرح جب بہت مشکل سے وقت نکلتا ہے تو پھر ہمیں اس وقت کی قدرو قیمت کا بھی احساس رہتا ہے اور ہم چاہتے کہ اپنے سفر سے زیادہ سے زیادہ لطف اندوز ہوں۔

[haroonmcs26]

بیس جولائی 2019ء (دسواں دن)۔

صبح تہجد کے وقت اٹھ کر نماز تہجد ادا کی اور بعد میں نماز فجر با جماعت پڑ ھ کر بیان سنا ۔ نماز اشراق ادا کرکے تبلیغی جماعت کے ساتھ ہی ناشتہ کیا اور پھر ساڑھے چھ بجے ان سے اجازت لیکر اور ان کی مہمان نوازی کا شکریہ ادا کرکے ہم نے بائیک پر سامان باندھا اور کیل سے آگے تاؤ بٹ کیلئے روانہ ہو گئے۔میڑ ریڈنگ 24120۔ اس کے لئے ہمیں سیدھا اسی سڑک پر آگے جانا پڑا۔ کچھ آگے جا کر ایک چوک آ گیا جہاں سے سیدھا راستہ تاؤ بٹ اور بائیں طرف والا راستہ شاؤنٹر وادی کیلئے نکلتا ہے۔ ہم تاؤ بٹ کی طرف چل پڑے۔ ابھی ہم کیل کی ہی آبادی میں سفر کر رہے تھے۔ آگے جا کر سڑک بہت ہی زیادہ ٹوٹ پھوٹ کا شکار تھی اور اوپر سے اترائی بھی بہت تھی لیکن یہ سو دو سو میٹر میٹر کا ٹکڑا تھا ۔ کیل کی آبادی کے آخر میں ایک سیکورٹی پوسٹ پر اندراج کروانے کے بعد ہم کیل کی آبادی سے باہر نکل آئے۔ اس وقت تک سڑک پر رش بالکل بھی نہیں تھا اور کیل کے آس پاس کے پہاڑوں پر دھند چھائی ہوئی تھی۔

[haroonmcs26]

جب تک ہمارا سفر کیل کی آبادی کے اندر تھا تو دریا سڑک کے ساتھ ساتھ نہیں تھا لیکن جیسے ہی ہم کیل کی آبادی سے باہر نکلے تو ہمارا سفر دوبارہ سے دریا کے ساتھ شروع ہو گیا۔ اس سے پہلے دریا کیل کی آبادی سے تھوڑا ہٹ کر کیل اور اڑنگ کیل کے درمیان سے بہہ رہا تھا ۔ دریا کے پاس ہم دوبارہ قدرت کے رنگوں میں کھو گئے۔ یہاں دریا کا پاٹ کافی چوڑا تھا اور اس کے اردگرد پہاڑوں پر سر سبز جنگل کا نظارہ مسحور کرنے والا تھا ۔ پہلے ہمیں شاردہ سے کیل تک کے سفر کی خوبصورتی اس سے پہلے کے سفر سے زیادہ لگی اور موجودہ منظر نے شاردہ سے کیل تک کے سفر کی خوبصورتی کو ماند کر دیا تھا۔

[haroonmcs26]

سات بجے کے قریب وقت تھا اور ہم پہلے دوسرے گیئر میں سکون سے راستے کی خوبصورتی سے لطف اندوز ہوتے ہوئے جارہے تھے۔ پہاڑوں کی بلندی پر بادل چھائے ہوئے تھے اور صبح کے وقت خنکی بھی تھی اس وجہ سے ہم نے جیکٹس پہنی ہوئیں تھیں۔ اس جگہ دریا بہت سکون سے بغیر شور کیے ہوئے بہہ رہا تھا اور یہ سکون ہر طرف پھیلا ہوا نظر آ رہا تھا۔ سورج کی کرنیں ابھی تک اس جگہ نہیں پڑیں تھیں جہاں ہم سفر کر رہے تھے اور سڑک پر ہلکے ہلکے اندھیرے کا سا احساس تھا۔

[haroonmcs26]

کچھ فاصلہ طے کرنے کے بعد ایک خطرناک قسم کی اترائی سے ہمارا سامنا ہوا ۔ اس کی نوعیت دیکھتےہوئے طلحہ اتر گیا اور میں بہت آرام سے بریکوں کا استعمال کرتےہوئے اترنے لگا ۔ اترائی کے فوراً بعد چڑھائی تھی جس کیلئے بائیک کو ایکسلریشن دینا پڑا اور پھر وہاں رک کر طلحہ کو بٹھایا اور چل پڑے۔ سڑک کچی تھی جس پر جا بجا پتھر بھی موجود تھے اور کئی جگہوں پر پانی کی وجہ سے کیچڑ بھی تھا۔ سات بجے کے بعد سورج نے پہاڑوں کے اوپر سے جھانکنا شروع کر دیا اور دریا اور اس کے گردو نواح کو روشن کر دیا۔ پہاڑوں پر طلوع آفتاب کا منظر بھی بہت دلکش تھا ۔ سورج کی ابتدائی کرنیں آسمان سے اترنے والے زینوں کی طرح نظر آ رہیں تھیں۔دریا کے بلوں کے ساتھ سڑک بھی بل کھاتی ہوئی جا رہی تھی جو چڑھائیوں اور اترائیوں سے بھر پور تھی۔

[haroonmcs26]

مچھل کے علاقے میں ہم نے سڑک سے کچھ بلندی پر سیکورٹی فورسز کے زیر انتظام خچروں کا ایک فارم دیکھا جس میں گھوڑوں سے زیادہ تگڑے خچر نظر آ رہے تھے ۔یہ فارم آبادی سے ہٹ کر تھا۔ وہاں رک کر ہم نے سڑک کے ساتھ رکھے ہوئے ڈرم سے پانی پیا اور ایک بوتل بھی بھر لی۔ پانی پی کر فرحت و تازگی کا احساس ہوا۔ وہاں ہماری ملاقات لاہور چونگی امر سدھو کے علاقے سے تعلق رکھنے والے ایک شخص سے ہوئی جو اس فارم پر کام کرتا تھا ۔ اپنے گھر سے دور جب انسان اپنے علاقے سے تعلق رکھنے والے کسی شخص سے ملتا تو ایک عجیب سی خوشی کا احساس ہوتا ہے ۔ اس خوشی کا احساس ہمیں بھی ہوا اور اس شخص کو بھی۔ شاید اس احساس کا تعلق اپنے علاقے کی مٹی سے جڑا ہوا تھا۔ ہم تو سیر و سیاحت کیلئے اتنی دور آئے تھے جبکہ وہ شخص روزی روٹی کے چکر میں یہاں تھا۔ چند منٹ اس سے گپ شپ ہوئی اور پھر ہم آگے روانہ ہو گئے۔