وادی کمراٹ، ایک ان کہی داستان، روئیداد سفر ستمبر 2019، تحریر ہارون الرشید

[haroonmcs26]

ہا ہا ہا۔وعلیکم السلام۔ ٹھنڈ تو واقعی بہت پڑ رہی ہے لاہور میں لیکن جناب اس وقت کمراٹ میں کیا حال ہو گا اس کا تو وہاں جا کر ہی تجربہ کرنا پڑے گا اور یقینا وہ تجربہ اس موسم میں خوشگوار شاید ہی ہو۔ ویسے میں تو اسی موسم میں فیملی کے ساتھ مری اور گلیات کا ٹور کر آیا ہوں۔ باقی جو آپ جیسے دوست حوصلہ افزائی کرتے ہیں اس سے لکھنے کی ہمت کر پاتے ہیں۔ جزاکم اللہ خیراً۔

[haroonmcs26]

[haroonmcs26]

[haroonmcs26]

وقت دیکھا تو ساڑھے گیارہ بج رہے تھے اس کا مطلب یہ تھا کہ ہمیں جہاز بانڈہ سے کٹورہ جھیل تک تقریباً ساڑھے تین گھنٹے لگے تھے۔ کچھ دیر بیٹھ کر ہم اپنی سانسیں بحال کرتے رہے اور ساتھ ہی جھیل کی خوبصورتی کا بھی نظارہ کرنے لگے۔

[haroonmcs26]

اور پھر چند قدم اتر کر جھیل سے تقریباً ایک منزل اوپر ایک جگہ پر آگئے جہاں بابر پہلے ہی بیٹھا ہوا تھا۔ شعیب بابر سے مذاق کرنے لگا کہ بھائی لگتا ہے تم کوئی جن ہو بڑا اسٹیمنا ہے تمھارا۔ وہاں بیٹھ کر اپنی اپنی بوتلوں سے پانی پیا اور ساتھ رکھے ہوئے بسکٹ اور ڈرائی فروٹ سے معدہ کو تقویت دی جس سے کچھ انرجی بھی بحال ہوئی۔ کچھ دیر بعد شعیب نیچے اتر گیا اور تقریباً ایک منزل نیچے واقع جھیل کے کنارے کے پاس چلا گیا۔ میں اس وقت بہت زیادہ تھکن محسوس کر رہا تھا اور اس وقت نیچے اترنے کا حوصلہ نہیں پا رہا تھا جھیل کی خوبصورتی مجھے اپنی طرف کھینچ رہی تھی اور میں سوچ رہا تھا کہ اگر ایک بار اتر گیا تو دوبارہ اوپر کیسے آؤں گا۔

[haroonmcs26]

کچھ دیر میں وہاں بیٹھ کر اس ادھیڑ بن میں رہا کہ جاؤں یا نہ ۔ لیکن بالآخر جھیل کے سحر نے مجھے مجبور کر دیا کہ اس سے قریب سے ملاقات کروں ورنہ ساری زندگی ہی افسوس رہے گا کہ اس ساحرہ کے اتنے قریب آ کر ملاقات کیے بغیر چلا گیا۔ اپنی تھکاوٹ کو مدّنظر رکھتے ہوئے بہت احتیاط سے پکڑ پکڑ کر نیچے اتر ہی گیا ۔ یہ جگہ جہاں ہم اترے تھے وہ بنیادی طور پر جھیل کے پانی کے اخراج کا راستہ یعنی سپل وے تھاجہاں اور بھی سیاح موجود تھے۔

[haroonmcs26]

نیچے آ کر نظر اٹھائی تو جھیل اپنے بھر پور قدرتی حسن کے ساتھ سامنے تھی اور بلا شبہ وہ میرے وطن کی خوبصورت ترین جھیلوں میں سے ایک تھی۔ اس کی خوبصورتی کا انداز ایک ان چھوئی دو شیزہ جیسا تھا کیونکہ ابھی تک انسان نے اس کے قدرتی حسن کو کوئی نقصان نہیں پہنچایا تھا یہاں تک کہ اس کے کنارے کے آس پاس میں نے کوئی دوکان وغیرہ بھی نہیں دیکھی اور نہ ہی یہاں تک کوئی گاڑی آ سکتی تھی اور نہ ہی گھوڑے کے ذریعے یہاں پہنچا جا سکتا تھا اور اس کے یہ دشوار گزار راستے ہی اس کے حسن کی بقاء کے ضامن تھے۔ جھیل چاروں طرف سے پہاڑوں میں گھری ہوئی تھی اور اسی وجہ سے کسی نے اس کو کٹورہ جھیل کا نام دیا تھا۔ دور جھیل کا دوسرا کنارہ نظر آ رہا تھا جس سے اوپر ہمیں برف میں ڈھکی ہوئی چوٹیاں اور گلیشیئرز بھی نظر آرہے تھے جن کی برف پگھل پگھل کر اپنے آپ کو اس خوبصورتی ساحرہ کے سامنے قربان کر رہی تھی۔ نیلے آسمان پر بادل روئی کے گالوں کی طرح اس ساحرہ کی خوبصورتی کو چار چاند لگا رہے تھے۔ اس کی خوبصورتی میرے دل کی گہرائیوں کو چھو رہی تھی۔

[haroonmcs26]

اب مجھے نیچے اترنے کا کوئی دکھ نہیں تھا اور جھیل کی خوبصورتی نے میری تھکن بھی اڑا دی تھی۔ دنیا سے الگ تھلگ رہنی والی اس ساحرہ کا جادو سر چڑھ کر بول رہا تھا۔ اگر دیکھا جائے تو ہم اپنی بائکس کو چھوڑ کر یہاں تک تقریباً نو گھنٹوں کے دشوار گزار اور تھکن سے بھر پور پیدل سفر کے بعد پہنچے تھے لیکن اب لگ رہا تھا کہ یہ سفر اس ساحرہ کا حق بنتا تھا شاید یہ مشکل سفر ہی قدرت کے اس حسین شاہکار کی منہ دکھائی تھی۔ سامنے سے سورج پڑ رہا تھا اس وجہ سے تصاویر زیادہ صاف حاصل نہیں ہو سکیں لیکن کیمرہ کسی بھی طرح اس کے حسن کو بیان نہیں کر سکتا تھا۔

[haroonmcs26]

جھیل کا صاف و شفاف پانی اس تنگ سے اخراجی راستے سے نیچے گہرائی میں شور مچاتا ہو ا جا رہا تھا اور یہ پانی آگے جا کر ایک تیز رفتار اور منہ زور نالے کا روپ دھار لیتا ہے۔ لیکن اس اخراجی راستے سے پانی کے ساتھ ساتھ نیچے جانے کا کوئی راستہ نہیں تھا کیونکہ اس کے دونوں طرف عمودی چٹانیں نظر آ رہیں تھیں۔

[haroonmcs26]

جھیل کا پانی اتنا صاف و شفاف تھا کہ اندر موجود پتھر واضح نظر آرہے تھے وہ پانی ریشم کے باریک لبادے کی طرح تھا جس سے اس کا حسن عیاں ہو رہا تھا۔ ہم نے وہاں سے اپنی پانی کی بوتلیں بھی بھر لیں کیونکہ ان میں پانی تقریباً ختم ہو چکا تھا۔

[haroonmcs26]

میں گھٹنا گھٹنا پانی میں سے گزر کر دوسرے کنارے کے قریب ایک پتھر پر جا کر بیٹھ گیا لیکن جھیل کا پانی اتنا ٹھنڈا تھا کہ اتنی ہی دیر میں لگ پتا گیا۔ شعیب تھوڑی دیر کیلئے پانی میں جاتا اور پھر باہر نکل کر اپنی ٹانگوں کو مسل کر یخ بستہ پانی کے اثر کو کم کرنے کی کوشش کرتا تاہم اس کے چہرے پر خوشی کے تاثرات واضح نظر آرہے تھے۔ ہماری تو ٹانگوں کو ہی وہ پانی زیادہ دیر برداشت نہیں ہو رہا تھا لیکن وہاں کچھ فاصلے پر موجود دو تین ادھیڑ عمر افرادنے باقاعدہ نہانا شروع کر دیا جو کہ شکل و صورت سے کسی پہاڑی علاقے کے با شندے ہی لگ رہے تھے ۔ ہم اپنے آپ میں اتنی ہمت محسوس نہیں کر رہے تھے اور اگر ہمت کر بھی لیتے تو ڈبل کیا ٹرپل نمونیہ کے قوی امکانات تھے اس لئے پیروں سے ہی اس کی ٹھنڈ ک کو محسوس کرتے ہوئے جھیل کے ملکوتی حسن کا نظارہ کر رہے تھے۔

[haroonmcs26]

بابر ہمارا ساتھ نہیں دے رہا تھا بلکہ وہ اوپر سکون سے بیٹھا ہوا تھا کیونکہ وہ ہم سے کافی پہلے آگیا تھا اور شاید ہم سے پہلے ہی یہاں سے ہو کر گیا تھا ۔ ہمارے شوز،جیکٹ اور دوسرا سامان اس کے پاس ہی رکھا ہوا تھا۔

[haroonmcs26]

جھیل کی ایک پینو رامک تصویر۔

[haroonmcs26]

جھیل کی خوبصورتی تو انسان کو باندھ کر رکھ دیتی ہے لیکن موسم کو شاید ہمارا اس کے ساتھ زیادہ میل جول پسند نہیں آ رہا تھا اسی وجہ سے اس کے تیور خراب ہو رہے تھے اور گہرے بادل امڈے چلے آ رہے تھے۔اگر تو یہاں بارش آ جاتی تو بھیگنے سے بچنا مشکل تھا کیونکہ ہمیں وہاں کوئی سائبان نظر نہیں آرہا تھا ، دوسرا واپسی کا سفر بھی کافی لمبا تھا اور تیسرا ہمارا ٹینٹ اور سارا سامان جہاز بانڈہ میں ہی تھا جسے ہم اللہ کے آسرے دعائیں پڑھ کر چھوڑ آئے تھے۔ اس وجہ سے ہم نے فیصلہ کیا کہ واپسی کا سفر شروع کر دیا جائے تو بادل نخواستہ شوز پہنے اور جھیل کو الوداع کہہ کر واپس چل پڑے لیکن اب خوبصورت کٹورہ جھیل سے ملاقات کی یادیں ہمارے ساتھ تھیں۔ حسب روایت بابر ہم سے آگے تھا۔

[haroonmcs26]

[tourist]

Welcome back

[sajid65]

Nice come back..keep it roooling..

[maslambaloch57]

Aoa. Very well narrated haroon bhai.

[haroonmcs26]

جی واقعی ویلکم بیک۔ شکریہ

[haroonmcs26]

شکریہ۔ ان شاء اللہ میری کوشش ہو گی کہ اس سفر نامہ کو چند دن میں ختم کر دوں تاکہ کشمیر کے سفر نامے کو آگے بڑھا سکوں۔